31 C
Phnom Penh

កូនប្រុស​បុរស​ខ្លាំង​កម្ពុជា​លោក ហ៊ុន ម៉ានី ថា​បដិវត្តន៍​ពណ៌​មិនទាន់​ទៅ​ណា​ឆ្ងាយ​ពី​កម្ពុជា​ទេ

ដោយ ឌឹ ខេមបូឌា ដេលី

បទវិភាគ

តំណាងរាស្ត្រ​មណ្ឌល​ខេត្ត​កំពង់ស្ពឺ ដែល​ត្រូវ​ជា​កូនប្រុស​បង្កើត​របស់​មេដឹកនាំ​ក្រាញ​អំណាច លោក ហ៊ុន សែន លើកឡើង​ថា ការ​ខ្វែង​ទស្សនៈ​គ្នា​ដោយ​ការ​តបត​គ្មាន​ក្រមសីលធម៌ គឺជា​ធាតុ​ផ្សំ​មួយ​យ៉ាង​សំខាន់​ដែល​អាច​បង្កើត​ឲ្យ​មាន​បដិវត្តន៍​ពណ៌​គ្រប់​ពេលវេលា ហើយ​ដែល​នៅ​មិនទាន់​ទៅ​ណា​ឆ្ងាយ​ពី​ទឹកដី​កម្ពុជា​នៅឡើយ​ទេ។

ប្រធាន​សហភាព​សហព័ន្ធ​យុវជន​កម្ពុជា ដែល​ត្រូវ​ជា​កូនប្រុស​បង្កើត​បុរស​ខ្លាំង​ដើរ​បញ្ច្រាស​ទិស​នៅ​កម្ពុជា លោក ហ៊ុន ម៉ានី បាន​សរសេរ​លើ​គណនី​ហ្វេសប៊ុក​របស់​លោក​កាលពី​ចុង​សប្តាហ៍​កន្លងទៅ​ថា បដិវត្តន៍​ពណ៌​មិនទាន់​ទៅ​ណា​ឆ្ងាយ​ពី​ទឹកដី​កម្ពុជា​នៅឡើយ​ទេ ដូច្នេះ​ការ​ប៉ុនប៉ង​ធ្វើ​បដិវត្តន៍​ពណ៌​នៅ​កម្ពុជា គឺ​អាច​កើតមាន​គ្រប់​ពេល។

លោក ហ៊ុន ម៉ានី អះអាង​ថា ការ​ខ្វែង​ទស្សនៈ​គ្នា​ដោយ​ការ​តបត​ដែល​គ្មាន​ក្រមសីលធម៌ គឺជា​ឧទាហរណ៍​ជាក់ស្តែង​មួយ​ក្នុង​ការ​បង្ហាញ​ឲ្យ​ឃើញ​កាន់​តែ​ច្បាស់​ថា ការ​ប៉ុនប៉ង​ធ្វើ​បដិវត្តន៍​ពណ៌​ពិត​ជា​មិនទាន់​ទៅ​ណា​ឆ្ងាយ​ពី​ទឹកដី​កម្ពុជា​នៅឡើយ​ទេ។

ការ​អះអាង​នេះ ធ្វើ​ឡើង​ស្រប​ពេល​ដែល​មេដឹកនាំ​បក្ស​កាន់​អំណាច លោក ហ៊ុន សែន តែងតែ​គំរាម​តាម​កម្ទេច​អ្នក​ដែល​ប្រឆាំង​នឹង​ការ​ដឹកនាំ​របស់​លោក ជាពិសេស​អ្នក​ដែល​លោក​ចោទ​ថា​មាន​បំណង​ធ្វើ​ចលនា​ឱ្យ​មាន​បដិវត្តន៍​ពណ៌។

មុន​ថ្ងៃ​បុណ្យ​ចូល​ឆ្នាំ​ប្រពៃណី​ខ្មែរ អតីត​មេ​កម្មាភិបាល​ខ្មែរក្រហម​ដែល​សល់​ពី​របប​វាល​ពិឃាត លោក ហ៊ុន សែន បាន​គំរាម​តាមរយៈ​សារ​លិខិត​អបអរ​សាទរ​ក្នុង​ឱកាស​ពិធី​បុណ្យ​ចូល​ឆ្នាំ​ខ្មែរ​ថា រដ្ឋាភិបាល​របស់​លោក​ប្រឆាំង​ដាច់ខាត​រាល់​សកម្មភាព​ដែល​ពាក់ព័ន្ធ​នឹង​បដិវត្តន៍​ពណ៌ ឬ​ការ​ញុះញង់​ណា​មួយ​ដែល​ផ្ទុយ​នឹង​រដ្ឋធម្មនុញ្ញ។ ជាង​នេះ​ទៀត លោក ហ៊ុន សែន ប្ដេជ្ញា​ថា លោក​នឹង​ការពារ​ឯករាជ្យ​ជាតិ សន្តិភាព អធិបតេយ្យ​ជាតិ និង​បូរណភាព​ទឹកដី​ឱ្យ​បាន​លុះ​ដល់​ជីវិត​ចុងក្រោយ ទោះ​ត្រូវ​លះបង់​ក្នុង​តម្លៃ​ណា​ក៏ដោយ។

ជុំវិញ​ការ​ប្ដេជ្ញា​បែប​នេះ កាលពី​ខែ​មិថុនា ឆ្នាំ​២០១៧ កន្លងទៅ លោក ហ៊ុន សែន ធ្លាប់​គំរាម​តាម​កម្ទេច​ក្រុម​ប្រឆាំង​ឲ្យ​អស់​ជាច្រើន​រយ​នាក់​ផង​ដែរ ដើម្បី​ការពារ​សន្តិភាព​សម្រាប់​ពលរដ្ឋ​ខ្មែរ​រាប់​លាន​នាក់​ដែល​លោក​ចោទ​ថា អ្នក​ទាំងនោះ​មាន​គម្រោង​ធ្វើ​បដិវត្តន៍​ពណ៌​ផ្តួល​រំលំ​រដ្ឋាភិបាល​របស់​លោក។

អ្នក​តាមដាន​ស្ថានការណ៍​នយោបាយ​កម្ពុជា លោក សុខ សុគន្ធ ធ្លាប់​លើកឡើង​ថា ដើម្បី​លុប​បំបាត់​នូវ​ចលនា​បដិវត្តន៍​ពណ៌ រដ្ឋាភិបាល​លោក ហ៊ុន សែន គ្រាន់តែ​អនុវត្ត​ទៅ​តាម​ច្បាប់​របស់​កម្ពុជា​ឲ្យ​បាន​ត្រឹមត្រូវ នោះ​គឺ​អាច​ទប់ស្កាត់​បាន​ជា​មិន​ខាន។ ជាង​នេះ​ទៀត លោក ហ៊ុន សែន ក៏​ត្រូវ​បញ្ឈប់​ការ​អនុវត្ត​បទបញ្ជា​របស់​ខ្លួន​ពី​លើ​ច្បាប់​តទៅទៀត​ដែរ។

ចំណែក​ឯ​សកម្មជន​នៃ​កិច្ចព្រមព្រៀង​សន្តិភាព​ក្រុង​ប៉ារីស លោក ស្រ៊ុន ស្រ៊ន បាន​លើកឡើង​ក្នុង​កម្មវិធី Idea Talk កាលពី​ថ្ងៃ​ទី​១២ មេសា កន្លងទៅ​ថា ទម្រង់​ដឹកនាំ​របស់​បក្ស​កាន់​អំណាច​ដែល​ពោរពេញ​ទៅ​ដោយ​អំពើពុករលួយ អំពើ​និទ្ទណ្ឌភាព និង​ភាព​អយុត្តិធម៌​សង្គម​សព្វថ្ងៃ​នេះ បាន​ប្រែក្លាយ​កម្ពុជា​ទៅជា​ប្រទេស​ដែល​គ្មាន​នីតិរដ្ឋ​ទៅ​ហើយ ដែល​ជា​ហានិភ័យ​មួយ​បង្ក​ឱ្យ​មាន​បដិវត្តន៍​ពី​ពលរដ្ឋ​ខ្លួនឯង​ដែល​កំពុង​រង​ភាព​អយុត្តិធម៌​ពី​ការ​ដឹកនាំ​របស់​ខ្លួន​សព្វថ្ងៃ​នេះ។

លោក ស្រ៊ុន ស្រ៊ន អះអាង​ថា ជាក់ស្តែង​រដ្ឋាភិបាល​កម្ពុជា​បាន​អនុវត្ត​ផ្ទុយ​ពី​ខ្លឹមសារ​នៃ​កិច្ចព្រមព្រៀង​សន្តិភាព​ទីក្រុង​ប៉ារីស និង​ខ្លឹមសារ​រដ្ឋធម្មនុញ្ញ​របស់​ខ្លួន​ទាំងស្រុង ដែល​គេ​អាច​មើល​ឃើញ​ពី​ទិដ្ឋភាព​សង្គម​ជាក់ស្តែង​យ៉ាង​ច្បាស់​ពី​ការ​រំលោភ​យក​ដីធ្លី​របស់​ពលរដ្ឋ​ពី​សំណាក់​អ្នក​មាន​អំណាច ការ​បំបិទ​សិទ្ធិ​មូលដ្ឋាន​របស់​ពលរដ្ឋ និង​ការ​មិន​ទទួល​បាន​យុត្តិធម៌​តាម​ប្រព័ន្ធ​តុលាការ​សម្រាប់​ជនរងគ្រោះ ជាដើម ដែល​ទង្វើ​ទាំងអស់​នេះ​សុទ្ធសឹងតែ​ជា​ដើមចម​នៃ​ការ​បង្ក​កំហឹង និង​ការ​ឈឺចាប់​ដល់​ពលរដ្ឋ​ខ្មែរ​យ៉ាង​ធ្ងន់ធ្ងរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស