 ដែលដឹកនាំដោយឧត្ដមសេនីយ៍ត្រី Dato’ Pahlawan Asri bin Shukor ប្រធានបេសកកម្ម IOT (HOM) និងសមាជិក បានចេញដំណើរពីភ្នំពេញឆ្ពោះទៅទីស្នាក់ការប្រចាំនៅខេត្តព្រះវិហារ និងខេត្តបន្ទាយមានជ័យ ដើម្បីចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែនក្រោយបទឈប់បាញ់នៅរសៀលថ្ងៃទី១១ ខែកញ្ញា។){kind=link}
ក្រុមអ្នកសង្កេតការណ៍អន្តរកាល (IOT) ដែលដឹកនាំដោយឧត្ដមសេនីយ៍ត្រី Dato’ Pahlawan Asri bin Shukor ប្រធានបេសកកម្ម IOT (HOM) និងសមាជិក បានចេញដំណើរពីភ្នំពេញឆ្ពោះទៅទីស្នាក់ការប្រចាំនៅខេត្តព្រះវិហារ និងខេត្តបន្ទាយមានជ័យ ដើម្បីចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែនក្រោយបទឈប់បាញ់នៅរសៀលថ្ងៃទី១១ ខែកញ្ញា។
ក្រសួងការពារជាតិកម្ពុជា បានឲ្យដឹងថា ឧត្ដមសេនីយ៍ត្រី Dato’ Pahlawan និងក្រុមអ្នកសង្កេតការណ៍អន្តរកាល (IOT) តំណាងពីប្រទេសឥណ្ឌូនេស៊ី និងហ្វីលីពីន បានមកដល់កម្ពុជា កាលពីថ្ងៃទី១០ ខែកញ្ញា ហើយពួកគេបានចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែនក្រោយបទឈប់បាញ់នៅរសៀលថ្ងៃទី១១ ខែកញ្ញា។
ក្រសួងការពារជាតិកម្ពុជា ចាត់ទុកថាវត្តមានរបស់ក្រុមអ្នកសង្កេតការណ៍អន្តរកាល (IOT) នេះ គឺជាការចូលរួមយ៉ាងសកម្មរបស់បណ្តាប្រទេសសមាជិកអាស៊ាន ជាពិសេសប្រទេសម៉ាឡេស៊ី ជាប្រធានដែលដឹកនាំសម្របសម្រួលស្វែងរកដំណោះស្រាយដោយសន្តិវិធីសម្រាប់ជម្លោះព្រំដែនកម្ពុជា-ថៃ។
ក្រសួងការពារជាតិបន្ថែមថា ទាំងនេះគឺជាការឆ្លុះបញ្ចាំងឱ្យឃើញអំពីបំណងប្រាថ្នារួម ក្នុងការធ្វើឱ្យបទឈប់បាញ់ទទួលបានជោគជ័យ និងយូរអង្វែង ជាមួយនឹងគោលដៅនាំមកវិញនូវសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍសម្រាប់ប្រជាជននៃប្រទេសទាំងពីរ។
ក្នុងសន្និសីទកាសែតក្រោយបញ្ចប់កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) នៅខេត្តកោះកុង លោក ទៀ សីហា រដ្ឋមន្ត្រីក្រសួងការពារជាតិ បានឱ្យដឹងថា ការវិវឌ្ឍចុងក្រោយនៃស្ថានភាពជម្លោះព្រំដែនកម្ពុជា-ថៃ នេះ គឺភាគីទាំងពីរបានព្រមព្រៀងកែសម្រួលយុទ្ធោបករណ៍ និងសម្ភារៈយោធា ក្រោមការតាមដានរបស់ក្រុមអ្នកសង្កេតការណ៍អាស៊ាន (AOT)។
លោក ទៀ សីហា អះអាងថា បន្ថែមពីនេះ កម្ពុជា-ថៃ ក៏បានឯកភាពគ្នាជាគោលការណ៍ទៅលើលក្ខខណ្ឌប្រតិបត្តិ (TOR) សម្រាប់ការបង្កើតក្រុមអ្នកសង្កេតការណ៍អាស៊ាន (AOT) ថែមទៀត ដោយរង់ចាំតែការអនុម័តពីរដ្ឋាភិបាលនៃប្រទេសទាំងពីរតែប៉ុណ្ណោះ។
លោកបន្តថា ក្នុងអំឡុងពេលរង់ចាំការបង្កើតក្រុមអ្នកសង្កេតការណ៍អាស៊ាន (AOT) ភាគីទាំងពីរបានទទួលស្គាល់នូវតួនាទីដ៏សំខាន់របស់ក្រុមអ្នកសង្កេតការណ៍បណ្ដោះអាសន្ន (IOT) និងឯកភាពគ្នាក្នុងការបន្តប្រើប្រាស់យន្តការនេះ ដើម្បីធានាការអនុវត្តបទឈប់បាញ់ឱ្យមានប្រសិទ្ធភាព។
ទាក់ទិននឹងបញ្ហានេះ កាលពីថ្ងៃទី២២ ខែសីហា ស្ថានទូតជប៉ុន ប្រចាំនៅកម្ពុជា បានលើកឡើងថា រដ្ឋាភិបាលជប៉ុន អំពាវនាវឱ្យមានការអនុវត្តដោយប្រាកដប្រជានូវកិច្ចព្រមព្រៀងបទឈប់បាញ់ ដើម្បីឆ្ពោះទៅរកការបន្ធូរបន្ថយភាពតានតឹង ព្រោះទំនាក់ទំនងល្អរវាងប្រទេសកម្ពុជា និងថៃ មានសារសំខាន់ខ្លាំងណាស់សម្រាប់ស្ថិរភាព និងការអភិវឌ្ឍក្នុងតំបន់៕
© 2025, ឌឹ ខេមបូឌា ដេលី. All rights reserved.