អ្នកសង្កេតការណ៍លើកឡើងថា បើស្ថាប័នតុលាការមិនឯករាជ្យ ទោះនាយករដ្ឋមន្ត្រីបង្កើតក្រុមអ្នកច្បាប់ក្នុងគោលបំណងផ្តល់ជំនួយផ្នែកច្បាប់ដល់ពលរដ្ឋ និងប្រព័ន្ធយុត្តិធម៌យ៉ាងណាក៏ដោយ ក៏ការអនុវត្តច្បាប់នៅតែគ្មានប្រសិទ្ធភាពដែរ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី៣១ មីនា នេះថា បើស្ថាប័នតុលាការមិនឯករាជ្យ នោះការអនុវត្តច្បាប់ប្រាកដជារងនូវឥទ្ធិពលរបស់អ្នកមានអំណាចដដែល។
លោកបន្តថា ពួកគេនៅតែអាចលូកដៃកកូរកកាយប្រព័ន្ធយុត្តិធម៌បានគ្រប់ពេលតាមរយៈទំនាក់ទំនងរបស់អ្នកទាំងនោះជាមន្ត្រីអនុវត្តច្បាប់ ដូចជា អ្នកដែលមានគោរមងារជាឯកឧត្តម លោកជំទាវ អ្នកឧកញ៉ា និងក្រុមមហាសេដ្ឋីមួយចំនួន ជាដើម។
លោក សេក សុជាតិ លើកឡើងថា ភស្តុតាងជាក់ស្តែង ក្រុមប្រព្រឹត្តអំពើឆបោកដែលមានអង្គការចាត់តាំងដែលគេសង្ស័យថាមានអ្នកមានឥទ្ធិពលនៅពីក្រោយខ្នង ដូចជាករណីឆបោករបស់អតីតឧកញ៉ា ឡេង ចាន់ណា ករណីឆបោកក្រុមហ៊ុនភូមិខ្មែរ និងករណីឆបោកមួយចំនួននៅខេត្តកំពត ជាដើម នៅតែមិនអាចផ្តល់យុត្តិធម៌ជូនពលរដ្ឋរងគ្រោះឱ្យបានពេញលេញ ទោះមានក្រុមអ្នកច្បាប់របស់អតីតនាយករដ្ឋមន្ត្រីលោក ហ៊ុន សែន ដែលត្រូវបានបង្កើតឡើងហើយក៏ដោយ។
ប្រភពដដែលបញ្ជាក់ថា ដើម្បីលើកកម្ពស់ការអនុវត្តច្បាប់ ឬលើកកម្ពស់ប្រព័ន្ធយុត្តិធម៌របស់កម្ពុជា និងដើម្បីបង្កើនថាមពលក្នុងវិស័យច្បាប់ គ្មានអ្វីក្រៅពីកែសម្រួលលើកស្ទួយឱ្យស្ថាប័នតុលាការឯករាជ្យនោះទេ ហើយបើស្ថាប័ននេះឯករាជ្យ ក៏មិនពិបាកនាយករដ្ឋមន្ត្រីបង្កើតក្រុមអ្នកច្បាប់ជួយពលរដ្ឋនោះដែរ។
ការលើកឡើងរបស់លោក សេក សុជាតិ គឺនៅបន្ទាប់ពីលោក ហ៊ុន ម៉ាណែត សរសេរលើទំព័រហ្វេសប៊ុករបស់ខ្លួននៅថ្ងៃទី៣១ មីនា នេះថា លោកសម្រេចបង្កើតក្រុមអ្នកច្បាប់របស់នាយករដ្ឋមន្ត្រី ក្នុងបំណងផ្តល់ជំនួយផ្នែកច្បាប់ជូនពលរដ្ឋដែលពុំមានលទ្ធភាពពឹងពាក់សេវាវិជ្ជាជីវៈច្បាប់ ហើយក៏ជាយន្តការបំពេញបន្ថែមសំដៅបង្កើនសហថាមពលក្នុងវិស័យច្បាប់ និងយុត្តិធម៌របស់កម្ពុជាផងដែរ។
កាលពីថ្ងៃទី២៩ ខែមីនា ក្រុមអ្នកច្បាប់របស់លោក ហ៊ុន ម៉ាណែត បានរៀបចំពិធីប្រកាសសមាសភាពជាផ្លូវការដែលមានលោក ម៉ុក ចន្ទសុធា ជាប្រធាន។
យ៉ាងណា ក្រុមអ្នកសង្កេតការណ៍លើកឡើងថា ទោះលោក ហ៊ុន ម៉ាណែត បង្កើតក្រុមអ្នកច្បាប់ក្រោមហេតុផលដើម្បីជួយពលរដ្ឋដែលខ្វះលទ្ធភាពពឹងពាក់សេវាផ្នែកច្បាប់ក៏ដោយ ក៏ពលរដ្ឋនៅតែមិនមានទំនុកចិត្តដែរ ព្រោះករណីពលរដ្ឋរងគ្រោះដោយសារអំពើឆបោករបស់ក្រុមហ៊ុនឧកញ៉ាមួយចំនួនមិនត្រូវបានផ្តល់យុត្តិធម៌នោះឡើយ។
គម្រោងយុត្តិធម៌ពិភពលោក (The World Justice Project) បានចេញរបាយការណ៍របស់ខ្លួនកាលពីពេលថ្មីៗនេះ ស្ដីពីនីតិរដ្ឋថា កម្ពុជាជាប់ចំណាត់ថ្នាក់លេខរៀងទី១៤១ ក្នុងចំណោម ១៤២ប្រទេស ដែលមាននីតិរដ្ឋទាបបំផុត ដោយសារតែគេរកឃើញថាការដឹកនាំរបស់រដ្ឋាភិបាលកម្ពុជាគ្មានតម្លាភាព ពោរពេញទៅដោយអំពើពុករលួយ និងការមិនធានាបានឯករាជភាពនៃប្រព័ន្ធយុត្តិធម៌របស់ខ្លួន ជាដើម៕
© 2025, ឌឹ ខេមបូឌា ដេលី. All rights reserved.