កាលពីបួនខែមុន លោក ឆៃ ស៊ីណារិទ្ធ អគ្គស្នងការរងនគរបាលជាតិបានប្រកាសថា ស៊ីមកាតទូរស័ព្ទដែលមិនចុះបញ្ជីគឺជាការគំរាមកំហែងធំចំពោះសន្តិសុខជាតិ។ លោកបានអះអាងថា វាជាឧបករណ៍ដែលភេរវករ ជនចាប់ជំរិត និងជននាំគ្រឿងញៀនឆ្លងដែនចូលចិត្តប្រើប្រាស់ មុនពេលចោទប្រកាន់បណ្តាក្រុមហ៊ុនប្រតិបត្តិករទូរស័ព្ទចល័តដែលចែកចាយវាថា យកសុវត្ថិភាពរបស់ពលរដ្ឋមកលេងសើច។
ដោយអះអាងថា ៧០ភាគរយនៃជនក្រៅច្បាប់បានប្រើប្រាស់ស៊ីមកាតថោកៗដែលមិនចុះបញ្ជីដើម្បីប្រព្រឹត្តបទល្មើសកម្រិតធ្ងន់ ឧត្ដមសេនីយ៍ឯក ឆៃ ស៊ីណារិទ្ធ បានប្រកាសថា ដោយមានប្រសិទ្ធភាពភ្លាមៗ និងស្របតាមសារាចរណែនាំឆ្នាំ២០១២ ដែលមិនទាន់បានអនុវត្តមុននេះ រាល់ការទិញស៊ីមកាតទាំងអស់តម្រូវឲ្យមានអត្តសញ្ញាណប័ណ្ណ។ លោកថ្លែងថា បណ្ដាក្រុមហ៊ុនទូរគមនាគមន៍មានពេល៣ខែដើម្បីបញ្ជាក់អត្តសញ្ញាណអតិថិជនរបស់ខ្លួន ហើយផ្ដាច់លេខដែលមិនចុះបញ្ជី។
លោកបានព្រមានថា ក្រោយរយៈពេល៣ខែ ខ្សែទូរស័ព្ទដែលគ្មានការបញ្ជាក់ទាំងអស់នឹងត្រូវបិទចោលដោយស្វ័យប្រវត្តិ រីឯក្រុមហ៊ុនដែលមិនសហការអាចនឹងត្រូវព្យួរអាជ្ញាប័ណ្ណ។
ទោះជាយ៉ាងណា ស៊ីមកាតដែលមានតម្លៃថោកនៅតែមានលក់ពាសពេញរាជធានីភ្នំពេញ ចំណែកឯមន្ត្រីក្រសួងមហាផ្ទៃមួយរូបបានទទួលស្គាល់កាលពីថ្ងៃច័ន្ទថា អាជ្ញាធរមិនទាន់ចាប់ផ្ដើមអនុវត្តសារាចរនេះទេ។
លោក នៅ វុទ្ធី នាយការិយាល័យគ្រប់គ្រងទូរស័ព្ទនៃនាយកដ្ឋានសន្តិសុខផ្ទៃក្នុងក្រសួងមហាផ្ទៃ បានថ្លែងថា ”យើងមិនទាន់ចាប់ផ្ដើមបង្ក្រាបទេ” ហើយលោកបានបដិសេធមិនធ្វើអត្ថាធិប្បាយបន្ថែមទៀតឡើយ ដោយបង្វែរសំណួរទាំងអស់ទៅលោក ឆៃ ស៊ីណារិទ្ធ។
ទោះជាយ៉ាងណា គេមិនអាចទាក់ទងទៅឧត្ដមសេនីយ៍ឯករូបនេះបានទេ ក្រោយពីព្យាយាមជាច្រើនលើកក្នុងរយៈពេលមួយសប្ដាហ៍មកនេះ។
លោក ម៉ៅ ចរិយា ប្រធាននិយ័តករទូរគមនាគមន៍កម្ពុជា (TRC) បានមានប្រសាសន៍កាលពីសប្ដាហ៍មុនថា ស្ថាប័នរបស់រដ្ឋាភិបាលមួយនេះបានជួបជាមួយតំណាងមកពីក្រុមហ៊ុនប្រតិបត្តិករទូរស័ព្ទចល័តធំៗទាំងអស់ដែលរួមមានទាំងក្រុមហ៊ុនក្នុងស្រុកធំៗដូចជាស្មាត និងសែលកាតផងដែរ ក្នុងរយៈពេលប៉ុន្មានថ្ងៃបន្ទាប់ពីលោក ឆៃ ស៊ីណារិទ្ធ បានប្រកាសហើយបានបញ្ជាឲ្យក្រុមហ៊ុនទាំងនោះធ្វើយ៉ាងណាឲ្យអ្នកលក់បន្តរបស់ខ្លួន ព្រមទាំងអ្នកលក់តូចតាចគោរពតាមសារាចរនេះ។
លោកបានលើកឡើងបន្ថែមថា តាមដែលលោកដឹង ស៊ីមកាតបញ្ចុះតម្លៃដែលមិនអាចចុះបញ្ជីបាន គឺលែងមានទៀតហើយក្នុងសារាចរណែនាំនេះ។ ”យើងទុកពេលឲ្យពួកគាត់៣ខែទាក់ទងទៅអ្នកលក់ និងអ្នកដែលទិញស៊ីមកាតដោយមិនប្រើប្រាស់អត្តសញ្ញាណប័ណ្ណ បន្ទាប់ពីយើងប្រកាស។ ពេលនេះគ្មានអ្នកប្រើប្រាស់ស៊ីមកាតដោយគ្មានអត្តសញ្ញាណប័ណ្ណទៀតទេ”។
ខណៈបុគ្គលិកនៅតាមហាងទូរស័ព្ទក្នុងរាជធានីភ្នំពេញ ប្រាប់អ្នកយកព័ត៌មានថា ពួកគេលែងលក់ស៊ីមកាតមិនចុះបញ្ជីទៀតហើយដែលភាគច្រើនដោយសារតែក្រុមហ៊ុនបានណែនាំឲ្យពួកគេធ្វើបែបនេះនោះ អ្នកលក់តាមចិញ្ចើមផ្លូវនៅតែលក់ស៊ីមកាតហាមឃាត់នេះដដែល។
ម្ចាស់ស្តង់មួយកន្លែងក្នុងខណ្ឌដូនពេញ ដែលសុំមិនបញ្ចេញឈ្មោះដោយសារខ្លាចការផ្ដន្ទាទោស បានលក់ស៊ីមកាតមិនចុះបញ្ជីរបស់ក្រុមហ៊ុនស្មាត មួយក្នុងតម្លៃ២ដុល្លារកាលពីសប្ដាហ៍មុន។ គាត់និយាយថា ប្រហែលពាក់កណ្ដាលនៃអតិថិជនរបស់គាត់ហ៊ានចំណាយ៥ដុល្លារ និងខ្ពស់ជាងនេះទិញយកស៊ីមកាតចុះបញ្ជីដែលភាគច្រើនមានលេខរៀងដែលគេយល់ថានាំសំណាងល្អ ចំណែកឯអ្នកផ្សេងទៀតចង់បានស៊ីមកាតមិនចុះបញ្ជីដែលមានតម្លៃពី១ដុល្លារទៅ៣ដុល្លារ។
គាត់និយាយអំពីស៊ីមកាតដែលមានតម្លៃថោកថា “ខ្ញុំលក់វាឲ្យប្រជាជនខ្មែរ និងជនបរទេស ប៉ុន្តែអ្នកទិញភាគច្រើនជាសិស្សសាលា។ ខ្ញុំគិតថា បើក្រុមហ៊ុនមិនអនុញ្ញាតឲ្យអ្នកលក់លក់ទេ អ៊ីចឹងយើងគួរតែទទួលបានសំណង ពីព្រោះក្រុមហ៊ុនទេដែលគួរទទួលខុសត្រូវចំពោះបញ្ហានេះ”។ គាត់បានបន្ថែមថា មិនដែលមានក្រុមហ៊ុនទូរគមនាគមន៍ណាទាក់ទងមកគាត់ទេពាក់ព័ន្ធសារាចរនេះ។
នៅឯស្តង់ស្រដៀងគ្នាមួយក្នុងខណ្ឌចំការមន ម្ចាស់ស្តង់ឈ្មោះ ឃួន អ៊ែនឌី និយាយថា គាត់បានបង្វិលស៊ីមកាតថោកៗឲ្យទៅក្រុមហ៊ុនស្មាត និងក្រុមហ៊ុនសែលកាតវិញជាថ្នូរនឹងសំណងកាលប្រហែល៣ខែមុន។
គាត់និយាយទៀតថា ”ខ្ញុំបានប្រគល់ស៊ីមកាតប្រហែល៥០ទៅ៦០ឲ្យក្រុមហ៊ុនវិញ បន្ទាប់ពីក្រុមហ៊ុនប្រាប់ខ្ញុំថា គេនឹងបិទស៊ីមកាតដែលលក់ដោយមិនប្រើប្រាស់អត្តសញ្ញាណប័ណ្ណ។ ខ្ញុំប្រគល់ឲ្យវិញ ព្រោះបើខ្ញុំទុកវា ខ្ញុំនឹងខាតពេលគេបិទសេវា”។
ទោះជាយ៉ាងណា លោក ថូម៉ាស ហាន់ (Thomas Hundt) នាយកប្រតិបត្តិក្រុមហ៊ុនស្មាត និងលោក អាលែន ស៊ីនហ្វៀល (Alan Sinfield) នាយកប្រតិបត្តិក្រុមហ៊ុនឃ្យូប៊ី បានបដិសេធមិនឆ្លើយសំណួរទាក់ទិនវិធានការដ៏តឹងរ៉ឹងលើស៊ីមកាតទូរស័ព្ទនេះទេ។ ចំណែកឯតំណាងក្រុមហ៊ុនសែលកាតវិញ ក៏មិនបានឆ្លើយតបដែរ ក្រោយពីមានការស្នើជាច្រើនលើកសុំការបំភ្លឺជុំវិញបញ្ហានេះ៕ សុខុម