27 C
Phnom Penh

លោក ហ៊ុន ម៉ានី ប្រាប់​សមាជិក​បក្ស​នៅ​មូលដ្ឋាន​ត្រៀម​ខ្លួន​ជានិច្ច​ក្នុង​ការ​ទប់ស្កាត់​បដិវត្តន៍​ពណ៌

ដោយ ឌឹ ខេមបូឌា ដេលី

បទវិភាគ

កូនប្រុស​ពៅ​របស់​បុរស​ខ្លាំង​ក្រាញ​អំណាច​ត​ត្រកូល លោក ហ៊ុន សែន គឺ​លោក ហ៊ុន ម៉ានី ណែនាំ​ឱ្យ​សមាជិក​បក្ស​របស់​ខ្លួន​នៅ​មូលដ្ឋាន​ទាំងអស់ ត្រៀម​ខ្លួន​ជានិច្ច​ដើម្បី​ទប់ស្កាត់​គម្រោង​ការ​ធ្វើ​បដិវត្តន៍​ពណ៌​ណា​មួយ​ដែល​ប្រឆាំង​នឹង​ការ​ដឹកនាំ​របស់​ឪពុក​របស់​លោក​ឲ្យ​បាន​ជា​ដាច់ខាត។

កូនប្រុស​បង្កើត​របស់​លោក ហ៊ុន សែន ដែល​ចង់​បាន​តំណែង​ជា​នាយករដ្ឋមន្ត្រី លោក ហ៊ុន ម៉ានី បាន​ចេញ​មុខ​ការពារ​ឪពុក​របស់​ខ្លួន កាលពី​ថ្ងៃទី​១៨ ខែ​កញ្ញា ឆ្នាំ​២០២២ នៅ​ខេត្ត​បាត់ដំបង ក្នុង​ពិធី​សំណេះសំណាល​ជាមួយ​សមាជិក​គណបក្ស​នៅ​មូលដ្ឋាន​ថា សមាជិក​បក្ស​របស់​ខ្លួន​នៅ​មូលដ្ឋាន​ទាំងអស់​ត្រៀម​ខ្លួន​ជានិច្ច ដើម្បី​ទប់ស្កាត់​គម្រោង​ការ​ធ្វើ​បដិវត្តន៍​ពណ៌​ណា​មួយ​ដែល​ប្រឆាំង​នឹង​ការ​ដឹកនាំ​របស់​ឪពុក​របស់​លោក និង​ដើម្បី​ធានា​ឱ្យ​បាន​នូវ​សុខ​សន្តិភាព​យូរ​អង្វែង​ទៅ​ថ្ងៃ​អនាគត។

កូនប្រុស​របស់​មេដឹកនាំ​ដែល​ក្រាញ​អំណាច​រូប​នេះ អះអាង​ថា តម្លៃ​នៃ​សាមគ្គីភាព និង​ការ​ឯកភាព​ផ្ទៃក្នុង​របស់​បក្ស​កាន់​អំណាច​ដែល​ជា​ភាព​ខ្លាំង​របស់​ខ្លួន​បច្ចុប្បន្ន​នេះ គឺ​មិន​អាច​កាត់​ថ្លៃ​បាន​ឡើយ។

សកម្មជន​បក្ស​ប្រឆាំង លោក ហ៊ុន កុសល បាន​ប្រាប់​សារព័ត៌មាន The Cambodia Daily នៅ​ថ្ងៃទី​១៩ កញ្ញា នេះ​ថា ការ​ចេញ​មុខ​ការពារ​គណបក្ស​របស់​លោក ហ៊ុន ម៉ានី មិនមែន​ជា​រឿង​ចម្លែក​នោះ​ទេ ប៉ុន្តែ​ការ​ចេញ​មុខ​ការពារ​គណបក្ស​របស់​ក្រុម​ណា​មួយ​ជ្រុល​ហួសហេតុ​ពេក ក៏​បង្ហាញ​ឱ្យ​ឃើញ​ផង​ដែរ​ថា គណបក្ស​កាន់​អំណាច​អាច​នឹង​លែង​ជា​កម្មសិទ្ធិ​របស់​សមាជិក​បក្ស​ទាំងនោះ​បន្ត​ទៀត​ហើយ ប៉ុន្តែ​នឹង​ក្លាយ​ជា​កម្មសិទ្ធិ​របស់​បុគ្គល ឬ​គ្រួសារ​មួយ​ក្តាប់​តូច​ទៅវិញ​ប៉ុណ្ណោះ។

លោក ហ៊ុន កុសល បញ្ជាក់​ថា ការ​ចេញ​មុខ​អះអាង​ថា គណបក្ស​របស់​ខ្លួន​មិន​បែកបាក់​ផ្ទៃក្នុង ខណៈ​ក្រុម​ដទៃ​ទៀត​ដែល​ជា​សមាជិក​ជាន់ខ្ពស់​ផ្ទៃក្នុង​របស់​ខ្លួន​នៅតែ​បន្ត​ភាព​ស្ងៀមស្ងាត់​នោះ ក៏​ជា​ការ​បង្ហាញ​ឱ្យ​ឃើញ​ផង​ដែរ​ថា ស្ថានភាព​ផ្ទៃក្នុង​បក្ស​របស់​ខ្លួន​កំពុង​មាន​បញ្ហា​យ៉ាង​ពិតប្រាកដ។

ចំណែក​ប្រធាន​វេទិកា​ពលរដ្ឋ លោក គឹម សុខ ធ្លាប់​បាន​អះអាង​កាលពី​ពេល​ថ្មីៗ​នេះ​ថា មាន​លក្ខខណ្ឌ​ពីរ​ដែល​បង្ហាញ​ថា ផ្ទៃក្នុង​បក្ស​កាន់​អំណាច​កំពុង​បែកបាក់​ធ្ងន់ធ្ងរ គឺ​ទី​១ អង្គភាព​កង​អង្គរក្ស​របស់​លោក ហ៊ុន សែន ដែល​ក្រុម​ផ្សេង​នៃ​ផ្ទៃក្នុង​របស់​ខ្លួន​បាន​ទាមទារ​ឲ្យ​កាត់បន្ថយ​យ៉ាង​ច្រើន​នៅ​ត្រឹម ២០០​នាក់​នោះ ក៏​ត្រូវ​លោក ហ៊ុន សែន ចោទ​ថា​ជា​ការ​ប៉ុនប៉ង​ផ្តួល​រំលំ​អំណាច និង​ធ្វើ​ឃាត​គាត់​ទៅវិញ។

លោក​បន្ត​ថា ការ​លើកឡើង​របស់​លោក ហ៊ុន សែន បែប​នេះ គឺជា​ការ​ទម្លាយ​ការពិត​ចេញ​មក​ខាង​ក្រៅ​ថា អំណាច​ទំនើងចិត្ត​ដែល​បាន​មកពី​ការ​ប្លន់​ផ្ទៃក្នុង​បក្ស​របស់​ខ្លួន ដែល​នឹង​ផ្ទេរ​បន្ត​ទៅ​ឱ្យ​លោក ហ៊ុន ម៉ាណែត គ្មាន​ការ​គាំទ្រ​ពី​កងកម្លាំង​ប្រដាប់​អាវុធ​នោះ​ទេ គឺ​មាន​ត្រឹមតែ​កងកម្លាំង​អង្គរក្ស​ផ្ទាល់ខ្លួន​របស់​ក្រុម​គ្រួសារ​គាត់​ប៉ុណ្ណោះ។

លោក គឹម សុខ បញ្ជាក់​ថា ចំណែក​លក្ខខណ្ឌ​ទី​២ គឺ​ក្រុម​ផ្សេង​ដែល​ជា​មន្ត្រី​ជាន់ខ្ពស់​បក្ស​កាន់​អំណាច​ដែរ​នោះ ក៏​កំពុងតែ​តស៊ូ​យ៉ាង​ខ្លាំង​ទាមទារ​ឲ្យ​កាត់បន្ថយ​នូវ​អំណាច​នៃ​ការ​បញ្ជា​របស់​នាយករដ្ឋមន្ត្រី​លើ​កង​ប្រដាប់​អាវុធ​ដែរ​នោះ ក៏​ត្រូវ​លោក ហ៊ុន សែន បង្ហាញ​ការ​ខឹងសម្បា​ជា​ចំហ ដោយ​បញ្ជាក់​ជា​លក្ខខណ្ឌ​ដាច់​ណាត់​ទៅ​កាន់​ក្រុម​នោះ​ពី​ការ​ហាមឃាត់​ពួកគេ​មិន​ឱ្យ​បញ្ជា​កម្លាំង​ប្រដាប់​អាវុធ​ក្រៅពី​នាយករដ្ឋមន្ត្រី​ថែម​ទៀត។

កាលពី​ថ្ងៃទី​១៣ ខែ​កញ្ញា ឆ្នាំ​២០២២ បុរស​ខ្លាំង​ក្រាញ​អំណាច​ទំនើងចិត្ត លោក ហ៊ុន សែន គំរាម​ថា ក្នុង​អំឡុង​ពេល​ដែល​លោក​កំពុង​នៅ​ក្នុង​តំណែង​ជា​នាយករដ្ឋមន្ត្រី លោក​នឹង​មិន​ឱ្យ​នរណា​ម្នាក់​ធ្វើ​រដ្ឋប្រហារ​ផ្តួល​រំលំ​លោក​ជាដាច់ខាត ហើយ​កងកម្លាំង​ប្រដាប់​អាវុធ​ទាំងអស់​ត្រូវតែ​មាន​តួនាទី​ការពារ​នាយករដ្ឋមន្ត្រី​ដោយ​ឥត​ងាករេ។ ក្នុង​ន័យ​នេះ កងកម្លាំង​ប្រដាប់​អាវុធ​ទាំងនោះ​មិន​ត្រូវ​បាន​បញ្ជា​ដោយ​អ្នក​ណា​ផ្សេង​ក្រៅពី​រូបលោក​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស