សិស្សានុសិស្សជាច្រើននៅតាមសាលារៀនទូទាំងប្រទេសអ៊ីរ៉ង់ ក្នុងសប្តាហ៍នេះ បានប្រមូលផ្ដុំគ្នាចូលរួមយ៉ាងភ្លូកទឹកភ្លូកដីដើម្បីប្រឆាំងនឹងវិធានការគ្រប់គ្រងពីរដ្ឋាភិបាលរបស់ពួកគេ។ នេះបើតាមគេហទំព័រសារព័ត៌មាន Iran International ចុះផ្សាយនៅថ្ងៃទី២៦ ខែកុម្ភៈ ឆ្នាំ២០២៦។
សកម្មភាពនៃការប្រមូលផ្ដុំគ្នាតវ៉ាប្រឆាំងនឹងរបប អាយ៉ាតូឡា អាលី ខាមេនី ឬរបបសាធារណរដ្ឋឥស្លាមិកអ៊ីរ៉ង់ នេះ ត្រូវបានគេដឹងថាបានផ្ទុះឡើងនៅតាមបណ្តាវិទ្យាល័យ និងអនុវិទ្យាល័យជាច្រើនក្នុងគោលបំណងទាមទារសិទ្ធិ និងការបើកសិទ្ធិសេរីភាពទូលំទូលាយក្នុងការបញ្ចេញមតិអំពីបញ្ហាសង្គមជាតិ។
ការតវ៉ានេះ ត្រូវបានរៀបចំដោយសមាគមគ្រូបង្រៀនមួយដែលមានឈ្មោះថា “union-one”។ សមាគមនេះជាក្រុមគ្រូបង្រៀនឯករាជ្យដ៏ធំមួយដែលនៅតែបន្តសកម្មភាពប្រឆាំងនឹងរដ្ឋាភិបាលនៅក្នុងប្រទេស។
សមាជិក និងមេដឹកនាំរបស់ពួកគេបានប្រឈមមុខនឹងការគំរាមកំហែង ការឃុំខ្លួន និងការចូលពន្ធនាគារជាច្រើននាក់ ប៉ុន្តែការគំរាមកំហែងមិនបានរារាំងឆន្ទៈរបស់ពួកគេក្នុងការប្រឆាំងនឹងរដ្ឋាភិបាលសាធារណរដ្ឋឥស្លាមិកអ៊ីរ៉ង់ ឡើយ។ ពួកគេបន្តបណ្តុះបណ្តាល និងលើកស្ទួយសិស្សានុសិស្សឲ្យចូលរួមក្នុងសកម្មភាពសង្គម។ ការតវ៉ាពីសិស្សានុសិស្សនេះ បង្ហាញថាយុវជននៅអ៊ីរ៉ង់ ជាមនុស្សដើរទាន់សម័យ មានការរៀនសូត្រចេះដឹងខាងបច្ចេកវិទ្យា។
វីដេអូដែលផ្សព្វផ្សាយតាមអ៊ីនធឺណិត បានបង្ហាញពីសិស្សានុសិស្សភាគច្រើនជាក្មេងស្រី បានជួបជុំគ្នា និងច្រៀងចម្រៀងស្នេហាជាតិក្នុងសាមគ្គីភាពជាមួយជនរងគ្រោះ ដោយកងឆ្មាំបដិវត្តន៍នៃរបបសាធារណរដ្ឋឥស្លាមិកអ៊ីរ៉ង់ បាញ់សម្លាប់។
រដ្ឋមន្ត្រីក្រសួងយុត្តិធម៌ លោក Amir Hossein Rahimi បានទទួលស្គាល់ថា អនីតិជនមួយចំនួននៅតែត្រូវបានគ្រប់គ្រងក្នុងការឃុំខ្លួនដោយពាក់ព័ន្ធនឹងការតវ៉ា ហើយអាជ្ញាធរខិតខំធានាការដោះលែងអ្នកដែលមិនទាន់ពេញវ័យមួយចំនួន។
តាមសេចក្តីរាយការណ៍ពីអង្គការសិទ្ធិមនុស្ស ភាគច្រើននៃអ្នកស្លាប់ និងអ្នកចាប់ខ្លួនមានអាយុក្រោម ៣០ឆ្នាំ រួមទាំងសិស្សានុសិស្ស និងអនីតិជន។
អ្នកវិភាគ Abbas Abdi បានបញ្ជាក់ថា យុវជនជំនាន់ក្រោយប្រឈមមុខនឹងសម្ពាធច្រើន រួមទាំងការលំបាកខាងសេដ្ឋកិច្ច ការពង្រីកខុសគ្នារវាងច្បាប់ និងការខ្វះទស្សនវិស័យនយោបាយមួយត្រឹមត្រូវដើម្បីអនាគតយុវជន។ អ្នកវិភាគ Abbas Abdi បានព្រមានថា ប្រសិនបើសម្ពាធនេះមិនបានដោះស្រាយ វាអាចបង្កអស្ថិរភាពរយៈពេលវែងដល់សង្គម និងរដ្ឋាភិបាល។
ក្រៅពីការផ្ទុះឡើងនូវបាតុកម្មពីសំណាក់សិស្សានុសិស្សនៅតាមបណ្តាសាលារៀននានាទូទាំងប្រទេសអ៊ីរ៉ង់ គេក៏ឃើញនូវវត្តមានយ៉ាងគគ្រឹកគគ្រេងពីក្រុមនិស្សិតនៅសាកលវិទ្យាល័យមួយចំនួន បាននាំគ្នាធ្វើការតវ៉ាប្រឆាំងនឹងរដ្ឋាភិបាលរបស់ខ្លួនដែរ។
តាមតំណាងសិទ្ធិមនុស្សនៃក្រុមសិទ្ធិមនុស្ស Hrana ដែលមានមូលដ្ឋាននៅសហរដ្ឋអាមេរិក បានឱ្យដឹងថាមានអ្នកស្លាប់យ៉ាងហោចណាស់ ៧០០០នាក់ មានអ្នកតវ៉ាជាយុវជន និងមនុស្សវ័យចំណាស់ ៦៤៨៨នាក់ និងកុមារ ២៣៦នាក់។ សេចក្តីរាយការណ៍ខ្លះថាអ្នកស្លាប់ផ្សេងទៀតសរុបប្រហែល ១១០០០នាក់។
យ៉ាងណា ប្រធានាធិបតីសហរដ្ឋអាមេរិក ដូណាល់ ត្រាំ បាននិយាយថាមានអ្នកស្លាប់ប្រហែល ៣២០០០នាក់ ប៉ុន្តែរដ្ឋាភិបាលអ៊ីរ៉ង់ បានអះអាងថាចំនួនមនុស្សស្លាប់ត្រឹម ៣១១៧នាក់ប៉ុណ្ណោះ។
នៅពេលដែលសាកលវិទ្យាល័យត្រូវបានបើកដំណើរការឡើងវិញនៅថ្ងៃសៅរ៍សប្ដាហ៍មុននេះ និស្សិតជាច្រើនបាននាំគ្នាបន្តផ្ទុះបាតុកម្មនៅតាមសាកលវិទ្យាល័យជាច្រើនក្នុងទីក្រុងធំៗ ដូចជា តេហេរ៉ង់ Mashhad និង Isfahan។
តាមរយៈវីដេអូដែលផ្ទៀងផ្ទាត់ដោយបណ្ដាញផ្សាយព័ត៌មាន BBC និស្សិតនៅសាកលវិទ្យាល័យ al-Zahra ជាពិសេសនិស្សិតស្រីបាននាំគ្នាស្រែកពាក្យស្លោកប្រឆាំងនឹងរបបដឹកនាំរបស់ក្រុម អាយ៉ាតូឡា អាលី ខាមេនី និងដុតទង់ជាតិសាធារណរដ្ឋអ៊ីស្លាម ខណៈនិស្សិតនៅសាកលវិទ្យាល័យតេហេរ៉ង់ ស្រែកថា “ស្ត្រី ជីវិត សេរីភាព” ដើម្បីផ្តល់កម្លាំងដល់ចលនាតវ៉ាកាលពីឆ្នាំ២០២២ បន្ទាប់ពីការស្លាប់នារីវ័យក្មេង កញ្ញា Mahsa Amini។
ជាមួយគ្នានេះ គេក៏បានមើលឃើញពីទិដ្ឋភាពនៃការលើកបង្ហាញទង់ជាតិរូបតំណាង “តោ និងព្រះអាទិត្យ” ដែលជាទង់ជាតិនៃរបបរាជានិយមមុនក្រុមបដិវត្តន៍ឆ្នាំ១៩៧៩ ឡើងកាន់អំណាច និងការស្រែកគាំទ្រដល់ Reza Pahlavi ជារាជទាយាទស្តេច Shah នៃប្រទេសអ៊ីរ៉ង់ ព្រមទាំងការតវ៉ាប្រឆាំងកំពូលជនផ្ដាច់ការ Ayatollah Ali Khamenei។
ព្រឹត្តិការណ៍នេះក៏នាំឱ្យមានការប៉ះទង្គិចរវាងនិស្សិត និងក្រុមកងសន្តិសុខ Basij ដែលជាកងកម្លាំងស្ម័គ្រចិត្តរបស់កងឆ្មាំបដិវត្តន៍ឥស្លាមអ៊ីរ៉ង់ផងដែរ។ នេះជាការបង្ហាញពីភាពតានតឹង និងការប្រកួតប្រជែងរវាងក្រុមបាតុករនិស្សិត និងអាជ្ញាធរនៃរបបសាធារណរដ្ឋឥស្លាមិកអ៊ីរ៉ង់៕
© 2026, ឌឹ ខេមបូឌា ដេលី. All rights reserved.