អ្នកភូមិក្នុងខេត្តកោះកុង និងបុគ្គលិកក្រុមហ៊ុនចិន ដែលពួកគាត់ចោទប្រកាន់ថា បានប៉ុនប៉ងបណ្ដេញពួកគាត់ចេញពីដីធ្លី បានដាក់ពាក្យបណ្តឹងតបតគ្នាទៅវិញទៅមកទៅនគរបាលមូលដ្ឋានជុំវិញការប្រឈមមុខដាក់គ្នាកាលពីសប្ដាហ៍មុន ដែលអំឡុងពេលនោះភាគីទាំងពីរបានគប់ដុំថ្ម និងគ្រាប់បែកសាំងដាក់គ្នា។
ការប៉ះទង្គិចគ្នានោះបានកើតឡើងកាលពីថ្ងៃពុធ នៅពេលក្រុមហ៊ុន Union Development Group (UDG) ដែលបានសាងសង់រមណីយដ្ឋានដែលមានទឹកប្រាក់៣,៨ពាន់លានដុល្លារនៅក្នុងតំបន់នោះ បានបញ្ជូនរថយន្តពីរគ្រឿងឲ្យដឹកដីទៅចាក់លើផ្លូវធំទៅកាន់ភូមិ ដែលមានអ្នកភូមិប្រហែល៣០គ្រួសាររស់នៅក្នុងឃុំកោះស្ដេច ស្រុកគិរីសាគរ។
ក្រុមអ្នកភូមិដែលចោទប្រកាន់ក្រុមហ៊ុនថា បានប៉ុនប៉ងបណ្ដេញពួកគាត់ចេញនោះបានតបតវិញដោយគប់គ្រាប់បែកសាំងដាក់រថយន្តមួយគ្រឿង ដែលត្រង់ចំណុចនោះហើយសន្តិសុខក្រុមហ៊ុនUDG បានគប់ដុំថ្មដាក់អ្នកភូមិដើម្បីឲ្យពួកគាត់ចាកចេញ។
លោក លី វណ្ណា នាយប៉ុស្តិ៍ឃុំបានមានប្រសាសន៍ថា លោកទទួលបានពាក្យបណ្ដឹងរបស់ក្រុមហ៊ុន UDG មួយថ្ងៃបន្ទាប់ពីការប៉ះទង្គិចគ្នា និងពាក្យបណ្ដឹងរបស់ក្រុមអ្នកភូមិកាលពីម្សិលមិញ ហើយបានចាប់ផ្ដើមសាកសួរអ្នកដែលជាប់ពាក់ព័ន្ធ។
លោកបានមានប្រសាសន៍ថា លោក លី តិចហី មេការក្រុមហ៊ុន UDG បានចោទអ្នកភូមិបីនាក់ពីបទញុះញង់ឲ្យមានការតវ៉ា និងបំផ្លាញរថយន្តមួយគ្រឿង ហើយថា ក្រុមអ្នកភូមិចោទប្រកាន់សន្តិសុខថា បានធ្វើឲ្យអ្នកភូមិប្រាំនាក់រងរបួស។
លោក វណ្ណា បានមានប្រសាសន៍ថា “ខ្ញុំមិនអាចធ្វើអត្ថាធិប្បាយបន្ថែមបានទេឥឡូវនេះ ពីព្រោះខ្ញុំកំពុងប្រមូលឯកសារ ហើយបន្ទាប់មកខ្ញុំនឹងស្នើសុំការណែនាំពីថ្នាក់លើ។
នៅពេលត្រូវបានទាក់ទងកាលពីម្សិលមិញ លោក តិចហី បានលើកឡើងថា លោកទាមទារសំណង ២.០០០ដុល្លារពីក្រុមអ្នកភូមិចំពោះការវាយបំបែកភ្លើងហ្វា និងកញ្ចក់រថយន្តមួយគ្រឿង។ លោកបានបដិសេធការដែលថា ក្រុមហ៊ុនបានប៉ុនប៉ងបិទផ្លូវនេះដោយចេតនានោះ។ លោកបាននិយាយថា ” យើងមិនបានដឹកដីចាក់បិទផ្លូវទេ។ យើងដឹកដីចាក់ដើម្បីស្ថាបនាផ្លូវទៅកាន់កំពង់ផែថ្មីរបស់ក្រុមហ៊ុនតែប៉ុណ្ណោះ”។
លោក ស៊ឹម គឹមសាន ដែលមានឈ្មោះនៅក្នុងពាក្យបណ្ដឹងរបស់លោក តិចហី និងជាអ្នកដែលបានដាក់ពាក្យបណ្ដឹងប្ដឹងក្រុមហ៊ុន UDG បាននិយាយថា នគរបាលបានសាកសួររូបលោកកាលពីម្សិលមិញ ហើយលោកបានបដិសេធការចោទប្រកាន់របស់មេការូបនេះមកលើរូបលោក។
លោកបាននិយាយថា “ខ្ញុំបានឆ្លើយប្រាប់នគរបាលថា ខ្ញុំមិនបានវាយបំបែកកញ្ចក់រថយន្តរបស់ក្រុមហ៊ុនទេ។ ខ្ញុំស្ថិតនៅក្នុងក្រុមមនុស្ស ហើយខ្ញុំគ្រាន់តែស្រែកឲ្យអ្នកបើកបររថយន្តឈប់ដឹកដីទៅចាក់លើផ្លូវតែប៉ុណ្ណោះ”។ ពាក្យបណ្ដឹងប្ដឹងក្រុមហ៊ុន UDG ចោទប្រកាន់សន្តិសុខក្រុមហ៊ុននេះថាបានធ្វើឲ្យអ្នកភូមិប្រាំនាក់រងរបួស និងទាមទារសំណងជាប្រាក់៣.៥០០ដុល្លារ៕ សារុន