28 C
Phnom Penh

តុលាការ​ខេត្ត​បន្ទាយមានជ័យ​កោះហៅ​អភិបាលស្រុក​និង​មេឃុំ​ចូល​បំភ្លឺ​រឿង​ឈូស​ឆាយ​ដី​ព្រៃលិចទឹក

ដោយ ឌឹ ខេមបូឌា ដេលី

បទវិភាគ

សាលាដំបូង​ខេត្ត​បន្ទាយមានជ័យ កោះហៅ​អភិបាលស្រុក​ព្រះនេត្រព្រះ និង​មេឃុំ​ប្រាសាទ ឱ្យ​ចូល​បំភ្លឺ​នៅ​ខែ​មីនា ខាងមុខ​នេះ ពាក់ព័ន្ធ​នឹង​រឿង​ឈូស​ឆាយ​ដី​ព្រៃលិចទឹក។

លិខិត​អញ្ជើញ​របស់​ព្រះរាជអាជ្ញា​នៃ​អយ្យការ​អម​សាលាដំបូង​ខេត្ត​បន្ទាយមានជ័យ លោក កើត វណ្ណារ៉េត ចុះ​ថ្ងៃ​ទី​៩ ខែ​កុម្ភៈ ឆ្នាំ​២០២២ បាន​តម្រូវ​ឱ្យ​មេឃុំ​ប្រាសាទ លោក មាស ហ៊ឺក ចូល​បំភ្លឺ​នៅ​សាលាដំបូង​ខេត្ត​បន្ទាយមានជ័យ នៅ​ថ្ងៃ​ទី​៣ ខែ​មីនា ឆ្នាំ​២០២២ រឿង​ឈូស​ឆាយ​ដី​ព្រៃលិចទឹក​តំបន់​៣ បឹង​ទន្លេសាប។

ចំណែក​លិខិត​អញ្ជើញ​មួយ​ទៀត​ចុះ​ថ្ងៃ​ដដែល​នោះ ក៏​បាន​តម្រូវ​ឱ្យ​អភិបាលស្រុក​ព្រះនេត្រព្រះ លោក ឃូ ពៅ ចូល​បំភ្លឺ​នៅ​សាលាដំបូង​ខេត្ត​បន្ទាយមានជ័យ នៅ​ថ្ងៃ​ទី​២១ ខែ​មីនា ឆ្នាំ​២០២២ ក្នុង​ដំណើរ​រឿង​ពាក់ព័ន្ធ​នឹង​ការ​ឈូស​ឆាយ​ទន្ទ្រាន​ដី​ព្រៃលិចទឹក​តំបន់​៣ បឹង​ទន្លេសាប ស្ថិតនៅ​ភូមិសាស្ត្រ​ឃុំ​ប្រាសាទ និង​ឃុំ​ភ្នំលៀប ស្រុក​ព្រះនេត្រព្រះ។

រដ្ឋាភិបាល​បាន​ចេញ​អនុក្រឹត្យ​មួយ​កាលពី​ថ្ងៃ​ទី​២៩ ខែ​សីហា ឆ្នាំ​២០១១ ស្ដីពី​ការ​កំណត់​ដែន​ព្រៃលិចទឹក​ប្រមាណ ៦៥​ម៉ឺន​ហិកតារ ស្ថិត​ក្នុង​ខេត្ត​ចំនួន​៦ ជុំវិញ​បឹង​ទន្លេសាប រួម​មាន​ខេត្ត​កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និង​ខេត្ត​កំពង់ធំ។

ប៉ុន្តែ​ព្រៃលិចទឹក​នៅ​ខេត្ត​ជុំវិញ​បឹង​ទន្លេសាប បាន​រង​ការ​កាប់ ឈូស​ឆាយ និង​ទន្ទ្រាន​យក​ជា​ធ្វើជា​កម្មសិទ្ធិ​ឯកជន​ពី​សំណាក់​មន្ត្រី​នៅ​ក្នុង​ជួរ​រដ្ឋាភិបាល ចាប់ពី​ថ្នាក់​មូលដ្ឋាន​រហូត​ដល់​ខេត្ត រួម​ទាំង​មន្ត្រី​នៅ​ក្នុង​តុលាការ​ផង​ដែរ។

ពាក់ព័ន្ធ​នឹង​ការ​ទន្ទ្រាន​ដី​ព្រៃលិចទឹក​នេះ លោក ហ៊ុន សែន កាលពី​ថ្ងៃ​ទី​២៨ ខែ​វិច្ឆិកា ឆ្នាំ​២០២១ បាន​បញ្ជា​ទៅ​ប្រធាន​អង្គភាព​ប្រឆាំង​អំពើពុករលួយ ក្រសួង​រៀបចំ​ដែនដី និង​ស្ថាប័ន​ពាក់ព័ន្ធ​ផ្សេង​ទៀត ចុះ​ទប់ស្កាត់​ជាបន្ទាន់​ចំពោះ​ករណី​ទន្ទ្រាន​ដី​ព្រៃលិចទឹក​នៅ​តំបន់​បឹង​ទន្លេសាប​ដោយ​ខុសច្បាប់ និង​ចាត់​វិធានការ​ច្បាប់​តឹងរ៉ឹង​ចំពោះ​អ្នក​ល្មើស​ផង​ដែរ។

លើស​ពី​នេះ លោក ហ៊ុន សែន បាន​បង្កើត​គណៈកម្មការ​ចុះ​ស្រាវជ្រាវ​ពាក់ព័ន្ធ​នឹង​ការ​ទន្ទ្រាន​ដី​ព្រៃលិចទឹក​នេះ ប៉ុន្តែ​ចាប់តាំង​ពី​មាន​ការ​បញ្ជា​មកដល់​ពេលនេះ មាន​តែ​មន្ត្រី​នគរបាល​ខេត្ត​កំពង់ឆ្នាំង ពីរ​រូប​ប៉ុណ្ណោះ ត្រូវ​បាន​នាំ​ខ្លួន​មក​សាកសួរ និង​ឃុំ​ខ្លួន​ពាក់ព័ន្ធ​ការ​រំលោភ​ដី​ព្រៃលិចទឹក​រាប់​ពាន់​ហិកតារ ខណៈ​អតីត​អភិបាល​ខេត្ត​កំពង់ឆ្នាំង លោក ឈួរ ច័ន្ទឌឿន រហូត​មក​ទល់​ពេលនេះ​នៅ​មិន​ទាន់​មាន​ព័ត៌មាន​ណា​មួយ​ស្តី​អំពី​ការ​នាំ​ខ្លួន និង​ចាប់​ខ្លួន​នៅឡើយ​ទេ។

ខណៈ​ប្រធាន​រាជបណ្ឌិត្យសភា​កម្ពុជា លោក សុខ ទូច បាន​លើកឡើង​កាលពី​ថ្ងៃ​ទី​១៧ ខែ​ធ្នូ ឆ្នាំ​២០២១ ថា មន្ត្រី​ជំនាញ​ធ្វើ​របាយការណ៍​ពាក់ព័ន្ធ​នឹង​រឿង​ការ​ទន្ទ្រាន​ដី​ព្រៃលិចទឹក​គ្មាន​ភាព​ស្មោះត្រង់​ជាមួយ​ពលរដ្ឋ និង​រដ្ឋាភិបាល​ឡើយ ដោយ​ពួកគេ​ធ្វើ​របាយការណ៍​ភូត​កុហក។ លោក​បន្ត​ថា មូលហេតុ​ដែល​លោក​លើកឡើង​ដូច្នោះ ដោយសារ​ដី​ព្រៃលិចទឹក​ក្នុង​តំបន់​បឹង​ទន្លេសាប​ក្នុង​ខេត្ត​កំពង់ធំ បាន​បាត់បង់​ជាង ១០​ម៉ឺន​ហិកតារ ប៉ុន្តែ​របាយការណ៍​របស់​ក្រុម​មន្ត្រី​ជំនាញ​អន្តរ​ក្រសួង បាន​រក​ឃើញ​នោះ​តែ​ជាង ៣​ពាន់​ហិកតារ​ទៅវិញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស