យោងតាមសារាចរណែនាំមួយដែលចេញកាលពីថ្ងៃសៅរ៍បានឲ្យដឹងថា ព្រះរាជពិធីបុណ្យអុំទូកដែលធ្វើឡើងប្រចាំឆ្នាំនៅក្នុងរាជធានីភ្នំពេញត្រូវបានផ្អាកជាលើកទី៤ក្នុងរយៈពេលប្រាំឆ្នាំ ដោយរដ្ឋាភិបាលលើកឡើងពីកម្រិតទឹកទាបនិងគ្រោះរាំងស្ងួតជាមូលហេតុនៃការផ្អាកនេះ។
ទោះជាយ៉ាងណា តំណាងរាស្ត្រជាន់ខ្ពស់គណបក្សប្រឆាំង និងអ្នកវិភាគនយោបាយមានមន្ទិលសង្ស័យចំពោះហេតុផលនៃការសម្រេចនេះ ដោយលើកឡើងថា រដ្ឋាភិបាលមិនចង់ឲ្យមានមនុស្សរាប់ម៉ឺននាក់ធ្វើដំណើរមករាជធានីអំឡុងពេលមានភាពតានតឹងផ្នែកនយោបាយ។
សារាចរស្តីពីការផ្អាកពិធីនេះ ដែលចុះហត្ថលេខាដោយលោកនាយករដ្ឋមន្ត្រីហ៊ុនសែន បានលើកឡើងថា ការសម្រេចផ្អាកព្រះរាជពិធីដែលមានរយៈពេលបីថ្ងៃនេះ គឺដោយសារតែកង្វះខាតទឹកនៅទូទាំងប្រទេស និងទឹកទន្លេមានកម្រិតទាប។
សារាចរណែនាំនេះ មានខ្លឹមសារដូច្នេះថា ”ដោយឆ្នាំនេះ ទឹកទន្លេមានកម្រិតទាបហើយចំពោះមុខ ព្រះរាជាណាចក្រកម្ពុជាបាននិងកំពុងជួបប្រទះគ្រោះរាំងស្ងួត ដែលទាមទារឲ្យយើងត្រូវប្រមូលផ្ដុំកម្លាំងសរុប មធ្យោបាយសរុប ក្នុងការដោះស្រាយបញ្ហាកង្វះខាតទឹកសម្រាប់ស្រូវប្រាំងជូនប្រជាកសិករនៅតាមខេត្ត”។
សារាចរណែនាំនេះមានខ្លឹមសារបន្តថា ខណៈពេលគ្មានការប្រណាំងទូក គ្មានការប្រគំតន្ត្រី ឬគ្មានអ្នកលក់ដូរនៅតាមផ្លូវក្នុងរាជធានីភ្នំពេញនោះ ការឈប់សម្រាករបស់មន្ត្រីរាជការ និយោជិត កម្មករ ចំនួនបីថ្ងៃក្នុងព្រះរាជពិធីនេះនៅរក្សាដដែល។
អំឡុងពេលថ្លែងសុន្ទរកថានៅក្នុងខេត្តកំពត កាលពីម្សិលមិញ លោក ហ៊ុន សែន បានលើកឡើងថា ព្រះរាជពិធីនេះត្រូវបានផ្អាក ដោយសារគេគិតថា កម្រិតទឹកទន្លេសាបនឹងស្រកចុះនៅត្រឹម៤,២ម៉ែត្រ ពេលដល់់ថ្ងៃទី២៤ខែវិច្ឆិកា ជាពេលដែលព្រះរាជពិធីនេះគ្រោងនឹងចាប់ប្រារព្ធឡើង ពោលគឺទាបជាងកម្រិតទឹកជាធម្មតាដែលមានជម្រៅ៧ទៅ៨ម៉ែត្រ។
លោកមានប្រសាសន៍ទៅកាន់ទាហានចូលនិវត្តន៍ថា “ឆ្នាំនេះ ទឹកទាបខ្លាំងណាស់ ហើយមិនមែនតែកើតឡើងនៅកម្ពុជាយើងទេ សូម្បីតែនៅ ចិន ភូមា ឡាវ ថៃ ក៏ទឹកមានកម្រិតទាបអ៊ីចឹងដែរ។ អ៊ីចឹងហើយទឹក វាមិនអាចហូរមកកាន់តំបន់ទាបបានទេ ហើយប្រជាពលរដ្ឋដែលរស់នៅតាមដងទន្លេ កំពុងតែជួបប្រទះនូវការខ្វះខាតទឹកធ្វើស្រែនៅរដូវប្រាំង”។
យោងតាមតួលេខពីគណៈកម្មការទន្លេមេគង្គបានឲ្យដឹងថា ទឹកទន្លេសាបមានជម្រៅ៤,៣១ម៉ែត្រក្នុងរាជធានីភ្នំពេញកាលពីថ្ងៃសុក្រ។ នៅក្នុងថ្ងៃ ទីមួយនៃព្រះរាជពិធីនេះកាលពីឆ្នាំមុន ទឹកមានជម្រៅ៦,១១ម៉ែត្រ។
កាលពីម្សិលមិញ មន្ត្រីរដ្ឋាភិបាលបានលើកឡើងដូចគ្នានឹងការអះអាងរបស់លោក ហ៊ុន សែន ដែលថា ទឹកទន្លេមានកម្រិតទាបពេកមិនអាចប្រណាំងទូកបាន។
លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានលើកឡើងថា ទឹករាក់មានន័យថា ទូកមិនអាចនាំយកមករាជធានីភ្នំពេញតាមទឹកបានឡើយ ដែលជាធម្មតាគេតែងតែធ្វើដូច្នេះពេលព្រះរាជពិធីបុណ្យអុំទូកមកដល់។
លោកបានមានប្រសាសន៍ថា ” វាមានការលំបាកចំពោះយើងក្នុងការនាំទូកចូលមកទន្លេដើម្បីរៀបចំពិធីអុំទូក ដោយសារតែទឹកវាមានកម្រិតទាបនៅក្នុងតំបន់មួយចំនួន”។
លោក សុខ ឥសាន អ្នកនាំពាក្យគណបក្សប្រជាជនកម្ពុជាមានប្រសាសន៍ថា “លោកមិនមែនជាអ្នកជំនាញ” ខាងកម្រិតទឹក ឬការប្រណាំងទូកទេ ប៉ុន្តែថា វាមិនសមហេតុសមផលទេដែលប្រារព្ធព្រះរាជពិធីនេះនៅក្នុងរាជធានីភ្នំពេញ ខណៈកសិករនៅតាមបណ្ដាខេត្តកំពុងជួបការលំបាកដោយសារកម្រិតទឹកភ្លៀងតិចនោះ។
លោកបានមានប្រសាសន៍ថា”យើងមិនគួរបង្កើតភាពសប្បាយរីករាយច្រើនពេកទេ នៅ ពេលដែលប្រជាពលរដ្ឋ កំពុងជួបប្រទះភាពរាំងស្ងួតទូទាំងប្រទេស ហើយខ្វះទឹកបង្កបង្កើនផល”។
កាលពីឆ្នាំមុន មានការប្រារព្ធព្រះរាជពិធីបុណ្យអុំទូកដែលជាការអបអរប្រចាំឆ្នាំឡើងវិញក្រោយពេលផ្អាករយៈពេលបីឆ្នាំបន្ទាប់ពីមានការផ្អើលរត់ជាន់គ្នានៅថ្ងៃចុងក្រោយនៃព្រះរាជពិធីបុណ្យអំទូកឆ្នាំ២០១០ ដែលបានបណ្តាលឲ្យស្លាប់មនុស្សអស់៣៥៣នាក់ដែលភាគច្រើនជាយុវជន នៅលើស្ពានដែលតភ្ជាប់រាជធានីភ្នំពេញទៅកោះពេជ្រ។
ពិធីបុណ្យនេះត្រូវបានផ្អាកដោយសារគ្រោះទឹកជំនន់ក្នុងឆ្នាំ២០១១ និងឆ្នាំ២០១៣ ហើយដោយសារការយាងចូលទិវង្គតរបស់សម្តេចឪ នរោត្តម សីហនុ ក្នុងខែតុលា ឆ្នាំ២០១២។
លឹម ស្រីអូន ដែលឪពុករបស់គាត់កាន់កាប់ទូក ចន្ទរស្មីសារាយ មកពីខេត្តកំពង់ឆ្នាំងរហូតដល់ពេលគាត់ស្លាប់ក្នុងឆ្នាំ២០១៣ បានសម្តែងការខកចិត្តចំពោះសេចក្តីសម្រេចផ្អាកព្រះរាជពិធីបុណ្យអំុទូកនៅឆ្នាំនេះ ហើយបាននិយាយថា កម្រិតទឹកគឺខ្ពស់ល្មមសម្រាប់ធ្វើការប្រណាំងទូកបាន។
ស្រីអូន និយាយថា “ឥឡូវនេះកម្រិតទឹកទន្លេ មិនរាក់ពេកទេ គឺអាចធ្វើការប្រណាំងទូកបាន”។ អ្នកស្រីបន្ថែមថា កម្រិតទឹករាក់អាចលំបាកក្នុងការចតទូកនៅពេលមកដល់រាជធានីភ្នំពេញ។
មជ្ឈដ្ឋានផ្សេងទៀតបាននិយាយថា មូលហេតុដែលរដ្ឋាភិបាលផ្អាកការប្រណាំងទូកនេះមិនសមហេតុផលឡើយ។លោក អ៊ូ វីរៈ ស្ថាបនិកវេទិកាអនាគត ដែលជាអង្គការវិភាគ និងស្រាវជ្រាវនយោបាយបានមានប្រសាសន៍ថា ”ហេតុអ្វីបានជាយកកម្រិតទឹកជាមូលហេតុទៅវិញ?”។
លោកបានថ្លែងបន្តថា “ខ្ញុំគិតថា ក្នុងឆ្នាំភាគច្រើននៅក្នុងប្រវត្តិសាស្ត្រកម្ពុជា យើងឃើញថា កម្រិតទឹកក៏ឡើងខ្ពស់ខ្លាំងបន្តិច ឬទាបខ្លាំងបន្តិចដែរ។ តើអ្វីជាកម្រិតទឹកដ៏ល្អឥតខ្ចោះទៅ ហើយថា តើអ្វីជាលក្ខខណ្ឌជាមុនចំពោះព្រះរាជពិធីបុណ្យអុំទូក?។ មិនដែលមានលក្ខខណ្ឌជាមុនចំពោះព្រះរាជពិធីបុណ្យអំុទូកឡើយ”។
លោកថ្លែងបន្តទៀតថា ភាពចលាចលនយោបាយកាលពីសប្តាហ៍មុន ដែលក្នុងនោះ តំណាងរាស្ត្រគណបក្សសង្គ្រោះជាតិពីររូប ត្រូវបានវាយដំយ៉ាងព្រៃផ្សៃអំឡុងការតវ៉ារបស់គណបក្សប្រជាជនកម្ពុជា ហើយលោក កឹម សុខា អនុប្រធានគណបក្សប្រឆាំងត្រូវបានដកចេញពីតួនាទីជាអនុប្រធានទី១រដ្ឋសភាដោយតំណាងរាស្ត្រគណបក្សប្រជាជនកម្ពុជានោះ អាចជាចំណែកមួយចំពោះការសម្រេចនេះ។
លោកបានមានប្រសាសន៍ថា ”នេះអាចជាចំណែកមួយ វាប្រហែលជាមិនមែនបញ្ហាទាំងស្រុងឡើយ ប៉ុន្តែពួកគេបានផ្អាកបួនឆ្នាំក្នុងរយៈពេលប្រាំឆ្នាំដោយហេតុផលផ្សេងៗគ្នា…។ ខ្ញុំគិតថា ហេតុផលមួយគឺថា ពួកគេមិនចង់ឲ្យមានមនុស្សម្នាជាច្រើនមកកាន់រាជធានីភ្នំពេញ ពួកគេហាក់បីដូចជាមិនចង់បានបែបនេះទេ ព្រោះដោយសារការតវ៉ារបស់គណបក្សប្រឆាំង [ក្នុងឆ្នាំ២០១៣]”។
លោក សុន ឆ័យ សមាជិកសភាគណបក្សសង្គ្រោះជាតិក៏បានមានប្រសាសន៍ផងដែរថា លោកសង្ស័យថា សេចក្តីសម្រេចនេះអាចដោយសាររដ្ឋាភិបាលបារម្ភពីមនុស្សម្នាជាច្រើនមកកាន់រាជធានី។
លោក សុន ឆ័យ បានថ្លែងថា “ខ្ញុំទទួលព័ត៌មានថា កាលពីពីរបីថ្ងៃមុន រដ្ឋាភិបាលលើកឡើងថា នឹងមិនមានបញ្ហាទេ ដូច្នេះ ពួកគេហាក់ដូចជាធ្វើតែខ្លួនឯង ហើយឥឡូវនេះមានការផ្អាក… វាអាចថា ពួកគេបារម្ភពីមនុស្សម្នាមកកាន់រាជធានីភ្នំពេញ”។ លោកបន្ថែមថា គណបក្សប្រឆាំងមិនមានផែនការធ្វើការតវ៉ាអំឡុងព្រះរាជពិធីបុណ្យអុំទូកឡើយ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានច្រានចោលការលើកឡើងដែលថា រដ្ឋាភិបាលបានផ្អាកព្រះរាជពិធីបុណ្យអំុទូកដោយសារហេតុការណ៍នយោបាយកាលពីពេលថ្មីៗនេះ និងបារម្ភពីចំនួនមនុស្សម្នាដ៏ច្រើននោះ។
លោក ផៃ ស៊ីផាន បានថ្លែងថា “តើលោកអ្នកគិតថា រដ្ឋាភិបាលខ្លាច សម រង្ស៊ី ឬគណបក្សសង្គ្រោះជាតិឬ? ខ្ញុំចង់ប្រាប់លោកអ្នកថា ទេ។ អ្វីៗស្ថិតក្រោមការគ្រប់គ្រងរបស់យើង។ យើងមិនខ្លាចរឿងហ្នឹងឡើយ”៕ ស៊ុយឈាង , សារុន