ក្រសួងវប្បធម៌ និងវិចិត្រសិល្បៈកម្ពុជា បានប្រកាសជាសាធារណៈពីការអះអាងរបស់ព្រះចៅអធិការវត្តដែលសាងសង់សំណង់នានា ដែលមានរចនាបថដូចប្រាសាទអង្គរវត្តរបស់ខ្មែរ ថាមិនមែនជាការលួចចម្លងប្លង់តាមប្រាសាទអង្គរវត្តរបស់កម្ពុជានោះទេ ប៉ុន្តែជាគំនូសប្លង់ដែលពួកគេបង្កើតឡើងដោយខ្លួនឯងប៉ុណ្ណោះ។
ការអះអាងរបស់ក្រសួងវប្បធម៌ និងវិចិត្រសិល្បៈកម្ពុជា ក្រោយពីផ្ទុះការរិះគន់យ៉ាងចាស់ដៃលើបណ្ដាញសង្គម Facebook ថា រូបរាងប្រាសាទ និងរចនាបថដែលថៃ បានសាងសង់នោះ គឺជាការលួចចម្លងតាមប្លង់ប្រាសាទអង្គរវត្តដែលជាអត្តសញ្ញាណជាតិខ្មែរ។
ក្រសួងវប្បធម៌ និងវិចិត្រសិល្បៈ បានចេញសេចក្តីប្រកាសព័ត៌មានរបស់ខ្លួននៅថ្ងៃទី៧ ខែកក្កដា ឆ្នាំ២០២១ អំពីការសាងសង់ប្រាសាទថ្មីមួយនៅខេត្តបុរីរម្យ ប្រទេសថៃ ដែលមានការរិះគន់លើបណ្ដាញសង្គម Facebook ប៉ុន្មានថ្ងៃនេះ គឺក្រសួងបានសហការជាមួយឯកអគ្គរាជទូតកម្ពុជា ប្រចាំប្រទេសថៃ បានស្រាវជ្រាវយ៉ាងច្បាស់ថា ប្រាសាទថ្មនោះពិតជាបានសាងសង់ពិតប្រាកដមែន។
ប្រភពដដែលអះអាងថា សំណង់ប្រាសាទនោះជាសំណង់ប្រាសាទមួយក្នុងចំណោមសំណង់ប្រាសាទថ្មដទៃទៀតដែលគេសាងសង់ដើម្បីជាតំណាងទីប្រតិស្ឋាននៃព្រះពុទ្ធសម្រាប់បូជា ប៉ុន្តែសំណង់ទាំងនោះសាងសង់ពីថ្មភក់នៅផ្នែកខាងក្រៅ និងចាក់បេតុងបង្កប់ដែកពីខាងក្នុងប៉ុណ្ណោះ។
ក្រសួងបញ្ជាក់ថា តំណាងអ្នកសម្របសម្រួលគម្រោងស្ថាបនាប្រាសាទទាំងនេះ ក៏ស្វាគមន៍ក្នុងការទទួលស្នើឲ្យមន្ត្រីជំនាញផ្នែកស្ថាបត្យកម្មរបស់កម្ពុជា ចុះពិនិត្យដោយផ្ទាល់ផងដែរក្នុងករណីមានមន្ទិលសង្ស័យពីសំណង់នេះ។ បន្ថែមពីនេះ ពួកគេអះអាងថា ប្លង់របស់ប្រាសាទ និងរចនាបថលើប្រាសាទ គឺធ្វើទៅស្ថាបត្យកម្មមួយចំនួនក្នុងប្រទេសរបស់ពួកគេប៉ុណ្ណោះ មិនមែនជាការលួចចម្លងពីកម្ពុជានោះទេ។
កាលពីថ្ងៃទី៦ ខែកក្កដា ឆ្នាំ២០២១ មានការប្រតិកម្មព្រោងព្រាតលើបណ្ដាញសង្គមFacebook នូវរូបភាពដែលវិស្វករថៃ បានបង្ហាញគម្រោងសាងសង់ប្រាសាទដែលដូចទៅនឹងប្រាសាទអង្គរវត្តរបស់ខ្មែរ ដែលគេប្រសិទ្ធិនាមថាជាប្រាសាទសីហនគរ ដែលបានសាងសង់ក្នុងបរិវេណវត្តភូម៉ានហ្វា ភូមិណងបួឡាយ ឃុំបានសឹង្ហ ស្រុកណាងរ៉ង ខេត្តបុរីរម្យ ប្រទេសថៃ។
ទាក់ទិននឹងបញ្ហានេះ ក្រុមអ្នកប្រវត្តិសាស្ត្រខ្មែរ រិះគន់ថា ប្រទេសថៃ តែងតែលួចអរិយធម៌ខ្មែរទៅកុហកភ្ញៀវបរទេសថាប្រាសាទអង្គរវត្ត ប្រាសាទព្រះវិហារ ប្រដាល់ក្បាច់គុនខ្មែរ ល្ខោនខោល និងរបាំព្រះរាជទ្រព្យ ជាដើម គឺជារបស់ខ្លួន ស្របពេលដែលពួកគេប្រឹងរំលោភបំពាន និងលួចចម្លងស្នាដៃខ្មែរឥតឈប់ឈរ។
ពួកគេបញ្ជាក់ថា ការធ្វើបែបនេះ គឺក្នុងចេតនាកេងចំណេញលើវប្បធម៌ និងប្រពៃណីខ្មែរ ដើម្បីទាក់ទាញភ្ញៀវបរទេសក្នុងការរកចំណូលថវិកាជាតិរបស់ពួកគេ ដោយគ្មានការខ្លាចក្រែង និងខ្មាសអៀនទាល់តែសោះ។
កាលពីចុងឆ្នាំ២០២០ សាស្ត្រាចារ្យសិលាចារឹក និងប្រវត្តិសាស្ត្រខ្មែរនៃសាកលវិទ្យាល័យភូមិន្ទភ្នំពេញ បណ្ឌិត វង់ សុធារ៉ា បានអះអាងថា ប្រាសាទអង្គរវត្ត អង្គរធំ និងប្រាសាទជាច្រើនទៀត គឺជាអត្តសញ្ញាណរបស់ខ្មែរដែលគេតែងនាំគ្នាលើកតម្កើងគោរពបូជា និងការពារដើម្បីជាគោលកម្លាំងមោទកភាពជាតិ និងការរួបរួមជាតិ។
លោកបន្តថា បើអត្តសញ្ញាណនេះត្រូវគេយកទៅចម្លងដើម្បីគោលដៅផ្សេងពីការគោរពបូជា និងប្រើប្រាស់ដោយប្រាសចាកពីខ្លឹមសារដើមនោះ វាគឺជាការប្រមាថយ៉ាងធ្ងន់ធ្ងរដល់ព្រលឹងដូនតាខ្មែរ និងប្រជាជាតិខ្មែរទាំងមូល។
ជុំវិញបញ្ហានេះ កាលពីដើមខែតុលា ឆ្នាំ២០២០ អ្នកគ្រប់គ្រងកោះផាង៉ាន ប្រទេសថៃ ធ្លាប់បានចេញសុំទោសជាសាធារណៈចំពោះការយកគំរូរចនាបថប្រាសាទអង្គរវត្តដែលជាតំណាងឲ្យប្រទេសកម្ពុជា ទៅតុបតែងក្នុងសណ្ឋាគាររបស់ខ្លួនដែលបណ្តាលឲ្យផ្ទុះកំហឹងយ៉ាងខ្លាំងពីពលរដ្ឋខ្មែរ។
កាលពីចុងឆ្នាំ២០២០ សណ្ឋាគារឈ្មោះ Le palais Hotel មានទីតាំងនៅកោះផាង៉ាន ខេត្តសុរ៉ាត់ថានី ប្រទេសថៃ បានផ្សព្វផ្សាយលើគេហទំព័ររបស់ខ្លួនពីសេវា និងរូបរាងសណ្ឋាគារ បន្ទប់ស្នាក់នៅ អាហារដ្ឋាន និងអាងហែលទឹក ជាដើម ដែលជាការចម្លងរចនាបថប្រាសាទអង្គរវត្ត អង្គរធំ ប្រាសាទបន្ទាយស្រី និងប្រាសាទបាយ័នរបស់កម្ពុជាទាំងស្រុង។
បន្ទប់ស្នាក់នៅ អាងហែលទឹក និងអាហារដ្ឋានក្នុងសណ្ឋាគារនោះ បានប្រើឈ្មោះតាមប្រាសាទបុរាណខ្មែរមួយចំនួន រួមមាន បន្ទប់បន្ទាយស្រី បន្ទប់បាយ័ន និងបន្ទប់អង្គរធំ ព្រមទាំងបានប្រើឈ្មោះប្រាសាទបុរាណទាំងនោះដាក់ឈ្មោះអាហារដ្ឋាន និងអាងហែលទឹករបស់ពួកគេថា អាហារដ្ឋានបាយ័ន និងអាងហែលទឹកអង្គរធំ ជាដើមផងដែរ។
ប្រាសាទអង្គរវត្ត ស្ថិតនៅភាគពាយ័ព្យនៃប្រទេសកម្ពុជា ក្នុងទឹកដីនៃខេត្តសៀមរាប ដែលមានកម្ពស់ ៦៥ម៉ែត្រ មានក្រឡាផ្ទៃ ២០០ហិកតារ រាងចតុកោណដែលកំណត់ដោយកំពែងព័ទ្ធជុំវិញ និងគូទឹកដែលមានទទឹង ២០០ម៉ែត្រ ដែលបានកសាងឡើងដោយព្រះបាទ សូរ្យវរ្ម័នទី២ នៅដើមសតវត្សទី១២ ក៏ជាទីតាំងដែលកងទ័ពខ្មែរទទួលបានជ័យជម្នះលើកងទ័ពសៀមក្នុងសម័យរាជាណាចក្រអយុធ្យា នៅសតវត្សទី១៧។
បច្ចុប្បន្ននេះ ប្រាសាទអង្គរវត្ត ក្លាយជានិមិត្តរូបនៃប្រទេសកម្ពុជា តែមួយគត់ដែលរំលេចលើទង់ជាតិរបស់ប្រទេសជារូបភាពតំណាងប្រទេសជាតិខ្មែរ ហើយក៏បានដាក់បញ្ចូលជាសម្បត្តិបេតិកភណ្ឌពិភពលោក កាលពីថ្ងៃទី១៤ ខែធ្នូ ឆ្នាំ១៩៩២ និងត្រូវចាត់ទុកថាជាកន្លែងបុរាណវិទ្យាដ៏សំខាន់បំផុតមួយនៅអាស៊ីផងដែរ៕