31 C
Phnom Penh

កម្ពុជា​នឹង​ប្រគល់​រថយន្ត​ដឹក​វ៉ាក់សាំង​១០​គ្រឿង​ដល់​ឡាវ ដើម្បី​ពង្រឹង​កិច្ច​សហប្រតិបត្តិការ​ទ្វេភាគី

ដោយ ឌឹ ខេមបូឌា ដេលី

បទវិភាគ

រាជរដ្ឋាភិបាល​កម្ពុជា នឹង​ប្រគល់​រថយន្ត​ដឹក​វ៉ាក់សាំង​ចំនួន ១០​គ្រឿង​ជូន​សាធារណរដ្ឋ​ប្រជាធិបតេយ្យ​ប្រជាមានិត​ឡាវ នៅ​ថ្ងៃ​សៅរ៍ ចុង​សប្តាហ៍​នេះ ដើម្បី​ពង្រឹង​នូវ​កិច្ច​សហប្រតិបត្តិការ​ទ្វេភាគី និង​ជា​កាយវិការ​មនុស្សធម៌​របស់​កម្ពុជា​ផង​ដែរ។

ក្រសួង​សុខាភិបាល​កម្ពុជា បាន​ចេញ​ប្រកាស​ព័ត៌មាន​នៅ​ថ្ងៃ​ទី​៩ ខែ​មីនា ឆ្នាំ​២០២២ ថា កម្ពុជា​ជា​ប្រទេស​តូច​មែន តែ​មាន​បេះដូង​ធំ​ទូលាយ ហើយ​កម្ពុជា​តែងតែ​ធ្វើ​កិច្ច​សហប្រតិបត្តិការ​តាម​គោលការណ៍​មនុស្សធម៌​បែប​នេះ​រហូត​មក ដោយ​ឈរ​លើ​ស្មារតី​មិត្តភាព សាមគ្គីភាព និង​កិច្ច​សហប្រតិបត្តិការ​ល្អ​ប្រកប​ដោយ​ការ​គិតគូរ​ខ្ពស់ ដើម្បី​ទប់ស្កាត់​ការ​រីក​រាលដាល​ជំងឺ​កូវីដ-១៩ ក្នុង​តំបន់។

ប្រភព​ដដែល​អះអាង​ថា នៅ​ថ្ងៃ​ទី​១២ ខែ​មីនា ឆ្នាំ​២០២២ ខាងមុខ​នេះ រដ្ឋាភិបាល​កម្ពុជា​នឹង​ប្រគល់​រថយន្ត​ដឹក​វ៉ាក់សាំង​ចំនួន ១០​គ្រឿង​ដល់​រដ្ឋាភិបាល​ឡាវ នៅ​ច្រក​ព្រំដែន​អន្តរជាតិ​ត្រពាំងក្រៀល ស្ថិតនៅ​ក្នុង​ខេត្ត​ស្ទឹងត្រែង ជាប់​ព្រំដែន​ខេត្ត​ចម្បាស័ក ប្រទេស​ឡាវ។

ក្រសួង​សុខាភិបាល អះអាង​ថា អំណោយ​មនុស្សធម៌​របស់​កម្ពុជា​នៅ​ពេលនេះ គឺជា​ការ​រួម​ចំណែក​បន្ថែម​ទៀត​ដល់​ប្រទេស​ឡាវ នៅ​ក្នុង​ការ​ឆ្លើយតប​ទៅ​នឹង​វិបត្តិ​ជំងឺ​កូវីដ-១៩ ជាពិសេស​លើ​កិច្ចការ​ចាក់​វ៉ាក់សាំង​កូវីដ-១៩ ជូន​ដល់​ប្រជាជន​ឡាវ ឱ្យ​កាន់តែ​មាន​សុខភាព​ល្អ ដើម្បី​ទប់ស្កាត់​ការ​ឆ្លង​របស់​វីរុស​នេះ។

ប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៩ មីនា នេះ​ថា ការ​ផ្តល់​រថយន្ត​ដឹក​វ៉ាក់សាំង​ដល់​រដ្ឋាភិបាល​ឡាវ ដើម្បី​កិច្ច​សហប្រតិបត្តិការ​ល្អ​រវាង​ប្រទេស​ទាំង​ពីរ និង​ជា​កិច្ចការ​មនុស្សធម៌ គឺជា​កាយវិការ​ត្រឹមត្រូវ​ហើយ​ក្នុង​នាម​ជា​ប្រទេស​ជិតខាង។

លោក ម៉ែន ណាត លើកឡើង​ថា ទន្ទឹម​នឹង​ការ​ធ្វើ​កិច្ច​សហប្រតិបត្តិការ​ល្អ និង​កិច្ចការ​មនុស្សធម៌​នេះ រដ្ឋាភិបាល​កម្ពុជា​ដែល​ក្រោម​ការ​ដឹកនាំ​របស់​មេដឹកនាំ​បក្ស​កាន់​អំណាច លោក ហ៊ុន សែន គួរតែ​បែងចែក​ឱ្យ​បាន​ច្បាស់​ពី​គោលការណ៍​រឹងមាំ​សម្រាប់​គ្រប់គ្រង​ជាតិ និង​កិច្ចការ​មនុស្សធម៌ ព្រោះ​ថា​កម្ពុជា​នៅ​ពេលនេះ​កំពុង​ជាប់​ផុង​យ៉ាង​ជ្រៅ​ដែល​នឹង​ឈាន​ទៅ​រក​ការ​បាត់​ទឹកដី​ក្នុង​កិច្ច​សហប្រតិបត្តិការ​នៅ​តំបន់​ត្រីកោណ​អភិវឌ្ឍន៍ ដែល​មាន​កម្ពុជា ឡាវ និង​វៀតណាម សព្វថ្ងៃ​នេះ។

ប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ PMD រូប​នេះ ជំរុញ​ឱ្យ​កម្ពុជា​មើល​ប្រទេស​ឡាវ ជា​គំរូ​ដែល​ត្រូវ​វៀតណាម​គ្រប់គ្រង​ទាំងស្រុង​ក្នុង​រូបភាព​មេដឹកនាំ​ឡាវ ជា​អ្នកដឹកនាំ​ប្រទេស។ ដូច្នេះ បញ្ហា​នេះ​ក៏​ជា​មេរៀន​មួយ​សម្រាប់​កម្ពុជា​ក្នុង​ការ​រក​វិធី​គេច​ចេញពី​នយោបាយ​ឈ្លានពាន​របស់​វៀតណាម ដើម្បី​ដក​ខ្លួន​ចេញពី​តំបន់​ត្រីកោណ​អភិវឌ្ឍន៍ ចៀសវាង​កុំ​ឱ្យ​វាសនា​របស់​កម្ពុជា​ដូច​ប្រទេស​ឡាវ នៅ​ពេលនេះ។

ជុំវិញ​ការ​ផ្តល់​ជំនួយ​មនុស្សធម៌​នេះ កាលពី​ចុង​ឆ្នាំ​២០២១ រដ្ឋាភិបាល​កម្ពុជា​បាន​ផ្តល់​ជំនួយ​មនុស្សធម៌​ជា​ម៉ាស់​ចំនួន ២​លាន​ម៉ាស់ និង​បរិក្ខារ​វេជ្ជសាស្ត្រ​ជាច្រើន​ដល់​រដ្ឋាភិបាល​ឡាវ។ ជាង​នេះ​ទៀត កម្ពុជា​ក៏​បាន​ផ្តល់​ជំនួយ​វ៉ាក់សាំង​ប្រភេទ​ស៊ីណូវ៉ាក់​សរុប​ប្រមាណ​ជា ៧០​ម៉ឺន​ដូស និង​ជំនួយ​ជា​ទឹកប្រាក់​ចំនួន ១៣​លាន​ដុល្លារ​អាមេរិក​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស