អ្នកឃ្លាំមើលសង្គម ប្រាប់ជនរងគ្រោះឱ្យឈប់រង់ចាំយុត្តិធម៌ពីរបបដឹកនាំត្រកូលហ៊ុនបន្តទៀត ព្រោះរបបមួយនេះមិនអាចផ្តល់យុត្តិធម៌សម្រាប់ជនរងគ្រោះ និងពលរដ្ឋខ្មែរទូទាំងប្រទេសបានឡើយ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី០៨ កក្កដា នេះថា រដ្ឋាភិបាលដែលកំពុងគ្រប់គ្រងដោយគ្រួសារត្រកូលហ៊ុន នឹងមិនអាចផ្តល់យុត្តិធម៌ដល់ជនរងគ្រោះបានទេ ជាពិសេសជនរងគ្រោះដែលត្រូវបានសម្លាប់ដោយអំពើឃាតកម្មក្រៅប្រព័ន្ធច្បាប់ ព្រោះរដ្ឋាភិបាលមួយនេះក៏ជាប់ពាក់ព័ន្ធ ឬអាចនៅពីក្រោយនៃអំពើឧក្រិដ្ឋនេះដែរ។
លោក ម៉ែន ណាត លើកឡើងថា បើជនរងគ្រោះចង់បានយុត្តិធម៌ លុះត្រាតែរដ្ឋាភិបាលដែលគ្រប់គ្រងដោយគ្រួសារនិយមមួយនេះត្រូវបានជំនួសដោយរដ្ឋាភិបាលកើតចេញពីឆន្ទៈរបស់ពលរដ្ឋខ្មែរតាមរយៈនៃការបោះឆ្នោតដោយពិតប្រាកដ ខណៈរដ្ឋាភិបាលសព្វថ្ងៃនេះត្រូវបានបង្កើតឡើងដោយក្រុមគ្រួសារអ្នកមានអំណាចមួយក្តាប់តូចប៉ុណ្ណោះ។
កាលពីថ្ងៃទី៧ ខែកក្កដា ឆ្នាំ២០២៥ មជ្ឈមណ្ឌលសិទ្ធិមនុស្សកម្ពុជា និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស រួមជាមួយអង្គការសមាគមជាច្រើនទៀត បាននាំគ្នាប្រារព្ធខួប ៩ឆ្នាំនៃការបាញ់សម្លាប់បណ្ឌិត កែម ឡី ដើម្បីឧទ្ទិសកុសលជូនវិញ្ញាណក្ខន្ធរបស់លោក និងវីរជនមួយចំនួនទៀតដែលបាត់បង់ជីវិតដោយសារបុព្វហេតុនៃកិច្ចការការពារបរិស្ថាន សិទ្ធិការងារ និងយុត្តិធម៌សង្គមកន្លងមក។
ក្នុងពិធីបុណ្យខួប ៩ឆ្នាំនេះ មានការចាក់បញ្ចាំងវីដេអូខ្លីៗនិយាយអំពីការចងចាំ និងការចូលរួមរបស់បណ្ឌិត កែម ឡី ក្នុងការលើកកម្ពស់យុត្តិធម៌សង្គម រួមទាំងការធ្វើយុទ្ធនាការផ្សព្វផ្សាយនូវសម្រង់ទស្សនៈ និងគំនិតមួយចំនួនរបស់លោកដែលពាក់ព័ន្ធនឹងសិទ្ធិពលរដ្ឋលើបណ្ដាញទំនាក់ទំនងសង្គមផងដែរ។
ជុំវិញបញ្ហានេះ ចលនាមាតាធម្មជាតិ បានលើកឡើងថា ៩ឆ្នាំកន្លងមកនេះ ពន្លឺយុត្តិធម៌ហាក់បីដូចជាងងឹតសូន្យសុងសម្រាប់បណ្ឌិត កែម ឡី និងក្រុមគ្រួសាររបស់លោក។
ប្រភពដដែលអះអាងថា ទោះបីជាអាជ្ញាធរមានសមត្ថកិច្ចមិនស្វះស្វែងរកយុត្តិធម៌ជូនបណ្ឌិត កែម ឡី និងក្រុមគ្រួសាររបស់គាត់ក៏ដោយ ក្នុងនាមជាយុវជន សកម្មជន និងពលរដ្ឋខ្មែរគ្រប់រូបដែលរស់នៅក្នុង និងក្រៅប្រទេស នៅតែបន្តស្រែកទាមទាររកសំឡេងយុត្តិធម៌ពីរបបដឹកនាំមួយនេះ ដែលតែងតែអួតក្ដែងៗអំពីសន្តិភាពគ្រប់ទិសទីរហូតមកនោះ។
បណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ចំនួន ៣គ្រាប់ក្នុងហាងស្តារម៉ាតនៃស្ថានីយប្រេងឥន្ធនៈកាល់តិច (Caltex) ត្រង់ចំណុចស្តុបបូកគោខណ្ឌចំការមន រាជធានីភ្នំពេញ បណ្តាលឱ្យបាត់បង់ជីវិតនៅនឹងកន្លែងកាលពីថ្ងៃទី១០ ខែកក្កដា ឆ្នាំ២០១៦៕
© 2025, ឌឹ ខេមបូឌា ដេលី. All rights reserved.