សហរដ្ឋអាមេរិករឹបអូសកប៉ាល់អ៊ីរ៉ង់ ចំណែកអ៊ីរ៉ង់ចោទអាមេរិកថាជាចោរសមុទ្រ រួមទាំងគំរាមសងសឹកវិញ

នៅលើទំព័រនៃសារព័ត៌មានអន្តរជាតិជាច្រើន បានបង្ហាញពីស្ថានការណ៍វិវត្តនៃព័ត៌មានជាបន្តបន្ទាប់ ជុំវិញភាពតានតឹងដែលកំពុងកើនឡើងដែលអាចឈានទៅរកការផ្ទុះប្រដាប់អាវុធជាថ្មីរវាងសហរដ្ឋអាមេរិក និងអ៊ីរ៉ង់ ជុំវិញសំណុំរឿងច្រកសមុទ្រហ័រមូស (Hormuz)។

ច្រកសមុទ្រហ័រមូស (Hormuz) ត្រូវបានអ៊ីរ៉ង់ ចាប់យកជាចំណាប់ខ្មាំងតាំងពីថ្ងៃទី២៨ ខែកុម្ភៈ ជាថ្ងៃដំបូងនៃការផ្ទុះសង្គ្រាមអាមេរិក រួមនឹងអ៊ីស្រាអែល វាយប្រហារអ៊ីរ៉ង់។

ការវិលទៅរកការប្រឈមមុខយោធារវាងភាគីទាំងពីរ ត្រូវបានគេដឹងថា បានកើតឡើងបន្ទាប់ពីមានការកើនឡើងជាបន្តបន្ទាប់នៃសកម្មភាពគំរាមកំហែងយោធា និងការបរាជ័យនៃការចរចាសន្តិភាព។

ព្រឹត្តិការណ៍ដ៏គួរឱ្យកត់សម្គាល់នេះ ក៏បានកើតឡើងបន្ទាប់ពីអាមេរិក បានបាញ់ព្រមាន ហើយចាប់យកកប៉ាល់ដឹកទំនិញមួយគ្រឿងដែលពាក់ព័ន្ធនឹងអ៊ីរ៉ង់។ ភ្លាមៗ អ៊ីរ៉ង់បានចោទប្រកាន់អាមេរិក ថាបានរំលោភច្បាប់អន្តរជាតិ ហើយបានគំរាមសងសឹក។ ហេតុនេះបានធ្វើឲ្យបទឈប់បាញ់ដែលផុយស្រួយរួចមកហើយ ត្រូវដួលរលំដោយបង្កើនភាពតានតឹងឡើងវិញ។

មុនសកម្មភាពយោធាប្រឈមមុខគ្នារវាងគូភាគី ប្រធានាធិបតីសហរដ្ឋអាមេរិក លោក ដូណាល់ ត្រាំ ឱ្យដឹងកាលពីថ្ងៃអាទិត្យ ថា កងកម្លាំងសហរដ្ឋអាមេរិក បានស្ទាក់ចាប់កប៉ាល់ដឹកទំនិញមួយគ្រឿងដែលពាក់ព័ន្ធនឹងអ៊ីរ៉ង់ នៅក្នុងឈូងសមុទ្រអូម៉ង់ បន្ទាប់ពីនាវានោះមិនគោរពតាមបម្រាមរបស់កងទ័ពជើងទឹកអាមេរិក។

ប្រធានាធិបតី ដូណាល់ ត្រាំ (Donald Trump) បានអះអាងតាមបណ្ដាញសង្គម Truth Social ថា កប៉ាល់ដែលមានឈ្មោះ TOUSKA បានព្យាយាមឆ្លងកាត់របាំងបិទផ្លូវទឹកដោយកងនាវាចម្បាំងរបស់អាមេរិក ប៉ុន្តែត្រូវបានរារាំងដោយកងទ័ពជើងទឹកអាមេរិក។

លោកបានបន្ថែមថា នាវាពិឃាដបំពាក់ដោយមីស៊ីល USS Spruance បានអន្តរាគមន៍ស្ទាក់ចាប់កប៉ាល់នោះ និងផ្តល់ការព្រមានឲ្យបញ្ឈប់ការបើកទម្លុះរបាំងរបស់នាវាចម្បាំងអាមេរិក។

ហេតុការណ៍នេះ បង្ហាញពីភាពតានតឹងដ៏ផុយស្រួយនៅលើផ្លូវទឹកសំខាន់ៗ និងជាហេតុធ្វើឲ្យជម្លោះរវាងភាគីទាំងពីរឡើងក្នុងកម្រិតខ្លាំងឡើងវិញ។

លោក ត្រាំ បានបន្ថែមថា ក្រុមនាវិក TOUSKA បានបដិសេធមិនស្តាប់ទៅតាមបទបញ្ជារបស់ទ័ពជើងទឹកអាមេរិក ដូច្នេះកងទ័ពជើងទឹកអាមេរិកក៏បានបញ្ឈប់កប៉ាល់នោះភ្លាមៗ ដោយវាយប្រហារជាការគំរាមលើកប៉ាល់នោះឱ្យឈប់ជាបន្ទាន់។

លោក ត្រាំ មានប្រសាសន៍ថា ឥឡូវនេះ កងម៉ារីនអាមេរិកមានសិទ្ធិគ្រប់គ្រងកប៉ាល់នេះ។ លោកបានបន្តលើកឡើងថា យើងមានសិទ្ធិគ្រប់គ្រងពេញលេញលើកប៉ាល់នេះ ហើយកំពុងរង់ចាំមើលថាមានអ្វីនៅលើកប៉ាល់នេះផងដែរ។

បន្ទាប់ពីការវាយប្រហារ និងរឹបអូសយកកប៉ាល់អ៊ីរ៉ង់ ដោយកម្លាំងទ័ពជើងទឹកអាមេរិក អ៊ីរ៉ង់បានបង្ហាញពីប្រតិកម្មយ៉ាងខ្លាំងចំពោះហេតុការណ៍នេះ ដោយចាត់ទុកសកម្មភាពរបស់អាមេរិកថាជាអំពើចោរសមុទ្រដោយប្រើកម្លាំងយោធា និងជាការរំលោភលើបទឈប់បាញ់។

មន្ត្រីយោធារបស់ទីក្រុងតេហេរ៉ង់ បានបញ្ជាក់ថា អ៊ីរ៉ង់នឹងមិននៅស្ងៀមឡើយ ហើយនឹងមានការឆ្លើយតបវិញយ៉ាងខ្លាំងក្នុងពេលឆាប់ៗនេះ។ ពួកគេអះអាងថា កងកម្លាំងអាមេរិកបានបើកការបាញ់ប្រហារទៅលើកប៉ាល់របស់អ៊ីរ៉ង់ ហើយបន្ទាប់មកបានដាក់កម្លាំងម៉ារីនឡើងលើកប៉ាល់នោះ ដើម្បីគ្រប់គ្រងវា ដែលធ្វើឲ្យប្រព័ន្ធរុករកត្រូវបានផ្អាកដំណើរការ។ អ៊ីរ៉ង់ក៏បានបន្ថែមថា កប៉ាល់នោះកំពុងធ្វើដំណើរពីប្រទេសចិន មកកាន់អ៊ីរ៉ង់ ហើយមិនមានគោលបំណងយោធាអ្វីឡើយ។

ហេតុការណ៍នេះបានកើតឡើងក្នុងពេលដែលការចរចាជុំទី២ រវាងភាគីទាំងពីរ ត្រូវបានរំពឹងថានឹងចាប់ផ្តើមនៅទីក្រុង Islamabad បានធ្វើឲ្យស្ថានភាពកាន់តែតានតឹង និងបង្កការព្រួយបារម្ភថាជម្លោះអាចនឹងកើនឡើងទៅកាន់ការប៉ះទង្គិចធំជាងនេះ។

ប៉ុន្មានម៉ោងបន្ទាប់ពីការផ្ទុះឡើងនូវប្រតិកម្មពីសំណាក់ទីក្រុងតេហេរ៉ង់ នៅពេលនេះ គេបានដឹងថាពាក្យសម្ដីគំរាមកំហែងរបស់របបនៅអ៊ីរ៉ង់ ថានឹងសងសឹកទៅលើអាមេរិកវិញ បានក្លាយជារឿងពិតប្រាកដមែន។

អ៊ីរ៉ង់ អះអាងថា យន្តហោះគ្មានមនុស្សបើករបស់អ៊ីរ៉ង់ បានវាយរុញច្រាននាវាចម្បាំងអាមេរិកដែលឡោមព័ទ្ធច្រកសមុទ្រហ័រមូស (Hormuz)។

មិនយូរប៉ុន្មានបន្ទាប់ពីការព្រមាន “ការសងសឹក” ទីភ្នាក់ងារព័ត៌មាន Tasnim News Agency បានរាយការណ៍ថា អ៊ីរ៉ង់បានចាប់ផ្តើមឆ្លើយតបដោយបើកការវាយប្រហារដោយយន្តហោះគ្មានមនុស្សបើកទៅលើនាវាចម្បាំងអាមេរិក ខណៈទូរទស្សន៍រដ្ឋ Press TV ក៏បានបញ្ជាក់ដូចគ្នាថា កងទ័ពជើងទឹកអ៊ីរ៉ង់ បានបើកការបាញ់ប្រហារដោយដ្រូនទៅកាន់គោលដៅនាវាចម្បាំងរបស់អាមេរិកនៅតំបន់សមុទ្រអូម៉ង់។

ព្រឹត្តិការណ៍នេះមានន័យថា ជម្លោះបានផ្លាស់ប្ដូរពីការប្រឈមមុខតាមសមុទ្រទៅជាការប្រើអាវុធដោយផ្ទាល់រវាងភាគីទាំងពីរ ដែលបង្កើនហានិភ័យនៃការប៉ះទង្គិចយោធាទ្រង់ទ្រាយធំ។

ការវាយប្រហារដោយដ្រូន បង្ហាញថា អ៊ីរ៉ង់ចាប់ផ្តើមអនុវត្តសកម្មភាពសងសឹកជាក់ស្តែង មិនត្រឹមតែការគំរាមទេ ហើយវាអាចនាំឲ្យមានការឆ្លើយតបបន្ថែមពីសហរដ្ឋអាមេរិក ដែលធ្វើឲ្យស្ថានភាពនៅឈូងសមុទ្រអូម៉ង់ (Oman) និងតំបន់ជុំវិញកាន់តែអស្ថិរភាព។

យ៉ាងណា របាយការណ៍នេះមិនបានផ្តល់ព័ត៌មានលម្អិតបន្ថែមអំពីទំហំនៃការវាយប្រហារ ឬការខូចខាតណាមួយដែលអាចកើតមានចំពោះនាវាចម្បាំងអាមេរិកនោះទេ។

ភ្លាមៗបន្ទាប់ពីហេតុការណ៍នេះ កងទ័ពជើងទឹកសហរដ្ឋអាមេរិក បានដាក់កម្លាំងរបស់ខ្លួនឱ្យស្ថិតនៅក្នុងស្ថានភាពប្រុងប្រយ័ត្នខ្ពស់ និងបង្កើនការល្បាតនៅជុំវិញតំបន់សមុទ្រសំខាន់ៗ ដូចជា ច្រកសមុទ្រហ័រមូស (Hormuz) និងឈូងសមុទ្រអូម៉ង់ (Oman) ដើម្បីតាមដានសកម្មភាពយោធារបស់អ៊ីរ៉ង់។

ចំណែកអ៊ីរ៉ង់ វិញ បានបន្តចោទប្រកាន់សហរដ្ឋអាមេរិក ថាជាអ្នកបង្កហេតុ និងបានព្រមានថានឹងមានការឆ្លើយតបបន្ថែមទៀត ប្រសិនបើអាមេរិកបន្តវាយប្រហារលើនាវារបស់អ៊ីរ៉ង់។

ស្ថានការណ៍វិវត្តនេះ បានធ្វើឲ្យការដឹកជញ្ជូនតាមច្រកសមុទ្រមានហានិភ័យខ្ពស់ ដោយនាវាដឹកប្រេង និងនាវាពាណិជ្ជកម្មជាច្រើន ត្រូវបានណែនាំឲ្យកាត់បន្ថយការឆ្លងកាត់តំបន់នោះ។ ទន្ទឹមនឹងនេះ ការចរចាសន្តិភាពរវាងគូភាគី ក៏ត្រូវបានផ្អាក ឬពន្យារពេល ដោយសារភាពតានតឹងយោធាបានកើនឡើងវិញ។

ចំពេលដែលស្ថានការណ៍តានតឹងបានវិលត្រឡប់មកវិញនៅច្រកសមុទ្រតំបន់មជ្ឈិមបូព៌ា នៅខណៈនេះមានសេចក្ដីរាយការណ៍ថា តម្លៃប្រេងឆៅប្រភេទ Brent បានកើនឡើងប្រហែល ៦% ដែលឡើងដល់ជិត ៩៦ដុល្លារក្នុងមួយបារ៉ែល ដោយសារការព្រួយបារម្ភថាការដឹកជញ្ជូនប្រេងតាមច្រកសមុទ្រហ័រមូស (Hormuz) អាចទទួលរងការវាយប្រហារ៕

សហរដ្ឋអាមេរិករឹបអូសកប៉ាល់អ៊ីរ៉ង់ ចំណែកអ៊ីរ៉ង់ចោទអាមេរិកថាជាចោរសមុទ្រ រួមទាំងគំរាមសងសឹកវិញ

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

មេបញ្ជាការកងទ័ពអាមេរិកបង្ហាញផែនការថ្មីបើកប្រតិបត្តិការវាយប្រហារអ៊ីរ៉ង់លើកទីពីរ

ប្រធានាធិបតីសហរដ្ឋអាមេរិក អះអាងថាអ៊ីរ៉ង់ប្រាប់ថាទីក្រុងតេហេរ៉ង់ នឹងដួលរលំឆាប់ៗ

ច្រកសមុទ្រហ័រមូស នៅតែមិនទាន់មានសេរីភាពធ្វើនាវាចរណ៍សម្រាប់កប៉ាល់ដឹកប្រេងពីមជ្ឈិមបូព៌ា

អ៊ីរ៉ង់បញ្ជូនសំណើបញ្ឈប់ការឡោមព័ទ្ធច្រកសមុទ្រហ័រមូស និងបញ្ចប់សង្គ្រាមទៅកាន់សហរដ្ឋអាមេរិក

លោក ដូណាល់ ត្រាំ ព្រមានពីរលកនៃការវាយប្រហារថ្មី ប្រសិនបើកិច្ចព្រមព្រៀងជាមួយអ៊ីរ៉ង់បរាជ័យ

លោក ត្រាំ ជឿថាការចរចាអាចមានវិញនៅ ៣ថ្ងៃទៀត តែអ៊ីរ៉ង់ថាទាល់តែអាមេរិកបើកផ្លូវសមុទ្រឡើងវិញ

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន