32 C
Phnom Penh

នគរ​បាល​កម្ពុជា​​​ស្នើ​ឲ្យ​វៀតណាម​ កំណត់​​​​អត្តសញ្ញាណ​ទូក​​នេសាទ​​​​​ពាក់​ព័ន្ធ​​ហេតុការណ៍​​ប៉ះ​ទង្គិច​គ្្នា​

ដោយ ឌឹ ខេមបូឌា ដេលី

បទវិភាគ

សង្កាត់​ត្រើយ​កោះ, ក្រុង​កំពត-​នគរ​បាល​និយាយ​ថា ខ្លួន​បាន​ស្នើ​ឲ្យ​វៀតណាម ជួយ​​​​កំណត់​អត្ត​សញ្ញាណ​​​ទូក​ចៃរ៉ា​​វៀតណាម​​​ ដែល​​​​​ជាប់​ពាក់​ព័ន្ធ​ក្នុង​ហេតុការណ៍​​ប៉ះទង្គិច​គ្នាជា​​មួយ​អ្នក​នេសាទ​ខ្មែរ​​ ​បណ្ដាល​ឲ្យ​មនុស្ស​ស្លាប់​កាលពី​សប្ដាហ៍​មុន ដោយ​ផ្លាស់​ប្ដូរ​ជំហរ​​របស់​ខ្លួន​ដែល​​បាន​លើក​ឡើង​ថា ការ​ស្លាប់​​បុរស​​ម្នាក់​នៅ​ក្នុង​មូលដ្ឋាន​ គឺ​ជាឧបទ្ទវហេតុ។

ឧត្តមសេនីយ៍ត្រី ទូច ប៉ូលក្ខណ៍ មេបញ្ជាការ​​​រង​​​នៃ​​​កង​​​វរសេនាតូច​​​ការ​​​ពារ​​​ព្រំដែន​​​ទឹក ​​​​​​​​​និយាយ​​​ទៅ​​​កាន់​​​ប្រជា​​​ពល​​​រដ្ឋ​​​ក្នុង​​​​​​សហគមន៍​​​អ្នក​​​នេសាទ​​​ត្រើយ​​​កោះ​​​ នៅ​​​ខាង​​​ក្រៅ​​​ព្រះវិហារ​​របស់​​​ពួក​​​គាត​​​់​​​ក្នុង​​ក្រុង​​​កំពត​​​ ​​​កាល​​​ពី​​​ថ្ងៃ​​​សៅរ៍។ រូបថតៈ William Kelly
ឧត្តមសេនីយ៍ត្រី ទូច ប៉ូលក្ខណ៍ មេបញ្ជាការ​​​រង​​​នៃ​​​កង​​​វរសេនាតូច​​​ការ​​​ពារ​​​ព្រំដែន​​​ទឹក ​​​​​​​​​និយាយ​​​ទៅ​​​កាន់​​​ប្រជា​​​ពល​​​រដ្ឋ​​​ក្នុង​​​​​​សហគមន៍​​​អ្នក​​​នេសាទ​​​ត្រើយ​​​កោះ​​​ នៅ​​​ខាង​​​ក្រៅ​​​ព្រះវិហារ​​របស់​​​ពួក​​​គាត​​​់​​​ក្នុង​​ក្រុង​​​កំពត​​​ ​​​កាល​​​ពី​​​ថ្ងៃ​​​សៅរ៍។ រូបថតៈ William Kelly

កាលពី​ថ្ងៃទី​២៨ ខែ​កក្កដា លោក ម៉ៅ ច័ន្ទមធុរិទ្ធ ស្នង​ការ​រង​ខេត្ត​កំពត​ ​មាន​ប្រសាសន៍​​​​​ថា បុរស​ឈ្មោះ អៃ យ៉ូប អាយុ​៤២​ឆ្នាំ ​បាន​បាត់​​​បង់ជីវិត​​ដោយសារ​​កម្លាំង​បុក​ផ្ទុប​នឹង​​​​ផ្ទៃ​ទឹក​ បន្ទាប់ពី​​ទូក​ពីរ​គ្រឿង​បុកគ្នា​​​ធ្វើ​ឲ្យ​គាត់​ប៉ើង​ធ្លាក់​ចូល​​​ទឹក​​​កាលពី​យប់​មុន​នោះ (​យប់​ថ្ងៃ​​ទី​២៧) បណ្ដាល​ឲ្យ​អ្នក​នេសាទ​ក្នុង​មូល​ដ្ឋាន​​​​​ចោទ​ប្រកាន់​ថាមាន​ការ​បិទ​បាំង​ការ​ពិត​។

ទោះ​ជាយ៉ាង​ណា កាលពី​ម្សិលមិញ ​លោក ​​ម៉ៅ ច័ន្ទមធុរិទ្ធ បាន​ទទួល​ស្គាល់​ថា បុរស​រង​គ្រោះ​​ពិត​ជា​ត្រូវ​គេ​វាយ​ដំ​ដូច​​អ្វី​ដែល​​​អ្នក​នេសាទ​​ផ្សេងទៀត និង​បង​ប្អូន​ជីដូន​មួយ​របស់​គាត់​ឈ្មោះ ណុះ យ៉ូប បាន​រាយការណ៍​​កាល​​ពី​ដំបូង​​ប្រាកដ​មែន។

លោក​​មាន​ប្រសាសន៍​​ថា ​”​ខ្ញុំ​បាន​មើល​​​​​​រូប​ថត​​​​សព​ជន​រងគ្រោះ​​ ហើយ​វា​​​បង្ហាញ​ថា គាត់​​​​ត្រូវ​គេ​វាយ​ដំ។ ខ្ញុំ​បាន​ស្នើ​ឲ្យ​​អាជ្ញាធរ​វៀតណាម​​ ជួយ​តាម​រក​ទូក​នោះ​ឲ្យ​យើង​ហើយ។ ពេល​នេះ​យើង​មិន​អាច​ធ្វើ​អ្វី​បាន​ទេ ​​ក្រៅ​តែ​ពី​រង់ចាំ​ខាង​ភាគី​វៀតណាម។ ទន្ទឹម​​​នឹង​នេះ យើង​ក៏​មិន​ទាន់​កំណត់​អត្តសញ្ញាណ​​​​​​អ្នក​ជាប់​ពាក់​ព័ន្ធ​​បាន​នៅ​ឡើយ​ដែរ​”។

លោក ណុះ យ៉ូប បាន​រៀបរាប់​​អំពី​ហេតុ​ការណ៍​ប្រើ​អំពើ​ហិង្សា​យ៉ាង​សាហាវ​​ព្រៃ​ផ្សៃ​​​​ទៅ​លើ​ជន​រងគ្រោះ​ ដែល​ក្នុង​​​ពេល​នោះ​អ្នក​​​នេសាទ​វៀតណាម បាន​​​ទាញ​ជន​រងគ្រោះ​ចេញពី​ទឹក​សមុទ្រ ហើយ​​បន្ទាប់​មក​​វាយ​ជន​រងគ្រោះ​នឹង​បំពង់ទីប​ មុន​ពេល​បោះ​ជន​រង​គ្រោះ​ចូល​ទៅ​ក្នុង​ទឹក​វិញ ហើយ​​​បាន​ហៅ​​​ប្រជាពលរដ្ឋខ្មែរ​ ផ្សេង​ទៀត​តាម​វិទ្យុ​ទាក់​ទង​​ឲ្យ​ទៅទទួល​​យក​សាក​សព​ជន​រងគ្រោះ​។ បន្ទាប់​ពី​​ប្រជាពល​រដ្ឋ​​ខ្មែរ​ទាំង​នោះ​​ព្រមាន​ថា ​កង​ទ័ព​ជើង​ទឹក​របស់​ខ្លួននឹង​ទៅ​ដល់​កន្លែង​កើត​ហេតុ​ឆាប់ៗ​ ពេល​នោះ​​ក្រុម​ជន​​​ជាតិ​វៀត​ណាម ​បាន​​ឆ្លើយ​តប​វិញ​​ថា “បើ​ទ័ព​ជើង​ទឹក​មក​ដល់ យើង​នឹង​ដឹង​មុន​ពួក​ឯង”។

គាត់​បាន​និយាយ​ទៀត​ថា ការ​ប្រើ​អំពើ​ហិង្សា​នេះ​បាន​ធ្វើ​ឲ្យ​បង​ប្អូន​ជីដូន​មួយ​របស់​គាត់​មាន​ស្នាម​ប្រហោង​ត្រង់​ដើមទ្រូង ផុង​មុខ ​​និង​បែក​គ្រាប់ពោន (ដុំ​បំពង់​ក​​ផ្នែក​ប៉ោង​)។ ទោះ​ជាយ៉ាង​ណា រូប​ថត​​សាកសព​ដែល​អ្នក​យក​​​​ព័ត៌មាន​ម្នាក់​បាន​មើល​ឃើញ​បង្ហាញ​ថា ការ​អះ​​អាង​​របស់​គាត់​គឺ​ជា​ការ​បំផ្លើស​ការ​ពិត​​​។

ការ​ស្លាប់​េនះ​​​បាន​​ទាក់​ទាញ​​ឲ្យ​​​មាន​​​ការ​ចាប់​អារម្មណ៍​លើ​​ជម្លោះ​ដែន​សមុទ្រ​​ដែល​កំពុង​កើត​មាន​រវាង​សហគមន៍​នេសាទ​ខេត្ត​កំពត និង​អ្នក​នេសាទ​វៀតណាម ឈ្លាន​ពាន​ដែល​ប្រើប្រាស់​ទូកចៃរ៉ា​ធំៗ​ដើម្បី​ប្រមូល​ចាប់​​​​យកសត្វ​រស់​ក្នុង​សមុទ្រ​​ក្នុងបរិមាណ​យ៉ាង​​ច្រើន ​​​ហើយ​បំផ្លាញ​ជម្រក​របស់​ពួកវា​ក្នុង​សកម្ម​ភាព​​​​​​នេសាទ​​បែប​នេះ​។

អ្នក​នេសាទ​ខ្មែរ​ និយាយ​ថា រយៈពេល​ជា​ច្រើន​ឆ្នាំ​មក​នេះ អាជ្ញាធរ​មិន​បាន​​​អើ​ពើ​​នឹង​​ការ​រាយការណ៍​អំពី​ការ​ឈ្លាន​ពាន​របស់​វៀតណាម ឡើយ។ ចំណែក​ឯលោក ខូយ ឃុនហួ អភិបាល​ខេត្ត​កំពត​ ​មាន​ប្រសាសន៍​កាលពី​សប្ដាហ៍​មុន​ថា ប្រទេស​ទាំង​ពីរ​បាន​ព្រម​​​​ព្រៀង​​​ចែក​រំលែក​សមុទ្រ​នេះ​រួម​​គ្នា ហើយ​ថា ទូក​ចៃរ៉ា​ ជា​ទូក​ពីរ​ដែល​អូស​​សំណាញ់​​សង​​​ខាង​​​ប្រវែង​រាប់​រយ​ម៉ែត្រ​នោះ គឺ​មិន​ខុស​​​​​ច្បាប់​ទេ​នៅ​ក្នុង​ប្រទេស​វៀតណាម​ ហើយ​​ក៏​មិន​​គួរ​​ចាត់​ទុក​ថា​ខុស​ច្បាប់​ដែរ​នៅ​​ក្នុង​ខេត្ត​កំពត​ ទោះ​បី​ជា​ការ​នេសាទ​បែប​នេះ​​ខុស​ច្បាប់​​​ជលផល​របស់​កម្ពុជា ​​ក៏​ដោយ។

កាលពី​ថ្ងៃ​សៅរ៍ ​អំឡុង​​ពេល​ចុះទៅ​សង្កាត់​​​​ត្រើយ​កោះ លោក នាក់ សុវណ្ណារី អភិបាល​ក្រុង​កំពត ​មាន​ប្រសាសន៍​ថា ការ​ព្រម​ព្រៀង​នេះ​នៅ​តែ​រក្សា​ទុក​ដដែល​។ លោក​បាន​ថ្លែង​​​​ទៅ​កាន់​ប្រជាពលរដ្ឋ​ប្រមាណ​២៥០​នាក់​​នៃ​សហគមន៍​​ខ្មែរ​អុីស្លាម​ ដែល​បាន​ជួប​ជុំគ្នា​នៅ​ខាង​ក្រៅ​​ព្រះវិហារ​របស់​ពួកគាត់​ថា ”​យើង​គោរព​តាម​ច្បាប់​នេសាទ​របស់​យើង ហើយ​គេ​គោរព​ច្បាប់​របស់​គេ។ នៅ​ពេល​យើង​មាន​បញ្ហា​​ខ្លះ​​​កើត​ឡើង យើង​ត្រូវចេះ​​​អត់​ឱន​​​​ឲ្យ​គ្នា”។​​​​​​​

​​​ដោយមាន​​​​លោក​​​ ទូច ប៉ូលក្ខណ៍ ​​​មេ​បញ្ជា​ការ​រង​​នៃ​កង​វរសេនាតូច​​ការ​ពារ​ព្រំដែន​​ទឹក​នៅ​​​ក្បែរ​​​ខ្លួន​​​​ លោក​ នាក់​​​ សុវណ្ណារី បាន​​​បន្ត​​​រិះ​​​គន់​​​សហគមន៍​​​នេសាទ​​​ដែល​យក​​​ចិត្ត​​​ទុក​​​ដាក់​​​ហួស​​​ហេតុ​​​ចំពោះ​អ្នក​​​នេសាទ​​​វៀតណាម​​​​​​ខុស​​​ច្បាប់​​​។

លោក​​​បាន​​​មាន​​​ប្រសាសន៍​​​ថា ”ខ្លួន​​​ខ្ញុំ​​​មិន​​​​ទាំង​​​​ដឹង​ថា​ព្រំដែន​​​នៅ​​​ត្រង់​​​ណា​​​ផង​​​ តើ​​​​​​បង​​​ប្អូន​​​​​​​ដឹង​​​​​​ដោយ​របៀប​ណា​? បង​​​ប្អូន​​​មិន​​​អាច​​​ទៅ​​​បង្ក្រាប​​​​​ពួក​​​គេ​​​បាន​​​ទេ វា​​​ខុស​​​ច្បាប់​​​​​​។ ​ប្រសិន​​​បើ​​​បង​​​ប្អូន​​​​​​ប្រព្រឹត្ត​​​បទ​​​ល្មើស​​​ បង​​​ប្អូន​​​នឹង​​​ប្រឈម​​​ចំពោះ​​​មុខ​​​ច្បាប់​​​ហើយ​”។

ខណៈ​​​​​​​ប្រជាពលរដ្ឋ​​ទាំង​នេះ​បាន​​​ចាប់​​​ផ្តើម​​​​​​ជេរ​​​ប្រមាថ​​​ ដែល​គិត​ថា​ការ​​​ចុះ​​​មក​​​របស់​​​អាជ្ញាធរ​​​​មាន​បំណង​​​​បំបិទ​​​មាត់​​​​ច្រើន​​​​ជាង​​​មក​​​​​ធ្វើ​ឲ្យ​ពួកគាត់​​ស្ងប់​ចិត្ត​​​​នោះ​​​ ឧត្តម​​​សេនីយ៍​​​ត្រី ​ទូច ប៉ូលក្ខណ៍ បាន​​​ចេញ​​​មក​​​​​​​​​អះ​​​អាង​​​ថា ​អាជ្ញាធរ​​​​កំពុង​​​ធ្វើ​​​ការ​​​ដើម្បី​​​ការ​​​ពារ​​​ប្រយោជន៍​​​របស់​អ្នក​​​​​នេសាទ​​​ខ្មែរ​​​។

លោក​​​បាន​​​មាន​​​ប្រសាសន៍​​​ថា “​​​នៅ​​​ពេល​​​បង​​​ប្អូន​​​ឃើញ​​​អ្នក​​​នេសាទ​​​វៀតណាម​​​ សូម​​​រាយ​​​​​ការណ៍​​​​មក​​​​​នគរបាល​​​​​​។ ប្រើ​​​ត្រីវិស័យ​​​របស់​​​បង​​​​​​​​ប្អូន​​​ ហើយ​​​រាយការណ៍​​​មក​​​យើង​​​ភ្លាម​​​។ ​យើង​​​​​នឹង​​​​​​តាម​​​រក​​​អ្នក​​​ដែល​​​ [នេសាទ​​​ខុស​​​ច្បាប់] ​ប៉ុន្តែ ​​កុំ​​​គិត​​​ថា វា​​​​ស្រេច​​តែ​​​បង​​​ប្អូន​​​ក្នុង​​​ការ​​​ធ្វើ​​​ដូច្នេះ​​​”។

ដោយ​​​មាន​​​ការ​​​​លើក​ឡើង​​​​ដូច្នេះ ​​​មនុស្ស​​​ជា​​​​​ច្រើន​​​​​​ដែល​​​ភាគ​​​ច្រើន​​​ជា​​​ស្ត្រី​​​ បាន​​​ដើរ​​​ចេញ​​​​​​​​​​ទាំង​​កំហឹង​​។ ពួក​​​គាត់​​​បាន​​​ស្រែក​​​ថា “យើង​​​មិន​​​​​ជឿ​​​អស់​​​លោក​​​ទេ​​​។ យើង​​​មិន​​​ចង​​​់​​​ស្តាប់​​​អស់​​​លោក​​​​​​ទៀត​​​ទេ​​​​​​​​​​”។

ខណៈ​ពេល​​​លោក​​​ នាក់ សែន ប្រធាន​​​សហគមន៍​​​ព្យាយាម​​​​​​​ធ្វើ​ឲ្យ​ប្រជាពលរដ្ឋ​ទាំង​នេះ​​​រក្សា​ភាព​​ស្ងប់​ស្ងាត់​ ឧត្តម​​​សេនីយ៍​​​ត្រី​ ទូច ​​ប៉ូលក្ខណ៍ ​​​បាន​​​មាន​​​ប្រសាសន៍​​​​​​​​​ថា “​បើ​​​បង​​​ប្អូន​​​មិន​​​ជឿ​​​ទេ ​វា​​​ស្រេច​​លើ​​​​បង​​​ប្អូន​”។លោក​​​​​​​អះ​​​អាង​​​ថា លោក​​​​ដោះ​​​ស្រាយ​​​​​​បាន​​​​១០០ ​ករណី​​​​​ហើយ​​​ក្នុង​​​ឆ្នាំ​​​កន្លង​​​មក​​​ មុន​​​ពេល​​​ដើរ​​​ត្រឡប់​​​ទៅ​​​កាន់​​​រថយន្ត​​​សេ៊រីទំនើប​​​របស់​​​លោកវិញ​​​​។​

ពេល​​​ទាក់​​​ទង​​​តាម​​​ទូរស័ព្ទ​​​កាល​​​ពី​​​ម្សិល​មិញ ​លោក នាក់​​​ សែន បាន​​​លើកឡើង​ថា ទោះ​​​បី​​​ជា​​​គ្មាន​​​សង្ឃឹម​​​ក្នុង​​​ការ​​​តតាំង​​​នឹង​​​ការ​​​ឈ្លាន​​​ពាន​​​របស់​​​ទូក​​​នេសាទ​​​វៀតណាម​​​ក៏​​​ដោយ​​​ ក៏​​​សហ​​គមន៍​​​របស់​​​​​​លោក​​​នឹង​​​បន្តតតាំង​​​​ធ្វើ​​​យ៉ាង​​​ណា​​​ រក​​​ឲ្យ​​​ឃើញ​​អ្នក​​​ដែល​​​ទទួល​​​ខុស​​​ត្រូវ​​​ចំពោះ​​​ការ​​​ស្លាប់​​​របស់​លោក​​​​ អៃ យ៉ូប ។

លោក​​​បាន​​​មាន​​​ប្រសាសន៍​​​ថា ” យើង​​​​មាន​សង្ឃឹម​​​តិច​​​តួច​​ណាស់​ដែល​​​​ថា នគរ​​​បាល​​​ ឬ​​​អាជ្ញាធរ​​​​​​នឹង​​​ជួយ​​​យើង​​​ស្វែង​​​រក​​​យុត្តិធម៌​​​ ឬ​បញ្ឈប់​​​ទូក​​​នេសាទ​​​​​​វៀតណាម​​​ទាំង​​​នោះ។ ​ពួក​​​​គេគួរតែ​បញ្ឈប់​​​ [ទូក​​​នេសាទទាំងនោះ​​​​​] ​ជា​​​យូរ​​​មក​​​ហើយ​​​ ហេតុ​​​អី​ទើបតែ​​​​ធ្វើ​​​​នៅ​​ពេល​​​នេះ​​​​។ ប្រសិន​​​បើ​​​សហគមន៍​​​របស់​​​យើង​​​មិន​​​​​​​រឹង​​​​​​មាំ​​​ទេ​​​​​​​ ខ្ញុំ​​​គិត​​​ថា ពួក​​​គេ​​​នឹង​​​នៅ​​​ស្ងាត់​ស្ងៀម ​ហើយ​​​​​​មិន​​​ធ្វើ​​​អ្វី​​​ទាំង​អស់​​​​”៕សុខុម ​និង ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស