យោងតាមអង្គការសិទ្ធិមនុស្សលីកាដូបានឲ្យដឹងថា កាលពីម្សិលមិញ សាលាដំបូងខេត្តកោះកុងបានផ្តន្ទាទោសដាក់ពន្ធនាគារសកម្មជនបីនាក់របស់អង្គការមាតាធម្មជាតិ ជាអង្គការមិនមែនរដ្ឋាភិបាលការពារបរិស្ថាន បន្ទាប់ពីព្រះរាជអាជ្ញាបានចោទប្រកាន់ពួកគាត់ពីបទគំរាមកំហែងបង្កការខូចខាតអំឡុងការបន្តយុទ្ធនាការរបស់ខ្លួនប្រឆាំងក្រុមហ៊ុនមួយ ដែលពួកគាត់ចោទថា បានបូមខ្សាច់ខុសច្បាប់នៅព្រែកមួយក្នុងមូលដ្ឋាន។
លោក អុិន គង់ចិត្រ អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តនេះមានប្រសាសន៍ថា ព្រះរាជអាជ្ញា ប៊ូ ប៊ុនហាំង បានចោទប្រកាន់លោក ស៊ឹម សំណាង អាយុ២៩ឆ្នាំ ទ្រី សុវិជ្ជា អាយុ២៦ឆ្នាំ និង ស៊ុន ម៉ាឡា អាយុ២៤ឆ្នាំ ពីបទគំរាមកំហែងបំផ្លិចបំផ្លាញ ដែលមានទោសជាប់ពន្ធនាគារអតិបរមារហូតដល់២ឆ្នាំ។
លោកថ្លែងថា ”ព្រះរាជអាជ្ញាបានប្រគល់សំណុំរឿងនេះទៅចៅក្រម ស៊ើបសួរ ឈុំ ដាវី ហើយឥឡូវនេះ ចៅក្រមរូបេនះបានឃុំខ្លួនពួកគាត់ទាំងបី ហើយត្រូវបានបញ្ជូនទៅពន្ធនាគារខេត្តនៅម៉ោងប្រហែល៧យប់”។ លោកបានបន្ថែមថា អង្គការលីកាដូបានចាត់តាំងមេធាវីមួយរូបឲ្យតំណាងពួកគាត់ទាំងបី។ គេមិនអាចទាក់ទងលោក ប៊ូ ប៊ុនហាំង បានទេកាលពីយប់មិញ។
លោក សម សុគន្ធា មេធាវីអង្គការសិទ្ធិមនុស្សលីកាដូដែលតំណាងសកម្មជនទាំងនេះបានបដិសេធមិនធ្វើអត្ថាធិប្បាយអំពីការចោទប្រកាន់នោះទេ ដោយបារម្ភខ្លាចប៉ះពាល់ដល់សំណុំរឿងនេះ។
សកម្មជនទាំងនេះត្រូវបាននគរបាលស្រុកបទុមសាគរកោះហៅមកសាកសួរកាលពីថ្ងៃសុក្រ ប៉ុន្តែអ្នកទាំងបីមិនព្រមចូលបំភ្លឺទេ ដោយលើកឡើងថា ពួកគាត់មិនបានរំលោភច្បាប់ឡើយ។
លោក សំ ឃិតវៀន ស្នងការនគរបាលខេត្តបានមានប្រសាសន៍កាលពីម្សិលមិញថា អ្នកទាំងបីត្រូវបានកោះហៅបន្ទាប់ពីក្រុមហ៊ុន Direct Access ជាក្រុមហ៊ុនដែលទទួលបានអាជ្ញាប័ណ្ណពីក្រសួងរ៉ែ និងថាមពលធ្វើការបូមខ្សាច់ក្នុងព្រែកអណ្ដូងទឹកនោះ បានដាក់ពាក្យបណ្ដឹងប្ដឹងពួកគាត់។
លោកបានថ្លែងថា “ក្រុមហ៊ុនបានស្នើឲ្យសកម្មជនទាំងបីនាក់នេះឈប់ដឹកនាំអ្នកភូមិតវ៉ាប្រឆាំងការបូមខ្សាច់ទៀត ពីព្រោះវារំខានដល់ការធ្វើអាជីវកម្មខ្សាច់។ ប៉ុន្តែពួកគាត់មិនស្ដាប់ទេ”។
ឧត្ដមសេនីយ៍ទោ សំ ឃិតវៀន បានមានប្រសាសន៍ថា សកម្មជនទាំងនេះត្រូវបានចាប់ខ្លួនព្រោះពួកគាត់មិនបានចូលបំភ្លឺតាមការកោះហៅរបស់តុលាការ។ តុលាការបានកោះហៅពួកគាត់មកសាកសួរ ប៉ុន្តែពួកគាត់បានបដិសេធមិនព្រមចូលបំភ្លឺនៅតុលាការឡើយ”។
ទោះជាយ៉ាងណា លោក សន ចាន់តារា សកម្មជនអង្គការមាតាធម្មជាតិម្នាក់ទៀតក្នុងខេត្ដកោះកុងបានមានប្រសាសន៍ថា សកម្មជនទាំងបីនាក់នេះ គឺនគរបាលទេជាអ្នកកោះហៅ។
លោក ចាន់តារា បានមានប្រសាសន៍បន្ថែមថា លោក សុវិជ្ជា និងលោក ម៉ាឡា ជាសហស្ថាបនិកអង្គការមាតាធម្មជាតិ ត្រូវបានចាប់ខ្លួនកាលពីព្រឹកម្សិលមិញនៅផ្ទះជួលមួយក្នុងស្រុកបទុមសាគរ។
លោកបានថ្លែងថា ខ្ញុំបានឃើញនគរបាលប្រហែល៤០នាក់ធ្វើដំណើរតាមម៉ូតូ និងរថយន្ត។ បន្ទាប់មកពួកគេបានចូលទៅក្នុងផ្ទះជួលនោះ ហើយបានចាប់ខ្លួនសកម្មជនរបស់យើងទាំងពីរនាក់។ នគរបាលបានដាក់ខ្នោះសកម្មជនទាំងនោះ ហើយបានរុញពួកគាត់ចូលក្នុងរថយន្តតូយ៉ូតា ភីកអាប់ ហើយបានបើកចេញទៅ”។
លោក ចាន់តារា បានលើកឡើងថា លោក សំណាង ដែលត្រូវបានចាប់ខ្លួននៅកន្លែងផ្សេងគ្នានោះ ក៏ត្រូវបានចាប់ខ្លួននៅពេលព្រឹកដែរ។
ចាប់តាំងពីខែមេសាមក សកម្មជនអង្គការមាតាធម្មជាតិបានសហការជាមួយសហគមន៍នេសាទឲ្យបញ្ឈប់ការបូមខ្សាច់ក្នុងព្រែកអណ្ដូងទឹក ដែលពួកគាត់បានបន្ទោសថា ធ្វើឲ្យទឹកកខ្វក់ បាក់ច្រាំងទន្លេ ហើយធ្វើឲ្យហិនហោចបរិមាណត្រី និងក្ដាមដែលអ្នកភូមិអាស្រ័យផល។
សកម្មជន និងអ្នកនេសាទទាំងនោះបានឡើងលើសាឡង់របស់ក្រុមហ៊ុន Direct Access ហើយបានបញ្ជាឲ្យអ្នកបើកបរបញ្ឈប់ការបើកបរ ដោយជួនកាលពួកគាត់ប្រើប្រាស់ទូកនេសាទដើម្បីសណ្ដោងសាឡង់ធំៗទៅកាន់សមុទ្រវិញ។
បើទោះជាមានបម្រាមឆ្នាំ២០០៩មិនឲ្យនាំខ្សាច់ទន្លេចេញដោយលោកនាយករដ្ឋមន្ត្រី ហ៊ុន សែន ក៏ដោយ ក៏អាជ្ញាប័ណ្ណរបស់ក្រុមហ៊ុន Direct Access មានខ្លឹមសារថា ក្រុមហ៊ុននេះត្រូវបានអនុញ្ញាតឲ្យបូមខ្សាច់ក្នុងតំបន់ “ព្រែកអណ្ដូងទឹក” សម្រាប់ផ្គត់ផ្គង់ក្នុងស្រុក និងនាំចេញទៅបរទេសដែរ។
ប៉ុន្តែអង្គការមាតាធម្មជាតិលើកឡើងថា ក្រុមហ៊ុនេនះបានបូមខ្សាច់កាន់តែជ្រៅទៅៗនិងហួសពីតំបន់ដែលអាជ្ញាប័ណ្ណរបស់ក្រុមហ៊ុនទទួលបានការអនុញ្ញាត។
ក្រសួងរ៉ែ និងថាមពលមិនបានលើកឡើងថា តើខ្សាច់នេះត្រូវបាននាំចេញទៅណាឡើយ ប៉ុន្តែបើតាមតំណាងក្រុមហ៊ុន Pacific Carriers Limited ជាក្រុមហ៊ុនដឹកជញ្ជូនមានមូលដ្ឋាននៅសិង្ហបុរី ដែលបានជួលកបា៉ល់ឲ្យក្រុមហ៊ុន Direct Access នោះ វាមានទិសដៅឆ្ពោះទៅប្រទេសសិង្ហបុរី។
បើទោះជាអាជ្ញាប័ណ្ណរបស់ក្រុមហ៊ុន Direct Access នឹងអស់សុពលភាពនៅថ្ងៃពុធក៏ដោយ ក៏លោក ឌិត ទីណា អ្នកនាំពាក្យក្រសួងរ៉ែ និងថាមពលបានលើកឡើងកាលពីសប្ដាហ៍មុនថា មិនទាន់មានសេចក្ដីសម្រេចថាតើក្រសួងនឹងត្រូវបន្តអាជ្ញាប័ណ្ណដល់ក្រុមហ៊ុននេះ ឬយ៉ាងណានោះឡើយ។
លោក ឌិត ទីណា មិនបានឆ្លើយតបចំពោះសំណើសុំអត្ថាធិប្បាយទេកាលពីម្សិលមិញ។ អ្នកស្រី នាក់ សុភាព អាយុ៤៦ឆ្នាំ ជាអ្នកភូមិស្រុកបទុមសាគរ បាននិយាយថា អ្នកភូមិនឹងបន្តធ្វើការដើម្បីបញ្ឈប់ក្រុមហ៊ុន Direct Access នេះ បើទោះជាអាជ្ញាប័ណ្ណរបស់ក្រុមហ៊ុននេះត្រូវបានបន្តក៏ដោយ។
អ្នកស្រី សុភាព បាននិយាយបន្ថែមទៀតថា ”យើងនឹងបន្តតវ៉ាប្រឆាំងចំពោះការបូមខ្សាច់ បើទោះជាអាជ្ញាធរចាប់ខ្លួនសកម្មជនអង្គការមាតាធម្មជាតិទាំងអស់ក៏ដោយ”៕ សារុន