មន្ត្រីជាន់ខ្ពស់បក្សប្រឆាំង បង្ហាញឯកភាពលើការធ្វើវិសោធនកម្មមាត្រា៣៣ នៃរដ្ឋធម្មនុញ្ញក្នុងការបើកផ្លូវឱ្យមានច្បាប់ដកសញ្ជាតិខ្មែរពីជនជាតិដទៃដែលក្បត់ជាតិខ្មែរ ដើម្បីធានាដល់ការការពារតម្លៃជនជាតិខ្មែរ និងសញ្ជាតិខ្មែរ ប៉ុន្តែលោកមិនឯកភាពនឹងការធ្វើច្បាប់ដកសញ្ជាតិខ្មែរពីជនជាតិខ្មែរឡើយ។
មន្ត្រីជាន់ខ្ពស់គណបក្សសង្គ្រោះជាតិ លោក ហ៊ីង សុខសាន្ត លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃចន្ទ ដើមសប្តាហ៍នេះថា ក្នុងមាត្រា៣៣ នៃរដ្ឋធម្មនុញ្ញ បានចែងត្រឹមតែការផ្តល់សញ្ជាតិខ្មែរដល់ជនជាតិដទៃប៉ុណ្ណោះ ប៉ុន្តែមាត្រានេះមិនបានចែងពីការដកសញ្ជាតិខ្មែរពីជនជាតិទាំងនោះឡើយ នៅពេលដែលពួកគេប្រព្រឹត្តខុសច្បាប់។
លោក ហ៊ីង សុខសាន្ត លើកឡើងថា នៅពេលដែលជនជាតិដទៃទទួលបានសញ្ជាតិខ្មែរ ហើយទៅប្រព្រឹត្តបទឧក្រិដ្ឋ ឬប្រព្រឹត្តអំពើក្បត់ជាតិខ្មែរនោះ គឺនាំឱ្យប៉ះពាល់ដល់សេចក្តីថ្លៃថ្នូរជនជាតិខ្មែរ និងសញ្ជាតិខ្មែរដែលពួកគេទទួលបានយ៉ាងធ្ងន់ធ្ងរ ទោះពួកគេទទួលបានសញ្ជាតិខ្មែរតាមច្បាប់សញ្ជាតូបនីយកម្ម ឬក្រោមលក្ខខណ្ឌផ្សេងៗទៀតក៏ដោយ។
លោកបន្ថែម ផ្ទុយទៅវិញ សម្រាប់ជនជាតិខ្មែរដែលបានប្រព្រឹត្តអំពើក្បត់ជាតិឯង ពិតមែនតែមានទោសធ្ងន់ ប៉ុន្តែមិនគួរត្រូវបានដកសញ្ជាតិពីពួកគេនោះទេ គួរតែជំនួសមកវិញនូវការដាក់ទោសទណ្ឌក្នុងកម្រិតផ្សេង ព្រោះការធ្វើបែបនេះក៏ជាការបង្ហាញពីការលើកតម្លៃចំពោះជាតិសាសន៍ខ្លួនឯងដែរ។
មន្ត្រីបក្សប្រឆាំងរូបនេះ ក៏បានច្រានចោលនូវការលើកឡើងពីរដ្ឋមន្ត្រីក្រសួងយុត្តិធម៌ លោក កើត រិទ្ធ ដែលសំអាងថាសហរដ្ឋអាមេរិកមានច្បាប់ដកសញ្ជាតិអាមេរិកពីជនជាតិអាមេរិកកាំងផងដែរ។ លោកបញ្ជាក់ថា សហរដ្ឋអាមេរិកមិនមានច្បាប់ដកសញ្ជាតិពីជនជាតិអាមេរិកកាំងឡើយ ប៉ុន្តែសហរដ្ឋអាមេរិកមានច្បាប់ដកសញ្ជាតិអាមេរិកាំងពីជនជាតិដទៃដែលទទួលបានសញ្ជាតិអាមេរិកាំងតាមវិធីក្លែងបន្លំឯកសារសុំចូលសញ្ជាតិ ឬបានសញ្ជាតិហើយ ទៅបម្រើរបបផ្ដាច់ការប្រមូលផ្ដុំផ្ដាច់មុខ (totalitarianism)។
សេចក្តីស្នើច្បាប់ស្ដីពីវិសោធនកម្មមាត្រា៣៣ នៃរដ្ឋធម្មនុញ្ញ ដើម្បីដកសញ្ជាតិខ្មែរ ត្រូវបានអនុម័តយល់ព្រមក្នុងសម័យប្រជុំព្រឹទ្ធសភា កាលពីថ្ងៃទី១៤ ខែកក្កដា ក្រោមសំឡេងគាំទ្រ ៥៨ ក្នុងចំណោមសមាជិកព្រឹទ្ធសភាដែលមានវត្តមានសរុប ៦០រូប។
ក្រោយកិច្ចប្រជុំ អគ្គលេខាធិការដ្ឋានព្រឹទ្ធសភា បានចេញសេចក្តីប្រកាសព័ត៌មានថា ច្បាប់ដកសញ្ជាតិនេះធ្វើឡើងដើម្បីបន្សុទ្ធនូវទឹកចិត្តស្នេហាជាតិរបស់ប្រជាពលរដ្ឋខ្មែរចំពោះជាតិមាតុភូមិ។ ពោល គឺដើម្បីលើកកម្ពស់ឧត្ដមគតិជាតិ មនសិការស្នេហាជាតិ និងសេចក្ដីស្មោះត្រង់ឥតងាករេចំពោះជាតិ មាតុភូមិ និងប្រជាជនកម្ពុជា។ ចំណុចនេះ គេសួរថា ចុះបើប្រជាជនកម្ពុជាមិនមែនខ្មែរពីកំណើត ប្រព្រឹត្តអំពើក្បត់ជាតិខ្មែរ ច្បាប់ខ្មែរដកសញ្ជាតិដូចខ្មែរដែរឬទេ?៕
© 2025, ឌឹ ខេមបូឌា ដេលី. All rights reserved.