មេបញ្ជាការយោធភូមិភាគទី២ របស់ថៃ ព្រមានបន្តប្រើយន្តហោះ F-16s ក្រោយពីប្រធានព្រឹទ្ធសភាកម្ពុជា លោក ហ៊ុន សែន ស្នើប្រទេសដែលផលិតយន្តហោះនេះ កុំអនុញ្ញាតឲ្យថៃ ប្រើប្រាស់ដើម្បីវាយប្រហារចូលទឹកដីកម្ពុជា ទឹកដីឡាវ ម៉ាឡេស៊ី ឬភូមា ដែលជាប្រទេសជាប់ព្រំដែនជាមួយថៃ។
សារព័ត៌មាន ខៅស៊ុត (Khaosod) ស្រង់សម្ដីមេបញ្ជាការយោធភូមិភាគទី២ របស់ថៃ ឧត្ដមសេនីយ៍ឯក ប៊ុនស៊ីន ផាតក្លាង (Boonsin Phadklang) ក្រោយពីទទួលបានដ្រូនឈ្លបយកការណ៍សម្រាប់ទាហានតាមព្រំដែននៅថ្ងៃទី៧ សីហា នេះថា ថៃនឹងមិនខ្វល់ពីការអំពាវនាវរបស់លោក ហ៊ុន សែន មិនឱ្យប្រើយន្តហោះចម្បាំង F-16s នោះទេ ព្រោះថៃ ត្រូវប្រើវាដើម្បីការពារអធិបតេយ្យជាតិរបស់ខ្លួន។
ប្រភពដដែលបញ្ជាក់ថា ដើម្បីការពារជាតិឱ្យរឹងមាំ យោធាថៃ ក៏នឹងត្រូវប្រគល់ដ្រូនដែលទទួលបានទៅឱ្យទាហានជួរមុខឱ្យបានឆាប់ផងដែរ ដើម្បីពួកគេអាចប្រើប្រាស់សម្រាប់ការពារខ្លួន ឈ្លបយកការណ៍ និងការពារព្រំដែន ហើយថៃ ក៏មិនមានផែនការធ្វើឃាតមេដឹកនាំខ្មែរ លោក ហ៊ុន សែន និងលោក ហ៊ុន ម៉ាណែត នោះដែរ។
ប្រធានព្រឹទ្ធសភាកម្ពុជា លោក ហ៊ុន សែន បានសរសេរលើទំព័រហ្វេសប៊ុករបស់លោកកាលពីថ្ងៃទី៦ ខែសីហា អំពាវនាវទៅកាន់ប្រទេសដែលលក់យន្តហោះចម្បាំងឲ្យថៃ គួរតែរឹតបន្តឹងលើកិច្ចសន្យាប្រើប្រាស់យន្តហោះទាំងនោះ ព្រោះកន្លងទៅ ថៃបានប្រើយន្តហោះដែលបានទិញពីអាមេរិក និងប្រទេសស៊ុយអែត វាយចូលជ្រៅក្នុងទឹកដីកម្ពុជា។
មេដឹកនាំបក្សកាន់អំណាចរូបនេះ លើកឡើងថា កម្ពុជាមិនជំទាស់នឹងការលក់យន្តហោះចម្បាំងឲ្យប្រទេសថៃ នោះទេ ប៉ុន្តែសូមកុំឲ្យថៃ ប្រើប្រាស់យន្តហោះទាំងនោះវាយប្រហារចូលក្នុងទឹកដីកម្ពុជា ទឹកដីឡាវ ម៉ាឡេស៊ី ឬភូមា ដែលជាប្រទេសជាប់ព្រំដែនជាមួយថៃ នោះ។
ការប៉ះទង្គិចគ្នាដោយអាវុធធុនធ្ងន់ និងស្រាលរវាងកម្ពុជា និងថៃ នៅតាមតំបន់ព្រំដែនរវាងប្រទេសទាំងពីរ បានផ្ទុះឡើងអស់រយៈពេល ៥ថ្ងៃ និងបានបញ្ចប់ទៅវិញក្រោយពីភាគីទាំងពីរបានឯកភាពឱ្យមានបទឈប់បាញ់កាលពីថ្ងៃទី២៨ ខែកក្កដា តាមសំណើប្រធានាធិបតីអាមេរិក លោក ដូណាល់ ត្រាំ។
រយៈពេល ៥ថ្ងៃនៃសង្គ្រាមនោះ ភាគីកម្ពុជា បានចោទភាគីថៃ ថាបានប្រើអាវុធធុនធ្ងន់ជាច្រើនវាយប្រហារចូលយ៉ាងជ្រៅក្នុងទឹកដីកម្ពុជា រួមមាន យន្តហោះចម្បាំង F-16s ដែលទិញពីអាមេរិក យន្តហោះចម្បាំង Gripens ដែលទិញពីប្រទេសស៊ុយអែត ដ្រូនទម្លាក់គ្រាប់បែក កាំភ្លើងត្បាល់ គ្រាប់បែកចង្កោម និងប្រើយន្តហោះបញ្ចេញផ្សែងពុលផងដែរ ខណៈកម្ពុជា ប្រើប្រាស់សិទ្ធិត្រឹមការពារខ្លួនប៉ុណ្ណោះ។
ជុំវិញបញ្ហានេះ កាសែតរបស់ប្រទេសសិង្ហបុរី The Strait Time បានចុះផ្សាយកាលពីថ្ងៃអង្គារដើមសប្តាហ៍នេះថា គណៈរដ្ឋមន្ត្រីថៃ បានអនុម័តសំណើទិញយន្តហោះ JAS 39 Saab Gripen ដែលផលិតនៅប្រទេសស៊ុយអែត ចំនួន ៤គ្រឿងទៀត កាលពីថ្ងៃទី៥ ខែសីហា រួចរាល់ហើយ ដើម្បីពង្រឹងកងទ័ពអាកាសថៃ និងការពារអធិបតេយ្យភាពរបស់ខ្លួន។
ប្រភពដដែលចុះផ្សាយថា កិច្ចព្រមព្រៀងទិញយន្តហោះនេះមានទំហំទឹកប្រាក់ដល់ទៅ ៦០០លានដុល្លារអាមេរិក ដើម្បីធ្វើទំនើបកម្មសមត្ថភាពប្រយុទ្ធរបស់កងទ័ពអាកាសថៃ៕
© 2025, ឌឹ ខេមបូឌា ដេលី. All rights reserved.