គណបក្សបេះដូងជាតិ ដែលជាគណបក្សទើបតែកើតថ្មី បានហៅចំណាត់ការរបស់ក្រសួងមហាផ្ទៃ មកលើខ្លួនថា ជារឿងដែលគួរឱ្យអាម៉ាស់សម្រាប់ពិភពលោក ប្រសិនបើគ្រាន់តែមិនគ្រប់លក្ខខណ្ឌដូចមានកំណត់នៅក្នុងច្បាប់ស្ដីពីគណបក្សនយោបាយ ហើយបែរជាត្រូវមានទោសព្រហ្មទណ្ឌទៅវិញនោះ។
ប្រតិកម្មរបស់លោក សៀម ភ្លុក ប្រធានគណបក្សបេះដូងជាតិ ធ្វើឡើងមួយថ្ងៃបន្ទាប់ពីក្រសួងមហាផ្ទៃ គំរាមចាត់ការតាមផ្លូវច្បាប់ប្រឆាំងអ្នកគាំទ្រ និងស្ថាបនិកនៃគណបក្សថ្មោងថ្មីនេះកាលពីថ្ងៃទី១៦ ខែវិច្ឆិកា។
តាមរយៈសារឆ្លើយឆ្លងជាមួយ The Cambodia Daily នៅថ្ងៃទី១៧ ខែវិច្ឆិកា ប្រធានគណបក្សបេះដូងជាតិ បញ្ជាក់ថា ប្រសិនបើក្រសួងមហាផ្ទៃ ពិតជាចង់តតាំងនយោបាយតាមផ្លូវច្បាប់ និងហេតុផលដើម្បីសង្គមសុចរិត ដោយស្មើភាពគ្នា លោកមិនបារម្ភនោះទេ។
លោក សៀម ភ្លុក បន្ថែមថា ក្នុងនាមជាស្ថាបនិកគណបក្ស លោកបានត្រៀមខ្លួនរួចជាស្រេចក្នុងការតស៊ូមតិផ្នែកនយោបាយតាមនីតិវិធី និងមានហេតុផលដោះបន្ទុកគ្រប់គ្រាន់ ប្រសិនបើក្រសួងមហាផ្ទៃ ពិតជាដាក់បណ្តឹងប្រឆាំងរូបលោក និងអ្នកគាំទ្រគណបក្សនេះមែន។
បើតាមប្រធានគណបក្សបេះដូងជាតិ បានឲ្យដឹងថា អ្វីដែលលោកព្រួយបារម្ភនៅពេលនេះ គឺខ្លាចក្រែងការអនុវត្តរបស់ក្រសួងមហាផ្ទៃ មានការរំលោភបំពានក្រៅច្បាប់តាមរយៈការប្រើកម្លាំងបាយ និងកម្លាំងអាជ្ញាធរ ឬតាមបុរេវិនិច្ឆ័យនៃអ្នកមានអំណាច នោះខ្លួនពិតជាពុំមានលទ្ធភាពអ្វីដើម្បីតបតបានទេ។
ដោយឡែកនៅក្នុងរបាយការណ៍ដែលលោក ស ខេង រាយការណ៍ទៅលោក ហ៊ុន សែន កាលពីថ្ងៃទី៨ ខែវិច្ឆិកា កន្លងទៅនេះ គឺលោកបានបញ្ជាឱ្យអគ្គស្នងការនគរបាលជាតិ ត្រូវស្រាវជ្រាវរកបុគ្គលដែលមានចេតនាទុច្ចរិតក្នុងការផ្ដិតមេដៃជំនួស និងការក្លែងអត្តសញ្ញាណបុគ្គលជាដើម។ មិនត្រឹមតែប៉ុណ្ណោះ ក្រសួងមហាផ្ទៃក៏បានសម្រេចដាក់បណ្តឹងប្តឹងស្ថាបនិកនៃគណបក្សបេះដូងជាតិ ទៅតុលាការ ដើម្បីចាត់វិធានការតាមផ្លូវច្បាប់ថែមទៀតផង។
ឆ្លើយតបនឹងការចោទប្រកាន់នេះ លោក សៀម ភ្លុក បានបញ្ជាក់ថា បើស្ថិតក្នុងការសង្ស័យស្នាមមេដៃក្លែងក្លាយ និងស្នាមមេដៃខូចគុណភាព ឬមានស្នាមមេដៃស្ទួនមែន ក្រសួងមហាផ្ទៃអាចបដិសេធ ឬទាត់ចោលបាន។ លោកបន្តថា ក្រសួងមហាផ្ទៃមិនត្រូវចាត់ទុកស្នាមមេដៃទាំងនោះប្រែក្លាយទៅជាបទល្មើសព្រហ្មទណ្ឌឡើយ។
ប្រភពដដែលបន្ថែមទៀតថា ក្នុងច្បាប់ស្ដីពីគណបក្សនយោបាយ មិនមានមាត្រាណាមួយដែលចែងអំពីទោសព្រហ្មទណ្ឌ ដោយសារការបំពេញបែបបទបង្កើតគណបក្ស និងបែបបទស្នើសុំចុះបញ្ជីនៃគណបក្សនយោបាយដែលមានភាពខ្វះចន្លោះនោះទេ។ បើតាមលោក សៀម ភ្លុក ច្បាប់ស្ដីពីគណបក្សនយោបាយ បានកំណត់ទិសដៅត្រឹមតែថា បើក្រសួងមហាផ្ទៃ រកឃើញពិតជាមានកំហុសឆ្គងក្នុងការស្នើសុំចុះបញ្ជីនេះមែន អាចស្នើឱ្យសាមីខ្លួនកែតម្រូវឡើងវិញ។
បើក្នុងករណីការស្នើសុំចុះបញ្ជីនៃគណបក្សបេះដូងជាតិនេះអាចប្រែក្លាយទៅជាបទល្មើសព្រហ្មទណ្ឌមែន នោះវាជារឿងដែលចម្លែកសម្រាប់ពិភពលោក និងបង្ហាញការភ្ញាក់ផ្អើលចំពោះដំណើរការប្រជាធិបតេយ្យ និងបរិយាកាសនយោបាយនៅកម្ពុជា។
រដ្ឋធម្មនុញ្ញដែលជាច្បាប់កំពូលរបស់ជាតិមាត្រា៣៥ ចែងថា ពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គម និងវប្បធម៌របស់ប្រទេសជាតិ។ ដោយឡែកច្បាប់ស្ដីពីគណបក្សនយោបាយមាត្រា៩ នៃច្បាប់នេះវិញ ចែងថា ពលរដ្ឋខ្មែរយ៉ាងតិច ៨០នាក់ដែលមានអាយុយ៉ាងតិច ១៨ឆ្នាំ ហើយមានទីលំនៅអចិន្ត្រៃយ៍ក្នុងប្រទេសកម្ពុជា មានសិទ្ធិផ្តើមបង្កើតគណបក្សនយោបាយមួយបាន ដោយគ្រាន់តែជូនដំណឹងជាលាយលក្ខណ៍អក្សរទៅក្រសួងមហាផ្ទៃ។
ក្រសួងមហាផ្ទៃ ត្រូវឆ្លើយតបជាលាយលក្ខណ៍អក្សរវិញថា បានទទួលសេចក្តីជូនដំណឹងនេះក្នុងរយៈពេលយ៉ាងយូរ ១៥ថ្ងៃ។ បើហួសការកំណត់ ១៥ថ្ងៃនេះ ត្រូវចាត់ទុកថាបានទទួលសេចក្តីជូនដំណឹងនេះហើយ៕