 ដោយទម្លាក់គ្រាប់បែកកម្ទេចទីតាំងរូងក្រោមដីដ៏ធំមួយ ដោយបំផ្ទុះឃ្លាំងអាវុធរបស់កងឆ្មាំបដិវត្តន៍អ៊ីរ៉ង់ បានដោយជោគជ័យ។){kind=link}
ទីបញ្ជាការកណ្ដាលកងទ័ពសហរដ្ឋអាមេរិក បានឱ្យដឹងថា កងទ័ពអាកាសសហរដ្ឋអាមេរិក បានបើកការវាយប្រហារលើទីតាំងមីស៊ីលរបស់អ៊ីរ៉ង់ ដែលស្ថិតនៅក្បែរច្រកសមុទ្រហ័រមូស (Hormuz) ដោយទម្លាក់គ្រាប់បែកកម្ទេចទីតាំងរូងក្រោមដីដ៏ធំមួយ ដោយបំផ្ទុះឃ្លាំងអាវុធរបស់កងឆ្មាំបដិវត្តន៍អ៊ីរ៉ង់ បានដោយជោគជ័យ។
នៅក្នុងសេចក្ដីថ្លែងការណ៍មួយបង្ហោះលើបណ្ដាញទំនាក់ទំនងសង្គម X កាលពីថ្ងៃអង្គារ ទី១៧ ខែមីនា ឆ្នាំ២០២៦ ទីបញ្ជាការកណ្ដាលយោធាអាមេរិក បានបញ្ជាក់ថា កងកម្លាំងទ័ពអាកាសអាមេរិក បានប្រើប្រាស់គ្រាប់បែកទម្ងន់ ៥០០០ផោន ឬស្មើនឹង ២២០០គីឡូក្រាមជាច្រើនគ្រាប់ដោយជោគជ័យទម្លាក់លើទីតាំងមីស៊ីលដ៏រឹងមាំរបស់អ៊ីរ៉ង់ នៅតាមបណ្ដោយឆ្នេរសមុទ្រអ៊ីរ៉ង់ ដែលស្ថិតនៅក្បែរច្រកសមុទ្រ Hormuz។
បើតាមទីបញ្ជាការកងទ័ពសហរដ្ឋអាមេរិក ឲ្យដឹងថា មីស៊ីលគ្រូសប្រឆាំងនាវាចម្បាំងដែលមាននៅក្នុងទីតាំងរូងក្រោមដី ត្រូវបានកម្ទេច។ មីស៊ីលទាំងនោះដែលកងឆ្មាំបដិវត្តន៍ឥស្លាមអ៊ីរ៉ង់ បានវាយប្រហារកប៉ាល់ដឹកប្រេងដែលបើកឆ្លងកាត់ចក្រសមុទ្រ Hormuz។
ក្នុងស្ថានភាពសង្គ្រាមចូលដល់ថ្ងៃទី១៩ រដ្ឋមន្ត្រីការបរទេសអ៊ីស្រាអែល លោក Gideon Saar បានប្រកាសថា ប្រទេសរបស់លោកបានឈ្នះក្នុងសង្គ្រាមជាមួយអ៊ីរ៉ង់ រួចទៅហើយ ប៉ុន្តែលោកនិយាយថា ប្រតិបត្តិការសឹកនឹងបន្តធ្វើឡើងរហូតទាល់តែសម្រេចគោលដៅ។
លោក Gideon Saar ធ្វើការកត់សម្គាល់បែបនេះនៅក្នុងសន្និសីទសារព័ត៌មានមួយកាលពីថ្ងៃអង្គារ ទី១៧ ខែមីនា ឆ្នាំ២០២៦។
យ៉ាងណា ប្រមុខការទូតអ៊ីស្រាអែល រូបនេះ និងក្រុមមន្ត្រីអ៊ីស្រាអែល ធ្លាប់បាននិយាយថា គោលដៅរបស់អ៊ីស្រាអែល គឺសំដៅធ្វើឱ្យសមត្ថភាពដឹកនាំការវាយប្រហាររបស់អ៊ីរ៉ង់ ចុះខ្សោយជាលំដាប់រយៈពេលយូរ។
ជាមួយគ្នានេះ កងសន្តិសុខអ៊ីរ៉ាក់ បាននិយាយនៅថ្ងៃពុធ ទី១៨ ខែមីនា ថា កងទ័ពអ៊ីរ៉ង់ បានវាយប្រហារដោយដ្រូនមួយគ្រឿងលើស្ថានទូតអាមេរិកប្រចាំទីក្រុងបាដាដ នៃប្រទេសអ៊ីរ៉ាក់។
កាលពីថ្ងៃអង្គារ ប្រភពសន្តិសុខនៃប្រទេសអ៊ីរ៉ាក់ ក៏បានឱ្យដឹងផងដែរថា ការវាយប្រហារដោយរ៉ុក្កែត និងដ្រូននាំឱ្យសំឡេងស៊ីរ៉ែនបន្លឺឡើងជាមួយនឹងស្នូរផ្ទុះក្បែរបរិវេណស្ថានទូតអាមេរិក ដែលជាការវាយប្រហារដោយដ្រូន ៣គ្រឿង តែត្រូវបានប្រព័ន្ធការពារដែនអាកាស C-RAM ស្ទាក់ចាប់។
ប៉ុន្តែការវាយសងសឹករបស់អ៊ីរ៉ង់ ទៅលើមូលដ្ឋានទ័ពអាមេរិកនៅតំបន់ឈូងសមុទ្រពែក្ស បានបណ្ដាលឱ្យប្រទេសមួយចំនួនក្នុងតំបន់ថ្កោលទោសអ៊ីរ៉ង់ ព្រោះតែដ្រូន និងមីស៊ីលអ៊ីរ៉ង់ បានវាយប្រហារទៅលើទីតាំងស្តុកប្រេង រោងចក្រប្រេង និងអាកាសយានដ្ឋាន។ មិនត្រឹមតែថ្កោលទោសប៉ុណ្ណោះទេ ប្រទេសទាំងនោះគំរាមវាយប្រហារទៅលើអ៊ីរ៉ង់ វិញដែរ។
នៅថ្ងៃទី១៨ ខែមីនា នេះ ប្រទេសអារ៉ាប់ ជំរុញឱ្យអាមេរិកបន្ដធ្វើសង្គ្រាមលើអ៊ីរ៉ង់ រហូតដល់អ៊ីរ៉ង់ ចុះខ្សោយខ្លាំងសមត្ថភាពយោធាក្នុងតំបន់។
យោងតាមការចេញផ្សាយដោយទីភ្នាក់ងារសារព័ត៌មាន Reuters ដោយដកស្រង់សម្ដីមន្ត្រីក្នុងតំបន់ឈូងសមុទ្រពែក្ស ឱ្យដឹងថា រដ្ឋអារ៉ាប់ជាច្រើនកំពុងជំរុញសហរដ្ឋអាមេរិកឱ្យបន្តយុទ្ធនាការយោធារបស់ខ្លួនប្រឆាំងអ៊ីរ៉ង់ ដោយមិនចង់ឱ្យមានការផ្អាកនោះទេ ទោះបីជាសមត្ថភាពយោធារបស់អ៊ីរ៉ង់ ត្រូវបានបង្ហាញថាបានចុះខ្សោយក៏ដោយ។
រដ្ឋាភិបាលនៃប្រទេសទាំងនោះ មានដូចជា ប្រទេសអារ៉ាប៊ីសាអ៊ូឌីត ប្រទេសអារ៉ាប់រួម ប្រទេសបារ៉ែន ប្រទេសគុយវ៉ែត ប្រទេសហ្សកដានី បារម្ភថាការផ្អាកយុទ្ធនាការមុនពេលវេលាសមស្រប អាចធ្វើឲ្យអ៊ីរ៉ង់ មានសមត្ថភាពគំរាមកំហែងទៅលើផ្លូវដឹកជញ្ជូនប្រេង គ្រឹះស្ថានហេដ្ឋារចនាសម្ព័ន្ធ និងមជ្ឈមណ្ឌលពាណិជ្ជកម្មដែលមានសារសំខាន់សម្រាប់សេដ្ឋកិច្ចតំបន់។
ប្រតិកម្មរបស់ប្រទេសទាំងនេះ កើតឡើងនៅពេលសង្គ្រាមចូលដល់សប្តាហ៍ទីបី ដោយការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែល កាន់តែខ្លាំងឡើង ខណៈអ៊ីរ៉ង់ បានបាញ់មីស៊ីល និងប្រើយន្តហោះគ្មានមនុស្សបើកទៅលើមូលដ្ឋានយោធារបស់អាមេរិកក្នុងតំបន់ និងរំខានដល់ចរាចរណ៍នៅច្រកសមុទ្រ Hormuz ដែលជាផ្លូវនាវាចរដ៏សំខាន់សម្រាប់ការដឹកប្រេងចេញពីមជ្ឈិមបូព៌ាទៅកាន់ទីផ្សារអាស៊ីប៉ាស៊ីហ្វិក និងអឺរ៉ុប៕
© 2026, ឌឹ ខេមបូឌា ដេលី. All rights reserved.