អង្គភាពអ្នកនាំពាក្យរាជរដ្ឋាភិបាលកម្ពុជា អះអាងថាទោះបីជាកម្ពុជា អត់ធ្មត់ដើម្បីអនុវត្តកិច្ចព្រមព្រៀងឈប់បាញ់ក្នុងបំណងចៀសវាងការផ្ទុះអាវុធក៏ដោយ ក៏កម្ពុជា មិនបោះបង់សិទ្ធិក្នុងការទាមទារដែនអធិបតេយ្យភាពជាតិ និងបូរណភាពទឹកដីរបស់ខ្លួន ស្របតាមអនុសញ្ញា សន្ធិសញ្ញា និងច្បាប់អន្តរជាតិឡើយ។
អង្គភាពអ្នកនាំពាក្យរដ្ឋាភិបាលកម្ពុជា បានចេញសេចក្ដីថ្លែងការណ៍ នៅថ្ងៃទី១៧ ខែតុលា ឆ្នាំ២០២៥ នេះ ដោយទាត់ចោលទាំងស្រុងនូវការអះអាងរបស់ភាគីថៃ ក្រោមហេតុផលថា មានតែគណៈកម្មការចម្រុះព្រំដែន (JBC) ដែលបានព្រមព្រៀងគ្នារវាងកម្ពុជា-ថៃ ប៉ុណ្ណោះ ទើបមានសមត្ថកិច្ចក្នុងការវាស់វែង និងកំណត់ខណ្ឌសីមារវាងប្រទេសទាំងពីរ។
រដ្ឋាភិបាលកម្ពុជា លើកឡើងថា ខ្សែព្រំដែនរវាងប្រទេសទាំងពីរមានតម្លៃផ្លូវច្បាប់រឹងមាំដែលត្រូវបានការពារដោយធម្មនុញ្ញរបស់អង្គការសហប្រជាជាតិ និងច្បាប់អន្តរជាតិ ដែលមិនអាចត្រូវបានកែប្រែជាឯកតោភាគីដោយភាគីណាមួយឡើយ។
ជាងនេះទៅទៀត ក្នុងពេលរង់ចាំការវាស់វែង និងការកំណត់ខណ្ឌសីមារបស់គណៈកម្មការចម្រុះព្រំដែន (JBC) នោះ កម្ពុជាប្រកាន់ជំហរដោះស្រាយបញ្ហាដោយសន្តិវិធី និងដោយផ្អែកលើសន្ធិសញ្ញា និងកិច្ចព្រមព្រៀងទាំងឡាយរវាងប្រទេសទាំងពីរ ក្រោមច្បាប់អន្តរជាតិជាធរមាន។
ប្រភពដដែល អះអាងថា កម្ពុជាប្រកាន់ខ្ជាប់នូវគោលជំហរយ៉ាងម៉ឺងម៉ាត់ចំពោះអធិបតេយ្យភាព និងបូរណភាពទឹកដីរបស់ខ្លួន ដោយមិនទទួលយកដាច់ខាតនូវការប្រកាសជាឯកតោភាគីរបស់យោធាថៃ ពីព្រោះយោធាគ្មានសមត្ថកិច្ចក្នុងការសម្រេចអំពីខណ្ឌសីមារបស់ប្រទេសនោះឡើយ។
អ្នកនាំពាក្យរដ្ឋាភិបាលកម្ពុជា បញ្ជាក់ថា ព្រំដែនកម្ពុជា-ថៃ គឺជាព្រំដែនអន្តរជាតិរវាងរដ្ឋ និងរដ្ឋ ដែលត្រូវបានកំណត់ដោយអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧ ព្រមទាំងផែនទីខ្នាត ១/២០០០០០ និងបង្គោលព្រំដែនចំនួន ៧៤បង្គោល ដែលត្រូវបានបោះតាំងពីជាង ១០០ឆ្នាំមុនមកម្ល៉េះ។
កាសែត ខៅស៊ុត (Khaosod) បានផ្សព្វផ្សាយកាលពីថ្ងៃទី១៥ ខែតុលា ឆ្នាំ២០២៥ នូវវីដេអូឃ្លីបមួយដែលអ្នកជាតិនិយម និងយោធាថៃ កាន់ដៃគ្នាដើរច្រៀងចម្រៀងជាតិថៃ ស្ថិតក្នុងភូមិបានណង យ៉ាកែវ ខេត្តស្រះកែវ ប្រទេសថៃ។
ប្រភពដដែល បញ្ជាក់ថា ចម្រៀងនេះ គឺជាកំណាព្យដែលនិពន្ធដោយព្រះបាទរាមាទី៦ របស់ថៃ ខណៈមេបញ្ជាការក្រុមទី១២ នៃកម្លាំងបូរ៉ាផា (Burapha) លោក ចាន់ណារ៉ុង កាស៊ី (Chainarong Kasee) អះអាងថា វីដេអូនេះតំណាងឱ្យកាយវិការជានិមិត្តរូបថា គ្រប់ទីកន្លែងដែលទាហានថៃ ដើរ គឺជាទឹកដីថៃ និងជាដីដែលត្រូវបានបោសសម្អាតមីន។
អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ថ្លែងក្នុងសន្និសីទសារព័ត៌មានកាលពីថ្ងៃទី១៣ ខែតុលា ថា កងកម្លាំងប៉ារ៉ាថៃ និងតម្រួតព្រំដែនថៃ បានរាយលួសបន្លា ព្រមទាំងដាក់កង់ឡាននៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ចាប់តាំងពីថ្ងៃទី១២ ខែតុលា មក។
ជុំវិញបញ្ហានេះ ដោយឡែកអ្នកជំនាញច្បាប់ និងឧក្រិដ្ឋកម្មអន្តរជាតិ លោក ឆាំង យុ បានលើកឡើងកាលពីពេលថ្មីៗនេះថា លក្ខណៈសម្គាល់យោធាដែលមានវិជ្ជាជីវៈ និងភាពចាស់ទុំ គឺការប្រកាន់ខ្ជាប់នូវវិន័យ តម្លៃជាយោធា និងការគោរពនីតិរដ្ឋ ចំណែកយោធាដែលយាយីទៅលើជនស៊ីវិលស្លូតត្រង់ គឺជាយោធាដែលស្ថិតនៅក្រៅព្រំដែននៃស្ថាប័នវិជ្ជាជីវៈ ដែលប្រៀបបីដូចជាអ្នកលេង ជនពាល ចោរប្លន់ ឬជនល្មើសច្បាប់ដូច្នោះដែរ៕
© 2025, ឌឹ ខេមបូឌា ដេលី. All rights reserved.