ក្រុមអ្នកតស៊ូមតិមានមូលដ្ឋានក្នុងប្រទេសអូស្ត្រាលី ដាក់ការសង្ស័យលើករណីបញ្ជូនខ្លួនលោក ចេន ហ្ស៊ី ដោយមិនឆ្លងប្រព័ន្ធច្បាប់របស់កម្ពុជា ថាជាការពាក់ព័ន្ធនឹងកិច្ចព្រមព្រៀងនយោបាយ និងសេដ្ឋកិច្ចរវាងគណបក្សប្រជាជនកម្ពុជា និងបក្សកុម្មុយនីស្តចិន ដែលផ្តល់បុព្វសិទ្ធិពិសេសដល់ជនជាតិចិន នៅកម្ពុជា។
ក្រុមអ្នកតស៊ូមតិកម្ពុជា (CAT) បានចេញលិខិតវិភាគមួយនៅថ្ងៃទី២ កុម្ភៈ នេះថា ការបញ្ជូនលោក ចេន ហ្ស៊ី (Chen Zhi) ចេញពីប្រទេសកម្ពុជា ដោយបង្ខំ និងប្រញាប់ប្រញាល់ដោយមិនឆ្លងនីតិវិធីច្បាប់របស់កម្ពុជា គឺជាវិធីតែមួយគត់ដើម្បីបិទបាំងការស៊ើបអង្កេតរបស់តុលាការ ដែលអាចនឹងនាំឱ្យរកការពិតដែលជាប់ពាក់ព័ន្ធនឹងមេដឹកនាំបក្សកាន់អំណាច លោក ហ៊ុន សែន និងនាយករដ្ឋមន្ត្រីកម្ពុជា លោក ហ៊ុន ម៉ាណែត ក្នុងសំណុំរឿងនោះ។
ប្រភពខាងលើ លើកឡើងថា លោក ចេន ហ្ស៊ី មានឋានៈខ្ពស់ស្មើរដ្ឋមន្ត្រី មានសកម្មភាពសង្គម និងសេដ្ឋកិច្ចយ៉ាងទូលំទូលាយ ដូចជា ការផ្តល់អាហារូបករណ៍ និងការដឹកនាំធនាគារ ព្រីនស៍ ជាដើម ដែលបង្ហាញថាទំនាក់ទំនងរបស់លោកជាមួយថ្នាក់ដឹកនាំកំពូលរបស់កម្ពុជា គឺជាទំនាក់ទំនងពិសេស និងអាថ៌កំបាំង។
ប្រភពដដែលថា តាមរយៈតួនាទី ទំនាក់ទំនង និងសកម្មភាពសង្គម និងសេដ្ឋកិច្ចយ៉ាងទូលំទូលាយនេះ គេអាចសន្និដ្ឋានបានថា លោក ចេន ហ្ស៊ី គឺជាភ្នាក់ងារបរទេសដែលដើរតួជាស្ពានចម្លងប្រភពទុនពីប្រទេសចិន មកកម្ពុជា តាមរយៈថ្នាក់ដឹកនាំបក្សកាន់អំណាច ហើយក៏អាចជាភ្នាក់ងារតំណាងក្នុងកិច្ចព្រមព្រៀងអនុញ្ញាតឱ្យជនជាតិចិន មករស់នៅកម្ពុជា ផងដែរ។
ជាក់ស្តែង សេចក្តីបំភ្លឺរបស់ក្រសួងការបរទេសកម្ពុជា ស្ដីពីការបញ្ជូនខ្លួនលោក ចេន ហ្ស៊ី ទៅប្រទេសចិន បានបង្ហាញឱ្យឃើញពីការរំលោភរដ្ឋធម្មនុញ្ញយ៉ាងធ្ងន់ធ្ងរ ដែលបង្ហាញពីការឱ្យតម្លៃលើកិច្ចសន្យាជាមួយបរទេសរបស់រដ្ឋាភិបាលកម្ពុជា ធំជាងការអនុវត្តច្បាប់កំពូលរបស់ខ្លួន ព្រោះរដ្ឋធម្មនុញ្ញចែងថា ពលរដ្ឋខ្មែរគ្រប់រូបមានសិទ្ធិការពារខ្លួនតាមផ្លូវច្បាប់ ដរាបណាមិនទាន់មានសាលក្រមស្ថាពរ ជននោះនៅតែជាជនឥតទោសនៅឡើយ។
ប្រភពដដែលបញ្ជាក់ថា ផ្អែកតាមលទ្ធផលនៃការវិភាគនេះ បង្ហាញថា ការបញ្ជូនខ្លួនលោក ចេន ហ្ស៊ី ទៅប្រទេសចិន ពីសំណាក់រដ្ឋាភិបាលកម្ពុជា គឺជាការប្រព្រឹត្តផ្ទុយទៅនឹងរដ្ឋធម្មនុញ្ញ រួមទាំងច្បាប់របស់ប្រទេសកម្ពុជា ទាំងស្រុង ដែលជាការបង្ហាញឱ្យឃើញនូវអាថ៌កំបាំងជាច្រើនទៀតដែលរដ្ឋាភិបាលព្យាយាមលាក់បាំងក្នុងសំណុំរឿងដែលជាប់ពាក់ព័ន្ធនឹងលោក ចេន ហ្ស៊ី នោះ។
កាលពីថ្ងៃទី៧ ខែមករា ឆ្នាំ២០២៦ ក្រសួងមហាផ្ទៃ បានចេញសេចក្តីប្រកាសព័ត៌មានថា ផ្អែកតាមសំណើរបស់អាជ្ញាធរចិន សមត្ថកិច្ចកម្ពុជា បានចាប់ខ្លួនពលរដ្ឋចិន ៣នាក់ រួមមាន ឈ្មោះ ចេន ហ្ស៊ី (Chen Zhi) ឈ្មោះ ស៊ូ ជី លាំង (Xu Ji Liang) និងឈ្មោះ សៅ ជី ហួយ (Shao Ji Hui) ដើម្បីបញ្ជូនទៅសាធារណរដ្ឋប្រជាមានិតចិន វិញ ក្រោមការសហការរវាងសមត្ថកិច្ចនៃប្រទេសទាំងពីរ។
ក្រោយការចាប់បញ្ជូនខ្លួនលោក ចេន ហ្ស៊ី រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន បានផ្តល់បទសម្ភាសន៍ជាមួយទីភ្នាក់ងារសារព័ត៌មានអន្តរជាតិ Reuters កាលពីថ្ងៃទី១៤ ខែមករា ឆ្នាំ២០២៦ ថា ការចាប់ខ្លួនឧក្រិដ្ឋជនជនជាតិចិន លោក ចេន ហ្ស៊ី គឺជាការឆ្លុះបញ្ចាំងពីការប្ដេជ្ញាចិត្តអនុវត្តច្បាប់យ៉ាងម៉ឺងម៉ាត់របស់កម្ពុជា ក្នុងការបង្ក្រាបឧក្រិដ្ឋកម្មឆ្លងដែន ជាពិសេសឧក្រិដ្ឋកម្មឆបោកតាមប្រព័ន្ធបច្ចេកវិទ្យា (Online Scams)។
លោកថា ពិតមែនតែលោក ចេន ហ្ស៊ី មានសញ្ជាតិកម្ពុជា ប៉ុន្តែពេលដែលរដ្ឋាភិបាលបើកការស៊ើបអង្កេត ទើបរកឃើញថាសញ្ជាតិរបស់គាត់មិនទទួលបានដោយស្របច្បាប់ឡើយ។
យ៉ាងណាក៏ដោយ កាលពីឆ្នាំ២០១៤ លោក ចេន ហ្ស៊ី ទទួលបានសញ្ជាតិខ្មែរ និងឆ្នាំ២០១៦ ទទួលបានគោរមងារជាឧកញ៉ា រហូតដល់ឆ្នាំ២០២៤ ក៏ទទួលបានតំណែងជាទីប្រឹក្សារបស់លោក ហ៊ុន សែន ថែមទៀត ហើយរាល់ការទទួលបានទាំងនេះ គឺដោយសារមានការទូលថ្វាយរបស់លោក ហ៊ុន សែន ទៅកាន់ព្រះមហាក្សត្រទាំងអស់៕
© 2026, ឌឹ ខេមបូឌា ដេលី. All rights reserved.