សង្គ្រាមនៅច្រកសមុទ្រហ័រមូស៖ អ៊ីរ៉ង់មិនទៅចរចានៅប៉ាគីស្ថាន លោក ត្រាំ សម្រេចបន្តពេលឈប់ប្រយុទ្ធគ្នា

ខណៈខ្សែភ្នែកពិភពលោកកំពុងផ្ដោតទៅលើលទ្ធភាពដែលអាចទៅរួចនៃកិច្ចចរចាបទឈប់បាញ់រវាងទីក្រុងវ៉ាស៊ីនតោន និងទីក្រុងតេហេរ៉ង់ និងខណៈមជ្ឈដ្ឋានខ្លះដាក់ក្តីរំពឹងថា សន្តិភាពនៅតំបន់មជ្ឈិមបូព៌ាអាចនឹងរះឡើងវិញ ហើយអស្ថិរភាពនៃសេដ្ឋកិច្ចសកលក៏នឹងត្រូវបានបញ្ឈប់ផងដែរនោះ ក្តីសង្ឃឹមនេះដូចជាមិនក្លាយជាការពិតទេ ពីព្រោះអ៊ីរ៉ង់ បានបដិសេធមិនបញ្ជូនក្រុមចរចារបស់ខ្លួនទៅកាន់ទីក្រុងអ៊ីស្លាម៉ាបាដ ដើម្បីបន្តការចរចានៅសប្តាហ៍នេះឡើយ។

ទីក្រុងតេហេរ៉ង់ ដាក់លក្ខខណ្ឌថា លោក ដូណាល់ ត្រាំ (Donald Trump) ត្រូវលុបចោលការឡោមព័ទ្ធច្រកសមុទ្រហ័រមូស (Hormuz) ជាមុនសិន។ ក្នុងរយៈពេល ២៤ម៉ោងនេះ កងកម្លាំងអ៊ីរ៉ង់ បានវាយប្រហារទៅលើកប៉ាល់ជំនួញជាច្រើនគ្រឿងដែលបើកឆ្លងកាត់ច្រកហ័រមូស ដោយមិនទាក់ទងអ៊ីរ៉ង់ ជាមុន។

ចំណែកភាគីសហរដ្ឋអាមេរិក ដំណាលពេលគ្នានេះ ខាងលោក ដូណាល់ ត្រាំ បែរជាបានបង្ហាញថា ការចរចាកម្រិតខ្ពស់ជាមួយអ៊ីរ៉ង់ អាចនឹងចាប់ផ្តើមឡើងវិញក្នុងពេលឆាប់ៗនេះ ប៉ុន្តែមានភាពមិនច្បាស់លាស់អំពីពេលវេលា និងផែនការពិតប្រាកដ។

កាលពីថ្ងៃអង្គារ លោក ដូណាល់ ត្រាំ បានលើកឡើងថា លោកមិនមានគម្រោងបើកច្រកសមុទ្រនោះទេ រហូតដល់ភាគីទាំងពីរឈានដល់កិច្ចព្រមព្រៀងរួមជាមួយគ្នា។ ការណ៍នេះ បាននាំឱ្យមានភាពជាប់គាំងការចរចា ដែលទីក្រុងតេហេរ៉ង់ និងទីក្រុងវ៉ាស៊ីនតោន បានបង្ហាញពីជំហររឹងរូសរៀងៗខ្លួន។ ទីក្រុងតេហេរ៉ង់ មិនទុកចិត្តទីក្រុងវ៉ាស៊ីនតុន ហើយក៏បន្តពង្រឹងកម្លាំងទ័ពរបស់ខ្លួនដោយស្ងាត់ៗដែរ ដោយសាររុស្ស៊ី ឲ្យការណ៍ថា ក្រុងវ៉ាស៊ីនតុន និងអ៊ីស្រាអែល អាចនឹងយកពេលផ្អាកប្រយុទ្ធគ្នានេះវាយលុកចូលប្រទេសអ៊ីរ៉ង់។

បើទោះបីជាស្ថានភាពកំពុងជាប់គាំងក៏ដោយ លោក ដូណាល់ ត្រាំ បានផ្តល់ហេតុផលខ្លះ ដោយបង្ហាញពីការប្រែប្រួលជំហររបស់ខ្លួន។ បន្ទាប់ពីបាននិយាយថាមិនមានបំណងបន្តបទឈប់បាញ់ជាលើកទីពីរ លោកក៏បានសម្រេចបន្តបទឈប់បាញ់ ដោយការណ៍នេះបានបង្កើតភាពមិនស្របគ្នានៅក្នុងសារនយោបាយរបស់សេតវិមាន។

នៅរដ្ឋធានីវ៉ាស៊ីនតុន ក្នុងពេលនេះ ការស្ទង់មតិពលរដ្ឋអាមេរិកាំងពីមជ្ឈដ្ឋានស្រាវជ្រាវជាច្រើនឲ្យដឹងថា ប្រជាប្រិយភាពលោក ត្រាំ ជាមួយពលរដ្ឋអាមេរិកាំងធ្លាក់ចុះពីជាង ៦០% ទៅ ៧០% គិតតាំងពីរឿងធ្វើចម្បាំង រឿងសេដ្ឋកិច្ច រឿងអតិផរណា និងរឿងអន្តោប្រវេសន៍។

លោក ត្រាំ ពន្យល់ថា ការសម្រេចចិត្តនេះ គឺធ្វើឡើងដើម្បីបំពេញចិត្តប្រជាជនប៉ាគីស្ថាន មិនមែនជាការសម្របសម្រួលជាផ្លូវការពីសហរដ្ឋអាមេរិកឡើយ។

ទោះជាយ៉ាងណា វាបានបង្ហាញយ៉ាងច្បាស់ពីភាពមិនច្បាស់លាស់នៃកិច្ចខិតខំប្រឹងប្រែងដើម្បីឈានទៅរកកិច្ចព្រមព្រៀងទូលំទូលាយមួយ ខណៈអ៊ីរ៉ង់ បានបដិសេធលក្ខខណ្ឌខាងសហរដ្ឋអាមេរិក សម្រាប់ការចរចា ទោះជាលោក ត្រាំ បានសម្រេចបន្តបទឈប់បាញ់គ្នាជាឯកតោភាគីក៏ដោយ។

លោក ត្រាំ បញ្ជាក់ថា លោកសម្រេចដូច្នេះ ព្រោះលោកធ្វើតាមសំណើសេនាប្រមុខកងទ័ពប៉ាគីស្ថាន។ នេះបើយោងតាមការចុះផ្សាយក្នុងប្រព័ន្ធផ្សព្វផ្សាយរដ្ឋអ៊ីរ៉ង់។

ចំពោះការបិទច្រកសមុទ្រហ័រមូស (Hormuz) នៃឈូងសមុទ្រពែក្ស៍ គ្រាន់តែជាចំណុចជាប់គាំងមួយក្នុងចំណោមបញ្ហាចម្បងជាច្រើន ដែលក្រុមចរចាពីសេតវិមានកំពុងប្រឈមមុខ។ ជាមួយគ្នានេះ ករណីដែលសហរដ្ឋអាមេរិក បានរឹបអូសកប៉ាល់របស់អ៊ីរ៉ង់ នៅឈូងសមុទ្រអូម៉ង់ កំពុងត្រូវបានអ៊ីរ៉ង់ ស្នើទៅកាន់អង្គការសហប្រជាជាតិ ឱ្យធ្វើអន្តរាគមន៍ដោះលែង។

កាលពីថ្ងៃអង្គារ អ៊ីរ៉ង់បានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិ ធ្វើអន្តរាគមន៍ បន្ទាប់ពីសហរដ្ឋអាមេរិក បានរឹបអូសនាវាពាណិជ្ជកម្មអ៊ីរ៉ង់ មួយគ្រឿង និងឃុំខ្លួននាវិកជាមួយក្រុមគ្រួសាររបស់ពួកគេ។ ទីក្រុងតេហេរ៉ង់ បានពណ៌នាសកម្មភាពនេះថាជាការរំលោភលើបទឈប់បាញ់គ្នា។

នៅក្នុងលិខិតមួយផ្ញើទៅកាន់អគ្គលេខាធិការអង្គការសហប្រជាជាតិ លោក António Guterres ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani បានបញ្ជាក់ថា ការរឹបអូសនាវា Toska កាលពីដើមសប្តាហ៍នេះ គឺជា «ការរំលោភបំពានយ៉ាងច្បាស់លាស់ និងជាក់ស្តែង» លើកិច្ចព្រមព្រៀងផ្អាកប្រយុទ្ធគ្នា។

ការរឹបអូសយកនាវាពាណិជ្ជកម្មរបស់អ៊ីរ៉ង់ ក៏ដូចជាការបិទផ្លូវនៅច្រកសមុទ្រហ័រមូស (Hormuz) គឺជាសម្ពាធដ៏មានសារសំខាន់ដែលមិនអាចនាំទីក្រុងតេហេរ៉ង់ ទៅកាន់តុចរចាជាមួយសហរដ្ឋអាមេរិក វិញបានទៀតឡើយ។

រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក Scott Bessent បាននិយាយថា កងទ័ពជើងទឹកសហរដ្ឋអាមេរិក នឹងបន្តយុទ្ធនាការដាក់សម្ពាធលើអ៊ីរ៉ង់ ដោយផ្ដោតលើការរឹតបន្តឹងពាណិជ្ជកម្មតាមសមុទ្រ និងកាត់បន្ថយប្រភពចំណូលសំខាន់ៗរបស់ទីក្រុងតេហេរ៉ង់។

លោក Scott Bessent បានបង្ហោះនៅលើបណ្ដាញគណនី X ថា សហរដ្ឋអាមេរិកនឹងបន្ត “បិទផ្លូវទឹក” កំពង់ផែអ៊ីរ៉ង់ ដែលលោកថាឃ្លាំងស្តុកប្រេងនៅកោះ Kharg នៃប្រទេសអ៊ីរ៉ង់ កំពុងរងសម្ពាធ ហើយអណ្តូងប្រេងអ៊ីរ៉ង់ ក៏ត្រូវបានប៉ះពាល់យ៉ាងខ្លាំងដែរ។

ទោះជាដូច្នេះក្តី ការប្រញាប់ប្រញាល់ទៅវាយប្រហារប្រទេសអ៊ីរ៉ង់ ដោយមិនបានផ្តល់ដំណឹងសភាអាមេរិកាំង និងពិគ្រោះជាមួយសម្ព័ន្ធមិត្តអាមេរិកាំងជាមុន ត្រូវបានពលរដ្ឋអាមេរិកាំងភាគច្រើនប្រឆាំងមិនគាំទ្រ ជាពិសេសនៅពេលសាំងឡើងថ្លៃ ពីព្រោះលំហូរប្រេងឥន្ធនៈចេញពីប្រទេសបូមប្រេងស្ទះនៅច្រកហ័រមូស។

អតីតឧត្ដមនាវី William McRaven អតីតមេបញ្ជាការនៃបញ្ជាការដ្ឋានកងកម្លាំងនាវាចរណ៍ពិសេស ប្រាប់ទូរទស្សន៍ MSNOW ពីមុន MSNBC ពីថ្ងៃអង្គារនេះ អំពីមេដឹកនាំថា៖ បើដឹកនាំប្រើកំហឹង មិនចេះអត់ធ្មត់ មិនបានគិតអំពីយុទ្ធសាស្ត្រទេ អ្នកនោះក៏នឹងបាត់បង់តម្លៃជាមនុស្សជាតិដែរ៕

សង្គ្រាមនៅច្រកសមុទ្រហ័រមូស៖ អ៊ីរ៉ង់មិនទៅចរចានៅប៉ាគីស្ថាន លោក ត្រាំ សម្រេចបន្តពេលឈប់ប្រយុទ្ធគ្នា

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

មេបញ្ជាការកងទ័ពអាមេរិកបង្ហាញផែនការថ្មីបើកប្រតិបត្តិការវាយប្រហារអ៊ីរ៉ង់លើកទីពីរ

ប្រធានាធិបតីសហរដ្ឋអាមេរិក អះអាងថាអ៊ីរ៉ង់ប្រាប់ថាទីក្រុងតេហេរ៉ង់ នឹងដួលរលំឆាប់ៗ

ច្រកសមុទ្រហ័រមូស នៅតែមិនទាន់មានសេរីភាពធ្វើនាវាចរណ៍សម្រាប់កប៉ាល់ដឹកប្រេងពីមជ្ឈិមបូព៌ា

អ៊ីរ៉ង់បញ្ជូនសំណើបញ្ឈប់ការឡោមព័ទ្ធច្រកសមុទ្រហ័រមូស និងបញ្ចប់សង្គ្រាមទៅកាន់សហរដ្ឋអាមេរិក

លោក ដូណាល់ ត្រាំ ព្រមានពីរលកនៃការវាយប្រហារថ្មី ប្រសិនបើកិច្ចព្រមព្រៀងជាមួយអ៊ីរ៉ង់បរាជ័យ

លោក ត្រាំ ជឿថាការចរចាអាចមានវិញនៅ ៣ថ្ងៃទៀត តែអ៊ីរ៉ង់ថាទាល់តែអាមេរិកបើកផ្លូវសមុទ្រឡើងវិញ

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន