មន្ត្រីជាន់ខ្ពស់របស់រដ្ឋាភិបាល លើកឡើងថា ដើម្បីកែប្រែកម្ពុជាទៅជាសួនច្បារសម្រាប់ពិភពលោកទៅថ្ងៃអនាគតពិតប្រាកដ រដ្ឋាភិបាលត្រូវតែផ្ដល់ជំនាញដល់យុវជន ដើម្បីឲ្យពួកគេធ្វើម្ចាស់លើការងារក្នុងស្រុក ឬទៅក្រៅស្រុកដោយមានជំនាញពិតប្រាកដ។
ប្រធានរាជបណ្ឌិត្យសភាកម្ពុជា បណ្ឌិត សុខ ទូច បានសរសេរលើគណនីហ្វេសប៊ុករបស់លោកកាលពីថ្ងៃទី៦ ខែវិច្ឆិកា ថា កម្ពុជាត្រូវតែបង្ហាញពីអ្វីដែលខ្លួនមាន និងឱ្យតម្លៃលើជាតិរបស់ខ្លួនឱ្យអស់លទ្ធភាព មុននឹងទទួលយករបស់ពីបរទេស ក្នុងនោះកម្ពុជាត្រូវតែបង្កើនផលិតផលក្នុងស្រុកឱ្យអស់លទ្ធភាព ដើម្បីកេរ្តិ៍ឈ្មោះរបស់ខ្លួនលើឆាកអន្តរជាតិ។
បណ្ឌិត សុខ ទូច លើកឡើងថា ដើម្បីឱ្យកម្ពុជាប្រែទៅជាប្រទេសមួយដែលពិភពលោកទទួលស្គាល់ថាជាសួនច្បាររបស់ពួកគេពិតប្រាកដ រដ្ឋាភិបាលត្រូវតែផ្ដល់ជំនាញដល់យុវជន ដើម្បីអាចឲ្យពួកគេធ្វើម្ចាស់លើការងារក្នុងស្រុក ឬទៅក្រៅស្រុកដោយមានជំនាញពិតប្រាកដ ដើម្បីជំរុញឱ្យពួកគេស្រឡាញ់ការងាររបស់ខ្លួន និងទទួលខុសត្រូវនូវអ្វីដែលពួកគេកំពុងអនុវត្ត។
ប្រធានរាជបណ្ឌិត្យសភាកម្ពុជារូបនេះបញ្ជាក់ថា ភាពអស្ចារ្យរបស់កម្ពុជា គឺកូនខ្មែរត្រូវអានប្រវត្តិសាស្ត្ររបស់ខ្លួនឱ្យមានការយល់ដឹងគ្រប់ៗគ្នា ហើយការងារទាំងអស់ដែលកូនខ្មែរបានធ្វើ ត្រូវចងក្រងជាឯកសារសម្រាប់អ្នកបន្តវេនទៅថ្ងៃក្រោយគ្រប់ៗជំនាន់។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី៧ វិច្ឆិកា នេះថា ការលើកឡើងរបស់បណ្ឌិត សុខ ទូច គឺជាគំនិតវិជ្ជមាន និងត្រឹមត្រូវ ប៉ុន្តែបើកម្ពុជានៅតែស្ថិតក្នុងស្ថានភាពនយោបាយដូចបច្ចុប្បន្ននេះ នោះគំនិតបែបនេះគ្រាន់តែបង្ហាញពីការចង់បានរបស់គាត់ប៉ុណ្ណោះ ប៉ុន្តែមិនអាចអនុវត្តទៅរួចឡើយ ត្បិតរដ្ឋាភិបាលកម្ពុជាដែលកំពុងដឹកនាំដោយឯកបក្សដូចដែលគេឃើញជាក់ស្តែងសព្វថ្ងៃនេះ មិនអាចដឹកនាំកម្ពុជាទៅដល់ដំណាក់កាលដូចបណ្ឌិត សុខ ទូច បានលើកឡើងនោះជាដាច់ខាត។
លោក សេក សុជាតិ លើកឡើងថា ដើម្បីឲ្យកម្ពុជាដើរដល់ដំណាក់កាលដែលក្លាយទៅជាសួនច្បារសម្រាប់ពិភពលោក ទាល់តែរដ្ឋាភិបាលបើកទូលាយទាំងសិទ្ធិសេរីភាពបញ្ចេញមតិ បើកសេរីភាពអ្នកនយោបាយ ដូចជាលោក កឹម សុខា និងដោះលែងអ្នកទោសមនសិការទាំងអស់ ដើម្បីឲ្យពួកគេមានសិទ្ធិពេញលេញក្នុងការចូលរួមជួយសង្គមជាតិដោយពិតប្រាកដ នោះទើបអាចធានានូវការអភិវឌ្ឍមួយនៅកម្ពុជាក្នុងកម្រិតខ្ពស់ ដែលពិភពលោកស្ងើចសរសើរទៅថ្ងៃអនាគត។
អ្នកស្រាវជ្រាវអំពីការអភិវឌ្ឍសង្គមរូបនេះបញ្ជាក់ថា បើអ្នកក្តោបក្តាប់អំណាចនៅតែប្រកាន់ឥរិយាបថនយោបាយដែលធ្វើឲ្យបែកបាក់ផ្ទៃក្នុងជាតិដូចសព្វថ្ងៃនេះ កុំថាឡើយដល់ទៅធ្វើជាសួនច្បារពិភពលោក សូម្បីចង់ធ្វើខ្លួនរួចផុតពីប្រទេសដែលជាប់ក្នុងបញ្ជីប្រផេះនៃការលាងលុយកខ្វក់ និងជាទីតាំងប្រព្រឹត្តអំពើជួញដូរមនុស្ស ក៏ប្រហែលជាមិនអាចទៅរួចដែរ ព្រោះថាការដឹកនាំបែបកើតជំងឺតួឯកដូចគណបក្សកាន់អំណាចដឹកនាំបច្ចុប្បន្ននេះ ងាយនឹងមានជំងឺសង្គមខ្លាំងណាស់ ដូចជាជំងឺពុករលួយ និងជំងឺឈ្លោះបែកបាក់ផ្ទៃក្នុងជាតិ ជាដើម ដែលជាមូលហេតុមិនអាចឲ្យកម្ពុជារីកលូតលាស់ទៅមុខបាន។
ក្រុមអ្នកឃ្លាំមើលសង្គមលើកឡើងថា កម្ពុជាក្រោមការដឹកនាំរបស់រដ្ឋាភិបាលឯកបក្សដែលដឹកនាំតាមរបៀបកុម្មុយនីស្តផ្ដាច់ការសព្វថ្ងៃនេះ មិនអាចសម្លឹងឃើញភាពស្រស់បំព្រង និងភាពអស្ចារ្យឱ្យពិភពលោកទទួលស្គាល់កើតនោះទេ ក្រៅតែពីការទាមទារឱ្យស្ដារលទ្ធិប្រជាធិបតេយ្យ គោរពសិទ្ធិមនុស្ស និងជាប្រទេសដែលត្រូវស្ថិតក្នុងបញ្ជីតាមដានកម្រិតខ្ពស់ពីការលាងលុយកខ្វក់ និងការប្រព្រឹត្តអំពើជួញដូរមនុស្សប៉ុណ្ណោះ៕