 លោក ខឹម វាសនា ដែលពួកគេជឿថានឹងការពារជីវិតរបស់ពួកគេឱ្យរួចខ្លួនពីគ្រោះទឹកជំនន់ ដែលនឹងកើតឡើងអំឡុងពេល ២ ឬ ៣ថ្ងៃខាងមុខនេះ។){kind=link}
ពលរដ្ឋមួយចំនួនរស់នៅក្នុងខេត្តសៀមរាប បានលក់ទ្រព្យសម្បត្តិ គោ មាន់ ទា និងម៉ូតូ ដោយទុកផ្ទះចោល ដើម្បីនាំគ្នាទៅរស់នៅក្បែរដីចម្ការប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា ដែលពួកគេជឿថានឹងការពារជីវិតរបស់ពួកគេឱ្យរួចខ្លួនពីគ្រោះទឹកជំនន់ ដែលនឹងកើតឡើងអំឡុងពេល ២ ឬ ៣ថ្ងៃខាងមុខនេះ។
ពលរដ្ឋចំនួន ៥គ្រួសារ បានប្រាប់សារព័ត៌មាន The Cambodia Daily កាលពីថ្ងៃទី២៨ ខែសីហា ឆ្នាំ២០២២ នេះថា ពួកគេពិតជាជឿថា គ្រោះធម្មជាតិទឹកជំនន់នឹងឡើងលិចពិភពលោកប្រាកដមែន ព្រោះថាលោក ខឹម វាសនា គឺជាព្រះព្រហ្មដែលបានដឹងពីបាតុភូតធម្មជាតិដែលនឹងកើតឡើងក្នុងពេលខាងមុខនេះ។
ក្រុមគ្រួសារទាំងនេះអះអាងថា ពេលមានគ្រោះធម្មជាតិទឹកជំនន់ឡើងលិចទូទាំងពិភពលោក មេបក្សជួង លោក ខឹម វាសនា នឹងសម្ដែងឫទ្ធិបញ្ចៀសគ្រោះធម្មជាតិទាំងនោះមិនឱ្យប៉ះពាល់ដល់ជីវិតរបស់ពួកគេឡើយ ហើយអ្នកដែលនៅឆ្ងាយៗមិនបានមកនៅលើដីចម្ការនោះ គ្រាន់តែស្រែកហៅឈ្មោះលោក ខឹម វាសនា ក៏នឹងត្រូវបានសង្គ្រោះឱ្យរួចជីវិតពីគ្រោះទឹកជំនន់នេះដែរ។
ការអះអាងនេះ ធ្វើឡើងអំឡុងពេលដែលពួកគេកំពុងបោះតង់ធ្វើជាជម្រកស្នាក់នៅក្បែរដីចម្ការរបស់មេបក្សជួងក្នុងចំណោមអ្នកជឿ និងបោះតង់ស្នាក់នៅទីនោះជាច្រើន។
ក្រុមអាជ្ញាធរដែលកំពុងប្រចាំការលើទីតាំងនៅទីនោះ បានអះអាងកាលពីថ្ងៃទី២៨ សីហា នេះថា ក្រុមអ្នកគាំទ្របក្សជួងប្លែកមុខថ្មីៗបាននាំគ្នាធ្វើដំណើរមកពីខេត្តផ្សេងៗជាបន្តបន្ទាប់ ខ្លះប្រើប្រាស់យានជំនិះផ្ទាល់ខ្លួន ខ្លះទៀតជួលឡានទេសចរណ៍ខ្នាតធំចូលទៅដីចម្ការនោះជារៀងរាល់ថ្ងៃ ដែលធ្វើឱ្យចំនួនមនុស្សកើនឡើងជារៀងរាល់ថ្ងៃ។
លោក តេង ច័ន្ទណាត ស្នងការដ្ឋាននគរបាលខេត្តសៀមរាប លើកឡើងថា ត្រឹមថ្ងៃទី២៦ ខែសីហា ឆ្នាំ២០២២ របាយការណ៍ត្រួសៗបញ្ជាក់ថាមានមនុស្សប្រមាណ ១,៥ម៉ឺននាក់ហើយដែលបានទៅស្នាក់នៅផ្ទះចម្ការ និងដីក្បែរចម្ការរបស់លោក ខឹម វាសនា ហើយដែលអ្នកខ្លះស្នាក់នៅក្នុងផ្ទះ និងខ្លះទៀតបោះតង់ ឬរោងនៅខាងក្រៅផ្ទះនៃចម្ការរបស់លោក ខឹម វាសនា ក្នុងស្រុកបន្ទាយស្រី។
នៅថ្ងៃទី៣០ ខែសីហា នេះ គឺជាថ្ងៃដែលប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា ត្រូវធ្វើតាមការសន្យារំសាយអ្នកគាំទ្ររបស់ខ្លួនហើយ បន្ទាប់ពីលោកបានសន្យាជាមួយអគ្គនាយកនៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ លោក ហ៊ុន ម៉ានិត កាលពីថ្ងៃទី២៧ ខែសីហា ឆ្នាំ២០២២ កន្លងទៅនេះ។
ក្នុងជំនួបដោយមានលោក ហ៊ុន ម៉ានិត អគ្គនាយកនៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ និងដែលជាកូនប្រុសទី២របស់លោក ហ៊ុន សែន ផងនោះ លោក ទៀ សីហា អភិបាលខេត្តសៀមរាប បានបញ្ជាដោយផ្ទាល់ឲ្យលោក ខឹម វាសនា បញ្ឈប់នូវសកម្មភាពបំផុសបំផុលតទៅទៀត។ លោកបានចាត់ទុកសកម្មភាពរបស់លោក ខឹម វាសនា ថាកំពុងធ្វើឲ្យពលរដ្ឋចលាចល និងខាតបង់ប្រយោជន៍គ្រួសាររបស់ពួកគេធ្ងន់ធ្ងរ។
ក្នុងខ្សែវីដេអូដែលមានប្រវែងប្រមាណជា ៥នាទី ត្រូវបានគេថតអំឡុងពេលដែលលោក ហ៊ុន ម៉ានិត ស្នើសុំឱ្យលោក ខឹម វាសនា បញ្ឈប់ប្រមូលអ្នកគាំទ្ររបស់លោកឱ្យទៅនៅលើដីចម្ការនោះ លោក ខឹម វាសនា បានបដិសេធថា គាត់មិនបានហៅឱ្យអ្នកគាំទ្ររបស់គាត់ឲ្យទៅនៅលើដីចម្ការនោះទេ គឺពួកគេទៅដោយខ្លួនឯងតែប៉ុណ្ណោះ។
ទោះជាបែបនេះក្តី កាលពីថ្ងៃទី២៣ ខែសីហា ឆ្នាំ២០២២ មេបក្សជួង លោក ខឹម វាសនា បានសរសេរលើគណនីហ្វេសប៊ុករបស់ខ្លួនដោយអំពាវនាវឱ្យអ្នកគាំទ្ររបស់លោកនាំគ្នាទៅរស់នៅលើដីចម្ការរបស់លោកនៅខេត្តសៀមរាប។ លោកអះអាងថា មានតែខេត្តសៀមរាបប៉ុណ្ណោះដែលក្លាយជានគររបស់កម្ពុជាថ្មី។
ចាប់តាំងពីថ្ងៃទី២៦ ខែសីហា ឆ្នាំ២០២២ មក អ្នកគាំទ្រលោក ខឹម វាសនា បាននាំគ្នាសម្រុកពីគ្រប់ខេត្តក្រុង រួមទាំងពលករខ្មែរដែលកំពុងបម្រើការនៅប្រទេសកូរ៉េ និងជប៉ុន ដែលមិនទាន់ចប់កុងត្រាការងារផងនោះ បាននាំគ្នាសម្រុកទៅរស់នៅក្បែរដីចម្ការរបស់លោក ខឹម វាសនា ក្នុងខេត្តសៀមរាប រហូតដល់ថ្ងៃនេះ គឺមានរយៈពេល ៤ថ្ងៃហើយ ខណៈអាជ្ញាធរនៅមិនទាន់មានវិធានការណាមួយនៅឡើយទេចំពោះការប្រមូលផ្ដុំនេះ។
ក្រុមអ្នកឃ្លាំមើលសង្គម លើកឡើងថា បើប្រៀបធៀបការប្រមូលផ្ដុំរបស់សកម្មជនបរិស្ថានដែលតវ៉ាដើម្បីឱ្យមានការការពារបរិស្ថានត្រឹមតែ ១០នាក់ ត្រូវអាជ្ញាធរចោទប្រកាន់ពីបទ ញុះញង់បង្កឱ្យមានភាពវឹកវរដល់សន្តិសុខសង្គម ប៉ុន្តែមេបក្សជួង លោក ខឹម វាសនា ប្រមូលមនុស្សជិត ២ម៉ឺននាក់ នៅតែរក្សាភាពស្ងៀមស្ងាត់ដដែល៕