ក្រុមអ្នកគាំទ្រលោក ខឹម វាសនា ប្រមាណ ២ម៉ឺននាក់ កំពុងនាំគ្នាពួនសម្ងំលាក់ខ្លួនបោះតង់ក្នុងព្រៃក្បែរជើងភ្នំគូលែន បន្ទាប់ពីអាជ្ញាធរខេត្តសៀមរាប ចេញលិខិតឱ្យរំសាយការជួបជុំនៅថ្ងៃអង្គារ ទី៣០ សីហា នេះ។
ក្រុមអ្នកគាំទ្រលោក ខឹម វាសនា បាននាំគ្នាបោះជំរំលាក់ខ្លួននៅក្នុងព្រៃក្បែរជើងភ្នំគូលែន នៅថ្ងៃទី៣០ ខែសីហា ឆ្នាំ២០២២ នេះ ដែលមានកងកម្លាំងសណ្ដាប់ធ្នាប់ជាសមាជិកបក្សជួង ដើរត្រួតពិនិត្យតាមទីតាំងដែលពួកគេបានបោះជំរំ ក្នុងនោះសមាជិកដែលនៅក្នុងជំរំបោះតង់ទាំងនោះមិនត្រូវបានអនុញ្ញាតឱ្យដើរចេញពីព្រៃជើងភ្នំគូលែននោះឡើយ ប៉ុន្តែមានតំណាងរបស់ពួកគេចេញមកខាងក្រៅដើម្បីទិញវត្ថុប្រើប្រាស់ផ្សេងៗយកទៅឱ្យអ្នកដែលពួនសម្ងំនៅក្នុងព្រៃទាំងនោះ។
សមាជិកបក្សជួងដែលកំពុងលាក់ខ្លួននៅក្នុងព្រៃនោះ អង្គុយជារង្វង់ទល់មុខគ្នាតាមក្រុមរៀងៗខ្លួនក្នុងជំរំដែលពួកគេធ្វើពីតង់កៅស៊ូជាច្រើនកន្លែង និងជាប់ៗគ្នាស្អេកស្កះរាប់មិនអស់ ស្ថិតក្នុងទឹកមុខក្រៀមក្រំ ប៉ុន្តែពួកគេមិនសូវនិយាយស្តីរកគ្នាឡើយ ក្នុងចំណោមនោះក៏មានអ្នកដែលអង្គុយមើលមេឃដើម្បីតាមដានពពក ដែលកំពុងតែកកពូនផ្តុំជាពពកខ្មៅចំពីលើដីចម្ការរបស់លោក ខឹម វាសនា ផងដែរ។
កាលពីថ្ងៃទី២៩ ខែសីហា ឆ្នាំ២០២២ រដ្ឋបាលខេត្តសៀមរាប បានចេញលិខិតបញ្ជាក់ថា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានឃោសនាប្រជាភិថុតិបែបអបិយជំនឿ និងប្រាសចាកពីការពិត ដែលបានតាំងខ្លួនថាជាព្រះព្រហ្ម និងផ្សព្វផ្សាយបោកបញ្ឆោតថាមានអភូតហេតុគ្រោះទឹកជំនន់លិចទូទាំងពិភពលោក។
រដ្ឋបាលខេត្តសៀមរាប ក៏បានចេញលិខិតដាច់ដោយឡែកមួយទៀតដែរ ដោយបញ្ជាឱ្យលោក ខឹម វាសនា បញ្ឈប់ការប្រមូលផ្ដុំ និងរំសាយការជួបជុំអ្នកគាំទ្ររបស់ខ្លួនដែលមិនមានការអនុញ្ញាតពីអាជ្ញាធរមូលដ្ឋានចាប់ពីថ្ងៃទី៣០ ខែសីហា ឆ្នាំ២០២២ នេះតទៅ។
យ៉ាងណាក៏ដោយ នៅថ្ងៃទី៣០ ខែសីហា ឆ្នាំ២០២២ នេះ គណបក្សសម្ព័ន្ធដើម្បីប្រជាធិបតេយ្យ បានចេញលិខិតបញ្ជាក់ថា កម្មវិធីជួបជុំសមាជិកគណបក្សស្ថិតក្នុងបរិវេណដីចម្ការនៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប នឹងបន្តប្រមូលផ្ដុំគ្នារហូតដល់ដំណាច់ខែកញ្ញា ក្រោយនេះ ព្រោះថាពួកគេបានជូនដំណឹងដល់មេឃុំត្បែងរួចរាល់អស់ហើយកាលពីថ្ងៃទី២៧ ខែសីហា កន្លងទៅនេះ។
ទោះជាបែបនេះក្តី នៅថ្ងៃទី៣០ ខែសីហា ឆ្នាំ២០២២ នេះ ក្រុមសមត្ថកិច្ចបានដាក់កម្លាំងតាមដងផ្លូវដែលមានចម្ងាយប្រមាណ ១គីឡូម៉ែត្រពីដីចម្ការរបស់លោក ខឹម វាសនា ដើម្បីហាមឃាត់អ្នកដែលមានបំណងចូលទៅដីចម្ការនោះ ប៉ុន្តែនៅថ្ងៃអង្គារនេះ ក៏មិនឃើញមានក្រុមអ្នកគាំទ្រលោក ខឹម វាសនា ធ្វើដំណើរចូលទៅដីចម្ការនោះដែរ ខណៈអ្នកដែលចាកចេញពីទីតាំងដីនោះមានចំនួនតិចតួចប៉ុណ្ណោះ។
អាជីវករដែលលក់ដូរនៅម្តុំដីចម្ការរបស់លោក ខឹម វាសនា បានប្រាប់សារព័ត៌មាន The Cambodia Daily នៅថ្ងៃទី៣០ ខែសីហា ឆ្នាំ២០២២ នេះថា ពួកគេបាននាំគ្នាចូលទៅលក់ផ្លែទុរេននៅទីនោះតាំងពីម៉ោង ៥ជិតភ្លឺនៅថ្ងៃអង្គារនេះ ប៉ុន្តែមិនឃើញសមាជិកបក្សជួងនាំគ្នាដើរចេញមកលើថ្នល់ដូចថ្ងៃមុននោះឡើយ ខណៈស្ថានភាពលើដងផ្លូវនៅថ្ងៃនេះមានភាពស្ងប់ស្ងាត់ជ្រងំ។
ប្រភពដដែលអះអាងថា ពួកគេមានតំណាងក្រុមចេញមកទិញអីវ៉ាន់ម្តងម្កាល ប៉ុន្តែអ្នកទាំងនោះមិននិយាយស្តីរកអ្នកណា ឬឆ្លើយសំណួររបស់អ្នកលក់ឡើយ។ ពួកគេគ្រាន់តែប្រាប់របស់ដែលខ្លួនចង់ទិញនោះតែប៉ុណ្ណោះ។ អ្នកស្រីបញ្ជាក់ថា អ្នកស្រីបានសួរថា តើមនុស្សទាំងអស់បាត់ទៅណា ប៉ុន្តែគ្មានការឆ្លើយតបពីពួកគេនោះទេ។
ការជួបជុំប្រមូលផ្ដុំពលរដ្ឋមកពីតាមបណ្តាខេត្តនានាដែលគាំទ្រលោក ខឹម វាសនា ដោយសារមានការបំផុសបំផុលពលរដ្ឋទាំងក្នុង និងក្រៅប្រទេសថា នឹងមានគ្រោះរញ្ជួយផែនដីកើតមានទឹកជំនន់ក្នុងពេលឆាប់ៗនេះ ហើយពលរដ្ឋត្រូវនាំគ្នាប្រញាប់រត់ទៅជ្រកកោននៅម្តុំដីចម្ការរបស់គាត់ដែលមានទំហំជាង ១២ហិកតារ នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ក្បែរជើងភ្នំគូលែន កាលពីថ្ងៃទី២៦ ខែសីហា ឆ្នាំ២០២២។
ការជួបជុំក្នុងចំនួនដ៏ច្រើនសន្ធឹកសន្ធាប់មិនធ្លាប់មានពីមុនមកនេះ នៅមិនទាន់មានការរំសាយនៅឡើយទេរហូតមកទល់ពេលនេះ ប៉ុន្តែពួកគេបែរជារត់ចូលទៅពួនសម្ងំនៅក្នុងព្រៃក្បែរជើងភ្នំគូលែនទៅវិញ។
នៅពេលប៉ុន្មាននាទីមុនការផ្សាយនេះបន្តិច លោក ខឹម វាសនា បានសរសេរនៅលើគណនីហ្វេសប៊ុករបស់លោកដោយប្រើពាក្យសម្ដីយ៉ាងអសុរោះ និងអសីលធម៌ជាខ្លាំងទៅលើក្រុមអ្នកគាំទ្ររបស់លោក សម រង្ស៊ី និងបានជេរប្រមាថលោក ហ៊ុន សែន ជាខ្លាំងផងដែរ។
ទោះជាបែបនេះក្តី នាយកអង្គភាពសារព័ត៌មានដើមអម្ពិលដែលស្និទ្ធនឹងបុរសខ្លាំង លោក ហ៊ុន សែន បានសរសេរនៅលើគណនីហ្វេសប៊ុករបស់លោកថា ប្រទេសខ្មែរមិនអនុញ្ញាតឱ្យនរណាម្នាក់បង្កើតតំបន់អបគមន៍ជាដាច់ខាត។ ដូច្នេះ ជនឆ្កួតលីលាទាំងឡាយណាដែលប៉ុនប៉ងបង្កើតចលាចល ឬអបគមន៍ ត្រូវតែបោសសម្អាត ទោះក្នុងរូបភាពណាក៏ដោយ៕