រាជរដ្ឋាភិបាលកម្ពុជា កំណត់យកថ្ងៃទី១២ ខែឧសភា ជារៀងរាល់ឆ្នាំ ជាទិវាលើកតម្កើងវីរភាពអតីតយុទ្ធជន និងនិវត្តជន ដែលបានលះបង់ដើម្បីជាតិមាតុភូមិ។
នាយករដ្ឋមន្ត្រីកម្ពុជា លោក ហ៊ុន ម៉ាណែត ចុះហត្ថលេខាលើអនុក្រឹត្យចុះថ្ងៃទី១១ ខែសីហា ឆ្នាំ២០២៥ ដែលទើបនឹងត្រូវបានផ្សព្វផ្សាយនៅថ្ងៃទី២១ សីហា នេះ សម្រេចយកថ្ងៃទី១២ ខែឧសភា ជារៀងរាល់ឆ្នាំ ជាថ្ងៃប្រារព្ធទិវាអតីតយុទ្ធជន និងនិវត្តជនកម្ពុជា ដែលបានលះបង់ដើម្បីជាតិមាតុភូមិ។
ខ្លឹមសារក្នុងអនុក្រឹត្យនេះ បញ្ជាក់ថា ទិវានេះមានគោលបំណងលើកតម្កើងវីរភាពដ៏អង់អាច និងគុណបំណាច់ដ៏ធំធេងនៃអតីតយុទ្ធជន និងនិវត្តជនកម្ពុជា ដើម្បីបុព្វហេតុជាតិមាតុភូមិ។
លោក ហ៊ុន ម៉ាណែត បញ្ជាឱ្យក្រសួង ស្ថាប័ន រដ្ឋបាលថ្នាក់ក្រោមជាតិ សង្គមស៊ីវិល គ្រឹះស្ថានសាធារណៈ និងឯកជន រួមទាំងភាគីពាក់ព័ន្ធ ត្រូវចូលរួមបំផុសស្មារតីគាំទ្រទិវានេះដល់សាធារណជន ដើម្បីឱ្យយល់ដឹងពីគុណតម្លៃនៃគំរូវីរភាពអតីតយុទ្ធជន និងនិវត្តជននៅក្នុងប្រទេសកម្ពុជា។
ក្រុមអ្នកសង្កេតការណ៍ លើកឡើងថា ទន្ទឹមនឹងបង្កើតទិវាតម្កើងវីរភាពរបស់អតីតយុទ្ធជន និងនិវត្តជន រដ្ឋាភិបាលក៏ត្រូវយកចិត្តទុកដាក់លើជីវភាពកងទ័ព និងនិវត្តជន អតីតយុទ្ធជនទាំងនោះឱ្យបានល្អប្រសើរផងដែរ ជៀសវាងការយកចិត្តទុកដាក់តែពេលដែលប្រទេសជាតិមានសង្គ្រាម ហើយបោះបង់ពួកគេចោលពេលដែលសង្គ្រាមផុតរលត់។
ប្រភពដដែលបញ្ជាក់ថា ការផ្តល់ដីសម្បទាន ការផ្តល់ប្រាក់បៀវត្ស និងការថែទាំផ្សេងៗ ដើម្បីធានាជីវភាពរបស់កងទ័ព និវត្តជន និងអតីតយុទ្ធជន គឺជារឿងចាំបាច់បំផុតដើម្បីលើកទឹកចិត្តឱ្យកូនខ្មែរចូលរួមការពារប្រទេសជាតិកាន់តែខ្លាំងក្លាដែលជាខឿនការពារជាតិដ៏រឹងមាំទៅថ្ងៃមុខ។
ទាក់ទិននឹងបញ្ហានេះ កាលពីថ្ងៃទី២៩ ខែកក្កដា នាយករដ្ឋមន្ត្រីកម្ពុជា លោក ហ៊ុន ម៉ាណែត ធ្លាប់បានចេញបទបញ្ជាឲ្យក្រសួងការពារជាតិ និងក្រសួងស្ថាប័នពាក់ព័ន្ធ រៀបចំនូវគោលនយោបាយលើកទឹកចិត្តពិសេសសម្រាប់កងកម្លាំងប្រដាប់អាវុធ ទាំងយោធា ទាំងនគរបាលជាតិ ដែលបានចូលរួមដោយផ្ទាល់នៅក្នុងសមរភូមិការពារបូរណភាពទឹកដី ជុំវិញជម្លោះព្រំដែនកម្ពុជា-ថៃ នាពេលនេះ។
សេចក្តីរាយការណ៍ពីរដ្ឋាភិបាល បានបង្ហាញកាលពីពេលកន្លងទៅថា បច្ចុប្បន្ន អតីតយុទ្ធជនខ្មែរមានចំនួនជាង ១សែននាក់ (១០៩០៣៤នាក់) ព្រមទាំងអ្នកនៅក្នុងបន្ទុកជិត ១សែន ៥ពាន់នាក់ផងដែរ (១៤៩០៥៣នាក់) ដែលកំពុងទទួលប្រាក់របបសន្តិសុខសង្គមប្រចាំខែពីរដ្ឋ។
គួរបញ្ជាក់ថា រាជាណាចក្រកម្ពុជា មានទិវាអតីតយុទ្ធជនដែលបង្កើតឡើងកាលពីឆ្នាំ២០០៧ ហើយប្រារព្ធរៀងរាល់ឆ្នាំនៅថ្ងៃទី២១ ខែមិថុនា។
ដំណាលពេលគ្នានេះ មេដឹកនាំបក្សជំទាស់នៅក្រៅប្រទេស ដែលដឹកនាំក្រុមប្រឹក្សាជាតិតស៊ូ លោក សម រង្ស៊ី បានសរសេរផ្សាយក្នុងហ្វេសប៊ុក ហើយដែលសារព័ត៌មានថៃ The Nation បានយកទៅចុះផ្សាយបន្តនៅថ្ងៃទី២១ ខែសីហា នេះថា៖ «ប្រទេសកម្ពុជាក្រ កងទ័ពក្រ ប៉ុន្តែមេដឹកនាំជាមហាសេដ្ឋី។»
លោក សម រង្ស៊ី អះអាងថា៖ «ទ្រព្យសម្បត្តិលោក ហ៊ុន សែន ត្រូវបានប៉ាន់ប្រមាណថាមាន ៣ពាន់លានដុល្លារ ខណៈលោក ស៊ី ជីនពីង ប្រធានាធិបតីចិន មានចំនួន ១ពាន់លានដុល្លារ។ មេដឹកនាំកម្ពុជា ជាអ្នកមាន មានជាងមេដឹកនាំចិន ទៅទៀត ប៉ុន្តែហេតុអ្វីបានជាកម្ពុជាជំពាក់លុយចិនរាប់ពាន់លានដុល្លារ ហើយគ្មានលទ្ធភាពពង្រឹងវិស័យកងទ័ព? យោធារបស់យើងកំពុងរស់នៅក្នុងភាពក្រីក្រ រស់នៅខ្វះមុខខ្វះក្រោយ យោធារបស់យើងមិនមានសូម្បីតែឧបករណ៍សុវត្ថិភាពគ្រប់គ្រាន់ដើម្បីការពារខ្លួន ហើយពួកគេកាន់អាវុធចាស់ និងគ្មានប្រសិទ្ធភាព។ ចំណែកឯអាវុធទំនើប និងសំណាញ់មេឃ (ឬប្រព័ន្ធការពារដែនអាកាស) គេទុកនៅទួលក្រសាំង ដើម្បីការពារផ្ទះលោក ហ៊ុន សែន។»
លោក សម រង្ស៊ី ហៅទ្រព្យសម្បត្តិទាំងនោះជាទ្រព្យសម្បត្តិចោរលួចជាតិ ដែលនឹងត្រូវរឹបអូស៕
© 2025, ឌឹ ខេមបូឌា ដេលី. All rights reserved.