តុលាការកំពូលបានច្រានចោលបណ្ដឹងគណបក្សបេះដូងជាតិ របស់លោក សៀម ភ្លុក ដែលស្នើសុំឱ្យតុលាការជាន់ខ្ពស់មួយនេះចេញដីកាបង្គាប់ទៅក្រសួងមហាផ្ទៃ ឱ្យចុះបញ្ជីគណបក្សនយោបាយរបស់ខ្លួន។
កាលពីថ្ងៃទី២៦ ខែវិច្ឆិកា ឆ្នាំ២០២១ មេធាវីការពារក្ដីឱ្យស្ថាបនិកគណបក្សបេះដូងជាតិ បានដាក់បណ្ដឹងទៅតុលាការកំពូល ដោយស្នើតុលាការជាន់ខ្ពស់នេះទម្លាក់ចោលការចោទប្រកាន់របស់ក្រសួងមហាផ្ទៃ និងបើកផ្លូវឱ្យគណបក្សបេះដូងជាតិ បានចុះបញ្ជីនៅក្រសួងឡើងវិញ ដើម្បីបានចូលរួមការបោះឆ្នោតនៅឆ្នាំ២០២២ និងឆ្នាំ២០២៣ ខាងមុខតាមលក្ខខណ្ឌច្បាប់។
នៅថ្ងៃសុក្រ ទី២៤ ធ្នូ នេះ តុលាការកំពូលបានបើកសវនាការសួរដេញដោលបណ្ដឹងរបស់ស្ថាបនិកគណបក្សបេះដូងជាតិ លោក សៀម ភ្លុក ដែលមានភាគីក្រសួងមហាផ្ទៃ រួមទាំងមេធាវីទាំងសងខាងចូលរួម។ សវនាការសួរដេញដោលនេះ មានសមាសភាពចៅក្រមចូលរួមជំនុំជម្រះចំនួន ៩រូប ដោយមានលោក គង់ ស្រ៊ីម ជាប្រធាន ខណៈតំណាងអយ្យការ លោក អ៊ុក គឹមសិទ្ធិ។
ក្នុងបន្ទប់សវនាការ ប្រធានក្រុមប្រឹក្សា លោក គង់ ស្រ៊ីម បានសួរលោក សៀម ភ្លុក ជុំវិញមូលហេតុមិនសុខចិត្តដែលក្រសួងមហាផ្ទៃ មិនចុះបញ្ជីឱ្យគណបក្សបេះដូងជាតិ។
លោក សៀម ភ្លុក លើកឡើងអំឡុងពេលសវនាការថា គណបក្សរបស់ខ្លួនបានកែតម្រូវតាមការណែនាំរបស់ក្រសួងមហាផ្ទៃរួចហើយ ប៉ុន្តែក្រសួងនៅតែមិនចុះបញ្ជីឱ្យ និងបានបិទឱកាសតវ៉ាបន្ថែមទៀត។ ចំណែកស្នាមមេដៃដែលក្រសួងមហាផ្ទៃ ពិនិត្យថាស្ទួននោះ ក្រសួងអាចលុបចោលបាន ព្រោះស្នាមមេដៃដែលខ្លួនបានដាក់ទៅជាង ៤ពាន់ស្នាមមេដៃ ខណៈច្បាប់ស្ដីពីគណបក្សនយោបាយតម្រូវតែ ៤ពាន់ស្នាមមេដៃប៉ុណ្ណោះ។
លោក សៀម ភ្លុក បន្តថា ករណីមិនចុះបញ្ជីគណបក្សបេះដូងជាតិ ដែលក្រសួងអះអាងថាស្នាមមេដៃស្ទួនមានចេតនាទុច្ចរិត បំប៉ោងតួលេខ គឺធ្វើឡើងមិនសមហេតុផល ព្រោះលោកមិនមានចេតនាទុច្ចរិតដូចការចោទប្រកាន់ឡើយ។ លើសពីនេះ លោកថាស្នាមមេដៃស្ទួននេះអាចបណ្ដាលមកពីមន្ត្រីថ្នាក់មូលដ្ឋានចុះស្រង់ខុស ព្រោះការងារនេះលោកប្រគល់ឱ្យពួកគាត់ធ្វើ ដោយគាត់មិនបានពិនិត្យមើលអំឡុងពេលពលរដ្ឋផ្ដិតស្នាមមេដៃ ស្របនឹងការយល់ដឹងរបស់ប្រជាពលរដ្ឋនៅតាមមូលដ្ឋានមានកម្រិត។
ករណីនេះ លោក សៀម ភ្លុក ស្នើទៅតុលាការកំពូល ចេញដីកាបង្គាប់ឱ្យក្រសួងមហាផ្ទៃ ចុះបញ្ជីឆ្លើយតបនឹងការអះអាងនេះ។
មន្ត្រី និងមេធាវីតំណាងក្រសួងមហាផ្ទៃ លើកឡើងថា មូលហេតុដែលក្រសួងមិនចុះបញ្ជី គឺគណបក្សបេះដូងជាតិមិនបានស្តាប់តាមការណែនាំរបស់ក្រសួងមហាផ្ទៃ ខណៈក្រសួងបានជូនដំណឹង ៣លើកឱ្យកែតម្រូវរួចមកហើយ។ ម្យ៉ាងវិញទៀត លោកថា គណបក្សនេះផ្តល់ស្នាមមេដៃស្ទួន មិនច្បាស់លាស់ ដោយបំប៉ោងតួលេខដែលមានចេតនាមិនល្អ មិនស្មោះត្រង់ និងគ្មានភាពត្រឹមត្រូវតាមលក្ខន្តិកៈរបស់ក្រសួង។ ទាំងមន្ត្រី និងមេធាវីក្រសួងមហាផ្ទៃ បានចាត់ទុក និងចោទគណបក្សនេះបង្កើតកំហុស ដោយការបន្លំស្នាមមេដៃជាបទល្មើសព្រហ្មទណ្ឌ។ ករណីនេះ ពួកគេបានស្នើច្រានចោលបណ្ដឹងស្ថាបនិកគណបក្សបេះដូងជាតិ លោក សៀម ភ្លុក ដូចក្រសួងសម្រេចគណបក្សបានបង្កើតកំហុសធ្ងន់ធ្ងរ។
ក្រោយពីសវនាការដេញដោល និងស្ដាប់ភាគីទាំងសងខាងនោះ ប្រធានក្រុមប្រឹក្សាជំនុំជម្រះតុលាការកំពូល លោក គង់ ស្រ៊ីម បានសម្រេចច្រានចោលបណ្ដឹងរបស់លោក សៀម ភ្លុក ស្ថាបនិកគណបក្សបេះដូងជាតិ បន្ទាប់ពីសវនាការពេញមួយព្រឹកនៅថ្ងៃសុក្រនេះ។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងលិខិតមួយដាក់ទៅលោក ហ៊ុន សែន កាលពីពេលថ្មីៗនេះថា តាមការធ្វើកោសលវិច័យទៅលើស្នាមមេដៃចំនួនជាង ៤ពាន់ស្នាមមេដៃ (៤៧៨១ស្នាមមេដៃ) ដែលគណបក្សបេះដូងជាតិ ផ្ញើទៅក្រសួងដើម្បីសុំចុះបញ្ជីគណបក្សនោះ បានរកឃើញមានភាពមិនប្រក្រតីមួយចំនួន ដូចជាស្នាមមេដៃខ្លះខុសទៅនឹងស្នាមមេដៃក្នុងអត្តសញ្ញាណប័ណ្ណ និងស្នាមមេដៃមួយចំនួនទៀតខូចគុណភាពមិនអាចធ្វើកោសលវិច័យបាន ជាដើម។
ក្រោយពីមានការបដិសេធនេះ គណបក្សបេះដូងជាតិ នៅថ្ងៃទី២២ ខែវិច្ឆិកា បានចេញសេចក្ដីថ្លែងការណ៍មួយបង្ហាញការសោកស្ដាយ ដែលក្រសួងមហាផ្ទៃមិនចុះបញ្ជីគណបក្សរបស់ខ្លួន ហើយថែមទាំងចោទប្រកាន់យ៉ាងអយុត្តិធម៌។
គណបក្សនេះអះអាងថា ស្នាមមេដៃដែលខ្លួនបានដាក់ទៅក្រសួងមហាផ្ទៃ ចំនួន ៤៦១៨នាក់ មិនមែនចំនួន ៤៧៨១នាក់ដូចការអះអាងរបស់ក្រសួងមហាផ្ទៃនោះទេ។ លើសពីនេះ គណបក្សបេះដូងជាតិ ថាការរកឃើញភាពមិនប្រក្រតីនៃស្នាមមេដៃ គួរតែក្រសួងណែនាំពីកំហុសឆ្គងដើម្បីកែសម្រួលទៅតាមលក្ខន្តិកៈជាជាងបដិសេធ៕