នាយកមជ្ឈមណ្ឌលឯកសារកម្ពុជា អះអាងថា ពាក្យបណ្ដឹងរបស់ថៃ ទៅកាន់តុលាការក្នុងស្រុកលើប្រធានព្រឹទ្ធសភាកម្ពុជា លោក ហ៊ុន សែន និងនាយករដ្ឋមន្ត្រីកម្ពុជា លោក ហ៊ុន ម៉ាណែត ជាទង្វើមិនថ្លៃថ្នូរ និងគួរឱ្យអាម៉ាស់ ដែលនាំទៅដល់ការបន្ទច់បង្អាក់កិច្ចការទូតជុំវិញជម្លោះព្រំដែនរវាងប្រទេសទាំងពីរទៅវិញ។
នាយកមជ្ឈមណ្ឌលឯកសារកម្ពុជា លោក ឆាំង យុ សរសេរលើគណនីហ្វេសប៊ុករបស់ខ្លួននៅថ្ងៃទី៣០ មករា ថា ទំនាក់ទំនងការទូតប្រកបដោយប្រសិទ្ធភាពរវាងរដ្ឋ និងរដ្ឋ គឺអាស្រ័យលើការឯកភាពរួមគ្នារវាងបញ្ជាការយោធា និងគោលនយោបាយការបរទេសនៃរដ្ឋាភិបាល។
លោក ឆាំង យុ លើកឡើងថា ការដាក់ពាក្យបណ្ដឹងស្របពេលដែលប្រទេសថៃ និងប្រទេសកម្ពុជា កំពុងបន្តចរចាលើជម្លោះព្រំដែននាពេលនេះ គឺមិនត្រឹមតែផ្ទុយទៅនឹងស្មារតីនៃការស្វែងរកដំណោះស្រាយដោយសន្តិវិធីចំពោះជម្លោះព្រំដែនរវាងប្រទេសទាំងពីរប៉ុណ្ណោះទេ ថែមទាំងបង្ហាញថារដ្ឋាភិបាលថៃ មិនមានគោលនយោបាយការបរទេសរួបរួមជាមួយក្រុមយោធាទៀតផង។
លោក ឆាំង យុ ចោទសួរថា តើអ្នកណាជាអ្នកដឹកនាំរដ្ឋាភិបាលថៃ ឱ្យពិតប្រាកសព្វថ្ងៃនេះ? ព្រោះផ្នែកម្ខាងនៃរដ្ឋាភិបាលនេះ កំពុងស្វះស្វែងរកដំណោះស្រាយតាមវិធានការទូត ប៉ុន្តែផ្នែកម្ខាងទៀត បែរជាព្យាយាមដោះស្រាយដោយប្រើប្រាស់តុលាការក្នុងស្រុក ឬតុលាការអន្តរជាតិទៅវិញ។
គួររំឭកឡើងវិញថា៖ ភាគីប្រទេសកម្ពុជា ជាអ្នកផ្តើមគំនិតចង់ប្តឹងថៃ ទៅតុលាការអន្តរជាតិ ICC ឬ ICJ តាមយោបល់ខ្មែរជាតិនិយមមួយចំនួន ប៉ុន្តែភាគីថៃ ប្រាប់ថាគេមានបំណងដោះស្រាយជម្លោះជាទ្វេភាគី។ អ្នកដឹកនាំខ្មែរបានប្រាប់ពលរដ្ឋខ្មែរទៀតថា គេបានរកមេធាវីអន្តរជាតិ ដើម្បីដាក់ពាក្យប្តឹងទៅតុលាការអន្តរជាតិរឿងជម្លោះព្រំដែន។
ការអះអាងពីលោក ឆាំង យុ អ្នកស្រាវជ្រាវឯកសារខ្មែរក្រហម ធ្វើឡើងបន្ទាប់ពីមន្ត្រីជាន់ខ្ពស់ថៃ បានដាក់ពាក្យបណ្ដឹងរដ្ឋប្បវេណីទៅកាន់តុលាការក្នុងស្រុកថៃ ប្រឆាំងនឹងមេដឹកនាំកំពូលរបស់កម្ពុជា ស្របពេលដែលប្រទេសថៃ និងប្រទេសកម្ពុជា កំពុងចរចារកដំណោះស្រាយលើជម្លោះប្រដាប់អាវុធតាមបន្ទាត់ព្រំដែននោះ។
កាលពីថ្ងៃទី២៨ ខែមករា ឆ្នាំ២០២៦ កាសែតថៃ The Nation បានរាយការណ៍ថា អគ្គលេខាធិការក្រុមប្រឹក្សាសន្តិសុខជាតិថៃ លោក Chatchai Bangchuad បានដាក់ពាក្យបណ្ដឹងទៅតុលាការខេត្តសុរិន្ទ ស្នើឲ្យដាក់ក្នុងបញ្ជីខ្មៅរបស់ប៉ូលិសអាំងទែរប៉ូល ដោយចោទប្រកាន់នាយករដ្ឋមន្ត្រីកម្ពុជា លោក ហ៊ុន ម៉ាណែត និងប្រធានព្រឹទ្ធសភា លោក ហ៊ុន សែន ថាបានបញ្ជាឱ្យវាយប្រហារលើប្រទេសថៃ ជាពិសេសតំបន់ស៊ីវិល។
ទោះជាយ៉ាងណាក៏ដោយ មេដឹកនាំបក្សកាន់អំណាច លោក ហ៊ុន សែន អះអាងកាលពីថ្ងៃទី៧ ខែមករា ឆ្នាំ២០២៦ ថា ប្រទេសថៃ បានបង្កសង្គ្រាមរំលោភបំពានយ៉ាងកំរោលមកលើបូរណភាពទឹកដីកម្ពុជា ដោយប្រើប្រាស់អាវុធធំតូច និងទំនើបគ្រប់ប្រភេទ ទាំងជើងគោក ជើងទឹក និងជើងអាកាស បាញ់ប្រហារមកលើកងទ័ពកម្ពុជា ដែលកំពុងស្ថិតក្នុងទីតាំងលើដែនអធិបតេយ្យរបស់កម្ពុជា និងវាយប្រហារលើគោលដៅស៊ីវិលនានាឥតរើសមុខឡើយ។
ជុំវិញបញ្ហានេះ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី២២ ខែធ្នូ ឆ្នាំ២០២៥ បានថ្លែងក្នុងពិធីប្រកាសការផលិតនាវាចម្បាំងខ្នាតយក្សថ្មីជាមួយរដ្ឋមន្ត្រីក្រសួងសង្គ្រាម និងនាយគ្រប់គ្រងកងទ័ពជើងទឹកសហរដ្ឋអាមេរិក ដោយចោទថា ប្រទេសថៃ គឺជាអ្នកចាប់ផ្តើមសង្គ្រាមមុនទៅលើប្រទេសកម្ពុជា។
នៅថ្ងៃសុក្រ ទី៣០ ខែមករា នេះ កាសែតថៃ The Nation បានរាយការណ៍ព័ត៌មានអំពីការផ្ទុះគ្រាប់មីនបង្កប់ បណ្តាលឲ្យទាហានថៃ ពីរនាក់របួស នៅតំបន់អានសេះ ឬអានម៉ា ជាប់ព្រំដែនខេត្តព្រះវិហារ ខាងខ្មែរ និងខេត្តឧប៊ុនរាជធានី ខាងថៃ។
ប្រភពយោធាថៃ ថាគ្រាប់មីននោះផ្ទុះដោយសារមានភ្លើងឆេះស្លឹកឈើក្រៀមស្ងួតតាមព្រៃជាប់ព្រំដែន។
នៅថ្ងៃទី៣០ ខែមករា ឆ្នាំ២០២៦ នេះ ក្រសួងមហាផ្ទៃកម្ពុជា បានចេញសេចក្តីប្រកាសព័ត៌មានថា បទឈប់បាញ់គ្នារវាងប្រទេសកម្ពុជា និងប្រទេសថៃ អនុវត្តបានរយៈពេល ១ខែហើយ បើគិតត្រឹមថ្ងៃទី២៧ ខែមករា ឆ្នាំ២០២៦ ប៉ុន្តែកម្ពុជាបានតាមដាន និងកត់ត្រាទុកជាបន្តបន្ទាប់នូវសកម្មភាពមិនស្មោះត្រង់មួយចំនួនខាងភាគីថៃ ចំណែកឯផលប៉ះពាល់លើប្រជាពលរដ្ឋ និងតំបន់ស៊ីវិលកម្ពុជា ដែលបង្កឡើងដោយអំពើវាយប្រហារពីកងទ័ពថៃ ក៏នៅតែជាបន្ទុកដែលត្រូវដោះស្រាយយ៉ាងអាទិភាពជាបន្តបន្ទាប់ដែរ។
ចំណែកឯមេទ័ពថៃ មួយចំនួន ក៏និយាយថា គេនៅតែតាមដានស្ថានការណ៍តាមព្រំដែនគ្រប់ពេលជានិច្ច។ នេះក៏ជាលទ្ធផលនៃការមិនទុកចិត្តគ្នាទៅវិញទៅមកដែរ។
ចំណែកគណៈកម្មាធិការសិទ្ធិមនុស្សកម្ពុជា បានចេញសេចក្តីប្រកាសព័ត៌មាន ស្ដីពីការដាក់ពាក្យប្ដឹងទៅកាន់មេធាវីឱ្យអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិជនភៀសសឹកនៅទីក្រុងហ្សឺណែវ ប្រទេសស្វីស អ្នកស្រី Paula Gaviria Betancur កាលពីថ្ងៃទី២៦ ខែមករា ឆ្នាំ២០២៦ ថា រហូតដល់ពេលនេះ ជនភៀសសឹកខ្មែរជាង ១សែននាក់ (ជាង ១១៥០០នាក់) នៅតែមិនអាចត្រឡប់ទៅលំនៅឋាន និងសហគមន៍របស់ពួកគេវិញបានទេ។
គណៈកម្មាធិការសិទ្ធិមនុស្សកម្ពុជា បញ្ជាក់ថា ការមិនអាចត្រឡប់ទៅលំនៅឋាន និងសហគមន៍របស់ពួកគេវិញនេះ គឺដោយសារតែសកម្មភាពខុសច្បាប់របស់យោធាថៃ ដែលបានកម្ទេចផ្ទះសម្បែង ការដាក់ពង្រាយទូកុងតឺន័រ ការដាក់ពង្រាយលួសបន្លាក្នុងតំបន់ដែលកងទ័ពថៃ បានកាន់កាប់ដោយខុសច្បាប់ក្រោយការច្បាំងគ្នារវាងប្រទេសកម្ពុជា និងប្រទេសថៃឡង់ដ៍៕
© 2026, ឌឹ ខេមបូឌា ដេលី. All rights reserved.