​​គ្រិស្ត​សាសនទូត​​នាំ​យក​កីឡា​​​​ស្គីលើ​ទឹក​ វ៉េកបតឌីង ​លើក​ដំបូង​មក​កាន់​​កម្ពុជា​

លោក ស្សន មឺរី (Shaun Murray)​ ដែល​ជា​​​ជើង​ឯក​​ពិភព​លោក​៤ជំនាន់​នៃ​កីឡា​ស្គី​លើ​ទឹក​​ វ៉េកបតឌីង (Wakeboarding-ជា​កីឡា​ស្គី​លើ​ទឹក​ដែល​អ្នក​លេង​​ត្រូវ​​តោង​ខ្សែ​អូស​ដោយ​អូប័រ​)​ ​និង​​ជា​​តួអង្គ​​ក្នុង​​វីដេអូ​ហ្គេម​​ដែល​មាន​ចំណង​ជើង​ថា “Wakeboarding Unleashed featuring Shaun Murray” ​បាន​ចំណាយ​ពេល​​ប្រហែល​២០​នាទី​កាលពី​ថ្ងៃ​សៅរ៍ ដើម្បី​បញ្ចេញ​ស្នៀត​​​ពិសេស​ៗ​​​នៃ​កីឡា​នេះ​នៅ​ស្រះ​ទឹក​​មួយ​ស្ថិត​នៅ​ជាយ​រាជធានី​ភ្នំពេញ។

អ្នក​​​ឈ្នះ​​​ក្នុង​​​ការ​​​ប្រកួត​​​កីឡា វ៉េកបតឌីងយុវជន​​​​​​ ​​​ដែល​​​រៀប​​​ចំ​​​ឡើង​​​កាល​​​ពី​​​ថ្ងៃ​​​សៅរ៍ នៅ​​​ទី​​​លាន Kam-air Walkerpark ក្នុង​​​រាជធានី​​​ភ្នំពេញ ​​​​​​ត្រូវ​​​បានចូល​​​រួម​​​​​​អប​​​អរ​​​ដោយ​​​កីឡាករ​​​អាជីព​​​ អែមីលី ដឺរែម (ទី២​​​ឆ្វេង) និង ស្សន មឺរី (ចុង​​​ខាង​​​ស្តាំ)។ រូបថតៈ Olivia Harlow/The Cambodia Daily
អ្នក​​​ឈ្នះ​​​ក្នុង​​​ការ​​​ប្រកួត​​​កីឡា វ៉េកបតឌីងយុវជន​​​​​​ ​​​ដែល​​​រៀប​​​ចំ​​​ឡើង​​​កាល​​​ពី​​​ថ្ងៃ​​​សៅរ៍ នៅ​​​ទី​​​លាន Kam-air Walkerpark ក្នុង​​​រាជធានី​​​ភ្នំពេញ ​​​​​​ត្រូវ​​​បានចូល​​​រួម​​​​​​អប​​​អរ​​​ដោយ​​​កីឡាករ​​​អាជីព​​​ អែមីលី ដឺរែម (ទី២​​​ឆ្វេង) និង ស្សន មឺរី (ចុង​​​ខាង​​​ស្តាំ)។ រូបថតៈ Olivia Harlow/The Cambodia Daily

ឈរ​ជ្រក​ម្លប់​តង់​នៅ​​​ទីលាន​ប្រកួត Kam-air ​Wakepark ក្នុង​សង្កាត់​ព្រែកតាសេក ខណ្ឌ​ជ្រោយ​​​ចង្វា លោក ស្សន មឺរី ​មាន​ប្រសាសន៍​ថា “​យើង​​​កំពុង​​អង្គុយ​នៅ​វាល​ស្រែ​​កណ្ដាល​​ប្រទេស​កម្ពុជា ហើយ​យើង​​មិន​ធ្លាប់​ស្រមៃ​ដល់​​​ឡើយ​ពីមុន​មក​។ អ្វី​ដែល​គួរ​ឲ្យ​ចាប់​អារម្មណ៍​គឺ​ ប្រព័ន្ធ​ប៉ម​ពីរ​នេះ​​​បាន​​ធ្វើ​ឲ្យ​យើង​​​អាច​លេង​កីឡា​វ៉េក​បតឌីង​បាន​នៅ​កន្លែង​ដែល​​ជា​ធម្មតា​មិន​អាច​​​លេង​បាន​”។

មនុស្ស​ប្រហែល​៥០​នាក់​បាន​​ចូល​រួម​​​​ព្រឹត្តិ​ការណ៍​ប្រកួត​​កីឡា​​វ៉េកបតឌីង​លើក​ដំបូង​​បង្អស់​នៅ​កម្ពុជា ​នៅ​​ ”​ទីលាន​​កីឡា​ប្រកួត​វ៉េក​​បតឌីង” ដែល​មាន​តែ​មួយ​គត់​នៅ​ក្នុង​ប្រទេស​​​​ដែល​​បាន​​សម្ពោធ​ជា​​ផ្លូវ​ការ​កាលពី​ថ្ងៃ​សៅរ៍ ពោល​គឺ​ប្រហែល​២ឆ្នាំ​បន្ទាប់ពី​ត្រូវ​បាន​​ផ្ដួច​ផ្ដើម​ឡើង​ដោយ​សាសនទូត​​ អាល់ អុីវែនស៍ (Alf Evans) ដែល​មាន​ដើម​កំណើត​នៅ​រដ្ឋ​តិចសាស​។

​​​​ក្នុង​​ចំណោម​អ្នក​​​មាន​វត្តមាន​​ក្នុង​ព្រឹត្តិ​ការណ៍​ប្រកួត​​​​នេះដែល​​អាច​ដំណើរ​ការ​ទៅ​បាន​​ដោយ​សារ​ក្រុម​ហ៊ុន​ ណធីក (Nautique) ជា​ក្រុម​ហ៊ុន​កីឡា​វ៉េកបតឌីង មាន​​កីឡាករ​​វ៉េក​បតឌីង​អាជីព​លំដាប់​កំពូល​របស់​ពិភព​លោក​ចំនួន​បួន​រូប​​​​ដែល​មាន​ដូច​ជា​​ ស្សន មឺរី បប់ សូវិន ​​(Bob Soven) អែមីលី ដឺរែម (Emily Durham) និង​​ រីមី មឺរីត (Raimi Merritt)។

ក្រោយ​ការ​ប្រកួត​​​​​ជា​លក្ខណៈ​មិត្តភាព​ជាមួយ​អ្នក​​ប្រកួត​ប្រជែង​ប្រហែល​១០​​រូប កីឡាករ​អាជីព​ទាំង​បួន​​ដែល​ទាញ​ដោយ​រ៉ក​​ខ្សែកាប​លាត​សន្ធឹង​​កាត់​ផ្ទៃ​ទឹក​ប្រហែល​១៥៥​ម៉ែត្រ​​ បាន​​បញ្ចេញ​​ស្នៀត​​ពិសេសៗ​ជូន​អ្នក​ចូល​រួម​ទស្សនា។

ប្រព័ន្ធ​​រ៉ក​ខ្សែ​កាប​នេះ​​​ទាញ​​អ្នក​ជិះ​ទៅ​ចុង​​ស្រះ​កន្លែង ​ដែល​នៅ​ទី​នោះ​ពួកគេ​ត្រូវ​ផ្លាស់​វេន​គ្នា​នៅ​ពេល​​ប្រព័ន្ធ​​រ៉ក​​ប្ដូរ​ទិសដៅ ហើយ​ទាញ​ពួកគេ​ត្រឡប់​ទៅវិញ​ ដោយ​​ធ្វើ​ឲ្យ​ពួកគេ​អាច​ជិះ​បាន​រហូត​​ឲ្យ​តែ​អ្នក​ជិះ​មិន​​ធ្លាក់​ទឹក។

​ដោយ​មាន​​ទី​សម្រាប់​​​​បញ្ចេញ​ស្នៀត​លោត​​​ផ្លោះ​នៅ​កណ្ដាល​ស្រះ​ កីឡាករ​អាជីព​ទាំង​បួន​រូប​​​​បាន​បង្ហាញ​​អ្នក​ចូល​រួម​​នូវ​អ្វី​ដែល​​អាច​ធ្វើ​បាន ដោយ​ពួក​គាត់​បាន​​​បញ្ចេញ​​ស្នៀត​ក្រឡាប់ និង​​បង្វិល​ខ្លួន​​ នៅ​ពេល​លោក​​​ អាល់ អុីវែនស៍ ឬ​លោក ស្សន មឺរី ​ប្រកាស​ឈ្មោះ​ស្នៀត​​នីមួយៗ​។

លោក ចន ហ្វីហ្វើ (John Phifer) ​ជា​សាសន​​ទូត​​មក​ពី​រដ្ឋ​តិច​សាស ដែល​​ជា​ដៃគូ​​របស់​លោក​ ​​អាល់ អុីវែនស៍ ក្នុង​ការ​ធ្វើ​ឲ្យ​​ទីលាន​​​​ប្រកួត​ Kam-air Wakeboard ចាប់​ផ្តើម​ដំណើរ​ការ​​ មាន​​ក្តីរំភើប​​យ៉ាង​ខ្លាំង​ចំពោះ​ព្រឹត្តិការណ៍​នេះ​។

លោក​បាន​​មាន​ប្រសាសន៍​ថា “​វា​ជា​ជោគ​ជ័យ​​ដ៏​អស្ចារ្យ វា​លើស​ពី​​អ្វី​ដែល​យើង​បាន​រំពឹង​ទុក​​។ អាល់ និង​​ខ្ញុំ​មាន​ការ​ភ្ញាក់​ផ្អើល​យ៉ាង​​​ខ្លាំង ​​ពីព្រោះ​យើង​មាន​​កីឡាករ​​វ៉េកបតឌីង​ កំពូលៗ​ លំដាប់​ពិភព​លោក​​ចំនួន​បួន​រូប​នៅ​ក្នុង​ប្រទេស​កម្ពុជា ​​​​នៅ​ទីលាន​ប្រកួត​វ៉េក​បត​ឌីង​ របស់​យើង​។ វា​ពិត​ជា​​អស្ចារ្យ​ណាស់​ គ្មាន​អ្វី​អស្ចារ្យ​ដូច​​នេះ​ឡើយ​​”។

លោក ស្សន មឺរី ​ជា​អតីត​​​ជើង​ឯក​ពិភព​លោក​​​ដែល​បាន​​ក្លាយ​​​​ជា​កីឡាករ​​វ៉េកបតឌីង​​អាជីព​អស់​រយៈ​ពេល​២១​ឆ្នាំ មាន​ប្រសាសន៍​ថា ក្រុម​របស់​លោក​​ធ្វើ​ដំណើរ​ជុំវិញ​​ពិភព​លោក​​ដោយ​​សោហ៊ុយ​ចំណាយ​ជា​បន្ទុក​របស់​ក្រុម​ហ៊ុន ណធីក ដែល​លោក​ចាត់​ទុក​ជា​ ​”ក្រុម​ហ៊ុន​​មាន​ជំនឿ​សាសនា​​” ដែល​រៀបចំ​​ “ដំណើរ​ផ្សព្វ​ផ្សាយ និង​បំពេញ​​​​​បេសកកម្ម​”។

លោក​បាន​លើក​ឡើង​ថា ​”​យើង​​​ធ្លាប់​បាន​ទៅ​កាន់​​ប្រទេស​​អែល​សាល់​វ៉ាឌ័រ កន្លង​ទៅ​​​មិន​យូរ​​ប៉ុន្មាន​ទេ​ ហើយ​​កាល​ពី​​ពីរ​បី​ឆ្នាំ​​​មុន​ ខ្ញុំ​បាន​ទៅ​ប្រទេស​ឥណ្ឌា។ វា​​​ជា​​រឿង​គួរ​ឲ្យ​ចាប់​អារម្មណ៍​ដែល​នៅ​តែ​អាច​​លេង​កីឡា​វ៉េកបតឌីង​បាន​​ ប៉ុន្តែ​​វា​នៅ​តែ​មាន​ឥទ្ធិ​ពល​​​​​ខុស​គ្នា​មក​លើ​ជីវិត​រស់​នៅ​”។

សម្រាប់​លោក​​ អាល់ អុីវែនស៍ និង​លោក ចន ហ្វីហ្វើ ដែល​បាន​ជួប​គ្នា​នៅ​ព្រះវិហារ​គ្រិស្ត​​​​ក្នុង​ទីក្រុង​​ហ្គ្រេបវ៉ាន (Grapevine) ​រដ្ឋ​តិច​សាស កីឡា​វ៉េកបតឌីង​​គឺ​ជា​បេសកកម្ម​​មួយ​របស់​​​ក្រុម​​ហ៊ុន​ដែរ។

cam-photo-wakeboard-1បច្ចុប្បន្ន ​ពួក​​គាត់​​​ទាំង​ពីរ​មាន​​​​បុគ្គលិក​​នាក់​ ហើយ​កំពុង​​ពិចារណា​​ជួល​បុគ្គលិក​ម្នាក់​ទៀត ហើយ​សង្ឃឹម​​ថា នឹង​ជួយ​​​​យុវជន​​ឲ្យ​ក្លាយ​ជា​​​​ជន​គំរូ​នៅ​ក្នុង​សហគមន៍​របស់​ពួកគេ​ និង​មាន​ជំនឿ​លើ​​​ព្រះ​យេស៊ូ។

លោក​ អាល់ អុីវែនន៍ បាន​​មាន​ប្រសាសន៍​​ថា “​ខ្ញុំ​នឹង​ជំរុញ​​​លើក​ទឹក​ចិត្ត​ពួកគេ​ ប៉ុន្តែ​​ខ្ញុំ​មិន​បង្ខំ​ឲ្យ​ពួកគេ​ទៅ​​ព្រះវិហារ​​នោះ​ទេ។ យើង​​ចង់​ឲ្យ​មនុស្ស​ទាំងពីរ​នាក់​របស់​យើង​​ក្លាយ​ជា​គ្រិស្ត​សាសនិក​ ប៉ុន្តែ​​​វា​​មិន​​តម្រូវ​ទាល់​ពួកគេ​ជា​បុគ្គលិក​ទេ នោះ​មិន​មែន​ជា​អ្វី​ដែល​ព្រះ​យេស៊ូ​​បាន​ធ្វើ​ឡើយ​”។

ដោយ​​ហៅ​​ខ្លួន​ឯង​ថា​ជា​ “​កីឡាករ​វ៉េកបត​ឌីង​ដ៏ចំណាស់ និង​ជា​អតីត​គ្រូគង្វាល​​យុវជន​​” លោក​ អាល់ អុីវែនស៍ ​​​​ជា​អ្នក​ទទួល​បន្ទុក​ផ្នែក​បង្ហាត់​​លេង​កីឡា​វ៉េកបតឌីង ​ហើយ​លោក ចន ហ្វីហ្វើ គឺ​ជា​សិស្ស​ទី១​​​របស់​លោក​នៅ​ទីលាន​ប្រកួត​នោះ។

លោក​បាន​មាន​ប្រសាសន៍​ថា ”​យើង​​មិន​យក​ប្រាក់​ខែ​ទាល់​តែ​សោះ។ អ្វីៗ​ដែល​អ្នក​ឃើញ​គឺ​​​សុទ្ធ​តែ​ត្រូវ​បាន​​ចំណាយ​ ឬ​បរិច្ចាគ​ដោយ​ប្រជាជន​​ក្នុង​សហរដ្ឋអាមេរិក។ ហើយ​​​​ប្រាក់​​ដែល​បាន​​ពី​នេះ​នឹង​​ទុក​សម្រាប់​​ទីលាន​​ប្រកួត​ និង​បុគ្គលិក​”។

​សូម​បញ្ជាក់​ថា ពួក​គេ​បាន​​ចំណាយ​​ប្រាក់​​​ប្រហែល​​​៤.០០០​ដុល្លារ​លើ​​ការ​ជីក​ស្រះ​ ​ចំណែក​ឯ​​ប្រព័ន្ធ​​ខ្សែរ៉ក​ដែល​មាន​តម្លៃ​៣០.០០០​​ដុល្លារ​​​​​ត្រូវ​បាន​បរិច្ចាគ​ដោយ​សមា​ជិក​ព្រះវិហារ​គ្រិស្ត​។

ក្រុម​នេះ​​មាន​គម្រោង​​​ស្វែងរក​​​​អ្នក​ឧប​​​ត្ថម្ភ​​ក្នុង​ចំណោម​ជន​បរទេស​​​​នៅ​ក្នុង​រាជធានី​ភ្នំពេញ និង​ប្រជាជន​​មាន​ចំណូល​​លើ​មធ្យម​ដែល​មាន​ពេល​វេលា​ ​មានប្រាក់ និង​​ចិត្ត​ចង់​រៀន​លេង​កីឡា​វ៉េកបតឌីង និង​​ពូកែ​លេង​កីឡា​នេះ​។ លោក​ទាំង​ពីរ​សង្ឃឹម​ថា ប្រាក់​​ដែល​ទទួល​បាន​ពី​​​​​អ្នក​លេង​កីឡា​វ៉េកបតឌីង ​​​នឹង​គ្រប់​គ្រាន់​សម្រាប់​​​ឲ្យ​គម្រោង​​នេះ​បន្ត​ដំណើរ​ការ​ទៅ​មុខ។

​អ្នកស្រី អែមីលី ដឺរែម ​ជា​កីឡាករ​អាជីព​​មួយ​រូប​​​​ក្នុង​ចំណោម​កីឡាករ​អាជីព​​​​ទទួល​ការ​ឧបត្ថម្ភ​ពី​ក្រុម​ហ៊ុន​ណធីក ដែល​បាន​ចូល​និវត្ត​ពី​ការ​ប្រកួត​កាល​ពី​ពេល​ថ្មីៗ​នេះ ​​បន្ទាប់​​ពី​ចាប់​​​​អាជីព​​​ក្នុង​កីឡា​នេះ​​អស់​រយៈ​ពេល​១៦​ឆ្នាំ បាន​​​​លើក​ឡើង​ថា “​ខ្ញុំ​គិត​ថា វា​ពិត​ជា​មាន​សក្ដា​នុពល​យ៉ាង​ខ្លាំង​។ វា​ជា​រឿង​ថ្មី​នៅ​​ទីនេះ​។ ​​​ពួកគេ​មិន​ស្គាល់​ថាអ្វី​ជា​កីឡា​វ៉េកបត​​ឌីង​ទេ។ ពួកគេ​មិន​ទំាង​ស្គាល់​ថា អ្វី​ជា​​​ស្គី​លើ​ទឹក​ផង​!”៕ សុខុម

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.