ក្រុងព្រះសីហនុ, ខេត្តព្រះសីហនុ-ផែនការនាំយកការប្រគំតន្ត្រីកាហ្សានធីបដ៏សប្បាយរយៈពេល១០ថ្ងៃមកឆ្នេរកម្ពុជា ត្រូវខកខានទាំងស្រុងកាលពីថ្ងៃពុធ ខណៈដែលជនជាតិរុស្ស៊ីមកលេងសប្បាយរាប់រយនាក់បានមកដល់ស្ពានទៅកោះពស់ ឃើញផ្លូវដែលរាំងដោយរបាំងដែកកម្ពស់ពីរម៉ែត្រ។
ពេលរសៀលនោះចាប់ផ្តើមដោយសុទិដ្ឋិនិយម ខណៈដែលក្រុមអ្នកដើរលេងសប្បាយ ដែលភាគច្រើនបានទិញសំបុត្រ “viZas” រួចហើយ ដើម្បីចូលកម្សាន្តកាហ្សានធីប “រីផាប់ប្លិក” នោះ បានមកដល់គល់ស្ពាននេះតាមរ៉ឺម៉កទេសចរណ៍និងតាមម៉ូតូ។ ប័ណ្ណប្រកាសដែលបិទនឹងរបាំងផ្លូវបានសរសេរថា ការប្រគំតន្ត្រីល្បីល្បាញខាងអាសអាភាសដែលគ្រោងចាប់ផ្តើមនៅថ្ងៃពុធនេះ ត្រូវបានលើកពេលជិត២៤ម៉ោង បើទោះជាអាជ្ញាធរបាននិយាយកាលពីថ្ងៃអង្គារថា កម្មវិធីត្រូវបាន “លុបចោលទាំងស្រុងក៏ដោយ”។
លោក អូឡេក ជាជនជាតិរុស្ស៊ី ដែលកំពុងរៀបចំដំឡើងតូបមួយក្បែររបាំងផ្លូវនៅម៉ោងប្រហែលពីរល្ងាច ជឿជាក់ថា ព្រឹត្តិការណ៍នេះនឹងនៅតែធ្វើទៅបាន បើទោះជាប៉ូលិសបានប្រាប់គាត់ម្តងហើយម្តងទៀតថា ពិធីនេះត្រូវបានលុបចោលក៏ដោយ។
លោក អូឡេក ដែលមិនព្រមប្រាប់ឈ្មោះពេញ ហើយចង្អុលទៅប័ណ្ណប្រកាស បាននិយាយថា “មែនហើយ ស្អែកគេបើក…ជាការប្រគំតន្ត្រីកាហ្សានធីប”។ លោកបាននិយាយថា “នេះមិនមែនជា វ៉ូដស្តុក (Woodstock) ទេ នេះជាកាហ្សានធីប។ វាគឺមិនដូចគ្នាទេ។ វ៉ូដស្តុកមានស៊ិច ថ្នាំញៀន និងតន្ត្រីរាំញាក់ ឯកាហ្សានធីបវិញមានស៊ិច ថ្នាំញៀន និងតន្ត្រីឌីជេ”។
ប្រហែលមួយម៉ោងក្រោយមក ប័ណ្ណប្រកាសត្រូវបានគេបកចេញ ហើយមេឃក៏ចាប់ងងឹត។
ខណៈដែលអ្នកមានសំបុត្រ viZa មួយចំនួនបានទទួលស្គាល់ការបរាជ័យនិងបានធ្វើដំណើរទៅកណ្តាលក្រុងវិញដើម្បីពិនិត្យមើលជម្រើសផ្សេងនោះ អ្នកផ្សេងទៀតគិតទៅរកកន្លែងរាំរែកសប្បាយផ្សេងជំនួសវិញ។
នីកូឡា កាវ៉ាលី ជាទេសចរអីុតាលី ដែលបានធ្វើដំណើរមកដល់ក្រុងព្រះសីហនុកាលពីខែមុនបាននិយាយថា “ខ្ញុំឮថាមានពិធីសប្បាយពីរកន្លែងធ្វើនៅទីជិតនេះ…គេត្រូវតែរកកន្លែងមួយផ្សេងទៀតមកជំនួស”។
ពេលរសៀលមកដល់ ព្រះអាទិត្យក៏ចាប់ផ្តើមអស្តង្គចាកចោលសេចក្តីសង្ឃឹមចុងក្រោយ ដែលថាអាជ្ញាធរនឹងប្តូរចិត្ត ហើយអនុញ្ញាតឲ្យមានការប្រគំតន្ត្រីនេះ ឬឲ្យមានការប្រគំខ្លះនោះ។
ដេនីស កូស្លូវ ជាមិត្តភក្តិជិតស្និទ្ធរបស់អ្នករៀបចំពិធី គឺលោក នីគីតា ម៉ាស៊ូណុក និងជាសហការីរបស់ម្ចាស់ក្រុមហ៊ុនអភិវឌ្ឍន៍រុស្ស៊ី គឺលោក សេរហ្គេ ប៉ូឡុនស្គី ដែលរស់នៅលើកោះឯកជនមួយឆ្ងាយពីឆ្នេរ ទទួលបានការអនុញ្ញាតឲ្យទៅលេងកោះពស់តាមរថយន្ត SUV របស់លោកនៅរសៀលនោះ។
ត្រឡប់មកវិញពីកោះនោះនៅម៉ោងប្រហែល៤ល្ងាច លោក កូស្លូវ បាននិយាយថា លោក ម៉ាស៊ូណុក បន្ទាប់ពីមានជំនឿជាច្រើនសប្តាហ៍ថា នៅទីបញ្ចប់រដ្ឋាភិបាលនឹងអនុញ្ញាតឲ្យមានធ្វើពិធីនេះ នៅពេលនេះបានបោះបង់សេចក្តីសង្ឃឹមនេះហើយ។ លោកបាននិយាយថា “ពិធីនឹងមិនធ្វើនៅទីកន្លែងណាទេ ខ្ញុំគ្រាន់តែបានទៅទីនោះ ប៉ូលិសគ្រាន់តែអនុញ្ញាតឲ្យខ្ញុំទៅទីនោះ អ្វីៗត្រូវបិទទាំងអស់”។ “ខ្ញុំបាននិយាយទៅកាន់ នីគីតា គាត់ជាមិត្តរបស់ខ្ញុំ ហើយគាត់បាននិយាយថា បញ្ហានេះគឺថា គាត់មិនបានធ្វើតាមច្បាប់ទម្លាប់របស់ប្រជាជនកម្ពុជា”។
ស្នងការប៉ូលិសខេត្តព្រះសីហនុ លោក សៀង កុសល បាននិយាយថា កម្លាំងរបស់លោកនៅប្រកាន់ខ្ជាប់ក្នុងការរារាំងពិធីនេះ ហើយងឿងឆ្ងល់ថា ហេតុអ្វីអ្នករៀបចំពីធីជ្រើសរើសកោះពស់ជាកន្លែងទីមួយ។
លោក កុសល បាននិយាយអំពីសេចក្តីសម្រេចរបស់សាលាខេត្តក្នុងការលុបចោលពិធីនេះ បន្ទាប់ពីការរារែកចិត្តជាច្រើនសប្តាហ៍ ថាតើនឹងអនុញ្ញាតឲ្យធ្វើពិធីនេះឬយ៉ាងណានោះថា “ខ្ញុំចង់ប្រាប់អ្នកថា មិនមានការកែប្រែទេ”។
លោកបាននិយាយថា “ខ្ញុំចង់សួរ ហេតុអ្វីពួកគេចង់ប្រគំតន្ត្រីតាមរបៀបនេះ? អ្នកផ្សេងទៀតអាចប្រគំលើឆ្នេរអូរឈើទាល និងនៅរោងមហោស្រព ប៉ុន្តែហេតុអ្វីបានជាពួកគេត្រូវធ្វើវានៅកន្លែងឆ្ងាយដាច់ពីគេបែបនេះ?”៕ មានិត