35 C
Phnom Penh

​​តុលាការ​​ផ្ដន្ទាទោស​បុរស​៥នាក់​​​​ឲ្យ​ជាប់ពន្ធនា​គារ​​​​​ក្នុង​ម្នាក់ៗ​៧​ឆ្នាំ​ពីបទ​លួច​ព្រះសារីរិកធាតុ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សាលា​ដំបូង​ខេត្ត​កណ្ដាល​​​​បាន​ផ្ដន្ទាទោស​​​សន្តិសុខ​បួន​នាក់​ និង​កសិករ​ម្នាក់​​​​ឲ្យ​​ជាប់​ពន្ធនាគារ​​​​ក្នុង​ម្នាក់ៗ​៧​​ឆ្នាំ​ពីបទ​​​​លួច​​​ព្រះសារីរិកធាតុ​​ចេញពី​ព្រះ​សក្យមុនីចេតិយ​​​​​លើ​កំពូល​ភ្នំ​ឧដុង្គ​កាលពី​ឆ្នាំ​២០១៣ ទោះបី​ជា​​បុរស​ជា​កសិករ​ទទូច​​​អះអាង​ថា ខ្លួន​​ជា​អ្នក​លួច​តែ​ម្នាក់​ឯង​ក្ដី​។

​ឆ្មាំ​​​ពន្ធនាគារ​​​ក្រៀក​​​ឈ្មោះ សៀង សារិន (ឆ្វេង) កា  សាត (កណ្តាល​​​) និង ចោម  ថៃ ចេញ​​​ពី​​​សាលា​​​ដំបូង​​​ខេត្ត​​​កណ្តាល​​​ កាល​​​​​​​​​ពីម្សិលមិញ បន្ទាប់​​​ពី​​​​​​ពួ​​​កគេ​​​ត្រូវ​​​បាន​​​ផ្តន្ទាទោស​​​​​​ឲ្យជាប់​​​ពន្ធនាគារ​​​ក្នុង​​​ម្នាក់​​​ៗ៧ឆ្នាំ ពីបទលួច​​​ព្រះសារីរិកធាតុ​​​ ក្នុង​​​​ឆ្នាំ​​​២០១៣​​​។ រូបថតៈ Jens Welding Ollgaard/The Cambodia Daily
​ឆ្មាំ​​​ពន្ធនាគារ​​​ក្រៀក​​​ឈ្មោះ សៀង សារិន (ឆ្វេង) កា សាត (កណ្តាល​​​) និង ចោម ថៃ ចេញ​​​ពី​​​សាលា​​​ដំបូង​​​ខេត្ត​​​កណ្តាល​​​ កាល​​​​​​​​​ពីម្សិលមិញ បន្ទាប់​​​ពី​​​​​​ពួ​​​កគេ​​​ត្រូវ​​​បាន​​​ផ្តន្ទាទោស​​​​​​ឲ្យជាប់​​​ពន្ធនាគារ​​​ក្នុង​​​ម្នាក់​​​ៗ៧ឆ្នាំ ពីបទលួច​​​ព្រះសារីរិកធាតុ​​​ ក្នុង​​​​ឆ្នាំ​​​២០១៣​​​។ រូបថតៈ Jens Welding Ollgaard/The Cambodia Daily

បុរស​ទី៦​ម្នាក់​ទៀត​ដែល​ជា​អ្នក​រត់​ម៉ូតូ​ឌុប​ ត្រូវ​បាន​​តុលាការ​​សម្រេច​លើក​លែង​ការ​ចោទ​ប្រកាន់​ ហើយ​បាន​ដើរ​​ចេញ​មក​វិញ​ដោយ​មាន​សេរីភាព​កាលពី​ម្សិលមិញ ​បន្ទាប់ពី​​បុរស​​រូប​នោះ និង​សន្តិសុខ​​ទាំង​នេះ​​បាន​ជាប់​ពន្ធនាគារ​​អស់​រយៈ​ពេល​ជិត​២ឆ្នាំ។

ចៅក្រម​ជំនុំជម្រះ​​ សាយ សម្ផស្សសេរី បាន​ប្រកាស​ក្នុង​តុលាការ​កាលពី​ម្សិល​មិញ​​​​ថា ​​”​ឈ្មោះ ចោម ថៃ សៀង សារិន ផា សុខខែម ​​​កា សាត និង​ កែវ រស្មី ត្រូវ​បាន​ផ្ដន្ទាទោស​ឲ្យ​​ជាប់​ពន្ធនាគារ​ម្នាក់​ៗ​​៧​ឆ្នាំ​ ពីបទ​លួច​ព្រះសារី​រិកធាតុ​ចេញពី​ព្រះសក្យ​មុនីចេតិយ​”។

លោក​បាន​​លើក​ឡើង​បន្ថែម​​ថា បុរស​ទាំង​នេះ​​ក៏​ត្រូវ​បាន​ពិន័យ​ជា​ប្រាក់​៨លាន​រៀល​ផង​ដែរ​។ ”​ប្រសិន​បើ​ចុង​ចោទ​ទាំង​អស់​​មិន​​សុខចិត្ត​នឹង​សាល​ក្រម​នេះ​ ពួកគេ​មាន​​ពេល​១ខែ​​ដើម្បី​ប្ដឹង​ឧទ្ធរណ៍​​​ដោយ​គិត​ចាប់ពី​ថ្ងៃ​នេះ​ទៅ”។

សន្តិសុខ​ទាំង​នេះ​​ដែល​មាន​ឈ្មោះ ចោម ​ថៃ សៀង សារិន កា សាត និង​ ផា សុខខែម ដែល​ជា​ប្រធាន​សន្តិសុខ​​ ត្រូវ​បាន​ចាប់​ខ្លួន​​កាលពី​ខែ​ធ្នូ​ ឆ្នាំ​២០១៣ ពីបទ​​លួច​កោដ្ឋ​មាស​​​មួយ​​កាល​ពី​ដើម​ខែ​នោះ ដែល​​ដាក់​តម្កល់​ព្រះសារីរិកធាតុ​​ដូច​ជា ​ព្រះកេសា ព្រះទន្ត​ និង​អដ្ឋិ​​នៃ​ព្រះពុទ្ធ​ជា​ម្ចាស់​។

​​សន្តិសុខ​ទាំង​នេះ​​បាន​អះអាង​ថា ខ្លួនគ្នាន​ទោស​កំហុស​ចាប់​តាំងពី​ពេល​នោះ​មក ហើយ​​​កាលពី​ខែ​កុម្ភៈ ឆ្នាំ​មុន នគរ​បាល​ខេត្ត​តាកែវ​ បាន​ចាប់​ខ្លួន​បុរស​ជា​កសិករ​ឈ្មោះ កែវ រស្មី ដែល​បាន​សារភាព​ថា ខ្លួន​ជា​អ្នក​លួច​ព្រះ​សារី​រិកធាតុ​តែ​ម្នាក់​ឯង​។ បន្ទាប់ពី​ឆែក​ឆេរ​ផ្ទះ​របស់​​​កសិករ​រូបនេះ​នៅ​ក្នុង​ស្រុក​ទ្រាំង នគរ​បាល​បាន​រក​ឃើញ​ព្រះសារីរិកធាតុ​ រួម​ជាមួយ​នឹង​ពុទ្ធប្បដិមា​មាស​មួយ​ចំនួន​ ដែល​បុរស​រូប​នេះ​និយាយ​ថា ខ្លួន​បានលួច​ចេញពី​ភ្នំ​ឧដុង្គ​ដែរ​។

នៅ​ឯ​សវនាការ​​ជំនុំជម្រះ​កាលពី​ថ្ងៃទី​១១ ខែ​សីហា ភ័ស្តុតាង​តែ​មួយ​គត់​ដែល​អយ្យការ​បាន​បង្ហាញ​​ដើម្បី​ដាក់​បន្ទុក​លើ​សន្តិសុខ​ទាំង​នេះ គឺ​ស្នាម​ម្រាម​ដៃ​ និង​ស្នាម​ម្រាម​​​ជើង​របស់​​​បុរស​ទាំង​នេះ​ ដែល​នគរ​បាល​បាន​រក​ឃើញ​នៅ​លើ​ឥដ្ឋ​ ជញ្ជាំង និង​ទ្វារ​នៃ​ព្រះសក្យ​មុនី​ចេតិយ។ ​

បុរស​ទាំង​នេះ​បាន​និយាយ​ថា ខ្លួន​ទំនង​ជា​បន្សល់​ទុក​ស្នាម​ម្រាម​ដៃម្រាម​ជើង​នៅ​​​ក្នុង​​​ព្រះសក្យ​មុនីចេតិយ ​ខណៈ​ពេល​ពួកគេ​​បំពេញ​ភារកិច្ច​យាម​កាម​របស់​ខ្លួន។

អំឡុង​សវនាការ​ ឈ្មោះ កែវ រស្មី បាន​បញ្ជាក់​ជា​ថ្មី​ម្ដង​ទៀត​ថា គាត់​ជា​អ្នក​លួច​​​ព្រះ​សារីរិកធាតុ​តែ​ម្នាក់​ឯង​ ដោយ​បន្ត​រៀបរាប់​លម្អិត​ពី​ដំណើរ​ដើម​ទង​ដែល​ខ្លួន​​លួច​​បាន​​សម្រេច​។

ខណៈពេល​​ឆ្មាំ​ពន្ធនាគារ​ក្រៀក​បុរស​ទាំង​​ប្រាំនាក់​នេះ​ចេញពី​សាល​សវនាការ​កាលពី​ម្សិលមិញ ឈ្មោះ សៀង សារិន បាន​​តវ៉ា​ថា ខ្លួន​គ្មាន​កំហុស​​ទេ។ បុរស​រូប​នេះ​និយាយ​ថា “​ខ្ញុំ​មិន​បាន​ប្រព្រឹត្ត​បទ​ល្មើស​ទេ។ ខ្ញុំ​មិន​អស់​ចិត្ត​ទេ។ ខ្ញុំ​គ្រាន់​តែ​ធ្វេស​ប្រហែស​ក្នុង​ការ​ងារ​​​របស់​ខ្ញុំ​ប៉ុណ្ណោះ ប៉ុន្តែ​តុលាការ​បែរ​ជា​ផ្ដន្ទា​ទោស​​​ខ្ញុំ​បែប​នេះ​”។

ទាំង​ឈ្មោះ សៀង សារិន និង​​ឈ្មោះ កា សាត បាន​បញ្ជាក់​​​ថា ពួកគេ​នឹង​ប្ដឹង​ទាស់​សេច​ក្ដី​​សម្រេច​របស់​សាលា​ដំបូង​។ ឈ្មោះ កា សាត ​​បាន​លើក​ឡើង​ថា ”​ខ្ញុំ​មិន​ដឹងទេ​​ពាក់​ព័ន្ធ​នឹង​ការ​លួច​នេះ។ ហេតុ​អ្វី​បាន​ជា​តុលាការ​ផ្ដន្ទា​ទោស​យើង​ធ្ងន់​យ៉ាង​នេះ?”។

ចំណែក​ឯ​ឈ្មោះ កែវ រស្មី ​​ដែល​ជា​កសិករ ​​​​បាន​បដិសេធ​មិន​ធ្វើ​អត្ថាធិប្បាយ​ទេ​។

បុរស​​រត់​ម៉ូតូឌុប​ឈ្មោះ កាន់ សុភក្ដិ ដែល​ត្រូវ​តុលាការ​​សម្រេច​​លើក​លែង​ការ​ចោទ​ប្រកាន់​​ បាន​និយាយ​ថា ខ្លួន​នឹង​មិន​​ស្វះស្វែង​​​ទាម​ទារ​​សំណង​ជំងឺ​ចិត្ត​​ឡើយ​។ គាត់​និយាយ​​​ថា ​”​វា​អយុត្តិធម៌​ដែល​ខ្ញុំជាប់​គុក​អស់​ប្រហែល​​​២​ឆ្នាំ។ ប៉ុន្តែ​ខ្ញុំ​គ្រាន់​តែ​ចង់​ចេញពី​​គុក​វិញ​​​ប៉ុណ្ណោះ”។

នៅ​ខាង​ក្រៅ​​សាល​សវនាការ​ ក្រុម​គ្រួសារ​​​​របស់​សន្តិសុខ​ទាំង​នេះ​​បាន​សម្រក់​​ទឹក​ភ្នែក​​ដោយ​ក្ដីសោក​សៅ​។

អ្នកស្រី កៅ សុខហេង ដែល​ជា​ប្រពន្ធ​របស់​ឈ្មោះ កា សាត ​​និយាយ​ថា “​វា​អយុត្តិ​ធម៌​ណាស់​ដែល​តុលាការ​​​ផ្ដន្ទាទោស​ប្ដី​ខ្ញុំ​ធ្ងន់​យ៉ាង​នេះ​ ពីព្រោះ​គាត់​មិន​ជាប់​ពាក់​ព័ន្ធ​ក្នុង​ករណី​នេះ​ទេ។ គ្រួសារ​​ខ្ញុំ​ក្រណាស់​ ចាប់​តាំង​​ពី​ប្ដី​ខ្ញុំ​ត្រូវ​ចាប់​ខ្លួន​មក កូន​ខ្ញុំ​ប្រាំមួយនាក់​​មិន​បាន​ទៅ​រៀន​ទេ ព្រោះ​ខ្ញុំ​គ្មាន​លុយ”​​។

ពេល​ទាក់​ទង​តាម​ទូរស័ព្ទ​​ លោក ឆេង ផាត មេធាវី​តំណាង​ឲ្យ​សន្តិសុខ​ទាំង​អស់​នេះ​​បាន​មាន​ប្រសាសន៍​ថា ចៅក្រម​មិន​បាន​ថ្លឹង​ថ្លែង​ភ័ស្តុតាង​ដោយ​ប្រុង​ប្រយ័ត្ន​នោះ​ទេ។ លោក​បាន​គូស​បញ្ជាក់​ថា “​តុលាការ​គ្រាន់​តែ​សង្ស័យ​ពួកគាត់​ បន្ទាប់​មក​​ក៏​ប្រើ​​ការ​សង្ស័យ​ទាំង​នោះ​ដើម្បី​ផ្ដន្ទាទោស​ពួកគាត់​”។

ចំណែក​ឯ​លោក វ៉ាន់ថូ រីយ៉ាវណ្ណ មេធាវី​របស់​​ឈ្មោះ កែវ រស្មី បាន​​ថ្លែង​ថា កូនក្ដី​របស់​លោក​នឹង​មិន​ប្ដឹង​ឧទ្ធរណ៍​ឡើយ​។ “​កូនក្ដី​របស់​​​ខ្ញុំ​បាន​សារភាព​​ថា​ ខ្លួន​​ពិត​ជា​បាន​ប្រព្រឹត្ត​បទ​ល្មើស​នេះ​មែន ដូច្នេះ​ខ្ញុំ​គិត​ថា ទោស​នេះ​គឺ​សម​រម្យ​​ហើយ​​សម្រាប់​គាត់​”៕ សុខុម​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស