គណៈកម្មាធិការសិទ្ធិមនុស្សកម្ពុជា ថ្កោលទោសដាច់អហង្ការចំពោះការប្រើប្រាស់ផ្សែងពុលដោយយោធារបស់ប្រទេសថៃ លើទឹកដីកម្ពុជា ព្រោះជាការរំលោភច្បាប់អន្តរជាតិ និងជាការប្រមាថលើគោលការណ៍មនុស្សជាតិ និងសន្តិភាពដែលគាំទ្រដោយអង្គការសហប្រជាជាតិ និងយន្តការសិទ្ធិមនុស្សក្នុងតំបន់។
គណៈកម្មាធិការសិទ្ធិមនុស្សកម្ពុជា (គ.ស.ម.ក.) ចេញសេចក្តីថ្លែងការណ៍នៅថ្ងៃទី២៨ កក្កដា នេះថា ការប្រើប្រាស់ផ្សែងពុលដោយចេតនារបស់យោធាប្រទេសថៃ ក្នុងការឈ្លានពានទឹកដីប្រទេសកម្ពុជា គឺជាសកម្មភាពល្មើសច្បាប់ និងបង្កផលប៉ះពាល់យ៉ាងធ្ងន់ធ្ងរដល់ប្រជាជនស៊ីវិលកម្ពុជា សុខភាពសាធារណៈ បរិស្ថានធម្មជាតិ និងតំបន់បេតិកភណ្ឌវប្បធម៌ដ៏ពិសិដ្ឋ រួមទាំងប្រាសាទព្រះវិហារ ដែលជាសម្បត្តិបេតិកភណ្ឌពិភពលោករបស់អង្គការយូណេស្កូផងដែរ។
ប្រភពដដែល អះអាងថា សកម្មភាពរបស់យោធាថៃ បែបនេះ បានបំពានលើលិខិតុបករណ៍អន្តរជាតិជាច្រើន រួមមាន អនុសញ្ញាអាវុធគីមីក្នុងមាត្រា១ អនុសញ្ញាអាវុធជីវសាស្ត្រ អនុសញ្ញាទីក្រុងហ្សឺណែវ ពិធីសារទីក្រុងហ្សឺណែវ ឆ្នាំ១៩២៥ លក្ខន្តិកៈទីក្រុងរ៉ូម នៃតុលាការឧក្រិដ្ឋកម្មអន្តរជាតិ ក្នុងមាត្រា៨ និងសិទ្ធិជាមូលដ្ឋានរបស់ជនស៊ីវិលកម្ពុជា ផងដែរ។
ជាងនេះទៀត ក៏បានរំលោភលើសិទ្ធិរស់រានមានជីវិត ដែលចែងក្នុងមាត្រា៣ នៃសេចក្តីប្រកាសជាសកលស្ដីពីសិទ្ធិមនុស្ស និងមាត្រា៦ នៃកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ និងសិទ្ធិទទួលបានសុខភាព ដូចមានចែងក្នុងមាត្រា១២ នៃកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ផងដែរ។
លើសពីនេះ ក៏ធ្វើឱ្យប៉ះពាល់ដល់សិទ្ធិទទួលបានបរិស្ថានដែលមានសុវត្ថិភាព ស្អាត និងមានសុខភាពល្អ ដែលទទួលស្គាល់ដោយក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងដំណោះស្រាយលេខ ៤៨/១៣ និងមាត្រា២៨ នៃសេចក្តីប្រកាសសិទ្ធិមនុស្សអាស៊ានយ៉ាងធ្ងន់ធ្ងរថែមទៀត។
គណៈកម្មាធិការសិទ្ធិមនុស្សកម្ពុជា ទាមទារឱ្យបញ្ឈប់ជាបន្ទាន់នូវការប្រើប្រាស់សារធាតុគីមី ឬសារធាតុពុលដែលប្រទេសថៃ ប្រើប្រាស់ប្រឆាំងនឹងប្រទេសកម្ពុជា ដើម្បីធានាការការពារជនស៊ីវិល បេតិកភណ្ឌវប្បធម៌ និងបរិស្ថាន ស្របតាមច្បាប់មនុស្សធម៌ និងសិទ្ធិមនុស្សអន្តរជាតិ។
គណៈកម្មាធិការសិទ្ធិមនុស្សកម្ពុជា អំពាវនាវឱ្យសហគមន៍អន្តរជាតិ ឈរជាមួយប្រទេសកម្ពុជា ក្នុងការប្រឈមមុខនឹងការរំលោភយ៉ាងធ្ងន់ធ្ងរដោយប្រទេសថៃ និងដើម្បីលើកកម្ពស់យុត្តិធម៌ សន្តិភាព និងនីតិរដ្ឋ។
នៅថ្ងៃទី២៨ ខែកក្កដា ឆ្នាំ២០២៥ នេះ ក្រសួងការពារជាតិកម្ពុជា បានថ្លែងក្នុងសន្និសីទសារព័ត៌មានថា នៅពេលវេលាម៉ោង ០៥ និង ០៦នាទីល្ងាច ថ្ងៃទី២៧ ខែកក្កដា ឆ្នាំ២០២៥ ភាគីថៃ បានប្រើយន្តហោះចម្បាំង ដ្រូនអត្តឃាត គ្រាប់បែកចង្កោម និងផ្សែងពុលផងដែរនៅតំបន់ភ្នំខ្មោច។
ជុំវិញបញ្ហានេះ បណ្ឌិត ឥន សុផល អ្នកជំនាញផ្នែកវិទ្យាសាស្ត្រនយោបាយ សរសេរលើគណនីហ្វេសប៊ុករបស់ខ្លួននៅថ្ងៃទី២៨ កក្កដា នេះថា ប្រទេសថៃ ជាប្រទេសហត្ថលេខីនៃសន្ធិសញ្ញាអន្តរជាតិធំៗដែលហាមប្រាមការប្រើប្រាស់សព្វាវុធ ដូចជា អនុសញ្ញាអាវុធគីមី (Chemical Weapons Convention ) អនុសញ្ញាអាវុធជីវសាស្ត្រ (Biological Weapons Convention) និងពិធីសារទីក្រុងហ្សឺណែវ (Geneva Protocol (1925) ផងដែរ។
បណ្ឌិត ឥន សុផល បញ្ជាក់ថា សន្ធិសញ្ញាទាំងនេះហាមឃាត់ការប្រើប្រាស់ ការអភិវឌ្ឍ ការផលិត និងការស្តុកទុកអាវុធគីមី និងជីវសាស្ត្រដាច់ខាត៕
© 2025, ឌឹ ខេមបូឌា ដេលី. All rights reserved.