 ចោទកម្ពុជាថាជាមជ្ឈមណ្ឌលឧក្រិដ្ឋកម្មឆ្លងដែន ដែលធ្វើឱ្យប្រទេសថៃ ខាតបង់ទឹកប្រាក់ជាង ៦០០ពាន់លានបាតក្នុង ១ឆ្នាំៗ ដូច្នេះប្រទេសថៃ កំពុងរឹតបន្តឹងការគ្រប់គ្រងព្រំដែន ដើម្បីបង្ក្រាបបណ្ដាញបោកប្រាស់ ស្របតាមការកំណត់របស់អង្គការសហប្រជាជាតិ ដែលវិធានការនេះត្រូវកំណត់ពេល ៣ខែសម្រាប់អនុវត្ត។){kind=link}
នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Paetongtarn Shinawatra) ចោទកម្ពុជាថាជាមជ្ឈមណ្ឌលឧក្រិដ្ឋកម្មឆ្លងដែន ដែលធ្វើឱ្យប្រទេសថៃ ខាតបង់ទឹកប្រាក់ជាង ៦០០ពាន់លានបាតក្នុង ១ឆ្នាំៗ ដូច្នេះប្រទេសថៃ កំពុងរឹតបន្តឹងការគ្រប់គ្រងព្រំដែន ដើម្បីបង្ក្រាបបណ្ដាញបោកប្រាស់ ស្របតាមការកំណត់របស់អង្គការសហប្រជាជាតិ ដែលវិធានការនេះត្រូវកំណត់ពេល ៣ខែសម្រាប់អនុវត្ត។
នាយករដ្ឋមន្ត្រីថៃ រូបនេះអះអាងថា ដើម្បីបង្ក្រាបឧក្រិដ្ឋកម្មនេះ ថៃត្រូវពិនិត្យយ៉ាងតឹងរ៉ឹងតាមច្រកព្រំដែនជាមួយកម្ពុជា ខណៈជើងហោះហើរទៅកាន់ខេត្តសៀមរាប ដើម្បីលេងល្បែង ក៏នឹងត្រូវប្រឈមនឹងការរឹតបន្តឹង រីឯការលេងល្បែងនៅតាមតំបន់ព្រំដែន ក៏ត្រូវហាមឃាត់ផងដែរ។ ជាងនេះទៀត ត្រូវត្រួតពិនិត្យប្រតិបត្តិការឧក្រិដ្ឋកម្មតាមអ៊ីនធឺណិតយ៉ាងហ្មត់ចត់ ដោយកំណត់គោលដៅគណនី និងបណ្ដាញហិរញ្ញវត្ថុដែលភ្ជាប់ទៅនឹងមជ្ឈមណ្ឌលក្រុមឧក្រិដ្ឋជនឆ្លងដែន ខណៈសេវាអ៊ីនធឺណិត និងការតភ្ជាប់តំណជាមួយកងកម្លាំងសន្តិសុខកម្ពុជា ក៏នឹងត្រូវបិទដែរ។ បន្ថែមពីនេះ ការិយាល័យប្រឆាំងការលាងលុយកខ្វក់ (AMLO) នឹងបង្កក ឬរឹបអូសទ្រព្យសម្បត្តិដែលភ្ជាប់ជាមួយបណ្ដាញឧក្រិដ្ឋជន រួមទាំងមូលនិធិដែលបានផ្ទេរទៅក្រៅប្រទេសថែមទៀត។
នាយករដ្ឋមន្ត្រីរូបនេះអះអាងថា ប្រទេសថៃ នឹងសម្របសម្រួលជាមួយប្រទេសដទៃ និងទីភ្នាក់ងារអន្តរជាតិផ្សេងទៀត ដើម្បីរុះរើបណ្ដាញឧក្រិដ្ឋកម្មតាមអ៊ីនធឺណិតឆ្លងដែន ដោយយកប្រទេសថៃ ធ្វើជាទីតាំងមជ្ឈមណ្ឌលប្រតិបត្តិការក្នុងតំបន់។
អ្នកស្រី ផែថងថាន ស៊ីណាវ៉ាត់ បញ្ជាក់ថា វិធានការនេះត្រូវកំណត់ពេល ៣ខែសម្រាប់អនុវត្ត ដោយរំពឹងថានឹងមានការថយចុះនូវអំពើឧក្រិដ្ឋកម្ម ទាំងជនរងគ្រោះ ការខាតបង់ផ្នែកហិរញ្ញវត្ថុ និងការរឹបអូសទ្រព្យសម្បត្តិ ជាដើម។
កាសែត The Bangkok Post ចេញផ្សាយអត្ថបទនៅថ្ងៃទី២៣ មិថុនា នេះថា កាលពីដើមខែមីនា ឆ្នាំ២០២៥ អង្គការសហប្រជាជាតិបានចេញលិខិតមួយយ៉ាងម៉ឺងម៉ាត់ទៅកាន់រដ្ឋាភិបាលថៃ ឱ្យបំភ្លឺលើចំណុចសំខាន់ជាច្រើន ទាក់ទងនឹងការប្រយុទ្ធប្រឆាំងនឹងការជួញដូរមនុស្សឆ្លងដែន ដោយផ្ដោតលើស្ត្រី និងកុមារក្នុងប្រតិបត្តិការបោកប្រាស់តាមអ៊ីនធឺណិត។
ប្រភពដដែលលើកឡើងថា អង្គការសហប្រជាជាតិបានចង្អុលបង្ហាញពីតួនាទីដ៏សំខាន់របស់ប្រទេសថៃ ដែលជាមជ្ឈមណ្ឌលចែកចាយជនរងគ្រោះទៅកាន់មជ្ឈមណ្ឌលបោកប្រាស់នៅក្នុងប្រទេសជិតខាង ជាពិសេសនៅតំបន់ព្រំដែនជាមួយរដ្ឋការ៉ែន (Karen) នៃប្រទេសភូមា។
កាសែត The Bangkok Post ដដែលបញ្ជាក់ថា កង្វល់របស់អ្នករាយការណ៍ពិសេសរបស់អង្គការសហប្រជាជាតិ គឺការខកខានក្នុងការកំណត់អត្តសញ្ញាណជនរងគ្រោះពីសំណាក់អាជ្ញាធរថៃ ក្នុងនោះ អ្នកខ្លះប្រឈមមុខនឹងការកាត់ទោស ឬការដាក់ទណ្ឌកម្មជាបន្តបន្ទាប់សម្រាប់បទល្មើសដែលពួកគេបានប្រព្រឹត្តក្រោមការបង្ខិតបង្ខំ ដូចជា អន្តោប្រវេសន៍ខុសច្បាប់ ឬឧក្រិដ្ឋកម្មដែលប្រព្រឹត្តនៅពេលធ្វើជាទាសករនៅក្នុងមជ្ឈមណ្ឌលបោកប្រាស់ ជាដើម។
ជុំវិញបញ្ហានេះ ក្នុងពិធីបិទមហាសន្និបាតវិសាមញ្ញកាយរឹទ្ធិជាតិកម្ពុជា កាលពីថ្ងៃទី១៧ មិថុនា នាយករដ្ឋមន្ត្រីខ្មែរ លោក ហ៊ុន ម៉ាណែត លើកឡើងថា ថៃតែងចោទថាកម្ពុជាអាក្រក់ ហើយអួតខ្លួនឯងថាល្អឥតខ្ចោះ ប៉ុន្តែថៃ ខំបិទបាំងអំពើអាក្រក់របស់ខ្លួន ដោយព្យាយាមទម្លាក់អំពើអាក្រក់ទាំងនោះមកលើកម្ពុជា។
លោក ហ៊ុន ម៉ាណែត បញ្ជាក់ថា តាមការពិត រឿងអាក្រក់ដែលថៃ ទម្លាក់មកលើកម្ពុជាកន្លងមកនោះ គឺមានដូចតែគ្នា ប៉ុន្តែថៃ ចេះតែលាបពណ៌កម្ពុជា ហើយអួតខ្លួនឯងថាល្អឥតខ្ចោះប៉ុណ្ណោះ៕
© 2025, ឌឹ ខេមបូឌា ដេលី. All rights reserved.