នៅក្នុងរបាយការណ៍មួយចេញកាលពីសប្តាហ៍មុន អង្គការឃ្លាំមើលសិទ្ធិមនុស្ស(HRW) បានធ្វើការសន្និដ្ឋានដែលអាចទាយដឹងមុននិងដែលទទួលបានការគាំទ្រយ៉ាងខ្លាំងថា រដ្ឋាភិបាលរបស់លោកនាយករដ្ឋមន្ត្រី ហ៊ុន សែន មិនបានបំពេញតាមតួនាទីនៅក្នុងការការពារពលរដ្ឋខ្លួនឡើយ។
នៅក្នុងសេចក្តីថ្លែងការណ៍មួយអមដោយរបាយការណ៍ពិភពលោកឆ្នាំ២០១៦ មានចំណងជើងថា “កម្ពុជា៖រលកថ្មីនៃការបង្ក្រាប” ដែលរៀបរាប់សង្ខេបអំពីការរំលោភបំពានសិទ្ធិមនុស្សហួសហេតុបំផុតរបស់រដ្ឋាភិបាល អង្គការនេះបានធ្វើការអះអាងដែលពីមុនត្រឹមតែជាពាក្យចចាមអារា៉ម ឬការប៉ាន់ស្មាន។
អង្គការឃ្លាំមើលសិទ្ធិមនុស្សបានសរសេរថា សមាជិកនៃអង្គភាពកងអង្គរក្សផ្ទាល់របស់លោក ហ៊ុន សែន ស្ថិតក្នុងចំណោមអ្នកដែលវាយដំយ៉ាងព្រៃផ្សៃលើតំណាងរាស្ត្រគណបក្សប្រឆាំងពីររូបកាលពីខែតុលា។
សេចក្តីថ្លែងការណ៍នេះមានខ្លឹមសារដូច្នេះថា “កាលពីថ្ងៃទី២៦-២៧ ខែតុលា ក្រោយការជំរុញជាសាធារណៈរបស់លោកហ៊ុន សែន ឲ្យមានការប្រឆាំងបាតុកម្មរបស់គណបក្សសង្គ្រោះជាតិ អង្គរក្សរបស់លោកនាយករដ្ឋមន្ត្រី និងអ្នកផ្សេងៗទៀតដែលស្លៀកស៊ីវិលបានវាយដំយ៉ាងព្រៃផ្សៃលើតំណាងរាស្ត្រគណបក្សសង្គ្រោះជាតិពីររូបនៅខាងក្រៅរដ្ឋសភា”។
នៅពេលសួរកាលពីថ្ងៃពុធឲ្យពន្យល់ថាតើអង្គការឃ្លាំមើលសិទ្ធិមនុស្សបានភ្ជាប់ទំនាក់ទំនងរវាងអង្គភាពកងអង្គរក្សរបស់លោកនាយករដ្ឋមន្ត្រី និងក្រុមដែលវាយដំទាត់ធាក់ និងជាន់ជញ្ច្រំលើលោក ញ៉យ ចំរើន និងលោក គង់ សុភា តំណាងរាស្ត្រគណបក្សសង្គ្រោះជាតិដោយរបៀបណានោះ លោក ប្រេដ អាដាម (Brad Adams) ប្រធាន ប្រចាំតំបន់អាស៊ីរបស់អង្គការនេះបានលើកឡើងថា លោកជឿថា ពីមុនព័ត៌មាននេះត្រូវបានចុះផ្សាយរួចហើយ។
ដោយសំដៅដល់បុរសបីនាក់ដែលអះអាងថា ជាទាហាន និងដែលប្រគល់ខ្លួនឲ្យអាជ្ញាធរប៉ុន្មានថ្ងៃក្រោយហេតុការណ៍នេះលោកបានលើកឡើងតាមរយៈអីុម៉េលថា ”និយាយឲ្យខ្លីទៅ អ្នកទាំងបីដែលប្រគល់ខ្លួននៅក្នុងករណីវាយដំលើរាងកាយរបស់តំណាងរាស្ត្រគណបក្សសង្គ្រោះជាតិគឺជាអង្គរក្ស”។
“ខ្ញុំគិតថា កាសែតរបស់លោកអ្នក និងកាសែតផ្សេងៗទៀតបានធ្វើសេចក្តីរាយការណ៍អំពីបញ្ហានេះរួចហើយ?”។
ទោះជាយ៉ាងណាទាំងកាសែត ខេមបូឌា ដេលី និងកាសែតផ្សេងៗទៀតសុទ្ធតែមិនបានចុះផ្សាយអំពីរបាយការណ៍ដែលបង្ហាញភ័ស្តុតាងគាំទ្រអះអាងនេះ។
អត្ថបទមួយចុះផ្សាយដោយកាសែតភ្នំពេញប៉ុស្តិ៍ ក្រោយហេតុការណ៍វាយដំបានគូសបញ្ជាក់ថា រូបភាពមួយដែលគេបានបង្ហោះផ្សព្វផ្សាយតាមអីុនធឺណិតស្តីអំពីជនដៃដល់ម្នាក់ក្នុងចំណោមជនដៃដល់ដែលបានសារភាព ទំនងជាបង្ហាញឲ្យឃើញថា បុរសរូនេះស្ថិតក្នុងឯកសណ្ឋានកងអង្គរក្ស។ អត្ថបទមួយទៀតនៅក្នុងកាសែតភ្នំពេញប៉ុស្តិ៍ដដែលនេះបានភ្ជាប់មេដឹកនាំការតវ៉ាម្នាក់អំឡុងពេលដែលតំណាងរាស្ត្រទាំងពីររូបនេះត្រូវបានវាយដំទៅនឹងអង្គភាពកងអង្គរក្សរបស់លោកនាយករដ្ឋមន្ត្រីដោយប្រាប់ពីអត្ថសញ្ញាណរបស់មេដឹកនាំរូបនេះថា ជាមេបញ្ជាការមួយរូបនៅក្នុងកងកម្លាំងនេះ ប៉ុន្តែ មិនបានភ្ជាប់បុរសរូបនេះដោយផ្ទាល់ទៅនឹងការវាយដំទេ។
ដោយជូនដំណឹងថា គ្មានកាសែតណាបានភ្ជាប់ទំនាក់ទំនងរវាងអង្គភាពកងអង្គរក្ស ទៅនឹងការវាយនេះ លោក ប្រេដ អាដាម បានលើកឡើងថា លោកបានផ្ញើអីុម៉េលមួយកាលពីថ្ងៃសុក្រ ដោយពន្យល់អំពីលទ្ធផលនៃការស្រាវជ្រាវរបស់អង្គការលោក។ អីុម៉េលបន្តបន្ទាប់ដែលផ្ញើជូនមកលោក ប្រេដ អាដាម ក្នុងរយៈពេលពីរថ្ងៃកន្លងមកនេះ គ្មានចម្លើយទេរហូតមកទល់ពេលមានការចុះផ្សាយឡើយ។
លោក ហីុង ប៊ុនហៀង មេបញ្ជាការអង្គភាពកងអង្គរក្សរបស់លោក ហ៊ុន សែន ពីមុនបានបដិសេធថា ក្នុងចំណោមកូនចៅរបស់លោកគ្មាននរណាម្នាក់ពាក់ព័ន្ធក្នុងករណីវាយដំលើតំណាងរាស្ត្រឡើយ។ ពេលទាក់ទងកាល ពីម្សិលមិញ ឧត្តមសេនីយ៍ ហីុង ប៊ុនហៀង បានផ្តាច់ទូរស័ព្ទរបស់អ្នកយកព័ត៌មានម្នាក់។
ក្រោយហេតុការណ៍វាយដំនេះរួចរដ្ឋាភិបាលបានបង្កើតគណៈកម្មការមួយដែលមានសមាសភាពមកពីនគរបាលថ្នាក់កំពូល និងមន្ត្រីក្រសួងមហាផ្ទៃដើម្បីសើុបអង្កេតករណី នេះដោយធ្វើឲ្យមានការរិះគន់ចំពោះការចាត់តាំងក្រុមទាំងពីរដែលសុទ្ធតែគាំទ្រគណបក្សប្រជាជនកម្ពុជាឲ្យដឹកនាំការសើុបអង្កេតដ៏រសើបទាក់ទិននឹងរឿងនយោបាយ។
លោក សុខ ខេមរិន្ទ ប្រធាននាយកដ្ឋាននគរបាលព្រហ្មទណ្ឌនៃក្រសួងមហាផ្ទៃដែលក៏ជាសមាជិកៃនគណៈកម្មការសើុបអង្កេតដែលមានសមាជិក៨រូបផងដែរនោះ បានលើកឡើងកាលពីម្សិលមិញថា បុរសជាប់ពន្ធនាគារទាំងបីនាក់នេះដែលមានឈ្មោះ ចាយ សារិទ្ធ អាយុ៣៣ឆ្នាំ ម៉ៅ ហឿន អាយុ៣៤ឆ្នាំ និង សុត វណ្ណនីអាយុ៤៥ឆ្នាំ មិនត្រូវបានសួរទាក់ទិននឹងអង្គភាពរបស់ពួកគេឡើយមុនពេលត្រូវបានបញ្ជូនទៅតុលាការ។
លោកបានមានប្រសាសន៍ថា “ខ្ញុំមិនច្បាស់ទេ ព្រោះនៅពេលនោះ ខ្ញុំប្រញាប់ប្រញាល់បញ្ជូនពួកគេទៅតុលាការ ហើយខ្ញុំមិនបានសួរនាំពួកគេឲ្យបានលម្អិតឡើយ។ ពេលខ្ញុំគ្មានព័ត៌មានលម្អិត ខ្ញុំមិនអាចប្រាប់អស់លោកបានទេព្រោះអស់លោកបម្រើនៅកាសែតបរទេស”។
នៅពេលសួរទាក់ទិនការអះអាងនៅក្នុងរបាយការណ៍របស់អង្គការឃ្លាំមើលសិទ្ធិមនុស្ស ឧត្តមសេនីយ៍ទោ សុខ ខេមរិន្ទ បានថ្លែងថា “អស់លោកអាចតាមដានពួកគេហើយនិយាយថា ‘នេះគឺជាអ្វីដែល អង្គការឃ្លាំមើលសិទ្ធិមនុស្សលើកឡើង’ ប៉ុន្តែ សម្រាប់ខ្ញុំ ខ្ញុំមិនច្បាស់ទេ ហើយខ្ញុំមិនហ៊ាននិយាយឡើយ”។
លោក មាស ច័ន្ទពិសិដ្ឋ ព្រះរាជអាជ្ញារងដែលដំណើរការរឿងក្តីដាក់បន្ទុកលើកជនសង្ស័យទាំងបីនាក់នេះបានបង្វែរសំណួរទាក់ទិននឹងអង្គភាពរបស់ពួកគេទៅចៅក្រមសើុបសួរ អីុ ថាវរៈ ដែលមិនអាចទាក់ទងបាន។ កាលបរិច្ឆេទសម្រាប់ការបើកសវនាការជំនុំជម្រះរឿងក្រីរបស់ពួកគេនៅមិនទាន់ប្រកាសឲ្យដឹងនៅឡើយទេ។
ហើយខណៈលោក ច័ន្ទពិសិដ្ឋ លើកឡើងថា តុលាការកំពុងបន្តការស្រាវជ្រាវរបស់ខ្លួនដើម្បី តាមចាប់ជនដល់បន្ថែមទៀតវីដេអូឃ្លីបដែលគេបង្ហោះផ្សព្វផ្សាយតាមអីុនធឺណិតបង្ហាញឲ្យឃើញយ៉ាងច្បាស់ថា មានបុរសលើសពីបីនាក់ជាប់ពាក់ព័ន្ធនៅក្នុងហេតុការណ៍វាយដំនេះ។ អ្នកសើុបអង្កេតសិទ្ធិមនុស្សដ៏លេចធ្លោមួយរូបនិយាយថា ការខិតខំរបស់រដ្ឋាភិបាលគ្មានភាពស្មោះត្រង់ទេ។
លោក អំ សំអាត អ្នកគ្រប់គ្រងបច្ចេកទេសផ្នែកស៊ើបអង្កេតនៅអង្គការសិទ្ធិមនុស្ស
លីកាដូបានលើកឡើងថា “ខ្ញុំគិតថា ប្រសិនបើបុរសទាំងបីនាក់នោះមិនប្រគល់ខ្លួនទេនោះពួកគេប្រហែលជារកមិនឃើញជនសង្ស័យណាម្នាក់ឡើយ”។លោកបានគូសបញ្ជាក់ថា មានភ័ស្តុតាងជាច្រើនដែលអ្នកសើុបអង្កេតអាចរកបាន។
លោកបានមានប្រសាសន៍ថា “ចំពោះករណីនេះ យើងឃើញតាមមាស៊ីនថត វីដេអូឃ្លីប រូបថតជាច្រើនដែលត្រូវបានបង្ហោះនៅលើទំព័រហ្វេសប៊ុកទាក់ទិននឹងអំពើហិង្សាលើតំណាងរាស្ត្រគណបក្សប្រឆាំង”។
ប៉ុន្តែ លោក អំ សំអាត បានលើកឡើងថាភ័ស្តុតាងទាំងនេះនៅតែមិនទាន់ធ្វើឲ្យលោកមានភាពច្បាស់លាស់ណាមួយនៅឡើយថា តើជនដៃដល់មកពីអង្គភាពកងអង្គរក្សរបស់លោក ហ៊ុន សែន ឬយ៉ាងណានោះ។
លោកបានថ្លែងថា ”វាមិនទាន់ច្បាស់នៅឡើយទេ ថាតើពួកគេគឺជាអង្គរក្ស ឬមិនមែននោះ”៕ស៊ុយឈាង