ក្រសួងការពារជាតិកម្ពុជា អះអាងថា ការវាយប្រហារពីសំណាក់ភាគីថៃ នៅថ្ងៃទី១៧ ធ្នូ នេះ បានសម្លាប់ជនស៊ីវិលកើនឡើងដល់ ១៧នាក់ ក្នុងនោះគឺមានទារក ១នាក់ដែរ ខណៈពលរដ្ឋដែលរងរបួសបានកើនឡើងដល់ ៧៧នាក់។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា បានចេញសេចក្តីប្រកាសព័ត៌មាននៅថ្ងៃទី១៧ ធ្នូ នេះថា គិតចាប់ពីម៉ោង ០៥ និង ០០នាទី ថ្ងៃទី១៦ ដល់ម៉ោង ០៨ និង ០០នាទីព្រឹកថ្ងៃទី១៧ ខែធ្នូ ឆ្នាំ២០២៥ នេះ យោធាថៃ បានបើកការវាយប្រហារមកលើកម្ពុជា ចំនួន ១៧លើកក្នុងរយៈពេលជាង ១៦ម៉ោង។
ប្រភពដដែល អះអាងថា រយៈពេល ១៦ម៉ោងនេះ យោធាថៃ បានវាយសម្រុកទៅលើភូមិសាស្ត្រចំនួន ១០ទីតាំងក្នុងទឹកដីរបស់កម្ពុជា រួមមាន ភ្នំ៣៣៣ ប្រាសាទតាក្របី តាថាវ ប្រាសាទតាមាន់ ថ្មដូន អូរភ្លុកដំរី ភូមិជោគជ័យ ភូមិព្រៃចាន់ និងភូមិចំការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ ផងដែរ។
ក្រសួងការពារជាតិ បញ្ជាក់ថា ថៃបានប្រើអាវុធ និងយុទ្ធោបករណ៍គ្រប់ប្រភេទសម្រាប់ការវាយប្រហារនេះ រួមមានយន្តហោះចម្បាំង F-16 រ៉ុក្កែត ឌី.ធី.អាយ-២ (DTI-2) នាវាចម្បាំង ដ្រូនពិឃាត កាំភ្លើងធំ ១០៥មិល្លីម៉ែត្រ និង ១៥៥មិល្លីម៉ែត្រ រថពាសដែក គ្រាប់បែកចង្កោម និងផ្សែងពុល ជាដើម រួមទាំងការដាក់ពង្រាយទាហានដ៏ច្រើនលើសលុបថែមទៀត។
ការអះអាងនេះ ធ្វើឡើងបន្ទាប់ពីសង្គ្រាមរវាងកម្ពុជា-ថៃ បានអូសបន្លាយចូលដល់ថ្ងៃទី១១ គិតត្រឹមថ្ងៃទី១៧ ធ្នូ នេះ។
ជុំវិញបញ្ហានេះ កាសែតបាងកកប៉ុស្តិ៍ រាយការណ៍នៅថ្ងៃទី១៧ ធ្នូ នេះថា កាលពីថ្ងៃទី១៦ ខែធ្នូ គណៈរដ្ឋមន្ត្រីចាំផ្ទះរបស់ថៃ បានអនុម័តការបែងចែកថវិកាប្រមាណ ២,៤៤ពាន់លានបាត ឬប្រមាណ ៧៧,៦លានដុល្លារអាមេរិកសម្រាប់ឆ្នាំ២០២៦ ដើម្បីពង្រឹងកម្លាំងយោធា និងពង្រឹងសន្តិសុខព្រំដែន នៅចំពេលដែលមានការប្រយុទ្ធគ្នាជាបន្តបន្ទាប់តាមបណ្តោយព្រំដែនថៃ-កម្ពុជា។
អ្នកនាំពាក្យរដ្ឋាភិបាលថៃ លោក សិរីពង្ស អង្គសក្សគុលគៀត (Siripong Angkasakulkiat) អះអាងថា ថវិកាដែលស្នើសុំដោយកងទ័ពជើងគោក និងកងទ័ពជើងទឹក គឺមានគោលបំណងគាំទ្រដល់ការត្រៀមលក្ខណៈការពារជាតិ និងឆ្លើយតបទៅនឹងការគំរាមកំហែងសន្តិសុខជាបន្ទាន់។
ជុំវិញបញ្ហានេះ ក្រសួងមហាផ្ទៃកម្ពុជា បានចេញសេចក្តីប្រកាសព័ត៌មាននៅថ្ងៃទី១៧ ធ្នូ នេះថា ជនភៀសសឹកមកពីខេត្តរងគ្រោះដោយការវាយប្រហារពីសំណាក់កងទ័ពថៃ បានកើនឡើងដល់ជាង ១សែន ៣ម៉ឺនគ្រួសារហើយ (១៣០០៧៩គ្រួសារ) ដែលស្មើនឹងចំនួនប្រជាជនជាង ៤សែននាក់ (៤៣២៦៨៦នាក់)។
ប្រភពដដែល បញ្ជាក់ថា ក្នុងចំណោមជនភៀសសឹកទាំងនេះមានស្ត្រីប្រមាណ ២សែន ២ម៉ឺន ២ពាន់នាក់ និងកុមារ ១សែន ៣ម៉ឺន ៤ពាន់នាក់ផងដែរ ខណៈហេដ្ឋារចនាសម្ព័ន្ធស៊ីវិលក៏ត្រូវរងការខូចខាតយ៉ាងធ្ងន់ធ្ងរ ដូចជា ផ្ទះរបស់ពលរដ្ឋ សាលារៀន មណ្ឌលសុខភាព ប្រាសាទបុរាណ វត្តអារាម សាលាឆទាន កុដិព្រះសង្ឃ អគារការិយាល័យគយ អគារកាស៊ីណូ សណ្ឋាគារ មណ្ឌលកសិកម្មសហគមន៍ ស្ពានថ្ម ស្ពានដែក ស្ថានីយប្រេង និងផ្លូវថ្នល់ ជាដើម។
ចំណែកក្រសួងការបរទេសកម្ពុជា ចេញសេចក្តីប្រកាសព័ត៌មាននៅថ្ងៃទី១៧ ធ្នូ នេះថា កម្ពុជាប្ដេជ្ញាចិត្តយ៉ាងម៉ឺងម៉ាត់ចំពោះការអនុវត្តបទឈប់បាញ់ និងសេចក្តីថ្លែងការណ៍រួមទីក្រុងកូឡាឡាំពួរ កាលពីចុងខែតុលា ឆ្នាំ២០២៥ កន្លងទៅ ដើម្បីស្ដារស្ថានភាពប្រទេសទាំងពីរវិលទៅរកប្រក្រតីភាពឡើងវិញ ដោយងាកទៅរកការចរចាតាមកិច្ចព្រមព្រៀងដែលមានស្រាប់។
ជុំវិញបញ្ហានេះ សមាគមខ្មែរដែលមានមូលដ្ឋានក្នុងប្រទេសន័រវែស និងសមាគមពុទ្ធសាសនិកជនខ្មែរ បានចេញសេចក្តីថ្លែងការណ៍កាលពីថ្ងៃទី១៦ ខែធ្នូ ដោយថ្កោលទោសដាច់អហង្ការចំពោះយោធាថៃ និងរដ្ឋាភិបាលថៃ ដែលតែងតែយកលេសគ្រប់បែបយ៉ាងបង្កសង្គ្រាមឈ្លានពានទៅលើប្រទេសកម្ពុជា។
ប្រភពដដែល អះអាងថា សកម្មភាពយ៉ាងគឃ្លើនរបស់ភាគីថៃ នាពេលនេះ ជាការរំលោភបំពានបទឈប់បាញ់ កិច្ចព្រមព្រៀងសន្តិភាពរវាងប្រទេសទាំងពីរ និងរំលោភគោលការណ៍ច្បាប់អន្តរជាតិនានាយ៉ាងជាក់ច្បាស់ ដែលកំពុងបង្កផលប៉ះពាល់ទៅលើជនស៊ីវិលកម្ពុជា ទីវត្តអារាមខ្មែរ ប្រាសាទបុរាណខ្មែរដែលជាបេតិកភណ្ឌពិភពលោក និងហេដ្ឋារចនាសម្ព័ន្ធស្ពាន ផ្លូវថ្នល់ និងសំណង់អគារជាច្រើនរបស់កម្ពុជា។
សមាគមខ្មែរប្រទេសន័រវែស និងសមាគមពុទ្ធសាសនិកជនខ្មែរ អំពាវនាវឱ្យរដ្ឋាភិបាលកម្ពុជា ត្រូវប្រញាប់ប្តឹងប្រទេសថៃ ទៅកាន់តុលាការយុត្តិធម៌អន្តរជាតិ (ICJ) ជុំវិញករណីវិវាទព្រំដែន និងករណីខូចខាតប្រាសាទបុរាណខ្មែរនៅតំបន់ព្រំដែន ស្របតាមសន្ធិសញ្ញាបារាំង-សៀមឆ្នាំ១៩០៤ និងឆ្នាំ១៩០៧ ដោយភ្ជាប់ផែនទីអាណានិគមបារាំង។
ជាងនេះទៀត ក៏ត្រូវប្តឹងមេយោធា និងមន្ត្រីជាន់ខ្ពស់មួយចំនួននៃរដ្ឋាភិបាលថៃ ទៅកាន់តុលាការឧក្រិដ្ឋកម្មអន្តរជាតិ (ICC) ផងដែរ អំពីករណីបង្កសង្គ្រាមលើកម្ពុជា ករណីសម្លាប់ជនស៊ីវិលខ្មែរ និងបទឧក្រិដ្ឋកម្មពាក់ព័ន្ធមួយចំនួនទៀត៕
© 2025, ឌឹ ខេមបូឌា ដេលី. All rights reserved.