បុរសខ្លាំងកម្ពុជា លោក ហ៊ុន សែន អះអាងថា ក្នុងដំណើរការនៃការបោះឆ្នោតអាណត្តិទី៥ នេះ មានអ្នកចូលរួមសង្កេតការណ៍ជាតិ និងអន្តរជាតិជិត ៨ម៉ឺននាក់មកពី ២០ស្ថាប័ន គឺជាភស្តុតាងមួយបង្ហាញថា ដំណើរការបោះឆ្នោតនៅឆ្នាំ២០២២ នេះ ធានាបាននូវតម្លាភាព និងយុត្តិធម៌។
មេដឹកនាំដែលក្រាញអំណាចយូរជាងគេក្នុងតំបន់អាស៊ីរូបនេះអះអាងកាលពីថ្ងៃទី៥ ខែមិថុនា បន្ទាប់ពីបានចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់នៅសាលាគរុកោសល្យ និងវិក្រឹត្យការក្រុងតាខ្មៅ ក្នុងខេត្តកណ្តាល ថា ដើម្បីធានាបាននូវតម្លាភាព និងយុត្តិធម៌នៃដំណើរការបោះឆ្នោតជ្រើសរើសក្រុមប្រឹក្សានេះ រដ្ឋាភិបាលកម្ពុជាបានអនុញ្ញាតឱ្យមានអ្នកសង្កេតការណ៍យ៉ាងច្រើនទាំងថ្នាក់ជាតិ និងអន្តរជាតិ។
លោកអះអាងថា មានអ្នកចូលរួមសង្កេតការណ៍ជាតិសរុបជាង ៧ម៉ឺន ៤ពាន់នាក់ ក្នុងនោះអ្នកសង្កេតការណ៍អន្តរជាតិមានចំនួន ២០ស្ថាប័ន និងភ្ញៀវពិសេសមានចំនួន ៥ស្ថាប័នដែលជាសក្ខីភាពមួយបញ្ជាក់ថា ការបោះឆ្នោតកាលពីថ្ងៃអាទិត្យ ទី៥ មិថុនា នេះ ធ្វើឡើងដោយសេរី ត្រឹមត្រូវ និងយុត្តិធម៌ ស្របទៅតាមច្បាប់របស់កម្ពុជាដែលមានចែងអំពីដំណើរការនៃការបោះឆ្នោតនេះ។
ការអះអាងនេះ ធ្វើឡើងស្របពេលដែលការបោះឆ្នោតឆ្នាំ២០២២ នេះ ត្រូវគេមើលឃើញថាជាការបោះឆ្នោតដែលរំលោភរដ្ឋធម្មនុញ្ញ និងជាការប្លន់ប្រព័ន្ធបោះឆ្នោតនៅកម្ពុជាយ៉ាងធ្ងន់ធ្ងរ ខណៈសហគមន៍អន្តរជាតិបានបដិសេធការបោះឆ្នោតនេះទាំងស្រុង។
គណៈកម្មាធិការជាតិរៀបចំការបោះឆ្នោត បានចេញសេចក្តីប្រកាសព័ត៌មានកាលពីថ្ងៃទី៤ ខែមិថុនា ឆ្នាំ២០២២ នេះថា គ.ជ.ប បានចុះឈ្មោះអ្នកសង្កេតការណ៍ជាតិចំនួន ៧២ស្ថាប័ន អ្នកសង្កេតការណ៍អន្តរជាតិមានចំនួន ២០ស្ថាប័ន និងភ្ញៀវពិសេសមានចំនួន ៥ស្ថាប័នផងដែរ ដើម្បីឲ្យពួកគេអាចចូលរួមសង្កេតការណ៍ការបោះឆ្នោតនេះ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី៦ មិថុនា ថា ការបោះឆ្នោតនេះមិនមែនធ្វើឡើងក្នុងលំហលទ្ធិប្រជាធិបតេយ្យពិតប្រាកដនោះទេ គ្រាន់តែជាសង្វៀននយោបាយសម្រាប់តែគណបក្សកាន់អំណាចប៉ុណ្ណោះ ដូច្នេះហើយបានជាប្រទេសលោកសេរីមិនគាំទ្រការបោះឆ្នោតនេះ។
ចំណែកអ្នកនាំពាក្យគណបក្សភ្លើងទៀន លោក ថាច់ សេដ្ឋា បានថ្លែងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ដែលបានបិទបញ្ចប់ទៅនៅថ្ងៃអាទិត្យ ទី៥ មិថុនា នេះ មានរូបភាពគំរាមកំហែង ខ្វះភាពសេរី ត្រឹមត្រូវ និងយុត្តិធម៌។
លោកថាអំឡុងថ្ងៃបោះឆ្នោតមានវត្តមានមេភូមិ រហូតអភិបាលស្រុកនៅជិតការិយាល័យបោះឆ្នោត និងខ្លះចែកលុយ ខ្លះអង្គុយកត់ឈ្មោះអ្នកដែលទៅបោះឆ្នោត ជាដើម។ លោកថា ទង្វើបែបនេះមិនត្រូវបានចាត់វិធានការផ្លូវច្បាប់ចំពោះអ្នកប្រព្រឹត្តិទាំងអស់នោះទេ ដែលលោកចាត់ទុកថាលទ្ធផលនេះអាក្រក់ជាងបោះឆ្នោតឆ្នាំ២០១២ ទៅទៀត។
ការបោះឆ្នោតក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ បានប្រព្រឹត្តទៅកាលពីថ្ងៃទី៥ ខែមិថុនា ឆ្នាំ២០២២ ដែលធ្វើឡើងក្នុងឃុំ-សង្កាត់ទូទាំងប្រទេសចំនួន ១៦៥២ តាមការិយាល័យជាង ២ម៉ឺន ៣ពាន់កន្លែងនៅទូទាំងប្រទេស និងមានពលរដ្ឋទៅបោះឆ្នោតជាង ៧លាន ១សែននាក់ ក្នុងចំណោមពលរដ្ឋដែលបានចុះឈ្មោះបោះឆ្នោតជាង ៩លាន ២សែននាក់ ដែលបានចេញផ្សាយដោយគណៈកម្មាធិការជាតិរៀបចំការបោះឆ្នោតកាលពីថ្ងៃទី៥ មិថុនា កន្លងទៅនេះ៕