សហរដ្ឋអាមេរិក គឺជាប្រទេសថ្មីចុងក្រោយគេដែលចាប់ផ្ដើមអនុវត្តការធ្វើតេស្ដកូវីដលើអ្នកដំណើរដែលមកពីប្រទេសចិន បន្ទាប់ពីប្រទេសចិនដ៏ធំនេះត្រូវបានសារព័ត៌មានបស្ចិមប្រទេសទម្លាយឱ្យដឹងថា តំបន់ខ្លះមនុស្សឆ្លងកូវីដមានពី ១លាននាក់ឡើងទៅ ហើយគិតត្រឹមថ្ងៃទី២៨ ធ្នូ រយៈពេល ២៨ថ្ងៃក្នុងខែនេះ ប្រជាជនចិនជិត ២៦០លាននាក់បានឆ្លងកូវីដ ខណៈមន្ទីរពេទ្យនៅក្រុងប៉េកាំងពោរពេញដោយអ្នកជំងឺកូវីដ។
បណ្ដាញផ្សាយព័ត៌មាន BBC ចុះផ្សាយថា ប្រទេសដែលចាប់ផ្ដើមធ្វើតេស្តអ្នកដំណើរមកពីចិនមុនគេ គឺប្រទេសជប៉ុន ឥណ្ឌា ម៉ាឡេស៊ី កោះតៃវ៉ាន់ អ៊ីតាលី ខណៈអង់គ្លេស និងអូស្ត្រាលី ក៏ចាប់ពិនិត្យពលរដ្ឋចិនចូលប្រទេសពួកគេដែរ។ បន្ទាប់ពីបិទពិភពលោករយៈពេល ៣ឆ្នាំ រដ្ឋាភិបាលចិនអួតអាងថាខ្លួនកំពុងឈ្នះសង្គ្រាមរាតត្បាតនៃជំងឺកូវីដ។ ប្រទេសនេះបានបើកឱ្យប្រជាជនរបស់ខ្លួនចេញពីប្រទេសដោយសេរី ទោះជាទៅប្រទេសណាក៏បាន ហើយអួតអាងថាប្រជាជនរបស់ខ្លួនភាគច្រើនបំផុតបានចាក់វ៉ាក់សាំងសឹងតែទាំងអស់ទៅហើយ។ តែពេលនេះ ពិភពលោកត្រៀមប្រកាសអាសន្នថាចិនកំពុងតែជាប្រភពនៃការឆ្លងជំងឺកូវីដជាថ្មីម្ដងទៀតហើយ។
វិធានការធ្វើតេស្ដលើអ្នកដំណើរមកពីប្រទេសចិន ធ្វើឡើងបន្ទាប់ពីប្រទេសជប៉ុន ឥណ្ឌា និងម៉ាឡេស៊ី បានប្រកាសថា អ្នកធ្វើដំណើរមកពីប្រទេសចិនកំពុងតែក្លាយជាមុខសញ្ញាបារម្ភពីការនាំកូវីដចូលប្រទេសរបស់ពួកគេ ព្រោះចុងក្រោយនេះការកើនឡើងនូវអត្រាឆ្លងជំងឺកូវីដ-១៩នៅក្នុងប្រទេសចិន ហក់ឡើងខ្លាំង។
ប្រទេសជប៉ុនបានបញ្ជាក់ថា ខ្លួននឹងតម្រូវឱ្យអ្នកធ្វើដំណើរមកពីប្រទេសចិន បង្ហាញតេស្ដអវិជ្ជមានចំពោះជំងឺកូវីដ-១៩ នៅពេលធ្វើដំណើរមកដល់។ ចំណែកឯប្រទេសម៉ាឡេស៊ីវិញ បានដាក់វិធានការតាមដានដិតដល់បន្ថែមទៀតទៅលើអ្នកដំណើរមកពីចិន ដោយតាមតាំងពីការធ្វើដំណើររបស់ពួកគេ និងពួកគេមានការទំនាក់ទំនងនឹងមនុស្សណាខ្លះ។
មជ្ឈមណ្ឌលត្រួតពិនិត្យ និងបង្ការជំងឺនៃសហរដ្ឋអាមេរិក បានប្រកាសថា ពិភពលោកចាំបាច់ត្រូវជួយទប់ស្កាត់ការរីករាលដាលជំងឺឆ្លងនេះពីប្រទេសចិន។
ពួកក្រុមមន្ត្រីរបស់នៃមជ្ឈមណ្ឌលនេះបង្ហាញក្ដីបារម្ភអំពីការកើនឡើងនៅក្នុងសហគមន៍អន្តរជាតិ ទាក់ទិននឹងករណីកើនឡើងជាបន្តនៃអត្រាឆ្លងជំងឺកូវីដ-១៩ នៅក្នុងប្រទេសចិន និងកង្វះទិន្នន័យប្រកបដោយតម្លាភាព ដែលក្នុងនោះរួមមានទាំងទិន្នន័យនៃដំណើរការកំណត់ការកកើតវីរុសដែលប្រទេសចិនកំពុងលាក់ការណ៍។
មន្ត្រីមន្ទីរពេទ្យ និងកន្លែងរៀបចំពិធីបុណ្យសពខ្លះនៅក្នុងប្រទេសចិន ថាមានសភាពច្រើនលើសលប់ហួសសមត្ថភាព ស្របពេលដែលវីរុសជំងឺកូវីដ-១៩ បានឆ្លងរាលដាលភាគច្រើនដោយគ្មានការត្រួតពិនិត្យនៅទូទាំងប្រទេសចិន ដែលមានប្រជាជនសរុបចំនួន ១៤០០លាននាក់។
ទោះជាយ៉ាងនេះក្ដី អាជ្ញាធរចិនបង្ហាញស្ថិតិផ្លូវការថាមានករណីស្លាប់ដោយសារជំងឺកូវីដ-១៩តែមួយករណីប៉ុណ្ណោះនៅក្នុងរយៈពេល ៧ថ្ងៃគិតត្រឹមថ្ងៃចន្ទមកដល់ថ្ងៃនេះ ដែលនេះបណ្ដាលឱ្យមានការសង្ស័យក្នុងចំណោមអ្នកជំនាញផ្នែកសុខាភិបាល និងពលរដ្ឋអំពីទិន្នន័យរបស់រដ្ឋាភិបាលចិនដែលគេថាគឺជាការលាក់ការពិត។
ទីភ្នាក់ងារសារព័ត៌មាន AFP បានចុះទៅមន្ទីរពេទ្យមួយនៅក្រុងប៉េកាំង កាលពីសប្ដាហ៍មុន ដោយបានជួបសាច់ញាតិគ្រួសារសាកសពដែលពួកគេសុំមិនបញ្ចេញឈ្មោះ ដោយដែលបានឱ្យដឹងថា អំឡុង ២ម៉ោង អ្នកជំងឺស្លាប់ដល់ទៅ ៤០នាក់នៅក្នុងមន្ទីរពេទ្យនោះ។ អ្នករាយការណ៍ព័ត៌មានរបស់ AFP បានឃើញសាកសពត្រូវគេរុំនឹងក្រណាត់កៅស៊ូរាប់សិបនាក់ មុននឹងដឹកយកទៅបញ្ចុះ។
អ្នកជំនាញព្រមានថា ពលរដ្ឋចិនដែលកំពុងឆ្លងជំងឺកូវីដ ពួកគេភាគច្រើនមានអាយុចាប់ពី ៦៥ឆ្នាំឡើងទៅ ហើយអ្នកស្លាប់ភាគច្រើនចាប់ពី ៧០ឆ្នាំឡើងទៅ។ អ្នកជំនាញព្រមានថានៅឆ្នាំ២០២៣ បើចិនទប់ស្កាត់មិនទាន់ទេ អ្នកជំងឺអាចនឹងស្លាប់ដល់ទៅ ២លាននាក់។ ចិនប្រកាន់គោលនយោបាយមួយមិនសូវជួយរក្សាសុខភាពសម្រាប់មនុស្សវ័យចាស់ជរានោះទេ។ ក្រុមមនុស្សប្រភេទនេះមិនទទួលបានវ៉ាក់សាំងចាក់គ្រប់គ្រាន់នោះទេ។ អ្នកខ្លះចាក់បានមួយដូស និងអ្នកខ្លះពុំបានចាក់តែម្ដង។
រដ្ឋាភិបាលចិនបានបញ្ជាក់កាលពីថ្ងៃចន្ទថា ខ្លួននឹងឈប់តម្រូវឱ្យអ្នកធ្វើដំណើរចូលមកប្រទេសចិន ធ្វើចត្តាឡីស័ក ដែលនឹងចាប់ផ្ដើមពីថ្ងៃទី៨ ខែមករា ខាងមុខនេះតទៅ ដែលនេះគឺជាជំហានដ៏ធំមួយឆ្ពោះទៅការបន្ធូរបន្ថយការត្រួតពិនិត្យនៅតាមព្រំដែនរបស់ខ្លួន ដែលភាគច្រើនត្រូវបានបិទតាំងពីឆ្នាំ២០២០។
អគ្គលេខាធិការអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយថា ចំនួននៃការស្លាប់ដោយសារជំងឺកូវីដ-១៩ ដែលត្រូវបានរាយការណ៍ប្រចាំសប្ដាហ៍បានធ្លាក់ចុះជិត ៩០% នៅទូទាំងពិភពលោកចាប់តាំងពីពេលដែលមានអត្រាឆ្លងខ្ពស់បំផុតនៃជំងឺនេះកាលពីចុងខែមករា កន្លងទៅនេះ។
លោក Tedros Adhanom Ghebreyesus ដែលចូលរួមក្នុងសន្និសីទព័ត៌មានស្ដីពីបញ្ហាសុខភាពសកលលោក រួមទាំងជំងឺកូវីដ-១៩ នៅទីក្រុងហ្សឺណែវ ប្រទេសស្វីស កាលពីពេលថ្មីៗនេះបានថ្លែងថា លោកបន្តអំពាវនាវឱ្យប្រទេសចិនចែករំលែកទិន្នន័យ និងធ្វើការសិក្សាស្រាវជ្រាវលើអ្វីដែល WHO បានស្នើឡើង និងនៅតែបន្តស្នើឡើង ដែលលោកបាននិយាយជាច្រើនដងរួចមកហើយសម្មតិកម្មទាំងអស់អំពីប្រភពនៃជំងឺរាតត្បាតនេះ គឺមាននៅប្រទេសចិន។
លោកទាមទារឱ្យចិន បង្ហាញតួលេខពិតប្រាកដអំពីអ្នកឆ្លង និងកំពុងសម្រាកនៅមន្ទីរពេទ្យ និងអ្នកស្លាប់។
ដោយឡែកសហភាពអឺរ៉ុបប្រកាសថា នៅថ្ងៃព្រហស្បតិ៍នេះគណៈកម្មាធិការជំនាញសុខភាពនឹងបើកកិច្ចប្រជុំពិនិត្យ និងវាយតម្លៃជាក់ស្ដែងអំពីស្ថានភាពជំងឺកូវីដ កំពុងឆ្លងរាលដាលនៅប្រទេសចិន ហើយព្រមានថាសហភាពអឺរ៉ុបទាំងមូលនឹងធ្វើតេស្ដពលរដ្ឋដែលមកពីប្រទេសចិន៕