គិតត្រឹមថ្ងៃទី៧ ខែវិច្ឆិកា នេះ គឺមានរយៈពេល ១០១ថ្ងៃហើយដែលកងកម្លាំងកម្ពុជាទាំង ១៨នាក់ត្រូវបានយោធាថៃ បដិសេធមិនដោះលែង បន្ទាប់ពីថ្ងៃចុះកិច្ចព្រមព្រៀងទីក្រុងកូឡាឡាំពួរ រវាងកម្ពុជា-ថៃ ក្រោមវត្តមានរបស់ប្រធានាធិបតីអាមេរិក លោក ដូណាល់ ត្រាំ ជាសាក្សី។
ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី៦ វិច្ឆិកា ដោយអំពាវនាវឱ្យភាគីថៃ ដោះលែងទាហានខ្មែរទាំង ១៨នាក់ត្រឡប់ទៅប្រទេសកម្ពុជា វិញ ដើម្បីឱ្យពួកគេអាចជួបជុំក្រុមគ្រួសារស្របតាមច្បាប់មនុស្សធម៌អន្តរជាតិ។
ក្រសួងការពារជាតិ បញ្ជាក់ថា រដ្ឋាភិបាលកម្ពុជាមិនដែលបោះបង់កងកម្លាំងខ្មែរណាម្នាក់ចោលឡើយ ទោះក្នុងកាលៈទេសៈណាក៏ដោយ ព្រោះពេលនេះ រដ្ឋាភិបាលកំពុងធ្វើការឥតឈប់ឈរដោយប្រើគ្រប់យន្តការដោះស្រាយទាំងអស់ ដើម្បីឱ្យភាគីថៃ ដោះលែងពួកគេត្រឡប់មកមាតុប្រទេសវិញឱ្យបានឆាប់។
ជុំវិញបញ្ហានេះ កាលពីថ្ងៃទី៥ ខែវិច្ឆិកា អង្គភាពអ្នកនាំពាក្យរាជរដ្ឋាភិបាលកម្ពុជា បានចេញសេចក្តីប្រកាសព័ត៌មាន ដោយអំពាវនាវឱ្យភាគីថៃ គោរពសេចក្តីថ្លែងការណ៍រួម ស្ដីពីកិច្ចព្រមព្រៀងសន្តិភាពទីក្រុងកូឡាឡាំពួរ ដោយសារតែកម្ពុជាមើលឃើញថា ប៉ុន្មានថ្ងៃចុងក្រោយនេះ ទាំងមន្ត្រី និងថ្នាក់ដឹកនាំរបស់ថៃ ធ្វើអត្ថាធិប្បាយផ្ទុយពីខ្លឹមសារដែលបានចែងក្នុងកិច្ចព្រមព្រៀងនេះជាបន្តបន្ទាប់។
ប្រភពដដែល អះអាងថា ជាក់ស្តែង មន្ត្រី និងថ្នាក់ដឹកនាំថៃ បានធ្វើអត្ថាធិប្បាយដោយយកចំណុចដែលបានព្រមព្រៀងគ្នាក្នុងសេចក្តីថ្លែងការណ៍រួម មកធ្វើជាលក្ខខណ្ឌក្នុងការដោះលែងយោធិនកម្ពុជា ទាំង ១៨រូប ដែលកំពុងស្ថិតនៅក្រោមការឃុំគ្រងរបស់ថៃ និងបង្កើតឱ្យមានលក្ខខណ្ឌថ្មីៗបន្ថែមទៀត ដូចជា ករណីប្រាសាទតាក្របី ដោយព្រមានពីការប្រើប្រាស់កម្លាំងយោធាដើម្បីដណ្តើមយក ជាដើម។
អង្គភាពអ្នកនាំពាក្យរាជរដ្ឋាភិបាលកម្ពុជា បញ្ជាក់ថា អ្វីដែលជាការកត់សម្គាល់យ៉ាងសំខាន់ដែលបញ្ជាក់ថា ភាគីថៃ មិនបានគោរពខ្លឹមសារនៃសេចក្តីថ្លែងការណ៍រួមនោះ គឺនៅត្រង់ថា រហូតមកទល់ថ្ងៃទី៥ ខែវិច្ឆិកា ឆ្នាំ២០២៥ នេះ គឺមានរយៈពេល ១០ថ្ងៃហើយដែលភាគីថៃ មិនទាន់បានដោះលែងយោធិនកម្ពុជា ១៨នាក់ ទៅតាមស្មារតីនៃសេចក្តីថ្លែងការណ៍រួមដែលភាគីទាំងពីរបានឯកភាពគ្នា។
ក្នុងកិច្ចព្រមព្រៀងសន្តិភាពកម្ពុជា-ថៃ កាលពីថ្ងៃទី២៦ ខែតុលា រវាងកម្ពុជា-ថៃ បានឯកភាពគ្នាឱ្យមានការដោះលែងចំណាប់ខ្មាំងសង្គ្រាម រួមទាំងលក្ខខណ្ឌមួយចំនួនទៀតផងដែរ ដើម្បីបន្ធូរបន្ថយស្ថានការណ៍ជម្លោះព្រំដែនរវាងប្រទេសទាំងពីរ។
ចំណែកប្រធានាធិបតីអាមេរិក លោក ដូណាល់ ត្រាំ ក៏បានថ្លែងគាំទ្រនូវកិច្ចព្រមព្រៀងទីក្រុងកូឡាឡាំពួរ នេះ រួមទាំងជំរុញឱ្យមានការដោះលែងទាហានខ្មែរទាំង ១៨នាក់ថែមទៀត។
យ៉ាងណាក៏ដោយ កាលពីថ្ងៃទី០៤ ខែវិច្ឆិកា កាសែត The Nation របស់ថៃ បានស្រង់សម្ដីរដ្ឋមន្ត្រីការពារជាតិថៃ លោក ណាតថាផន ណាក់ផានិត (Nattaphon Narkphanit) ថា គ្មានការចរចាលើបញ្ហាព្រំដែនណាមួយជាមួយកម្ពុជា ទេ រហូតទាល់តែប្រាសាទតាក្របី ត្រូវបានភាគីកម្ពុជា ប្រគល់មកឱ្យប្រទេសថៃ វិញ៕
© 2025, ឌឹ ខេមបូឌា ដេលី. All rights reserved.