អ្នកឃ្លាំមើលស្ថានការណ៍កម្ពុជា លើកឡើងថា បើការផ្គត់ផ្គង់របស់ថៃ នៅកម្ពុជាត្រូវបានកាត់ផ្ដាច់ នោះថៃ នឹងខាតបង់ដោយផ្ទាល់យ៉ាងធ្ងន់ធ្ងរ ថែមទាំងត្រូវរងផលប៉ះពាល់រយៈពេលវែងថែមទៀត ខណៈកម្ពុជាក៏នឹងរងនូវផលប៉ះពាល់ដែរ តែត្រឹមរយៈពេលខ្លីប៉ុណ្ណោះ។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ លោក សេង វណ្ណលី សរសេរលើគណនីហ្វេសប៊ុករបស់ខ្លួននៅថ្ងៃទី២៣ មិថុនា នេះថា កម្ពុជាស្ថិតក្នុងចំណោមប្រទេសដែលនាំទំនិញចូល ឬតម្រូវការ (Demand) ព្រោះកម្ពុជាមានលុយសម្រាប់ទិញទំនិញ ចំណែកថៃ ជាប្រទេសស្ថិតក្នុងចំណោមប្រទេសលក់ផលិតផល ឬការផ្គត់ផ្គង់ (Supply) ដូច្នេះបើថៃ មិនផ្គត់ផ្គង់ទំនិញឱ្យកម្ពុជា កម្ពុជានៅតែអាចនាំចូលផលិតផលពីប្រទេសផ្សេងបានដដែល ព្រោះកម្ពុជាមានលុយទិញទំនិញដែលខ្លួនត្រូវការ។
លោក សេង វណ្ណលី លើកឡើងថា ក្នុងន័យនេះ ប្រទេសថៃ នឹងខាតបង់ជាងប្រទេសកម្ពុជា ព្រោះថៃ មិនត្រឹមតែបាត់បង់ចំណូលសម្រាប់ក្រុមហ៊ុនផលិត និងបាត់បង់ការងារក្នុងវិស័យផលិតនោះទេ ខណៈក្រុមហ៊ុនផលិតក៏ត្រូវបិទទ្វារដែរ ជាពិសេសការបាត់បង់ទីផ្សារកម្ពុជាតែម្តង ព្រោះនេះគឺជាការផ្តល់ឱកាសឱ្យប្រទេសដែលជាគូប្រជែងរបស់ខ្លួន ដូចជា វៀតណាម ឬ ចិន ជាដើម ដណ្តើមយកទីផ្សារកម្ពុជាបានទាំងស្រុង។
អ្នកឃ្លាំមើលសង្គមរូបនេះអះអាងថា ប្រជាពលរដ្ឋខ្មែរដែលធ្លាប់តែប្រើប្រាស់ទំនិញថៃ អាចនឹងជួបការលំបាកក្នុងរយៈពេលខ្លី ដោយសារផលិតផលក្នុងស្រុកអាចនឹងឡើងថ្លៃ ព្រោះកង្វះផលិតផលចម្រុះ ប៉ុន្តែកម្ពុជានៅតែអាចរកអ្នកផ្គត់ផ្គង់ថ្មីបាន ព្រោះកម្ពុជាមានលុយសម្រាប់ទិញទំនិញដែលខ្លួនត្រូវការ។
លោក សេង វណ្ណលី បញ្ជាក់ថា កម្ពុជាអាចរងផលប៉ះពាល់រយៈពេលខ្លី និងអាចគ្រប់គ្រងបានរយៈពេលវែង ប្រសិនបើកម្ពុជាអាចគ្រប់គ្រងតម្លៃផលិតផលក្នុងស្រុក ជំរុញ និងលើកកម្ពស់ផលិតកម្ម និងការប្រើប្រាស់ផលិតផលក្នុងស្រុក និងពន្លឿនការស្វែងរកប្រភពផ្គត់ផ្គង់ជំនួសទំនិញថៃ ឱ្យបានទាន់ពេលវេលា។
កាលពីថ្ងៃទី២២ មិថុនា នាយករដ្ឋមន្ត្រីកម្ពុជា លោក ហ៊ុន ម៉ាណែត បានចេញបញ្ជាឱ្យផ្អាកការនាំចូលប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃ ទាំងស្រុង ត្រឹមម៉ោង ១២យប់ថ្ងៃអាទិត្យ ទី២២ មិថុនា។
លោក ហ៊ុន ម៉ាណែត បញ្ជាក់ថា ក្រុមហ៊ុនចែកចាយប្រេងឥន្ធនៈនៅកម្ពុជាមានលទ្ធភាពនាំចូលប្រេងឥន្ធនៈ និងឧស្ម័នឥន្ធនៈពីប្រភពផ្សេងគ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុក កុំថាឡើយត្រឹមរយៈពេលមួយខែ ទោះជារៀងរហូតក៏គ្មានបញ្ហាដែរ។
ការចេញបញ្ជាបែបនេះ ធ្វើឡើងបន្ទាប់ពីមេបក្សកាន់អំណាច លោក ហ៊ុន សែន ជំរុញឱ្យរដ្ឋាភិបាលកម្ពុជាបង្វែរការទិញទំនិញពីប្រទេសថៃ ក្រោយអ្នកនយោបាយគំរាមឈប់លក់ទំនិញឱ្យកម្ពុជា ជុំវិញទំនាស់ព្រំដែនរវាងប្រទេសទាំងពីរនាពេលនេះ។
មេដឹកនាំបក្សកាន់អំណាច លោក ហ៊ុន សែន កាលពីថ្ងៃទី២០ មិថុនា បានណែនាំឱ្យរដ្ឋាភិបាលដែលកំពុងដឹកនាំដោយលោក ហ៊ុន ម៉ាណែត ដែលជាកូនប្រុសរបស់លោក ពិចារណាបង្វែរការទិញទំនិញពីប្រទេសថៃ ដើម្បីកុំឲ្យថៃ មានហេតុផលគំរាមរដ្ឋាភិបាលកម្ពុជាតទៅថ្ងៃមុខទៀត ដោយរាប់បញ្ចូលទាំងការនាំចូលប្រេងឥន្ធនៈពីប្រទេសថៃ ផងដែរ៕
© 2025, ឌឹ ខេមបូឌា ដេលី. All rights reserved.