ប្រធានាធិបតីបារាំង លោក អេម៉ានុយអែល ម៉ាក្រុង បានប្រកាសថា សម្ពន្ធភាពអឺរ៉ុបបានសម្រេចបញ្ចេញបេសកកម្មយោធារួមគ្នាមួយប្រឆាំងនឹងការបិទច្រកសមុទ្រ Hormuz ដោយកងឆ្មាំបដិវត្តន៍ឥស្លាមអ៊ីរ៉ង់។
ច្រកសមុទ្រ Hormuz គឺជាផ្លូវនាវាចរដ៏សំខាន់នៃការដឹកប្រេងចេញពីតំបន់មជ្ឈិមបូព៌ាទៅកាន់អាស៊ីប៉ាស៊ីហ្វិក និងអឺរ៉ុប។
ដំណើរទៅត្រួតពិនិត្យ និងសួរសុខទុក្ខកងទ័ពបារាំង នៅលើនាវាផ្ទុកយន្តហោះ Charles de Gaulle កាលពីថ្ងៃចន្ទ ទី៩ ខែមីនា លោក ម៉ាក្រុង ព្រមានថា បារាំង និងអឺរ៉ុប ប្រឆាំងដាច់ខាតការបិទរាំងខ្ទប់ច្រកសមុទ្រ Hormuz ដោយយកធ្វើជាចំណាប់ខ្មាំងរបស់កងឆ្មាំបដិវត្តន៍ឥស្លាមអ៊ីរ៉ង់។
បើតាមលោក ម៉ាក្រុង បារាំងនឹងឈានមុខគេក្នុងចំណោមប្រទេសអឺរ៉ុប ត្រូវបញ្ជូននាវាចម្បាំងឆ្លងកាត់ច្រកសមុទ្រ Hormuz និងការពារនាវាចរអន្តរជាតិ ដែលត្រូវបើកឆ្លងកាត់ផ្លូវទឹកដ៏សំខាន់នេះ។
លោកប្រធានាធិបតីបារាំង រូបនេះប្រកាសថា បារាំងនឹងបញ្ជូននាវាចម្បាំងប្រភេទ Frigate ចំនួន ២គ្រឿង ដើម្បីចូលរួមក្នុងបេសកកម្មដែនសមុទ្រនៅក្រោមគម្រោងបេសកកម្មរបស់សហភាពអឺរ៉ុប នៅតំបន់សមុទ្រក្រហម និងតំបន់ច្រកសមុទ្រ Hormuz នៅតំបន់មជ្ឈិមបូព៌ា។
ការប្រកាសនេះ ធ្វើឡើងក្រោយកិច្ចប្រជុំរវាងលោក ម៉ាក្រុង ជាមួយប្រធានាធិបតីប្រទេសដែនកោះសាយប្រឺស លោក Nikos Christodoulides និងនាយករដ្ឋមន្ត្រីក្រិក លោក Kyriakos Mitsotakis នៅលើកោះសាយប្រឺស ក្រោយពីលោកចេញពីនាវាផ្ទុកយន្តហោះ Charles de Gaulle។
លោក ម៉ាក្រុង បញ្ជាក់ថា បេសកកម្មនេះ គឺដើម្បីការពារសុវត្ថិភាពផ្លូវទឹកអន្តរជាតិ និងជាការអមដំណើរនាវាពាណិជ្ជកម្មឆ្លងកាត់តំបន់ដែលមានហានិភ័យខ្ពស់នៅច្រកសមុទ្រ Hormuz។
លោកបញ្ជាក់ថា បេសកកម្មនេះនឹងត្រូវរៀបចំឡើងដោយមានការសហការគ្នាយ៉ាងជិតស្និទ្ធរវាងបណ្តាប្រទេសទាំងក្នុង និងក្រៅទ្វីបអឺរ៉ុប។
ការដាក់ពង្រាយនាវាចម្បាំងរបស់បារាំង ធ្វើឡើងស្របពេលដែលស្ថានការណ៍នៅតំបន់មជ្ឈិមបូព៌ា និងច្រកសមុទ្រសំខាន់ៗកំពុងស្ថិតក្នុងភាពតានតឹងខ្លាំង ជាពិសេសករណីកងឆ្មាំបដិវត្តន៍ឥស្លាមអ៊ីរ៉ង់ បិទរាំងខ្ទប់ច្រកសមុទ្រ Hormuz ដោយសារសង្គ្រាមរវាងសម្ពន្ធមិត្តអាមេរិក-អ៊ីស្រាអែល រួមគ្នាវាយប្រហារប្រទេសអ៊ីរ៉ង់ នៃរបបសាធារណរដ្ឋឥស្លាមអ៊ីរ៉ង់។
ប្រតិកម្មនឹងលោក ម៉ាក្រុង កងកម្លាំងឆ្មាំបដិវត្តន៍ឥស្លាមនៃប្រទេសអ៊ីរ៉ង់ បានព្រមានថា ពួកគេនឹងមិនអនុញ្ញាតឱ្យមានការដឹកប្រេងចេញពីតំបន់មជ្ឈិមបូព៌ាបានឡើយ ប្រសិនបើការវាយប្រហាររបស់សហរដ្ឋអាមេរិក និងអ៊ីស្រាអែល នៅតែបន្ត។
កងឆ្មាំបដិវត្តន៍ឥស្លាមអ៊ីរ៉ង់ និយាយថា ខ្លួននឹងមិនអនុញ្ញាតដាច់ខាតឱ្យប្រេងចាកចេញពីតំបន់មជ្ឈិមបូព៌ា ប្រសិនអាមេរិក និងអ៊ីស្រាអែល នៅតែបន្តការវាយប្រហារលើប្រទេសអ៊ីរ៉ង់ ដោយអួតថា អ៊ីរ៉ង់ទេគឺជាអ្នកដែលនឹងកំណត់ពីទីបញ្ចប់នៃសង្គ្រាម។
ការលើកឡើងបែបនេះ បាននាំឱ្យមានការចេញសារព្រមានពីប្រធានាធិបតីសហរដ្ឋអាមេរិក លោក ដូណាល់ ត្រាំ។
លោក ត្រាំ បានបង្ហោះសារថា ប្រសិនបើអ៊ីរ៉ង់ ហ៊ានរារាំងការដឹកប្រេងនៅច្រកសមុទ្រ Hormuz អ៊ីរ៉ង់នឹងរងការវាយប្រហារខ្លាំងជាងពេលនេះដល់ទៅ ២០ដង។
ច្រកសមុទ្រ Hormuz ជាទីដែលប្រេងឆៅប្រមាណជា ២០% របស់ពិភពលោក ត្រូវដឹកជញ្ជូនឆ្លងកាត់ជាប្រចាំ ប៉ុន្តែបានជាប់គាំងចាប់តាំងពីសង្គ្រាមមជ្ឈិមបូព៌ាបានផ្ទុះឡើងកាលពីថ្ងៃទី២៨ ខែកុម្ភៈ ដោយកងឆ្មាំបដិវត្តន៍ឥស្លាមអ៊ីរ៉ង់ រាំងខ្ទប់ចាប់ជាចំណាប់ខ្មាំង។
ជាមួយគ្នានេះ រដ្ឋមន្ត្រីការបរទេសអ៊ីរ៉ង់ និយាយថា ប្រទេសរបស់លោកបានត្រៀមលក្ខណៈដើម្បីបន្តការប្រយុទ្ធ ដរាបណាវានៅតែចាំបាច់។ បន្ថែមលើសពីនេះ លោក Abbas Araghchi បានច្រានចោលលទ្ធភាពចរចាឡើងវិញ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ និយាយថា សង្គ្រាមជាមួយអ៊ីរ៉ង់ នឹងចប់ទៅវិញក្នុងពេលឆាប់ៗ។
រដ្ឋមន្ត្រីការបរទេសនៃប្រទេសអ៊ីរ៉ង់ លោក Abbas Araghchi បានបញ្ជាក់ទៀតថា អ៊ីរ៉ង់បានត្រៀមលក្ខណៈដើម្បីបន្តការវាយប្រហារមីស៊ីល ហើយការចរចាជាមួយសហរដ្ឋអាមេរិក គឺលែងស្ថិតក្រោមរបៀបវារៈទៀតហើយ។
កាលពីថ្ងៃចន្ទ លោក ត្រាំ បានព្យាករថា សង្គ្រាមនឹងបិទបញ្ចប់ក្នុងពេលឆាប់ៗ ប៉ុន្តែបានគំរាមបង្កើនការធ្វើសង្គ្រាមជាមួយអ៊ីរ៉ង់ ប្រសិនបើទីក្រុងតេហេរ៉ង់ បិទខ្ទប់ការដឹកជញ្ជូនប្រេងចេញពីតំបន់មជ្ឈិមបូព៌ា។
កាលពីខែមិថុនា ឆ្នាំ២០២៥ អ៊ីស្រាអែល បានបើកការវាយប្រហារទៅលើអ៊ីរ៉ង់ បង្កជាសង្គ្រាមផ្លូវអាកាសរយៈពេល ១២ថ្ងៃ។ សង្គ្រាមពេលនោះ ក៏ព្រោះតែការចរចាអាមេរិក-អ៊ីរ៉ង់ អំពីការរំលាយកម្មវិធីនុយក្លេអ៊ែរអ៊ីរ៉ង់បរាជ័យ។ សង្គ្រាមលើកទី២ នេះ បានផ្ទុះឡើងកាលពីថ្ងៃទី២៨ ខែកុម្ភៈ ឆ្នាំ២០២៦ ព្រោះតែទីក្រុងតេហេរ៉ង់ ចរចាសាជាថ្មីជាមួយក្រុងវ៉ាស៊ីនតុន ជួបរឿងបរាជ័យជាថ្មីម្ដងទៀត ហើយអ៊ីស្រាអែល ដែលជាកូនជឹងរបស់អាមេរិក បានសម្រេចបើកការវាយប្រហារជាថ្មីម្ដងទៀត។
សង្គ្រាមនៅតែបន្ត តែតុល្យការនៃសង្គ្រាមសហរដ្ឋអាមេរិក និងអ៊ីស្រាអែល មានប្រៀបខ្លាំងជាងអ៊ីរ៉ង់ ដោយលំហអាកាសនៃប្រទេសអ៊ីរ៉ង់ សឹងតែទាំងមូល កំពុងស្ថិតក្រោមការគ្រប់គ្រងដោយកងទ័ពអាកាសអាមេរិក និងអ៊ីស្រាអែល៕
© 2026, ឌឹ ខេមបូឌា ដេលី. All rights reserved.