នាយកមជ្ឈមណ្ឌលឯកសារកម្ពុជា លោក ឆាំង យុ ចាត់ទុកការមន្ទិលសង្ស័យលើកងកម្លាំងប្រដាប់អាវុធប្រទេសកម្ពុជា ពាក់ព័ន្ធនឹងការបាត់ទង់ជាតិមួយផ្ទាំងពីដងទង់នៅតាមព្រំដែន គឺជាអំពើពុតត្បុតថៃ ដែលមានចេតនាបង្ករឿងជាមួយប្រទេសកម្ពុជា ជុំវិញបញ្ហាព្រំដែន ខណៈរាជរដ្ឋាភិបាលកម្ពុជានៅតែបង្ហាញនូវជំហរដ៏ម៉ឺងម៉ាត់ក្នុងការដោះស្រាយវិវាទព្រំដែនតាមរយៈវិធានការទូតដោយសន្តិវិធី និងសន្តិភាព។
លោក ឆាំង យុ សរសេរលើទំព័រហ្វេសប៊ុករបស់ខ្លួននៅថ្ងៃទី២២ មេសា នេះ ដោយចោទថា កងទ័ពថៃ កំពុងធ្វើមិនដឹងមិនឮអំពីភាពពុតត្បុតក្នុងពេលដែលពួកគេទាមទារកាន់កាប់លើទីតាំងព្រំដែន រួមទាំងតំបន់ជាទីសក្ការៈរបស់កម្ពុជា ទាំងដែលពួកគេកំពុងកាន់កាប់ដោយខុសច្បាប់លើដែនអធិបតេយ្យរបស់ភាគីដែលខ្លួនកំពុងចោទប្រកាន់រហូតមកនោះ។
អ្នកស្រាវជ្រាវឯកសារប្រវត្តិសាស្ត្រខ្មែរក្រហមរូបនេះលើកឡើងថា ពេលនេះកងទ័ពថៃ កំពុងផ្ទុះកំហឹង ដោយសារតែការបាត់ទង់ជាតិមួយផ្ទាំង ដូច្នេះថ្ងៃក្រោយ បើថៃ បាត់ដើមឈើមួយដើម ឬវត្ថុបុរាណណាមួយផ្សេងទៀតចេញពីដែនអធិបតេយ្យរបស់គេ ប្រហែលជាអាចត្រូវប្រើធ្វើជាលេសដើម្បីបង្កឱ្យមានជម្លោះប្រដាប់អាវុធទ្រង់ទ្រាយធំជាមួយប្រទេសកម្ពុជា ក៏អាចថាបាន។
នាយកមជ្ឈមណ្ឌលឯកសារកម្ពុជារូបនេះ បញ្ជាក់ថា ការសម្ដែងការខឹងសម្បាខុសរឿងដែលគួរឱ្យអស់សំណើចរបស់កងទ័ពថៃ ក្នុងកាលៈទេសៈនេះ រាជរដ្ឋាភិបាលកម្ពុជានៅតែបង្ហាញនូវជំហរដ៏ម៉ឺងម៉ាត់ក្នុងការដោះស្រាយវិវាទព្រំដែនតាមរយៈវិធានការទូតដោយសន្តិវិធី និងសន្តិភាព ដើម្បីទទួលបានជ័យជម្នះជាស្ថាពរ។
កាលពីថ្ងៃទី២១ ខែមេសា កាសែតថៃ ខៅស៊ុត បានស្រង់សម្ដីរដ្ឋមន្ត្រីការពារជាតិថៃ លោក អាឌុល ប៊ុនថាំចារ៉ើន ថាអាជ្ញាធរត្រូវតែធ្វើការស៊ើបអង្កេតករណីបាត់ទង់ជាតិថៃ មួយផ្ទាំង នៅក្បែរព្រំដែនកម្ពុជា ទោះបីជាមន្ត្រីយោធាកម្ពុជាបញ្ជាក់ថា កងទ័ពរបស់ពួកគេមិនពាក់ព័ន្ធក៏ដោយ។
រដ្ឋមន្ត្រីការពារជាតិថៃ រូបនេះបញ្ជាក់ថា ទោះភាគីកម្ពុជាបានបដិសេធមិនពាក់ព័ន្ធនឹងការបាត់ទង់ជាតិនេះក៏ដោយ ប៉ុន្តែអាជ្ញាធរថៃ ត្រូវតែស៊ើបអង្កេតដោយខ្លួនឯង ព្រោះថៃ មិនអាចទុកចិត្តទៅលើពាក្យសម្ដីភាគីម្ខាងនោះទេ ក្នុងនោះ កងទ័ពថៃ ក៏ត្រូវតែដាក់ពង្រាយដើម្បីត្រួតពិនិត្យដែរ។
ចំណែកអ្នកនាំពាក្យកងទ័ពជើងទឹកថៃ ឧត្ដមនាវីត្រី បារ៉ាត់ រ៉ាត់ណាឆៃយ៉ាផាន់ (Parat Rattanachaiyaphan) បានសរសេរនៅលើបណ្ដាញសង្គមរបស់កងទ័ពជើងទឹកថៃ កាលពីថ្ងៃចន្ទ ទី២០ ខែមេសា ថា កងកម្លាំងយោធាថៃ ក្នុងខេត្តចន្ទបុរី បានស៊ើបអង្កេត និងស្វែងរកភស្តុតាងដើម្បីកំណត់មុខអ្នកដែលធ្វើសកម្មភាពចូលទៅលួចដកទង់ជាតិថៃ។
អ្នកនាំពាក្យកងទ័ពជើងទឹកថៃ រូបនេះ ព្រមានចាត់វិធានការតបតនឹងភាគីកម្ពុជា ក្នុងករណីស្រាវជ្រាវរកឃើញថា កម្ពុជាជាអ្នកចូលទៅលួចដកទង់ជាតិថៃ នៅតំបន់ព្រំដែននេះ។
តាមទូរទស្សន៍ថៃ PBS កងទ័ពថៃ មិនបានប្រើពាក្យចោទដោយគ្មានព័ស្តុតាង ថាទាហានខ្មែរជាអ្នកប្រព្រឹត្តទង្វើនោះទេ ប៉ុន្តែគេនិយាយថា គេសង្ស័យថាអាចមានទាក់ទិននឹងយោធាខ្មែរ ហើយថាគេនឹងស៊ើបអង្កេតឲ្យដឹងរឿងពិត។
កាលពីថ្ងៃទី១៨ ខែមេសា ឆ្នាំ២០២៦ ហេតុការណ៍បាត់ទង់ជាតិថៃ មួយផ្ទាំង នៅតំបន់មានអូរបត់បែនរាងអក្សរ U ក្បែរព្រំដែនប្រទេសទាំងពីរ គឺស្ថិតក្នុងភូមិផាក់កាត ស្រុកពុងណាំរ៉ុន ខេត្តចន្ទបុរី ប្រទេសថៃ ជាប់ខេត្តប៉ៃលិន ប្រទេសកម្ពុជា។
ជុំវិញបញ្ហានេះ កងកម្លាំងកម្ពុជា បានអះអាងថា ហេតុការណ៍បាត់ដងទង់ជាតិថៃ នៅតំបន់រាងអក្សរ U ក្បែរព្រំដែនកម្ពុជា-ថៃ ក្នុងខេត្តចន្ទបុរី មិនពាក់ព័ន្ធនឹងកម្ពុជាឡើយ ប៉ុន្តែវាបានកើតឡើងដោយសារគ្រោះធម្មជាតិ ដ្បិតប៉ុន្មានថ្ងៃចុងក្រោយនេះមានភ្លៀងធ្លាក់ និងខ្យល់កួចយ៉ាងខ្លាំង។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ជំរុញឱ្យរដ្ឋាភិបាលកម្ពុជា ត្រូវតែប្តឹងថៃ ទៅតុលាការអន្តរជាតិ ប្រើវិធានការទប់ស្កាត់ភាពគឃ្លើនរបស់ភាគីថៃ លើដីជាក់ស្តែង និងដំឡើងកម្រិតការទូតឱ្យកាន់តែខ្ពស់ ដើម្បីការពារអធិបតេយ្យជាតិរបស់ខ្លួន កុំឱ្យមានការបង្កជម្លោះ និងការឈ្លានពានពីភាគីថៃ បន្តទៀត។
ព័ត៌មានដោយឡែកទាក់ទងនឹងភាពតានតឹងតាមព្រំដែនដែរ ប៉ុន្តែនៅក្នុងខេត្តស្រះកែវ។ កាសែតបាងកកប៉ុស្តិ៍ ផ្សាយកាលពីថ្ងៃអង្គារ ទី២១ ខែមេសា ដោយស្រង់សេចក្តីរាយការណ៍ពីយោធាថៃ ថាភាគីខ្មែរបានពង្រាយទាហានប៉ុន្មានថ្ងៃមុននៅតំបន់ទល់មុខភូមិបានណងចាន់ និងឃុំណនម៉ាក់មឿន ស្រុកគោកស៊ូង តាមបណ្តោយផ្លូវក-៥ ដោយមានជីកលេណដ្ឋានផង។
តាមកាសែតដដែល យោធាថៃ បានសង្កេតឃើញមានសកម្មភាពចល័តទ័ពនៅភូមិទល់មុខបានណងចាន់ និងបានណងយ៉ាកែវ ដែលគេថាយោធាបានដណ្តើមយកទៅកាន់កាប់វិញក្នុងរយៈពេលមានជម្លោះព្រំដែនប្រដាប់អាវុធកន្លងទៅនោះ។
ក្នុងពេលជាមួយគ្នានោះ យោធាថៃ ផ្នែកដោះមីន បានរកឃើញ ហើយដោះមីនកម្ទេចមនុស្សប្រភេទ PMN ចំនួន ៧គ្រាប់ថ្មីៗថែមទៀតនៅភូមិបានណងចាន់។
ហេតុការណ៍មួយទៀតកើតឡើងនៅខេត្តស្រះកែវ នោះដែរ ផ្សាយដោយកាសែតបាងកកប៉ុស្តិ៍ នៅថ្ងៃទី១៣ ខែមេសា គឺប៉ូលិសថៃ កំពុងស៊ើបអង្កេតករណីនាយកទូរទស្សន៍បញ្ចាំងរឿងភាគឯកសារម្នាក់ឈ្មោះ កានរ៉ាពី ដែលរាយការណ៍ប្រាប់ប៉ូលិសថា ខ្លួនបានចាញ់បោកជនឆបោកដែលបញ្ឆោតឲ្យខ្លួនចូលទៅក្នុងដីខ្មែរនៅប៉ោយប៉ែត ហើយបង្ខំឲ្យបើកគណនីផ្ទេរប្រាក់ បង្ខាំងទុកកន្លែងមួយអស់រយៈពេល ២អាទិត្យ ទើបដោះលែងវិញ៕
© 2026, ឌឹ ខេមបូឌា ដេលី. All rights reserved.