31 C
Phnom Penh

លោក ជា សុផារ៉ា បញ្ជា​ឱ្យ​រដ្ឋបាល​ខេត្ត​ជុំវិញ​បឹង​ទន្លេសាប​បន្ត​ជំរុញ​នីតិវិធី​តុលាការ​លើ​សំណុំរឿង​ទន្ទ្រាន​ដី​រដ្ឋ

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​រៀបចំ​ដែនដី លោក ជា សុផារ៉ា ចេញ​បទបញ្ជា​ឱ្យ​រដ្ឋបាល​ខេត្ត​ទាំង​៦ ជុំវិញ​តំបន់​បឹងទន្លេសាប បន្ត​ជំរុញ​នីតិវិធី​តុលាការ​លើ​ករណី​សំណុំរឿង​បទល្មើស​ទន្ទ្រាន​កាន់កាប់​ដី​រដ្ឋ​ក្នុង​ដែន​ព្រៃលិចទឹក​ឱ្យ​បាន​ហ្មត់ចត់ និង​អនុវត្ត​នីតិវិធី​ឱ្យ​បាន​ឆាប់​រហ័ស​ក្រោយ​ពេល​ទទួល​បាន​បណ្ដឹង។

រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ លោក ជា សុផារ៉ា បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃ​ទី​១០ ខែ​មីនា ឆ្នាំ​២០២២ ថា ដើម្បី​ធានា​នូវ​ប្រសិទ្ធភាព​ក្នុង​ការ​អនុវត្ត អង្គភាព​ប្រឆាំង​អំពើពុករលួយ​ត្រូវ​បន្ត​ចាត់​វិធានការ​ចំពោះ​មន្ត្រី​ស៊ីវិល និង​កងកម្លាំង​ដែល​បាន​ចូលរួម​ប្រព្រឹត្ត​បទល្មើស​ទន្ទ្រាន​ដែន​ព្រៃលិចទឹក​នៃ​តំបន់​ទន្លេសាប​ឱ្យ​បាន​ដាច់ខាត។

រដ្ឋមន្ត្រី​រូប​នេះ​ណែនាំ​ឱ្យ​រដ្ឋបាល​ខេត្ត​ទាំងអស់ បន្ត​ផែនការ​បោះ​បង្គោល​ដែល​នៅ​ខ្វះ​ចំនួន ១៤១​បង្គោល​បន្ត​ទៀត ក្នុង​នោះ​ខេត្ត​បាត់ដំបង នៅ​ខ្វះ​ចំនួន ៣​បង្គោល និង​ខេត្ត​សៀមរាប នៅ​ខ្វះ​ចំនួន ១៣៨​បង្គោល​ផង​ដែរ។ ជាង​នេះ​ទៀត ត្រូវ​ថែទាំ​ដើមឈើ និង​ដាំ​គ្រាប់​ត្នោត​ដែល​បាន​ដាំ​កន្លងមក និង​បន្ត​ដាំ​ដើមឈើ​ដែល​ស៊ាំ​ជាមួយ​នឹង​ភូមិសាស្ត្រ​នៅ​តំបន់​នោះ​ផង​ដែរ។

លោក ជា សុផារ៉ា បញ្ជាក់​ថា រដ្ឋបាល​ខេត្ត​នីមួយៗ​ត្រូវ​ពង្រឹង​នូវ​ការ​ចុះ​ល្បាត​ទប់ស្កាត់​ការ​ចូល​ទន្ទ្រាន និង​ផ្សព្វផ្សាយ​អំពី​វិធានការ​បង្ក្រាប​ការ​ទន្រ្ទាន​ដី​ក្នុង​តំបន់​៣ ឱ្យ​បាន​ម៉ឺងម៉ាត់ ដើម្បី​ឱ្យ​ពលរដ្ឋ​ដែល​បាន​ចូល​ទន្ទ្រាន​ប្រគល់​ដី​ជូន​រដ្ឋ​វិញ ហើយ​ត្រូវ​ចុះបញ្ជី​តាម​សំណើ​របស់​ក្រសួង​ធនធាន​ទឹក និង​ឧតុនិយម ឱ្យ​បាន​ត្រឹមត្រូវ។

ការ​អះអាង​នេះ ធ្វើឡើង​បន្ទាប់ពី​ប្រមុខ​រដ្ឋាភិបាល​កម្ពុជា បាន​ដាក់​ចេញ​នូវ​វិធានការ​ឱ្យ​មន្ត្រី​ក្រោម​ឱវាទ​របស់​ខ្លួន​អនុវត្ត​ផែនការ​ទប់ស្កាត់​ការ​ទន្ទ្រាន​ដី​ព្រៃលិចទឹក​ជុំវិញ​តំបន់​បឹង​ទន្លេសាប កាលពី​ចុង​ឆ្នាំ​២០២១ កន្លងទៅ។

កាលពី​ថ្ងៃ​ទី​២៨ ខែ​វិច្ឆិកា ឆ្នាំ​២០២១ លោក ហ៊ុន សែន បាន​ដាក់​បទបញ្ជា​ឲ្យ​រដ្ឋបាល​ខេត្ត​ទាំង​៦ ជុំវិញ​តំបន់​បឹង​ទន្លេសាប ត្រូវ​ចាត់​វិធានការ​ទប់ស្កាត់ និង​បង្ក្រាប​រាល់​សកម្មភាព​កាប់​រាន​ព្រៃលិចទឹក​យក​ជា​កម្មសិទ្ធិ ដោយ​ប្រើ​កម្លាំង​ចម្រុះ​ដែល​ពាក់ព័ន្ធ​ទាំងអស់​ដើម្បី​ទប់ស្កាត់​ការ​ទន្ទ្រាន​ដី​ព្រៃ​ទាំងនោះ​ឱ្យ​បាន​ទាន់​ពេលវេលា។

របាយការណ៍​របស់​ក្រសួង​រៀបចំ​ដែនដី នគរូបនីយកម្ម និង​សំណង់ បាន​ចេញ​ផ្សាយ​កាលពី​ថ្ងៃ​ទី​១០ ខែ​មីនា ឆ្នាំ​២០២២ ថា ពលរដ្ឋ​បាន​ស្ម័គ្រចិត្ត​ប្រគល់​ដី​ជូន​រដ្ឋ​វិញ​ចំនួន​ជាង ១​ម៉ឺន ៥​ពាន់​គ្រួសារ​ហើយ ក្នុង​នោះ​ក្រុម​ការងារ​ចុះ​ពិនិត្យ និង​ស្រាវជ្រាវ​ការ​ទន្ទ្រាន​ដី​ព្រៃលិចទឹក បាន​ធ្វើការ​វាស់វែង​ជាក់ស្តែង​លើ​ក្បាលដី​របស់​ពលរដ្ឋ​ជិត ៩​ពាន់​គ្រួសារ​ដែល​មាន​ទំហំ​ដី​ជិត ៩​ម៉ឺន​ហិកតារ។

ជុំវិញ​បញ្ហា​នេះ ប្រធាន​រាជបណ្ឌិត្យសភា​កម្ពុជា បណ្ឌិត សុខ ទូច បាន​អះអាង​កាលពី​ថ្ងៃ​ទី​១០ ខែ​មីនា ឆ្នាំ​២០២២ ថា ដី​ព្រៃលិចទឹក​នៅ​តំបន់​ទន្លេសាប​មាន​ចំនួន​រាប់​ម៉ឺន​ហិកតារ​ដែល​បាន​រង​ការ​ទន្រ្ទាន​ខុសច្បាប់​នា​ពេល​កន្លងមក ត្រូវ​បាន​រដ្ឋាភិបាល​កម្ពុជា​ដកហូត​ត្រឡប់​មកវិញ​បាន ១០០% ហើយ ប៉ុន្តែ​បណ្ឌិត សុខ ទូច មិន​បាន​បញ្ជាក់​ពី​តួលេខ​នៃ​ទំហំ​ចំនួន​ដី​ថា​មាន​ទំហំ​ប៉ុនណា​នោះ​ទេ។

លោក​បន្ត​ថា ដី​ដែល​រដ្ឋ​បាន​ដកហូត​យក​មកវិញ​នោះ គឺ​រដ្ឋ​មិន​បាន​យក​ទៅ​ធ្វើ​អ្វី​ផ្សេង​ឡើយ ដោយ​ទុក​ឱ្យ​ដី​ទាំងនោះ​ដុះ​ដើមឈើ​ឡើងវិញ និង​ដាំ​ដើម​រាំង ដើម​ឫស្សី និង​ដើម​ត្នោត​បន្ថែម ដើម្បី​ទប់ស្កាត់​នូវ​ការ​កាប់​ទន្ទ្រាន​សាជាថ្មី។

ប្រធាន​គណៈកម្មាធិការ​នាយក​នៃ​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​១១ មីនា នេះ​ថា លោក​អំពាវនាវ​ឲ្យ​រដ្ឋាភិបាល​កម្ពុជា​បន្ត​ការ​តាមដាន​ត្រួតពិនិត្យ​ជា​ប្រចាំ​នៅ​តំបន់​ព្រៃលិចទឹក​ទាំងនោះ​ឲ្យ​បាន​តឹងរ៉ឹង ដើម្បី​កុំ​ឲ្យ​មាន​ការ​រំលោភ​កាប់​ទន្ទ្រាន​ដី​ព្រៃ​នៅ​តំបន់​លិចទឹក​ទាំងនោះ​សាជាថ្មី។

បណ្ឌិត យ៉ង សាំងកុមារ អះអាង​ថា រដ្ឋាភិបាល​ក៏​ត្រូវ​អនុវត្ត​ច្បាប់​ឲ្យ​មាន​ប្រសិទ្ធភាព​ផង​ដែរ​ចំពោះ​អ្នក​រំលោភ​ដែល​ជា​មន្ត្រី​រាជការ ដោយ​ការ​ដាក់​ពិន័យ​ទៅតាម​កម្រិត​ទោស​របស់​ពួកគេ ដោយឡែក​សម្រាប់​ប្រជាកសិករ​តូចតាច​ដែល​ធ្លាប់​បាន​អាស្រ័យផល គួរ​តែ​មាន​ដំណោះស្រាយ​ជួយ​ដល់​ការ​ចិញ្ចឹម​ជីវិត​របស់​គាត់​តាម​ជម្រើស​ណា​មួយ​ដែល​អាច​ឲ្យ​ពួកគាត់​អាច​ចិញ្ចឹម​ជីវិត​បាន នៅ​ពេល​គាត់​ប្រគល់​ដី​នោះ​ជូន​រដ្ឋ​វិញ។

បឹងទន្លេសាប​ជា​អាង​ស្តុក​ទឹក​ធម្មជាតិ​ដែល​មាន​មច្ឆជាតិ​ដ៏​សំខាន់​របស់​កម្ពុជា ដែល​មាន​ទំហំ​ចំនួន ៣​ពាន់​គីឡូ​ម៉ែត្រ​ការ៉េ​នៅ​រដូវប្រាំង និង​មាន​ទំហំ​ចំនួន ១​ម៉ឺន​គីឡូ​ម៉ែត្រ​ការ៉េ​នៅ​រដូវវស្សា ដែល​ជាប់​ខេត្ត​ចំនួន​ប្រាំមួយ រួម​មាន​ខេត្ត​បាត់ដំបង ខេត្ត​បន្ទាយមានជ័យ ខេត្ត​សៀមរាប ខេត្ត​ពោធិ៍សាត់ ខេត្ត​កំពង់ធំ និង​ខេត្ត​កំពង់ឆ្នាំង។

ដោយឡែក​ព្រៃរនាម​លិចទឹក​នៅ​ជុំវិញ​បឹង​ទន្លេសាប​មាន​ផ្ទៃដី​សរុប​ប្រមាណ​ជិត ២៥​ម៉ឺន​ហិកតារ​ដែល​ជា​ជម្រក​សម្រាប់​ត្រី​ពង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស