ក្រសួងការបរទេសកម្ពុជា ចាត់ទុកចំណាត់ការផ្លូវច្បាប់របស់នាយករដ្ឋមន្ត្រីស្តីទីថៃ លើមេដឹកនាំកម្ពុជា ថាមិនត្រឹមតែជាការរំលោភលើអធិបតេយ្យ និងបូរណភាពជាតិកម្ពុជា ទេ ថែមទាំងធ្វើឱ្យខូចខាតទំនាក់ទំនងនៃប្រទេសទាំងពីរផងដែរ។
ក្រសួងការបរទេសកម្ពុជា ចេញសេចក្តីថ្លែងការណ៍នៅថ្ងៃទី១៩ សីហា នេះថា ទង្វើរបស់នាយករដ្ឋមន្ត្រីស្ដីទីថៃ បានធ្វើឱ្យប៉ះពាល់យ៉ាងធ្ងន់ធ្ងរដល់កិច្ចខិតខំប្រឹងប្រែងទាំងអស់ដែលបានអនុវត្តកន្លងមក ដើម្បីសម្រេចបាននូវបទឈប់បាញ់ពេញលេញ និងដើម្បីស្ដារសន្តិភាព រួមទាំងប្រក្រតីភាពនៃទំនាក់ទំនងរវាងប្រទេសទាំងពីរ។
ប្រភពដដែល អះអាងថា សកម្មភាពផ្លូវច្បាប់ដែលបានគ្រោងទុករបស់ថៃ នឹងធ្វើឱ្យខូចខាតដល់ការខិតខំប្រឹងប្រែងទាំងអស់ក្នុងការស្ដារឡើងវិញនូវទំនុកចិត្ត ដែលត្រូវការជាចាំបាច់ដើម្បីអនុវត្តប្រកបដោយប្រសិទ្ធភាពនូវបទឈប់បាញ់ និងការបន្ថយភាពតានតឹងនៃស្ថានការណ៍ ដែលភាគីទាំងពីរបានព្រមព្រៀងគ្នាក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥ កន្លងទៅ។
ក្រសួងការបរទេសកម្ពុជា បញ្ជាក់ថា រដ្ឋាភិបាលកម្ពុជា ប្ដេជ្ញាចិត្តឥតងាករេក្នុងការធ្វើការជាមួយរដ្ឋាភិបាលថៃ ដើម្បីសម្រេចបាននូវសន្តិភាព និងការស្ដារទំនាក់ទំនងឱ្យមានភាពប្រក្រតីឡើងវិញនាពេលដ៏ខ្លីបំផុតខាងមុខនេះ។
កាលពីថ្ងៃទី១៨ ខែសីហា កាសែតថៃ ខៅស៊ុត (Khaosod) បានស្រង់សម្ដីនាយករដ្ឋមន្ត្រីស្តីទីថៃ លោក ភូមថាំ វីឆាយ៉ាឆ័យ (Phumtham Wechayachai) ថា លោក ហ៊ុន សែន និងលោក ហ៊ុន ម៉ាណែត នឹងត្រូវចាប់ខ្លួនភ្លាមៗ ប្រសិនបើស្ថិតនៅក្នុងទឹកដីថៃ។
ជុំវិញបញ្ហានេះ ប្រធានព្រឹទ្ធសភាកម្ពុជា លោក ហ៊ុន សែន សរសេរលើទំព័រហ្វេសប៊ុករបស់លោកកាលពីយប់ថ្ងៃទី១៨ ខែសីហា ថា នាយករដ្ឋមន្ត្រីស្តីទីថៃ លោក ភូមថាំ វីឆាយ៉ាឆ័យ (Phumtham Wechayachai) គឺជាមនុស្សព្រៃ មិនស្គាល់ច្បាប់ទម្លាប់ និងការទូត ប្រសិនបើមេដឹកនាំថៃ រូបនេះពិតជាចង់ចាប់មេដឹកនាំកម្ពុជា មែននោះ។
លោកបន្តថា បើនាយករដ្ឋមន្ត្រីស្ដីទីថៃ ប៉ុនប៉ងចាប់ខ្លួនលោក និងនាយករដ្ឋមន្ត្រីខ្មែរលោក ហ៊ុន ម៉ាណែត ដូចការចុះផ្សាយរបស់កាសែតថៃ មែននោះ គឺមានន័យថា ច្បាប់ទម្លាប់នឹងត្រូវបានបំផ្លាញដោយពួកឈ្លានពានទាំងនេះយ៉ាងពិតប្រាកដ។
ជុំវិញបញ្ហានេះ រដ្ឋមន្ត្រីក្រសួងមហាផ្ទៃ លោក ស សុខា បានសរសេរលើទំព័រហ្វេសប៊ុករបស់ខ្លួននៅថ្ងៃទី១៩ សីហា នេះដែរថា លោកពិតជាមិននឹកស្មានថាមេដឹកនាំថៃ ហ៊ាននិយាយពីការចាប់ខ្លួនមេដឹកនាំកម្ពុជាបែបនេះសោះ។
រដ្ឋមន្ត្រីក្រសួងមហាផ្ទៃ រូបនេះ បញ្ជាក់ថា បើការប្រកាសចាប់ខ្លួនមេដឹកនាំកម្ពុជានេះជាការពិត នោះមានន័យថា មេដឹកនាំបែបនេះនឹងនាំឱ្យប្រទេសថៃ ដើរថយក្រោយក្រោមភាពអាម៉ាស់ដ៏ធ្ងន់ធ្ងរនៅលើឆាកអន្តរជាតិជាក់ជាមិនខាន៕
© 2025, ឌឹ ខេមបូឌា ដេលី. All rights reserved.