តុលាការកំពូលកាលពីថ្ងៃទី២៧ កក្កដា បានបដិសេធបណ្ដឹងសុំនៅក្រៅឃុំរបស់លោក សៀម ភ្លុក ស្ថាបនិកគណបក្សបេះដូងជាតិ ដោយសំអាងថា ការអនុញ្ញាតឱ្យនៅក្រៅឃុំ នឹងប៉ះពាល់ដល់ដំណើរការនីតិវិធីរបស់តុលាការ។
មេធាវីការពារក្ដីឱ្យលោក សៀម ភ្លុក គឺលោក ជូង ជូងី ប្រាប់សារព័ត៌មានក្នុងស្រុកថា តុលាការកំពូលបានសម្រេចបន្តឃុំខ្លួនកូនក្ដីរបស់លោកដូចការសម្រេចរបស់តុលាការថ្នាក់ក្រោមដែរ។ លោកបញ្ជាក់ថា តុលាការកំពូលបានចាត់ទុកការសម្រេចរបស់តុលាការថ្នាក់ក្រោមជារឿងត្រឹមត្រូវ។
លោក ជូង ជូងី បង្ហាញការសោកស្ដាយចំពោះការសម្រេចរបស់តុលាការ ដោយថាលោក សៀម ភ្លុក មិនបានក្លែងឯកសារ ហើយក៏មិនបានដឹងថា ឯកសារដែលបានដាក់ទៅក្រសួងមហាផ្ទៃ នាពេលកន្លងមកនោះជាឯកសារក្លែងដែរ។ លោកអះអាងថា លោកនឹងត្រឡប់ទៅដាក់សំណើនៅតុលាការជាន់ទាបវិញ គឺតុលាការរាជធានីភ្នំពេញ ដើម្បីសុំឲ្យដោះលែងកូនក្ដីរបស់លោកនៅក្រៅឃុំបណ្ដោះអាសន្ន។ លោកថា សំណុំរឿងរបស់លោក សៀម ភ្លុក មិនទាន់ឈានដល់ដំណាក់កាលជំនុំជម្រះនោះទេ ដោយស្ថិតក្នុងដំណាក់កាលស៊ើបសួរនៅឡើយ។
លោក សៀម ភ្លុក ត្រូវបានតុលាការចោទប្រកាន់ពីបទ «ក្លែងបន្លំ និងប្រើប្រាស់លិខិតក្លែង» កាលពីថ្ងៃទី២៧ ខែមេសា ឆ្នាំ២០២២ និងត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅពន្ធនាគារព្រៃសភ្លាមៗថ្ងៃដដែលនោះ។
កាលពីថ្ងៃទី២២ ខែកក្កដា អតីតតំណាងស្ថាបនិកគណបក្សបេះដូងជាតិ បានស្នើសុំទៅរដ្ឋមន្ត្រីក្រសួងមហាផ្ទៃ លោក ស ខេង ឲ្យជួយធ្វើអន្តរាគមន៍ទៅតុលាការទម្លាក់បទចោទប្រកាន់ ដោយអះអាងថា រូបលោកមិនបានក្លែងឯកសារ និងស្នាមមេដៃប្រជាពលរដ្ឋយកទៅកុហកក្រសួងមហាផ្ទៃ ដើម្បីបង្កើតគណបក្សឡើយ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត បង្ហាញការសោកស្ដាយដែលតុលាការមិនអនុញ្ញាតឱ្យលោក សៀម ភ្លុក នៅក្រៅឃុំ។ លោកបន្តថា ស្ថាបនិកគណបក្សបេះដូងជាតិ ដែលជាជនត្រូវចោទរូបនេះមិនមានចេតនាក្នុងការក្លែងស្នាមមេដៃនោះទេ តែជាកំហុសខ្វះខាតមួយចំនួនប៉ុណ្ណោះ ហើយករណីនេះក៏មិនបានបង្កការប៉ះពាល់ដល់សង្គមជាតិ ឬនរណាម្នាក់នោះដែរ។
លោក សៀម ភ្លុក ត្រូវបានក្រសួងមហាផ្ទៃ រកឃើញថា មានជាប់ពាក់ព័ន្ធនឹងការក្លែងស្នាមមេដៃ ដើម្បីបង្កើតគណបក្សបេះដូងជាតិ កាលពីខែមិថុនា ឆ្នាំ២០២១។ នេះបើតាមសេចក្តីរាយការណ៍ពីរដ្ឋមន្ត្រីក្រសួងមហាផ្ទៃ លោក ស ខេង ផ្ញើទៅលោកនាយករដ្ឋមន្ត្រី ហ៊ុន សែន កាលពីខែវិច្ឆិកា ឆ្នាំ២០២១៕