ប្រធានគណបក្សជំនាន់ថ្មី លោក មាជ សុវណ្ណារ៉ា ចាត់ទុកការចាប់ផ្សឹកព្រះភិក្ខុ ជា វុទ្ធី ថាជាការគំរាមកំហែងដល់វិស័យព្រះពុទ្ធសាសនា និងជាការរំលោភសេរីភាពបញ្ចេញមតិដែលមានចែងក្នុងរដ្ឋធម្មនុញ្ញយ៉ាងកំរោល។
លោក មាជ សុវណ្ណារ៉ា បានសរសេរលើគណនីហ្វេសប៊ុករបស់លោកនៅថ្ងៃទី១ មេសា នេះថា លោកមានការឈឺចាប់ និងសោកស្តាយជាខ្លាំងចំពោះករណីដែលមន្ទីរធម្មការ និងសមត្ថកិច្ចខេត្តបាត់ដំបង បានចាប់ផ្សឹកព្រះភិក្ខុ ជា វុទ្ធី ដែលជាសកម្មជនសង្ឃខេត្តបាត់ដំបង ដ៏សកម្ម ទាំងរាល់រឿងកិច្ចការងារសង្គមជាតិ និងបញ្ហាព្រំដែន។
មេបក្សក្រៅរដ្ឋាភិបាលរូបនេះ អំពាវនាវឱ្យអង្គការសិទ្ធិមនុស្សទាំងឡាយជួយតាមដានករណីព្រះភិក្ខុ ជា វុទ្ធី ឱ្យបានដិតដល់ ព្រោះព្រះអង្គគឺជាសង្ឃសកម្មក្នុងការបញ្ចេញមតិអំពីបញ្ហាសង្គមអស់រយៈពេលជាង ១០ឆ្នាំមកហើយ។
ព្រះភិក្ខុ ជា វុទ្ធី ជាព្រះសង្ឃដែលគង់នៅវត្តធម្មនិមិត្តរាជបុប្ផារាម ហៅវត្តប៉ាឆា ក្នុងក្រុងបាត់ដំបង ត្រូវបានសមត្ថកិច្ចស្លៀកពាក់ស៊ីវិលជាង ១០នាក់ ឃាត់ព្រះកាយនៅថ្ងៃទី១ ខែមេសា ឆ្នាំ២០២៦ នេះ។
ព្រះសង្ឃមួយចំនួនដែលស្ថិតនៅក្នុងហេតុការណ៍នេះ បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញព្រះនាម នៅថ្ងៃទី១ មេសា នេះថា មន្ទីរធម្មការ និងសាសនាខេត្តបាត់ដំបង បានណាត់ព្រះអង្គ ជា វុទ្ធី ឱ្យទៅជួបនៅវត្តពោធិ៍វាល។ លុះពេលព្រះអង្គ ជា វុទ្ធី និមន្តទៅដល់វត្តពោធិ៍វាល និងចូលទៅថ្វាយបង្គំគ្រូចៅអធិការវត្តពោធិ៍វាល ព្រះនាម សួន ឈឿន ស្រាប់តែមានជនស្លៀកពាក់ស៊ីវិលជិត ២០នាក់ ចាប់បង្ខំឱ្យព្រះអង្គឡើងលើរថយន្តដោយមិនប្រាប់ពីមូលហេតុ និងបានដឹកព្រះអង្គចេញពីវត្តតែម្តង។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បានសរសេរលើគណនីហ្វេសប៊ុករបស់លោកនៅថ្ងៃទី១ មេសា នេះថា ករណីនេះជារឿងអយុត្តិធម៌មួយទៀតក្នុងចំណោមរឿងអយុត្តិធម៌ជាច្រើនដែលអាជ្ញាធរកម្ពុជា ព្យាយាមរារាំងសេរីភាពបញ្ចេញមតិ និងចាប់ឃុំខ្លួនពលរដ្ឋខ្មែរជាបន្តបន្ទាប់ ដោយសារពួកគេឈឺចាប់ និងបញ្ចេញមតិលើបណ្ដាញសង្គមចំពោះការឈ្លានពានរបស់ថៃ មកលើទឹកដីកម្ពុជា។
អ្នកឃ្លាំមើលសង្គមរូបនេះលើកឡើងថា ទាំងព្រះភិក្ខុ ជា វុទ្ធី និងអ្នកឯទៀតដែលបានបញ្ចេញមតិក្នុងរឿងថៃ ឈ្លានពានទឹកដីខ្មែរនាពេលនេះ សុទ្ធតែមានទស្សនៈស្របជាមួយនឹងជំហររដ្ឋាភិបាលកម្ពុជា ដូច្នេះមិនគួរមានការថ្នាំងថ្នាក់រកលេសចោទប្រកាន់ និងចាប់ឃុំឃាំងពួកគេឡើយ។
លោក ម៉ែន ណាត អំពាវនាវឱ្យអាជ្ញាធរនៃរដ្ឋាភិបាលលោក ហ៊ុន ម៉ាណែត ក៏ដូចជាតុលាការផងដែរ ទម្លាក់ចោលបទចោទប្រកាន់នានា និងដោះលែងអ្នកទាំងនោះឲ្យមានសេរីភាពដោយគ្មានលក្ខខណ្ឌ ស្របតាមស្មារតីរដ្ឋធម្មនុញ្ញកម្ពុជា និងស្របតាមគោលការណ៍ច្បាប់អន្តរជាតិ។
កាលពីថ្ងៃទី២៣ ខែមីនា ឆ្នាំ២០២៦ សមាគមការពារសិទ្ធិមនុស្សអាដហុក បង្ហាញថា ឆ្នាំ២០២៥ ស្ថានភាពសិទ្ធិមនុស្សនៅកម្ពុជាចាប់តាំងពីឆ្នាំ២០២៥ មក មិនមានភាពល្អប្រសើរឡើយ បើធៀបនឹងឆ្នាំ២០២៤ ជាពិសេសការរឹតត្បិតសេរីភាពនៃការបញ្ចេញមតិ សិទ្ធិនយោបាយ និងបញ្ហាប្រព័ន្ធយុត្តិធម៌៕
© 2026, ឌឹ ខេមបូឌា ដេលី. All rights reserved.