ក្រោយក្រុមយោធាថៃ ប្រកាសបិទច្រកព្រំដែនជាឯកតោភាគី នៅថ្ងៃទី២៤ មិថុនា នេះ កម្ពុជាក៏សម្រេចបិទព្រំដែនទាំងអស់ជាមួយថៃ នៅថ្ងៃដដែលនេះដែរ ខណៈពលរដ្ឋនៃប្រទេសទាំងពីរសម្រុកត្រឡប់ទៅប្រទេសកំណើតវិញរាប់ពាន់នាក់តាមច្រកទ្វារព្រំដែនអន្តរជាតិ។
អគ្គនាយកនៃអគ្គនាយកដ្ឋានអន្តោប្រវេសន៍កម្ពុជា លោក សុខ វាសនា ចេញមកបញ្ជាក់នៅថ្ងៃទី២៤ មិថុនា នេះថា បន្ទាប់ពីយោធាថៃ ប្រកាសបិទច្រកព្រំដែនដោយឯកតោភាគី កម្ពុជាក៏ត្រូវតែបិទច្រកព្រំដែនទាំងអស់ជាមួយថៃ ដែរ។
លោក សុខ វាសនា បញ្ជាក់ថា ការបិទព្រំដែនកម្ពុជា-ថៃ ក្នុងពេលនេះ គឺមិនអនុញ្ញាតឲ្យមានការឆ្លងកាត់អ្វីទាំងអស់ ទាំងមនុស្ស និងទំនិញគ្រប់ប្រភេទ លើកលែងតែប្រជាពលរដ្ឋខ្មែរដែលនៅក្នុងប្រទេសថៃ ត្រឡប់ចូលមកប្រទេសកម្ពុជា វិញប៉ុណ្ណោះ។
ក្រុមយោធាថៃ នៅថ្ងៃទី២៤ ខែមិថុនា ឆ្នាំ២០២៥ នេះ បានសម្រេចបិទច្រកទ្វារព្រំដែនទាំងអស់ជាមួយប្រទេសកម្ពុជាជាឯកតោភាគី ដែលបានធ្វើឲ្យប៉ះពាល់ដល់ប្រជាពលរដ្ឋដែលត្រូវធ្វើដំណើរឆ្លងកាត់ និងភ្ញៀវទេសចរ ពិសេសជនជាតិថៃ ដែលប្រកបរបរ និងបំពេញការងារនៅក្នុងប្រទេសកម្ពុជា។
បន្ទាប់ពីក្រុមយោធាថៃ ប្រកាសបិទព្រំដែនជាមួយកម្ពុជា ច្រកទ្វារព្រំដែនទាំងអស់ត្រូវបានបិទទាំងស្រុង ដោយមិនអនុញ្ញាតឲ្យមានការដឹកជញ្ជូនទំនិញ ឬអ្នកដំណើរចេញចូលទៀតទេ ក្រៅពីសិស្សសាលា និងអ្នកជំងឺ ប៉ុន្តែរថយន្តនៃប្រទេសទាំងពីរ ត្រូវអនុញ្ញាតឱ្យបើកត្រឡប់ទៅប្រទេសរៀងៗខ្លួនវិញដោយហាមដឹកទំនិញអ្វីទាំងអស់។
ជុំវិញការបិទព្រំដែននេះ ភ្ញៀវទេសចរ ពលករ អ្នកធ្វើការ និងអ្នកជំងឺ ដែលត្រូវវិលត្រឡប់ពីកម្ពុជាទៅថៃ និងវិលត្រឡប់ពីថៃ ទៅកម្ពុជា មានចំនួនរាប់ពាន់នាក់ ដែលបង្កឱ្យមានការកកស្ទះ ដោយការរង់ចាំនៅតាមច្រកទ្វារអន្តរជាតិតាមបណ្តាខេត្តទាំង៧ ដែលជាប់ជាមួយប្រទេសថៃ។
ដោយឡែកពលរដ្ឋខ្មែរ និងអាជីវករ ដែលលក់ដូរនៅផ្សារឡុងក្លឿ រាប់រយនាក់ បានរង់ចាំចាកចេញពីប្រទេសថៃ ត្រឡប់ទៅកម្ពុជាវិញ នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ខណៈជនជាតិថៃ ដែលនៅក្នុងទឹកដីខ្មែរ ក៏កំពុងរង់ចាំត្រឡប់ចូលទៅប្រទេសថៃ វិញដែរ បន្ទាប់ពីអាជ្ញាធរកម្ពុជា-ថៃ បានឯកភាពគ្នាទុកពេលត្រឹម ៣ម៉ោង ចាប់ពីម៉ោង ៥ល្ងាចដល់ម៉ោង ៨យប់ នៅថ្ងៃទី២៤ ខែមិថុនា នេះ មុននឹងសម្រេចបិទទាំងស្រុង។
ចំណែកច្រកទ្វារផ្សេងទៀតដែលស្ថិតនៅក្នុងភូមិសាស្ត្រខេត្តបន្ទាយមានជ័យ និងខេត្តស្រះកែវ គឺភាគីកម្ពុជា-ថៃ ឯកភាពគ្នាទុកពេលត្រឹមម៉ោង ១ ប៉ុណ្ណោះ គឺចាប់ពីម៉ោង ៥ ដល់ម៉ោង ៦ល្ងាចថ្ងៃអង្គារនេះ។
ជុំវិញបញ្ហានេះ កាលពីថ្ងៃទី២៣ មិថុនា ពលរដ្ឋខ្មែរដែលបានសម្រាកព្យាបាលជំងឺតាមមន្ទីរពេទ្យនានានៅប្រទេសថៃ ក្នុងខេត្តស៊ីសាកេត និងខេត្តអ៊ូប៊ុន ក៏បាននាំគ្នាវិលត្រឡប់ចូលទៅប្រទេសកម្ពុជាវិញដែរ តាមច្រកទ្វារព្រំដែនអន្តជាតិជាំ ក្នុងស្រុកអន្លង់វែង ខេត្តឧត្ដរមានជ័យ។
ជុំវិញការបិទព្រំដែនកម្ពុជា-ថៃ នាពេលនេះ សារព័ត៌មានថៃ Thai PBS World បានស្រង់សម្ដីអ្នកជំនាញសន្តិសុខ និងកិច្ចការអន្តរជាតិ លោក ប៉ានីតាន់ វឌ្ឍនាយ៉ាកន (Panitan Wattanayagorn) ថាការបិទព្រំដែនដំណាក់កាលដំបូងៗ វានឹងប៉ះពាល់ដល់ពលករខ្មែរ និងសហគ្រិនខ្មែរមែន ប៉ុន្តែអ្នកខាត គឺអាជីវករថៃ ហើយបើការបិទនេះអូសបន្លាយកាន់តែយូរ នោះវានឹងប៉ះពាល់ដល់អាជីវកម្មរបស់ថៃ ទៅវិញ។
លោក ប៉ានីតាន់ វឌ្ឍនាយ៉ាកន បញ្ជាក់ថា វិធីល្អ ថៃគួររកយន្តការផ្លូវទូត និងការចរចា ដើម្បីដោះស្រាយបញ្ហានេះជាមួយភាគីកម្ពុជា ព្រោះពេលនេះ ភាគីកម្ពុជាកំពុងសាមគ្គីគ្នា ស្របពេលដែលថៃ កំពុងបែកខ្ញែកគ្នា៕
© 2025, ឌឹ ខេមបូឌា ដេលី. All rights reserved.