ការស៊ើបអង្កេតរឿងចោទប្រកាន់ពុករលួយលើប្រធានតុលាការក្រុងភ្នំពេញ ដែលត្រូវគេដកចេញពីតំណែងគឺ លោក អាំង មាលតី បានជាប់គាំង ដោយធ្វើឲ្យមានការចាប់អារម្មណ៍លើទំនាក់ទំនងរបស់គាត់ជាមួយលោក ឱម យ៉ិនទៀង ប្រធានអង្គភាពប្រឆាំងពុករលួយ ដែលកំពុងដឹកនាំការស៊ើបអង្កេតនេះ។
លោក មាលតី ត្រូវបានដកចេញពីមុខតំណែងកាលពីថ្ងៃទី១៧ខែកុម្ភៈ តែប៉ុន្មានម៉ោងប៉ុណ្ណោះ បន្ទាប់ពីលោកនាយករដ្ឋមន្ត្រី ហ៊ុន សែន បានលើកឡើងក្នុងការថ្លែងជាសាធារណៈថា សំណូកច្រើនលានដុល្លារប្រហែលបានបញ្ចុះបញ្ចូលតុលាការដោះលែងឲ្យនៅក្រៅឃុំនូវប្តីប្រពន្ធមួយគូដែលជាប់ពន្ធនាគារទាក់ទិននឹងករណីឃាតកម្មដ៏លេចធ្លោមួយ។
បន្ទាប់ពីក្រសួងយុត្តិធម៌បានបញ្ចប់ការស៊ើបអង្កេតរបស់ខ្លួនលើលោក មាលតី នៅថ្ងៃទី៧ខែមេសារួចមក លោក ឱម យ៉ិនទៀង បានចំណាយពេលពីរថ្ងៃសាកសួរអតីតចៅក្រមរូបនេះ។ មន្ត្រីជាន់ខ្ពស់ម្នាក់នៅក្នុងអង្គភាពប្រឆាំងអំពើពុករលួយ ដែលសុំមិនប្រាប់ឈ្មោះព្រោះខ្លាចមានការសងសឹក បានពណ៌នាអំពីជំនួបរវាងអ្នកទាំងពីរថា “រាក់ទាក់” ដោយកត់សម្គាល់ថា អ្នកទាំងពីរបានបរិភោគអាហារថ្ងៃត្រង់ជាមួយគ្នានៅពេលសាកសួរនោះទៀតផង។
នៅថ្ងៃទី១៣ខែមេសា លោក យ៉ិនទៀង បាននិយាយថា លោកនឹងបន្តការសាកសួរអតីតចៅក្រមរូបនេះ ក្រោយបុណ្យចូលឆ្នាំខ្មែរនៅពាក់កណ្តាលខែមេសា។ ក៏ប៉ុន្តែកាលពីថ្ងៃព្រហស្បតិ៍ លោក យ៉ិនទៀង បាននិយាយថា មិនទាន់ច្បាស់នៅឡើយថាតើ លោក មាលតី នឹងត្រូវកោះហៅមកជាថ្មីឬយ៉ាងណានោះទេ។
លោក យ៉ិនទៀង បានប្រាប់អ្នកយកព័ត៌មានថា “យើងនៅមានការលំបាកក្នុងការសន្និដ្ឋាន ព្រោះយើងត្រូវការភ័ស្តុតាងច្រើនទៀត។ ប្រសិនបើយើងរកឃើញ [ភ័ស្តុតាងថែមទៀត] យើងនឹងបន្តសាកសួរគាត់”។
លោក មាលតី ដែលបានទទួលតំណែងនៅក្រសួងយុត្តិធម៌ នៅជាមនុស្សមានសេរីភាពនៅឡើយ។
លោក ផៃ ស៊ីផាន អ្នកនាំពាក្យរដ្ឋាភិបាល បានមានប្រសាសន៍កាលពីខែមុនថា មិត្តភាពរវាងប្រធានអង្គភាពប្រឆាំងអំពើពុករលួយ និងចៅក្រមធ្លាក់សក្តិ អាចធ្វើឲ្យការស៊ើបអង្កេតមានការស្មុគ្រស្មាញ។
លោក ស៊ីផាន បានមានប្រសាសន៍ថា “យើងសង្ស័យរឿងហ្នឹង ប៉ុន្តែគ្រាន់តែចាំមើលលទ្ធផលសិន។ សាធារណជន បានឃ្លាំមើលយ៉ាងដិតដល់ចំពោះករណីនេះ ពីព្រោះគេយល់ថា អ្នកទាំងពីរជាមិត្តភក្តិនឹងគ្នា ប៉ុន្តែខ្ញុំមិនធ្វើអត្ថាធិប្បាយទេ ចាំមើលលទ្ធផលសិន”។
ក្រោយពីការដកលោក មាលតី ចេញពីតំណែងភ្លាម លោក ស៊ីផាន បានហៅចៅក្រមដែលត្រូវបណ្តេញចេញពីតំណែងនោះថា “បិសាច” នៅក្នុងទំព័រហ្វេសប៊ុកផ្ទាល់ខ្លួនរបស់លោក។អ្នកនាំពាក្យរដ្ឋាភិបាលរូបនេះ បានលើកឡើងអំពីករណីដែលលេចធ្លោពីរ ដែលចៅក្រមរូបនេះបានត្រួតមើលថាមានករណីមិនប្រក្រតី គឺការចាប់ដាក់ពន្ធនាគារមួយរយៈកាលពីឆ្នាំមុនលើពាណិជ្ជករខ្មែរអាមេរិកាំងម្នាក់ឈ្មោះ រីឆាត សាន និងការបន្តដាក់គុកលើពាណិជ្ជករជនជាតិអង់គ្លេស គឺលោក ហ្គ្រិហ្ក ហ្វ្រែតត៍ ដែលជាប់ពន្ធនាគារក្នុងខេត្តបន្ទាយមានជ័យក្នុងឆ្នាំ ២០១៣។
លោក មាលតី ធ្លាប់ជាប្រធានតុលាការខេត្តបន្ទាយមានជ័យ រហូតដល់ឆ្នាំ២០១៤ នៅពេលដែលលោកបានផ្លាស់មកក្រុងភ្នំពេញ។
ក្នុងបទសម្ភាសមួយកាលពីសប្តាហ៍មុន លោក ធន់ សារ៉ាយ ប្រធានយូរឆ្នាំនៃអង្គការសិទ្ធិមនុស្សអាដហុក បានមានប្រសាសន៍ថា ទំនាក់ទំនងរវាងលោក មាលតីនិងលោក យិុនទៀងបានរឹងមាំក្នុងឆ្នាំ២០១១ ក្នុងពេលដែលអង្គភាពប្រឆាំងអំពើពុករលួយ បានបង្ក្រាបក្រុមជំរិតយកប្រាក់ដែលប្រព្រឹត្តឡើងដោយនគរបាលក្នុងខេត្តបន្ទាយមានជ័យ។
លោក សារ៉ាយ បានមានប្រសាសន៍ថា “គេស្គាល់គ្នាច្បាស់ណាស់… ហើយទំនាក់ទំនងរបស់ពួកគេបានរឹងមាំ ក្នុងអំឡុងពេលនៃការស៊ើបអង្កេតលើស្នងការខេត្តបន្ទាយមានជ័យ”។
ការស៊ើបអង្កេតដោយអង្គភាពប្រឆាំងអំពើពុករលួយ បានចាប់ខ្លួនស្នងការខេត្ត គឺលោក ហ៊ុន ហ៊ាន និងស្នងការរង គឺលោក ឈាង សុន និងលោក ប៊ី ណាស៊ី នាយផ្នែកប្រឆាំងគ្រឿងញៀន។ ក្រោយមក ក៏នាំឲ្យមានការចាប់ខ្លួនដ៏ធំបំផុតរបស់អង្គភាពប្រឆាំងអំពើពុករលួយ គឺលោក មឹក ដារ៉ា អតីតអគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន។ អ្នកទាំងបួននាក់ ត្រូវបានកាត់ទោសដោយតុលាការខេត្តបន្ទាយមានជ័យ ដែលស្ថិតក្រោមការត្រួតត្រារបស់លោក មាលតី។
សប្តាហ៍បន្ទាប់ពីការដកលោក មាលតី ចេញពីតំណែងប្រធានតុលាការក្រុងភ្នំពេញនោះ នគរបាលជាតិ បាននិយាយនៅក្នុងសេចក្តីថ្លែងការណ៍មួយថា រថយន្តម៉ាកអូឌី ស៊ូវ ដែលបានរឹបអូសដោយតុលាការពីឈ្មួញគ្រឿងញៀនម្នាក់ ត្រូវប្រគល់ឲ្យកូនប្រុសលោកចៅក្រម ជាអធិការរងខណ្ឌ៧មករា ក្រុងភ្នំពេញ។
ក្នុងឆ្នាំ ២០១២ លោក អ៊ុង អឿន នៅពេលនោះជាចៅហ្វាយខេត្តបន្ទាយមានជ័យ បានផ្ញើលិខិតមួយច្បាប់ជូនលោកនាយករដ្ឋមន្ត្រី ហ៊ុន សែន ដោយអះអាងថា លោក មាលតី និងមន្ត្រីផ្សេងទៀត បានឃុបឃិតគ្នារឹបអូសដោយខុសច្បាប់នូវគ្រឿងចក្រមានតម្លៃរាប់រយពាន់ដុល្លារពីលោក ហ្វ្រែតត៍ ជាជនជាតិអង់គ្លេសដែលជាប់គុក។
យោងតាមមន្ត្រីប្រឆាំងអំពើពុករលួយជាន់ខ្ពស់ម្នាក់បានឲ្យដឹងថា ប៉ុន្តែទោះបីជាមានការចោទប្រកាន់ជាច្រើនប្រឆាំងនឹងចៅក្រមរូបនេះក៏ដោយ ក៏ការស៊ើបអង្កេតលើលោក មាលតី មិនទំនងជានាំឲ្យមានបទចោទពុករលួយដែរ។
មន្ត្រីរូបនេះបាននិយាយថា “មេខ្ញុំនឹងធ្វើរបាយការណ៍ទៅព្រះឥន្ទ្ [លោក ហ៊ុន សែន] ដោយនិយាយថា លោក មាលតី មិនបានធ្វើអ្វីខុសទេ ហើយស្នើឲ្យបញ្ចប់ករណីនេះ ពីព្រោះគាត់ជាមិត្តភក្តិជិតស្និទ្ធនឹងគ្នា”៕ (រាយការណ៍បន្ថែមដោយ គុច ណារ៉េន)និតនិងរើន