34 C
Phnom Penh

លោក កឹម សុខា និង ​​លោក​ ស ខេង ជួបគ្នា​នៅ​សភា​ដើម្បី​​ពិភាក្សា​​បញ្ហា​​នយោបាយ​

ដោយ ឌឹ ខេមបូឌា ដេលី

បទវិភាគ

លោក ស ខេង រដ្ឋមន្ត្រី​ក្រសួង​មហាផ្ទៃ និង​លោក កឹម សុខា អនុប្រធាន​គណបក្ស​​ប្រឆាំង បាន​​ជួប​គ្នា​នៅ​រដ្ឋសភា​កាលពី​ម្សិល​មិញ ដើម្បី​ពិភាក្សា​​អំពី​​​បញ្ហា​​ដាក់​ពន្ធនាគារ​​សកម្ម​ជន​គណបក្ស​សង្គ្រោះ​ជាតិ​ចំនួន​១៤​រូប​​​កាលពី​ពេល​ថ្មីៗ​នេះពាក់​ព័ន្ធ “កុបកម្ម” នៅ​ទីលាន​ប្រជាធិបតេយ្យ មួយ​សប្ដាហ៍​​មុន​​​ពេល​​​​​មាន​កិច្ចព្រមព្រៀង​នយោបាយ​​ថ្ងៃ​២២ កក្កដា ​កាលពី​ឆ្នាំ​មុន​។

cam-photo-front-channa2នៅ​ក្នុង​សេចក្ដី​សម្រេច​​ភ្លាមៗ​កាលពី​ខែ​មុន សកម្មជន​គណបក្ស​​សង្គ្រោះ​ជាតិ​ចំនួន​១១​រូប​ត្រូវ​បាន​តុលាការ​សម្រេច​​ឲ្យជាប់​ពិរុទ្ធភាព​ពី​បទ​កុបកម្ម​ពាក់​ព័ន្ធ​ការ​​តវ៉ា​​កាល​ពី​ថ្ងៃទី​១៥ ខែ​កក្កដា ដើម្បីបើក​​ទីលាន​ប្រជា​ធិបតេយ្យ​ឡើង​វិញ​បណ្តាល​​​ឲ្យ​ផ្ទុះ​អំពើ​ហិង្សា​ ហើយ​​សកម្មជន​គណបក្ស​សង្គ្រោះ​ជាតិ​បី​រូប​ទៀត​ត្រូវ​បាន​ចាប់​ខ្លួន​នៅ​ខែ​នេះ បន្ទាប់ពី​​​មាន​ការ​អំពាវ​នាវ​​ពីសំណាក់​លោក​នាយក​រដ្ឋមន្ត្រី ហ៊ុន សែន។

លោក សម រង្ស៊ី ប្រធាន​គណបក្ស​ប្រឆាំង ​បាន​​​​ស្ថិត​នៅ​​អឺរ៉ុប និង​សហរដ្ឋអាមេរិក​ ចាប់​តាំង​ពី​ថ្ងៃ​​ដែល​សកម្មជន​ទាំង​១១​រូប​​​ត្រូវ​បាន​តុលាការ​​សម្រេច​ផ្ដន្ទាទោស​កាលពី​ថ្ងៃទី​២១ ខែ​កក្កដា​មក​ម្លេ៉ះ ហើយ​លោក កឹម សុខា បាន​​​​ដឹកនាំ​យុទ្ធនាការ​របស់​គណបក្ស​ប្រឆាំង​ដើម្បី​​​​​ឲ្យ​មាន​ការ​ដោះលែង​សកម្ម​ជន​ទាំង​នេះ​។

ជំនួប​កាល​ពី​​ម្សិលមិញ​រវាង​លោក ស ខេង និង​លោក កឹម សុខា បាន​ធ្វើ​ឡើង​ដោយ​បិទ​ទ្វារ ហើយ​មេដឹកនាំ​ទាំង​ពីរ​​​ដែល​ញញឹម​បិទ​មាត់​​មិនជិតនៅ​ពេល​​ដើរ​ចេញ​មក​​ខាង​ក្រៅ​វិញ​នោះ បាន​បដិសេធ​មិន​​​ថ្លែង​ទៅ​កាន់​ក្រុម​អ្នក​យក​ព័ត៌មាន​ទេ ដោយ​ចាត់​តាំង​​​ឲ្យ​អ្នក​នាំ​ពាក្យ​​ជា​អ្នក​ថ្លែង​ជំនួស​។​

លោក សក់ សេដ្ឋា​ រដ្ឋលេខាធិការ​ក្រសួង​មហាផ្ទៃ​ ដែល​តំណាង​ឲ្យ​លោក ស ខេង ​​​​​​មាន​ប្រសាសន៍​ថា មេដឹកនាំ​ទាំង​ពី​បាន​ពិភាក្សា​​​គ្នា​លើ​​បញ្ហា​ជាច្រើន ក្នុង​នោះ​​​​​រួម​មាន​​​ទាំង​សកម្ម​​ជន​ទាំង​នេះ​ផង​ ទោះ​បីជា​អ្នក​នាំពាក្យ​​គណ​បក្ស​​​​​ប្រជាជន​កម្ពុជា​ បាន​លើក​ឡើង​កាលពី​ថ្ងៃ​អាទិត្យ​ថា ការ​ពិភាក្សា​បែប​នេះ​នឹង​ប៉ះ​ពាល់​​​​ដល់​ឯករាជភាព​របស់​តុលាការ​​ក៏ដោយ។

លោក​​លើក​ឡើង​បន្ថែម​ទៀត​ថា ”​​ពាក់​ព័ន្ធ​ការ​ចាប់​ខ្លួន​អ្នក​ដែល​ប្រព្រឹត្តបទល្មើស នោះ​គឺ​ជា​នីតិវិធី​ច្បាប់។ ការ​ពិភាក្សា​​របស់​គ​ណ​បក្ស​ទាំង​​ពីរ ធ្វើ​យ៉ាង​ណា​មិន​ឲ្យ​​ប៉ះ​ពាល់​ទៅ​ដល់​នីតិ​វិធី​​ច្បាប់​នោះ​ទេ។យើង​ខិត​ខំ​រក​មធ្យោ​បាយ​​ដើម្បី​ជួយ​ជា​​យោបល់​ ជួយ​ជា​​គំនិត​គ្នា​​ទៅ​វិញ​ទៅមក​ ប៉ុន្តែ​​ទោះ​ជា​ជួយ​ជា​យោបល់ ជួយ​ជា​​គំនិត​យ៉ាង​ណា​ក៏​​ដោយ ក៏​ការ​ជួយ​​​យោបល់ និង​គំនិត​​ទាំង​នោះ​​មិន​ប៉ះ​​ពាល់​ដល់​នីតិវិធី​ច្បាប់ មិន​ប៉ះ​ពាល់​​ទៅ​ដល់​សមត្ថ​កិច្ច​របស់​​​ស្ថាប័ន​តុលាការ​នោះ​ទេ​​”។

នៅ​ពេល​​សុំ​ឲ្យ​បញ្ជាក់​​​ថា ​តើ​យោបល់​បែប​នេះ​អាច​ពាក់​ព័ន្ធ​អ្វី​ខ្លះ​នោះ លោក សក់ សេដ្ឋា បាន​មាន​ប្រសាសន៍​ថា ចាំ​បាច់​​ត្រូវ​គោរព​តាម​នីតិវិធី​ច្បាប់​ឲ្យ​បាន​ត្រឹម​ត្រូវ ឬ​ជួយ​ឲ្យ​សកម្ម​ជន​គណបក្ស​សង្គ្រោះជាតិ​ ទទួល​បាន​មេធាវី។ តាម​ពិត​​សកម្មជនទាំង​១១​រូប​​ដែល​ត្រូវ​បាន​តុលាការ​ចោទ​ប្រកាន់​ពីបទ​ “​កុបកម្ម​” និង​បី​រូប​ទៀត​​ដែល​ត្រូវ​បាន​ចាប់​ខ្លួន​នៅ​ខែ​នេះ​ ​សុទ្ធ​តែ​មាន​មេធាវី​រួច​​ទៅ​​ហើយ​។

លោក អេង ឆៃអា៊ង តំណាង​រាស្ត្រ​គណ​បក្ស​សង្គ្រោះជាតិ​​​​ ដែល​តំណាង​​លោក កឹម សុខា ​បាន​​ថ្លែង​ទៅ​កាន់​ក្រុម​អ្នក​យកព័ត៌មាន​ថា គណបក្ស​ប្រឆាំង​ពេញ​ចិត្ត​នឹង​លទ្ធផល​នៃ​ការ​ពិភាក្សា​នេះ ហើយ​​​គណបក្ស​ទាំង​ពីរ​នឹង​ទុក​​​​​ឲ្យ​នីតិវិធី​​ច្បាប់​ពាក់​ព័ន្ធ​​សកម្មជន​ទាំង​នេះ​បន្ត​ដំណើរ​ការ​ទៅ​មុខ។

លោក​​បាន​​​​មាន​ប្រសាសន៍​​ដោយ​​មិន​លម្អិត​​​ថា “​សម្រាប់​បញ្ហា​​នេះ យើង​បាន​ពិភាក្សា​​គ្នា​ជា​ច្រើន ហើយ​ចុង​បញ្ចប់​​ថ្នាក់​ដឹកនាំ​នៃ​គណ​បក្ស​ទាំងពីរ​បាន​ព្រមព្រៀង​គ្នា​​ដូច​អ្វី​ដែល​លោក សក់ សេដ្ឋា បាន​​​លើក​ឡើង ហើយ​យើង​​​​​នឹង​ប្រើ​​ប្រាស់​នីតិវិធី​ច្បាប់​ដើម្បី​ដោះ​ស្រាយ​បញ្ហា​នេះ​”។

គណបក្ស​សង្គ្រោះជាតិ​ បាន​ចោទ​ប្រកាន់​​​​ម្ដង​ហើយ​ម្ដង​ទៀត​ថា តុលាការ​​ក្នុង​ប្រទេស​កម្ពុជា​​ ពុក​រលួយ និង​ស្ថិត​ក្រោម​​ឥទ្ធិពល​របស់​​គណបក្ស​ប្រជាជន​កម្ពុជា​។

លោក អេង ឆៃអា៊ង ក៏​បាន​​ថ្លែង​ទៅ​កាន់​ក្រុម​អ្នក​យកព័ត៌មាន​ដែរ​ថា វា​ច្បាស់​ណាស់​ថា ​តំណាង​រាស្ត្រ​​គណបក្ស​សង្គ្រោះជាតិ ​​ប្រាំពីរ​​រូប​ដែ​ល​បាន​​​ជាប់​ពន្ធនាគារ​​​​​ប៉ុន្មាន​ថ្ងៃ​​ចន្លោះ​ការ​តវ៉ា​​ថ្ងៃទី​១៥ ខែ​កក្កដា និង​​កិច្ច​ព្រម​ព្រៀង​​​ថ្ងៃទី​​២២ កក្កដា ឆ្នាំ​មុនពីបទ​ដឹកនាំ​ “​កុបកម្ម” ​នោះ ​នឹង​នៅ​តែ​មាន​សុវត្ថិភាព ដោយ​សារ​តែពួកគាត់​មាន​អភ័យ​ឯកសិទ្ធិ​តំណាង​រាស្ត្រ​ការ​ពារ​ខ្លួន​ពី​ការ​ផ្ដន្ទាទោស​។

លោក​​បាន​​​​លើក​ឡើង​បន្ត​ថា ”​សម្រាប់​តំណាង​រាស្ត្រ​ទាំង​​ប្រាំពីរ​រូប​ ដោយ​សារ​តែ​ពួកគាត់​មាន​អភ័យ​ឯកសិទ្ធិ ដូច្នេះ​តុលាការ​មិន​អាច​​ឃុំឃាំង ឬ​ចាប់​ខ្លួន​ពួកគាត់​បាន​ទេ”។

លោក ហ៊ុន សែន បាន​គំរាម​​​តំណាង​រាស្ត្រ​​ទាំង​នេះ​ម្ដង​ហើយ​ម្ដង​ទៀត​​ថានឹង​ត្រូវ​ប្រឈម​​​​សវនាការ​ជំនុំជម្រះ​ទោស​​ ប៉ុន្តែ​រហូត​មក​ទល់​​​ពេល​នេះ​ សាលា​ដំបូង​រាជធានី​ភ្នំពេញ​ មិន​ទាន់​បាន​ចេញ​ដីកា​កោះ​ហៅ​តំណាង​រាស្ត្រ​ណា​ម្នាក់​​មក​សាកសួរ​នៅ​ឡើយ​ទេ ចាប់​តាំង​ពី​លោកស្រី មូរ សុខហួរ ដែល​បាន​ដឹកនាំ​ការ​តវ៉ា​កាលពី​ឆ្នាំ​មុន ​បាន​រក្សា​​ភាព​​ស្ងាត់ស្ងៀម​អំឡុង​ការ​សាកសួរ​លោក​ស្រី​​កាលពី​ថ្ងៃទី​១១ ​​ខែ​ឧសភា​មក​។

ដោយ​ឡែក​ លោក សក់ សេដ្ឋា បាន​មាន​ប្រសាសន៍​ថា លោក ស ខេង និង​លោក កឹម សុខា បាន​ពិភាក្សា​គ្នា​​អំពី​​ច្បាប់​​ស្ដីពី​អង្គការ​មិន​មែន​រដ្ឋាភិបាល​​ដ៏ចម្រូង​ចម្រាស​​ដែល​ត្រូវ​បាន​​​អនុម័ត​កាលពី​ពេលថ្មីៗ​នេះ ដែល​បច្ចុប្បន្ន​​ធម្មនុញ្ញភាព​នៃ​ច្បាប់​នេះ​កំពុង​ត្រូវ​បាន​​​​ពិនិត្យ​​​ផ្ទៀង​ផ្ទាត់​​ដោយ​ក្រុម​ប្រឹក្សា​ធម្មនុញ្ញ​​។

លោក​បាន​លើក​ឡើង​ទៀត​​​ថា រដ្ឋាភិបាល​​​មិន​អាច​​​អន្តរាគមន៍​​បាន​ឡើយ​​​នៅ​​ក្នុង​​ដំណើរ​ការ​នីតិវិធី​នោះ ប៉ុន្តែ​ថា នៅ​ពេល​​ច្បាប់​នេះ​ត្រូវ​បាន​អនុម័ត​ដោយ​ក្រុម​ប្រឹក្សា​ធម្មនុញ្ញ និង​ឡាយ​ព្រះហស្ត​​លេខា​ដោយ​ព្រះមហា​ក្សត្រ នរោត្តម សីហមុនី ​គណបក្ស​ប្រជាជន​កម្ពុជា​​ ប្រហែល​ជា​នឹង​​ពិភាក្សា​ចរចា​ជាមួយ​គណ​បក្ស​​​សង្គ្រោះជាតិ​ ដើម្បី​​ធ្វើ​វិសោធនកម្ម​។ ​​​

លោក​បាន​បញ្ជាក់​​ថា “នីតិវិធី​នេះ​នៅ​តែ​បន្ត​ដំណើរ​ការ​ ប៉ុន្តែ​នៅ​ពេល​​​អនុវត្ត​​ ប្រសិន​ណា​បើ​មាន​ការ​ប៉ះពាល់​ទៅ​លើ​សិទ្ធិ​ និង​ផល​ប្រយោជន៍​​​របស់​​ប្រ​ជា​ពល​រដ្ឋ គណបក្ស​ទាំង​ពីរ​បាន​ព្រមព្រៀង​គ្នា​ថា នឹង​ពិនិត្យ​មើល​​​លើ​បញ្ហា​ដែល​មាន​ផល​ប៉ះពាល់​ទាំង​នោះ ហើយ​​​​នឹង​ធ្វើ​វិសោធនកម្ម​”៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស