មន្ត្រីជាន់ខ្ពស់ទទួលបន្ទុកសិទ្ធិមនុស្សនៅកម្ពុជា អំពាវនាវឲ្យរដ្ឋាភិបាលពិនិត្យឡើងវិញករណីចាប់ខ្លួនសកម្មជនបរិស្ថានបីរូបកាលពីពេលថ្មីៗនេះ ដើម្បីកែលំអប្រព័ន្ធយុត្តិធម៌សង្គមឲ្យបានល្អប្រសើរឡើងវិញ និងបញ្ឈប់ការរិះគន់ពីមជ្ឈដ្ឋានអន្តរជាតិផងដែរ។
ការអះអាងនេះ ធ្វើឡើងបន្ទាប់ពីយុវជនបរិស្ថាន ៣នាក់ដែលសមត្ថកិច្ចចាប់ឃុំខ្លួនកាលពីពេលថ្មីៗនេះក្រោមការចោទប្រកាន់ថា ដោយសារតែពួកគេបម្រើការឲ្យអង្គការចាត់តាំងខុសច្បាប់មកពីក្រៅប្រទេស។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី១៨ ខែមិថុនា ថា ក្រុមអង្គការសង្គមស៊ីវិលកំពុងតាមដានយ៉ាងយកចិត្តទុកដាក់ចំពោះករណីចាប់ខ្លួនសកម្មជនបរិស្ថានទាំងនេះ ព្រោះថាក្នុងនោះមានយុវជន ៣រូបត្រូវបានចាប់ខ្លួន ចំណែកយុវជន ១រូបផ្សេងទៀតមកទល់នឹងពេលនេះ ខាងសាច់ញាតិមិនទាន់បានទទួលដំណឹងនៅឡើយទេ ក្រោយអាជ្ញាធរស្រុកកោះធំ នាំខ្លួនទៅសួរនាំកាលពីថ្ងៃពុធ។
លោកអះអាងថា ការចូលរួមការពារបរិស្ថានពីសំណាក់យុវជនទាំងនោះ គឺជាការលំបាកសម្រាប់ពួកគេទៅហើយដែលតែងតែរងនូវការធ្វើទុក្ខបុកម្នេញពីសំណាក់ឈ្មួញទុច្ចរិតដែលបំផ្លាញធនធានធម្មជាតិកម្ពុជាកន្លងមក ដូច្នេះរដ្ឋាភិបាលគួរតែលើកទឹកចិត្ត និងជួយការពារសុវត្ថិភាពដល់សកម្មជនបរិស្ថានទាំងនោះវិញ ទើបជារឿងត្រឹមត្រូវ។
លោក ស៊ឹង សែនករុណា បញ្ជាក់ថា ដើម្បីថែរក្សាធនធានធម្មជាតិកម្ពុជាឲ្យបានគង់វង្ស រដ្ឋាភិបាលគួរផ្តល់ឱកាសឲ្យដៃគូពាក់ព័ន្ធ ដូចជាអង្គការសង្គមស៊ីវិល សកម្មជនបរិស្ថាន និងសហគមន៍មូលដ្ឋានជាដើម ចូលរួមល្បាតព្រៃដើម្បីឲ្យពួកគេរួមចំណែកក្នុងការទប់ស្កាត់បទល្មើសលើធនធានធម្មជាតិដែលរងការកាប់បំផ្លាញអស់រយៈពេលរាប់សិបឆ្នាំមកហើយនោះ។
កាលពីថ្ងៃទី១៦ ខែមិថុនា ឆ្នាំ២០២១ ព្រះរាជអាជ្ញារងសាលាដំបូងរាជធានីភ្នំពេញ លោក សេង ហៀង បានចេញដីកាឲ្យយុវជនបរិស្ថានរបស់អង្គការចលនាមាតាធម្មជាតិចំនួន ៣នាក់ ក្នុងនោះរួមមាន លោក លី ចាន់ដារ៉ាវុទ្ធ កញ្ញា ស៊ុន រដ្ឋា និងលោក យឹម លាងហ៊ី ចូលខ្លួនដើម្បីសាកសួរពីដំណើររឿងអំពើបង្កឲ្យមានអសន្តិសុខសង្គម។
ជុំវិញបញ្ហានេះ អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន អះអាងថា មានមូលហេតុមួយចំនួនដែលតម្រូវឱ្យសមត្ថកិច្ចចាប់ខ្លួនសកម្មជនចលនាមាតាធម្មជាតិទាំងនោះ គឺដោយសារតែពួកគេមានអង្គការចាត់តាំងខុសច្បាប់ និងប្រើប្រាស់ហិរញ្ញប្បទានភេរវកម្ម។
កាលពីថ្ងៃទី១៧ ខែមិថុនា ឆ្នាំ២០២១ ស្ថាបនិកចលនាមាតាធម្មជាតិ លោក អាឡេហាន់ដ្រូ ហ្កន់ហ្សាលេដេវីឌសុន បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily ថា ការចាប់ខ្លួនយុវជនការពារបរិស្ថានជាបន្តបន្ទាប់បែបនេះ ដោយសារតែបញ្ហានៃការបំផ្លាញធនធានធម្មជាតិ ដូចជាព្រៃឈើ និងដីកោះជាដើម គឺជាមុខព្រួយនៃមុខជំនួញដ៏ធំរបស់គ្រួសារត្រកូល ហ៊ុន និងឧកញ៉ាដែលកំពុងរកស៊ីទុច្ចរិតជាមួយគ្រួសារលោក ហ៊ុន សែន ក្នុងពេលបច្ចុប្បន្ននេះ។
កាលពីថ្ងៃទី៧ ខែមិថុនា ឆ្នាំ២០២១ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក Patrick Murphy បានបង្ហាញក្តីកង្វល់ជាខ្លាំងទៅកាន់លោក ស ខេង អំពីការកាត់ទោសសកម្មជនបរិស្ថានមួយចំនួនដាក់ពន្ធនាគារ ដែលអាជ្ញាធរកម្ពុជាបានចាប់ខ្លួន និងចោទប្រកាន់លើពួកគេកន្លងមក។
លោកថា ការហ៊ាននិយាយដើម្បីការពារបរិស្ថានដែលប្រឈមនឹងការគំរាមកំហែង ដោយសារការកាប់ឈើខុសច្បាប់ និងកេងយកប្រយោជន៍ពាណិជ្ជកម្មរបស់ជាតិ គឺជារឿងគួរឱ្យសរសើរទៅវិញទេ មិនគួរទទួលរងនូវការចោទប្រកាន់បែបនោះឡើយ។
ប៉ុន្តែអាជ្ញាធរតែងតែព្យាយាមបំបិទសំឡេងសកម្មជនបរិស្ថាន ហើយធ្វើទុក្ខបុកម្នេញសហគមន៍មូលដ្ឋាន និងសង្គមស៊ីវិលដែលជាដៃគូរបស់ខ្លួន ស្របពេលពួកគេបានបង្ហាញពីកង្វល់ដ៏សមហេតុផលលើការបាត់បង់ធនធានធម្មជាតិរបស់កម្ពុជាសព្វថ្ងៃនេះ។
កាលពីអំឡុងឆ្នាំ២០២០ របាយការណ៍មួយរបស់គម្រោងយុត្តិធម៌ពិភពលោក (World Justice Project) ស្ដីពីនីតិរដ្ឋនៅកម្ពុជា បានផ្តល់ពិន្ទុឲ្យកម្ពុជាជាប់លេខរៀងទី១២៧ ក្នុងចំណោមប្រទេសចំនួន១២៨ នៅជុំវិញពិភពលោក ដោយបង្ហាញថា ប្រព័ន្ធយុត្តិធម៌នៅកម្ពុជាអាក្រក់បំផុតនៅក្នុងលោក ប៉ុន្តែល្អជាងតែប្រទេសវេណេហ្ស៊ុយអេឡា តែមួយប៉ុណ្ណោះ៕