 ថាជាចោរឈ្លានពានទឹកដីខ្មែរ បន្ទាប់ពីមន្ត្រីថៃ រូបនេះ ទាមទារឱ្យកម្ពុជា ប្រគល់ប្រាសាទតាក្របី ទៅប្រទេសថៃ វិញ ជាថ្នូរនឹងការដោះលែងទាហានខ្មែរទាំង ១៨នាក់។){kind=link}
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា ហៅរដ្ឋមន្ត្រីក្រសួងការពារជាតិថៃ លោក ណាតថាផន ណាក់ផានិត (Nattaphon Narkphanit) ថាជាចោរឈ្លានពានទឹកដីខ្មែរ បន្ទាប់ពីមន្ត្រីថៃ រូបនេះ ទាមទារឱ្យកម្ពុជា ប្រគល់ប្រាសាទតាក្របី ទៅប្រទេសថៃ វិញ ជាថ្នូរនឹងការដោះលែងទាហានខ្មែរទាំង ១៨នាក់។
លោក គិន ភា សរសេរនៅលើគណនីហ្វេសប៊ុករបស់ខ្លួននៅថ្ងៃទី៥ វិច្ឆិកា នេះថា «ចោរឈ្លានពានចេញមុខដោយឥតអៀនខ្មាសចង់ប្រើកម្លាំងកងទ័ពវាយដណ្ដើមយកប្រាសាទតាក្របីរបស់ខ្មែរ»។
មន្ត្រីរដ្ឋាភិបាលកម្ពុជារូបនេះលើកឡើងថា ពេលនេះចោរឈ្លានពានកំពុងបង្ខំឱ្យរដ្ឋាភិបាលកម្ពុជា ដោះមីននៅតាមបន្ទាត់ព្រំដែនថែមទៀត ដើម្បីឱ្យពួកគេងាយស្រួលប្រើឧបាយកលចូលវាយដណ្ដើមយកប្រាសាទខ្មែរ និងទឹកដីខ្មែរទៅតាមផែនការឈ្លានពានដែលពួកគេប៉ុនប៉ងជាយូរមកហើយនោះ។
បណ្ឌិត គិន ភា បញ្ជាក់ថា ក្រោមទង្វើឈ្លានពានដោយឥតអៀនខ្មាសដែលចោរឈ្លានពានបង្ហាញច្បាស់ៗបែបនេះហើយ បើមានពលរដ្ឋខ្មែរណាបន្តទិញទំនិញចោរទៀតនោះ គឺមានន័យថាពួកគេកំពុងតែគាំទ្រចោរឈ្លានពានទាំងនោះយ៉ាងពិតប្រាកដ។
លោកបញ្ជាក់ថា កម្ពុជាគ្មានការចាំបាច់អ្វីទៅចរចាជាមួយចោររឿងប្រាសាទខ្លួនឯងនោះទេ ព្រោះប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី គឺជារបស់ខ្មែរ ស្ថិតក្នុងដែនដីខ្មែរ ហើយកម្ពុជាក៏បានដាក់តំបន់ទាំង ៤ នេះទៅតុលាការយុត្តិធម៌អន្តរជាតិ (ICJ) រួចហើយដែរតាំងពីថ្ងៃទី១៥ ខែមិថុនា ឆ្នាំ២០២៥ មកម្ល៉េះ។
កាលពីថ្ងៃទី០៤ ខែវិច្ឆិកា កាសែត The Nation របស់ថៃ បានស្រង់សម្ដីរដ្ឋមន្ត្រីការពារជាតិថៃ លោក ណាតថាផន ណាក់ផានិត (Nattaphon Narkphanit) ថា គ្មានការចរចាលើបញ្ហាព្រំដែនណាមួយជាមួយកម្ពុជា ទេ រហូតទាល់តែប្រាសាទតាក្របី ត្រូវបានភាគីកម្ពុជាប្រគល់មកឱ្យប្រទេសថៃ វិញ។
រដ្ឋមន្ត្រីក្រសួងការពារជាតិថៃ រូបនេះ អះអាងថា គណៈរដ្ឋមន្ត្រីថៃ មិនទាន់ពិភាក្សាអំពីបញ្ហាប្រាសាទតាក្របីនៅឡើយទេ ប៉ុន្តែថៃ មានការប្ដេជ្ញាចិត្តខ្ពស់ក្នុងការទាមទារយកប្រាសាទនេះមកវិញ ព្រោះប្រាសាទនេះនៅតែជាផ្នែកមួយស្ថិតក្នុងប្រទេសថៃ។
មន្ត្រីថៃ ដដែលនេះបញ្ជាក់ថា ថៃនឹងមិនបន្តការពិភាក្សាអំពីការដោះលែងទាហានកម្ពុជា ១៨នាក់ដែលត្រូវបានឃុំខ្លួននោះទេ លុះត្រាតែកម្ពុជាប្រគល់ការគ្រប់គ្រងប្រាសាទតាក្របីឱ្យថៃ ជាមុនសិន ខណៈប្រធានបទផ្សេងទៀត រួមទាំងការបើកច្រកទ្វារព្រំដែនផងដែរ មិនត្រូវបានលើកយកមកជជែកឡើយ។
ទោះជាយ៉ាងណាក៏ដោយ អ្នកជំនាញភូមិសាស្ត្រនយោបាយ បណ្ឌិត យង់ ពៅ បានសរសេរលើគណនីហ្វេសប៊ុករបស់ខ្លួននៅថ្ងៃទី៥ វិច្ឆិកា ដែរថា ប្រសិនបើពេលនេះកម្ពុជារបូតគំនិតជឿថៃ កាត់ទឹកដី កាត់ប្រាសាទឱ្យចោរដើម្បីដោះដូរនឹងអ្វីៗដែលចោរចេះតែបន្តដាក់លក្ខខណ្ឌនោះ ប៉ុន្មានឆ្នាំខាងមុខទៀត ថៃនឹងបន្តគូសផែនទីដោយឯកតោភាគី និងទាមទារកាត់ទឹកដីខ្មែរបន្តទៀតជាមិនខាន ដូច្នេះ តើកម្ពុជានៅសល់ទឹកដី និងប្រាសាទប៉ុន្មានទៀតសម្រាប់ទុកកាត់ទៅឱ្យថៃ នោះ។
កាលពីថ្ងៃទី១៦ ខែមិថុនា ឆ្នាំ២០២៥ ប្រធានព្រឹទ្ធសភា លោក ហ៊ុន សែន អះអាងថា ប្រវែងព្រំដែនកម្ពុជា និងថៃ មានចម្ងាយជាង ៨០០គីឡូម៉ែត្រ ប៉ុន្តែមានតែ ៤តំបន់ប៉ុណ្ណោះដែលកម្ពុជា ត្រូវដោះស្រាយជាមួយថៃ នៅតុលាការយុត្តិធម៌អន្តរជាតិ គឺតំបន់មុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ចំណែកទីតាំងផ្សេងទៀត គឺត្រូវដោះស្រាយដោយទ្វេភាគី។
លោក ហ៊ុន សែន ចាត់ទុកអំពើឈ្លានពានរបស់ថៃ មកលើទឹកដីកម្ពុជា ដោយគេចវេះមិនហ៊ានប្រឈមមុខនៅតុលាការអន្តជាតិ ថាជាទង្វើរបស់ចោរ។
សារព័ត៌មាន The Cambodia Daily មិនទាន់អាចទាក់ទងអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា សុំការបំភ្លឺជុំវិញការប្តឹងថៃ អំពីតំបន់ទាំង ៤ នេះបាននៅឡើយទេ រហូតដល់ម៉ោងផ្សាយនេះ៕
© 2025, ឌឹ ខេមបូឌា ដេលី. All rights reserved.